THINLUNG KHAWNGAIHTHLAL-7

 

THINLUNG KHAWNGAIHTHLAK

CHAPTER 7

Ririni Khiangte Abbra Pitartei




U Mapuia phone bawk chu a lo ri zawm leh zat a. Lungawi lo tih hriat lutukin a rum zui hrawih bawk. Rang zetin ka hmai hupna chu ka la sawn a, u Mapuia pawn a thil tih lai chawlin mitmeng thim khup, tisa chakna meipui alh hluah hluah vanga lang lum huamin min en let run a.


"Thil pawimawh a awm aniang chhang rawh," aw tham deuh țiak in ka ti a. Ti buai tu a lo awm leh bawk nen kan awm dan chu ka zak thar thut a.



"Hun lo lutuk," a rawn ti hriam hruih a, a aw thum zet chu a khur ru hluk bawk.


"Va chhang rawh," ti leh pahin rang deuhin ka lo inpawt țha nghal zung zung si a, u Mapuia lungawilo chu a rum deuh ngul ngul a. Mahse, ka mit meng nen lam țang kawpa ngenngawl taka ka melh takah chuan hreh hmel zetin a in la hrang a, puan sin chuan min lo khuh zui zat bawk.


"Practical class ka la pe zo hauh lo che ania," tih nghut pahin ka chal a lo fawp tawk a, khur ru hluk chunga thawk a lak hawk hnu ah a inbeng kang a, min nuih zui suk bawk.




A phone awmna lam pana a kal zui vut chu thawk lak la pangngai lo tak chungin ka en reng a. Kan boruak țang ut kha a reh tawh avangin ka thisen vawt rawih rawih chu ka hre thei hial a.




Phone screen a bih rualin u Mapuia hmel chu a lang chang zual sauh a. Thaw huai chungin min lo en leh a, phone chu a chhang zui bawk, "eng nge ni ta Pastor Cham," a ti chang rut a.



Cecilia-i pasal a ni tih ka lo hrethiam ve nghal mai bawk. Pastor thil lo sawi chu ngaithlain u Mapuia chu a ngawi zui vung vung a.



Ka awmdan chu ka lo insiam țha ve sawk sawk a. Lehkhbu chu la in ka mutna lamah ka tawlh phei nghal a. Khum lu ngheng a țhuin puan chuan ka inkhuh țha sauh sauh a. U Mapuia chu ngaihven zui lo ang deuh a langin lehkhabu chu ka keu kual a.



"A va zialo țhin ve aw," a ti hniam ruih a.

"Min hrethiam la, ka lo kal lo mai ang e," a ti khawng zui ut bawk. A aw chu a mar vut si a pastor chu ka lo vengthawng deuh.



Rei inbe zui lovin phone chu an ti tawp a. A awmna ngaia phone a dah leh pah chuan a thaw chhuak leh ham ham a.




Khum lam pana a lo let leh chuan, "I u Cecilia-i'n buaina a siam leh deuh a nih chu," a rawn ti kher a. Ka melh rum viau nangin ani erawh za lo tih hriat zetin a lo țhen suk thung.





Khum ah chuan a lo lawn ve leh a, ka rilru hriat tum ni awm takin a nui zui ruh ruh a. Kan thil tih lai mek kha a chhunzawm leh duh dawn hian ka hria a.


"Eng nge a lo sawi a," ti vat pahin lehkhabu chu ka kuah bet nghal zat bawk. U Mapuia chu a nui ta huk huk a.



"Min zawt lo la chu zirtirna kha kan han țan leh tur ania.." nghal fe maiin a rawn ti a, ka lai lutuk chu ka sa chhuak vek ni maiin ka hria. Mahse, țha te te in u Mapuia chuan, "min hmu duh a nih hmel," a ti ta nghut. A hmel chu ka en chik viau a, danglam erawh ka hmu lo.



"A pasal khan a lo hrilh che ami?" ka ti ve leh hram.


"Yeap," ngaihpawimawh loh hmel taka tiin puan chu a sin a, ka lamah a lo tawlh hnai nghal a.


Meme-i'n engkim min hrilh lawk tawh avangin mak ka ti hran lo. Mahse, Pastor Chama tan khan a tha nat thlak duh ngawt ang.




"Engtin chiah nge buaina chu a siam a," ka ti leh zel a. Cecilia-i chet țhin dan dik tak chu hriatchian ve vek ka duh.



"Min hmuh duh thu a sawi țhin, chu chu a ni deuh mai," ka kawnga ban lo suih bet pahin a ti dut a. Ka dul zawn ah hmai a lo phum a, thawk a la zui ham ham bawk.



"An lo koh chang che in i kal mai zel ami?" dil chhut tak bawk a ka han tih leh chuan a lo nui nghawr dawt a, "kal mai zel bik lo e," a lo ti muang ruih bawk.



"I kal loh ngawt chuan buaina lian zawk a chhuak palh mai lo ang maw? A pasal meuhin zah pawh dawn lovin a lo bia che a ni si a," ka ti melh melh a. Boruak a thunun theih loh vangin a tawp khawk ah u Mapuia hi a lo bia a nih ka ring a. Ani a va in lan miah siloh chuan u Cecilia-i zawkin a lo pan duh mai te chu ka ring deuh bawk.


"Kan buaina tur a nih loh chu," a lo ti nghut a, thaw halhin a dar hrawl zet ah chuan ka beng deuh dat a.


U Mapuia chuan, "An nupa inkar chu an mahni ngeiin an chingfel tur a ni. A hma chuan nupui ka la nei ve lo a, kan in țhian țhatna kha ka zah bawk, chuvang takin an nupa a an mualpho mai loh nan kan inrawlh phah fo a. Tunah chuan ka nei tawh che a. Nang nen a kan inkar chiah hi ka ngaihtuah chu a ni, nupa an ni a inchingfel ve rawh se," a lo ti duah a.



Lo hawi chhuakin amah bawk chuan uangthuang tak ang a lang si hian, "a reng reng thuah, i pasal hi zanlai tawh ah lehnghal hmeichhe dang buaipui tura a chhuah daih chu pawi i ti lo em ni?" a lo ti leh a. Min fiam angin a lang nangin a mitmeng ah chuan tawrhna ni awm tak ka hmu thei a.



"Chutiang pawh a nilo," ka ti ta ringawt a. A mit a melh let ngam lova ka hawi sawn daih chu a lo hrethiam ve tho aniang, "Lo mu tawh la, ka lo kuah ang che," dam thlup hian a lo ti leh daih a.



Amah chu ka en leh thuai a, a mitmeng thuk ruih ah chuan 'hrethiamtu' hi ka hmu thiam a.




"Aih, hei hi ka chhiar dawn," lehkhabu lek zauh chunga ka han ti let chu phurna nasa lutukin a mitmeng thim ruih chu a lo chim de sawr sawr a. Mi â nileng a ni bik lo a. Nupa chinchang hriat zau nan a inchhiar zau tum ka ni tih pawh ka sawi kher ngailoin a hrethiam a. A hrethiam mah mah chuan min ti lai chhe zo leh țep zawk.




Lo inbeng kangin a kut phah lian zet chuan ka biang a lo khuap a, koham lutukin hian min fawp nghal ngawr ngawr a, ka chhan let ve phei chuan a duhthawh zual sauh a, duhtawk nachang a hre tawh lo mai dawn emaw ka tih hnu ah rum hawk a ka hmui hnuai petin a tawp thei ta hram a.



"Min ti phur khawp mai, ka nupui" a lo ti chhuak hrawih a, lai zetin ka lo nui ve a, "i duh tawkin han inchhiar teh, i zir chhuahte erawh i pasal laka lanchhuah tir turin ka phut thung che a nia," a ti leh hram bawk.



A awm hran hmain phurna a khat a mitmeng de suar suar mai chuan hnai setsawt in min en leh vung vung a. Ka lai leh tihngaihna hrelo in a hmai chu ka chul sak deuh ringawt a, min thlakhlel hmel zet hian a biangin ka kut chu a lo nul let ve a, "zanin chu lo muhil hmasa mai rawh," ka ti fiam zui a. Lungawi hmel tak hian a kiai suk suk mai.




Ka dul zawna hmai phumin u Mapuia chu a muhil suk suk tawh a. Duh aiin a tlai tawh tih hre mah ila 'phur taka phalna min pe tu avang tal pawn ka inchhiar zau ngei ngei tur a ni' ti rilru chungin ka chhiar ta zel a.




Ka inchhiar thui thui tulh a, ka chhiar hmaa ka beisei lawk ang eng thil mah ka hmu lo. Kan nupa dinhmun nen a inanna tam tak nei, induhna leh inngaihzawnna awm hmasa lova innei ta te chanchin a ni a. Ka chhiar thui poh leh ka chiai a. A tir ațanga induhna nei lo ve ve an ni a. A changtunu lahin kei ang bawkin pasal neih chu duh lovin a pasal tur chu a haw em em a. A mipa zawk lahin ngaihzawng nghet a nei tum hrang bawk. An inneih hnu pawhin a ngaihzawng chu thlah lovin a kawp zui zel a. Chutah tak chuan ka rilru a buai chho ta hle a.




A duh zawng ni miah lo pasal a nei niin ka hre si a. Mahse, a pasal zun ah chuan a uai nghal a, a inpum pek thuai a, a pasal leh a bialnu te inthlah hleih theih loh avangin a rilru a na ta fo bawk a. Changtupa lahin a hmangaih ve miau loh avangin țawngkam na tak tak a țawngkhumin a nupui dik tak anga a en theih ngailoh tur thu a hrilh fo bawk si a. Changtunu chuan hmangaih a intive tlat tawh bawk a. A pasal leh a hmei te chet dan vanga na em em siin a pasal rilru hneh tumin țan a la a, thawnthu tawp dawn lamah changtupa pawhin a hmei chu thlah felin changtunu chu a hmangaih ve thei ta a. Ka chhiar zawh meuh chuan changtunu chu a ziak sihhnip hle hian ka hria a. Changtupa khawsak khum dan zawng zawng ngaihtuah phei chuan a ziaktu chu hmeichhia te ngeinep thei tak mipa, mipa dinhmun dah chungnung tlat țhin mi a nih ka ring ta hial a.


A ziaktu hi hmeichhia nge Mipa tih chu ka hrechiang chak ta tlat a.



Hetiang khawpa hmeichhia te dinhmun dah hniamna thawnthu chu hmeichhe ziak a niin ka ring lo ve tawp. Thawnthu hming leh a ziaktu chu internet ah ka browser a, ka beisei loh zetin a ziaktu chu hmeichhia a lo ni mauh mai. A lehkhabu lah chu copy maktaduai tel teh meuh an hralh chhuak tawh bawk. Mak tih vangin ka nui tawi tak tak khawp mai.



Hetiang hi a ni maw, 'love story' ti a khawvel mipui maktaduai tel teh meuh te'n a an lo romanticise luaih luaih chu. Hmangaihna hi a awmzia ka la hrechiang ve miah loh nangin hmangaihna ni tur a ka rin dan țhin nen chuan a inletling thawk a. Mahse, ka hmeichhiatpui maktaduai tel teh meuh te'n chutiang thawnthu kal phung chu hmangaihna thawnthu an ti miau si a. Hmangaihna ni tur a ka lo rin ve te kha a lo dik lo hle a nih chu ka ring ta rum rum mai.



Ka kawng a lo kuah tu ban hrawl zet chu amah tih harh hlau takin ka chawi kang a, ka mu zangthal fel chiah chu amah zawkin min zawng leh nghal a, ka kawngah a lo kuah sauh sauh a.



Ka ti harh ta mai amaw tiin ka ngaichang deuh vang vang a. Mahse, a harh zui lo a nih hmel.




Ka mut dan chu siam remin uluk takin dim light eng hnuaia a hmel lang thim khup chu ka thlir veng veng a.


''i mumang a nuam hle a ni maw u Mapui" zawite hian ka ti a. Ka zawhna atthlak zet avang chuan ka nui zui sak bawk.



Thil tam tak ngaihtuah zui chungin ka chhing ve ta riai riai a. Hmangaihna hi engtin nge a lo pian le.




Kut hrawl zetin ka kawr chhung lo zen lut a ka awm bawr a lo chul kual vel na chuan min ti harh a. Ka harh tih a hriat rual chuan a hmuiin ka dar a lo nul zui dun dun bawk.




Mut la kham lo lutuk hian ka meng chhuak a, a kiu a inbengkang meuhin hmuhnawm tih hmel deuh hian min lo thlir reng a," ka mut a la chhuak lutuk," zawite a ti sep in ka maimitchhing leh nghal a.


"I mut kham lo hmel pawh a țha tho a nih hi," ti nghutin ka chalah a rawn fawp vang vang a, tawite hian ka nuih let seih a. Zing dar 4 pelh tawh a ka mu ve chiah a, ka meng hlei thei thlawt lo.




"A tlai tawh em?" ka ti a dar zat min lo hrilh chuan ham zui hak pahin ka zimar zui țalh ţalh bawk. "Ka mit a thip vek mai," ka ti zui a.


"Lehkhabu chhiar dawn chuan tarmit tal vuah a țha asin. In siam la, mamawh lei pahin i tarmit tur kan en dawn nia," ti dut dut pahin amah zawk chuan ka taksa a lo chul kual dun dun a.


Hetiang a inkhawih kual hi za ka ti tlat a, țha deuh a lo dawnsawn tawp chu ka la thei thlawt lo.




"Bazar a kal i tih chuan khawi ka va insiam ang e," ka tih chuan a lo rum nghut a, ani pui roh chu a thil tih laiah a lo bur nghet viau tawh hi a lo ni a. Ka lehkhabu chhiar ami ang awm ve tawp mai chu a țha a hriain dan pawh ka tum tawh lem lo, ka kawrfual a hlim chho vek erawh min hmu chiang dawn lutukin ka hria a, bawp ka chip zui chaih chaih a.



"I nalh tak zet," ti supa mit zim sun a min melh kual dun dun chuan ka mur deuh ar ar mai. Ka taksa peng kawi tin chu belhchian tum ni awm tak hian a zut kual a, a tawpah ka awm bawr chu a hmai in a lo nawr kual thuak a, inveng hman lo a ka khek țhat chuan a rawn nui lum hawk a, ka ip chaih chu min nuih zui sukin ka kawr chu a pawt thla ve ta a.



"Tho rawh le," ti pahin ka mawngtam a lo beng tlawp bawk.



Zingkar bazar mai mai tur kan nih avangin ka inchei duh lem lo a. Inhnuai lama kan inzui thla erawh ka mi beisei loh zet ka zuk hmu zui a. Cecilia-i leh ka la hmuh ngai loh patling pakhat te hian thingpui an lo in mek a. Ka pa leh Cecilia-i lo kalpui pa chu an lo ti ti tui hle bawk.




Kan thawm hriain ka pa chuan, "Ahriat hei ka țhianpa hi lo chibai ve rawh le," a lo ti thuai a.


Keipawh chuan engmah sawi buai lovin ka chibai nghal a, "ka țhianpa ve ber a nih hi. In inneih ni khan a bialah innei an awm ve avangin a lo tel thei lo a," a ti leh luam a.


Hetiang hunah tak hian sawi ve mai tur ka hre țhin lo. Ka kut chelh tupa pawh chu ka nuih var var ringawt a.



Amah zawk chuan, "I fel dawn hi. I hmel pawh a țha," tiin min fiam zui a. Ka nu leh pa te chu an lo nui hak hak a.




U Mapuia pawh chuan a rawn chibai ve nghal a, a biak zui dan ațangin Cecilia-i pa a ni tih ka lo hrethiam zui ve mai bawk. Cecilia erawh a ngawi ran a, u Mapuia'n "Pa Thlan, tikhan lo țhu rawh u, Bazar ah kan va kal lawk ang e," a tih lai chuan u Mapuia ngawt chu a lo melh veng veng bawk.



Ka harh ve hmain ka nu nen mamawh lei ngai tur chu an lo inhrilh vek tawh aniang, Choka lam a lut kawi tawh lovin kan inzui chhuak nghal a.


Motor hunna ațang u Mapuia'n motor a la chhuak lai chu kawtzawl ah ka lo nghak ran a. Inchhung lam ka va en leh chuan Cecilia-i pawn min lo en ve reng mai. A chet dan chu a mak ka ti tak zet. Nizan lawk ah amah vangin a pasalin u Mapuia a lo be tawh a. Khawvar rualin a pa zuiin u Mapuia te in ah bawk a lo kal leh thei chua ania. A pasal rilru tur chu a dawn pui miah lo ni te in ka hria. Mahse, dem chiam thei ka nih bik loh zia inhre zawm nghalin ka hawi sawn san ta daih..



Bazar pui lama kan tlan phei lai te chuan zawh duh tam tak nei chungin u Mapuia chu ka en leh zauh zel a. Mahse, a mood chu a țhat hmel ang reng si a, ka tihchhiat sak palh hlauin ka ngawi leh ta zawk a.




Mamawh lei a che chhuak ber a ni bawk a, Bazar kan han thleng chu lo hretu a pui a ngah fu roh a. Ka nuih ka nuih mai.



Ngamtlak zeta nutling țhen khat te'n an lo biak chang lahin an hmingin a koh let nalh thei a, an kiangah chuan, "Ka nupui a nih hi," tiin min inhmelhriat tir zel bawk. Amah a palian bawk si a, chawhmeh a han khai bawr țeuh mai chu inhmeh lo deuhin a inhmeh ru phian lawi si. Patling, inchhungkhur mamawh tlakchham a awm phal lo bur tu mizia dik tak a nei niin ka hria.



Chawhmeh lam kan in lak khawm fel hnu chuan motor chhungah a dah lut hmasa vek a.



Hawi kual thuak pahin, "I tarmit tur chu buaipui ang le," a lo ti vut a. Nghet cherh chawrh hian ka kut a lo hum zui hmiah a. Kan inchibai hmasak ber țum kha ka hrechhuak zui rauh rauh mai.



Kan inleng ve satliah emaw ka tih khan ka nun a thlak danglam hlawk ta mai chu a ni si a.



Ka han en chhoh lai chuan motor lo tlan mek te chu a kut lek chhuakin a ti ding hlawm a, chutah min lo buk khum nghutin kawng kan turin min kai zui nghal a.



A hnunga ka zui dat dat lai te chuan kawng pawh en lovin amah ngawt chu ka en reng a, 'Maimitchhing chung pawha rintlak chu nangngei hi i ni' tih hla ang deuh khan he khawvel mipa zingah hian ani tluka rin ngam ka nei thei tawhin ka ring lo.



Mahse....


"Lut rawh le," a lo ti sup a, clinic darthlalang kawngkhar chu nam hawngin a chhung lamah a thle zui bak bawk. Tawite hian ka nuih ta ringawt a.



Tarmit kan lei satliah ngawt tura ka ngaih laiin u Mapuia chuan ka mit check turin Doctor chu a hrilh ta daih a.



Doctor nen chuan an lo inhmelhriat țha hle lehnghal, "in inneih ni bak kha ka lo leng hman leh ta silo a. In lo kal hlauh chu a tihzia e. Ahriat, tarmit zinga i duh ber kha i thlang dawn ania, ka lo free ang che," a ti nghal mawlh mawlh a.



"Ui... chutiang a ngai lo," inthlahrung rilru deuha tiin u Mapuia lam chu ka en thuai a.


Chair ah țhuin inkuangkuah run chung hian min lo thlir reng tawh sa a. A țhianpa chu a hnial ve ang chu tih nak a laiin a lo kiai suk a, "hnial duh suh, țhian ho group ah i hmelțhat thu sawi peih ber tu a ni bawk a, a man a chawi dawn a nih hi," a lo ti khauh a. A țhianpa chu za zet hian a nui zui hawk hawk bawk.



"Ahriat, in pa hian i hmelțhat thu kan lo sawi ve mai mai pawh a phal miah lo ania aw," a ti zui a. Sawi mai tur hrelo in lai deuh hian ka che sek tawh. U Mapuia țhianpa lah chuan, "țhian ho zingah a leng rei ber si a, duat nachang che a hre meuh amaw?" a ti leh zel a.



"Min duat rapthlak" rang deuh a ka tih chuan a nui leh hawk hawk a, ka lai leh si chu țang țeuhin u Mapuia ka va en leh chuan ril ruihin min lo en ve reng a, ka zak tak tak a ni.



"A duat loh che chuan min hrilh la, kan lo hau hrep dawn ania," tiin a țhianpa lah a nui zui kur kur a. U Mapuia lam chu ka va en ngam tawh lo hrim hrim.




In kan thleng phei leh chu chaw ei an lo peih diam tawh avangin kan bar ve nghal a. U Zoa te chhungkua pawh an haw dawn tawh a, Airport ah ka nu leh Meme-i te'n an zuk thlah dawn a. Kan ei kham rualin kan intifel nghal zung zung a. An haw tur chu an hreh ve reuh nge ni, Masangi te unau chu an kawi ve ngat ngat reuh a. Hetah pi leh pu te nen kan awm tlang dual dual a. Chumi hnua hnam dang kara chhungkua te reka an zuk khawsa leh tur chu kei tak pawn ka huphurh pui. Mizo dang an awm ve nual nangin hna vangte in an inlen pawh zen zen thei silo a. Naupang țhian ngaina rual lek tan chuan a khawhar thlak zual thei ngawt ang.



U Zoa te an han chhuak fel chiah chu inchhung chu a reh ruih hian a hriat a, u Mapuia sawi lawk tawh ang deuhin chhoh tlai deuh a ti pawh kha a lo dawn thui ka ti thar khawp mai.



Noah lah a lo chiau hiar ve deuh bawk nen an room lamah ti mu turin an inhruai lut nghal a. Ka pa erawh dan ngaite in Synod office lamah a kal leh tawh a. U Mapuia leh u Chawiteii pasal te chu veranda ah zial zu in an ti ti pah mawlh mawlh a.



"U Mapui," ka va tih chuan a lo hawi thuai a, "Lucy kha a lo leng dawn bawk si a, ka lo han inbual ang aw," ka tih leh chuan a bu nghut a, "keipawh ka lo chho har lo ang," a lo tih sup chuan tawite in ka nuih a.




Lucy lo thlen hma ngeia inbual fai hman tumin ka che nghal zung zung a. U Mapuia pawh a lo chho ve tawh a. Hna chungchang ah call a dawng a, BDO ber a ni bawk nen a dinhmun chu a pawimawh si a. A nau te ho chuan haw tawh turin a duh tawh ngawtin ania ka rin ni.


Ka zak hnuai ah towel venga darthlalang hmaa ka han ding chu ka ip zui chaih a. Ka hnute bu lang thei chin ah ngawt pawh nizana u Mapuia sulhnu kha hmuh tur a lo awm thluah a.



Khatianga insawngbawl kha ka tan chuan a vawi khatna vek a ni a. A chet dan duhthawh lutuk leh kohham zet mai dawngsawng tur a ka lo huaisen ve kha mak ka intiru hial bawk.




Ka phone lo ri ah chuan ka inthing harh deuh nak a. Bathrobe chu ka ban a. Ka ta tur hi a lo lei lawk vek a, hmang țhang lo tih takah inbual zawh rualin towel bawk ka chuh leh țhin.



Bathrobe ka hak mawlh mawlh laiin Bathroom kawngka chu a lo kik ri kauh kauh a. "I phone hi ka lo chhang mai dawn asin," a lo ti dut bawk.


"Aw.. Lucy ami? Lo chhang mai teh," ka ti ve lang lang a.


Phone a chhang thawm ka hriat takah chuan hmanhmawh ruai lem loin cream ka inhnawih leh rih a.



Bathrobe ha a ka chhuak chu bathlar kal chhuahna tukverh biang ngheng a dingin min lo melh run a.



"A lo thleng dawn tawh ami?" ka tih chuan a lo bu nghut a. Rang deuhin closet ah ka lut nghal a, ka thuamhnaw dah chhuah sa ka inbel lai chuan a lo lut ve vut a.



A hak thlak tur a lak chhuah rualin, "tui vawt a inbual ka mamawh tlat," a ti hluk a, ka en hu chu awmze nei deuh hian min lo melh kual dun dun a, ka lai lutuk chuan "va inbual vat rawh" ti pahin a awm ah ka nam ta vak a. A lo nghing dat ringawt.



"Kal vat teh," ka ti leh ngang ngang a.



U Mapuia chu za zet hian a nui chhuak huk huk a. Țha te te chuan a kal chhuak ve leh vut a. Nizan khan tum lui ngat se chu indan ngaihna hre lovin ka inhlan pumhlum ngeiin ka ring. Mahse, tukin thleng pawn sex min hman pui a tum ngawr ngawr lo a. Inbelhchian nan khatia tih vel bak kha a tum lo niin ka hria.




Inhnuai ka zuk thleng thla chiah chu gate ah Lucy pawh a lo tlan lut ve mek a. Meme-i Airport kal tur khan Xenver-a te chu an In te ah a khung daih rih a. An awm lai nise Lucy chu lawmin an tlan leh thuang thuang tawh ang.



"Ui.. nizan khan ka lo enchiang miah lo che a, i va han glow tak," scooty ațanga a lo chhuk chuan a han ti nghal a. Ei lo zetin ka lo melh ralh a.

"Lehkhabu kha i chhiar tawh em?" awmze nei deuh a min melh pahin a ti leh nghal a.


"Pakhat chiah ka la chhiar.. enteh, khatiang kha love story chu ami?" ka ti hu chu hahthlak min tih hmel deuh hian min melh vak a. Ka chhiar ngai miau tlat lova. Lehkhabu lam hi ka chhiar ve pawhin mizo ah chuan pu Mafaa leh pu Hruaitea te kut chhuak ka chhiar ve a. English erawh the Alchemist te how to win friends and influence people tih lam daih te a ni a. Romance lam hi ka ngaihven ngailoh em avangin chhiar en ah ka lo en ngai lo hrim hrim a.



"I chhah bawk sia, in nupa inkar nen a inhmeh ber tur thlan chhuah sak chung che pawn Love Story ami i la ti hu chu a ni sia," tiin a chet tlat tlat a.



"Ngaihnawm i ti em?" a lo ti leh nghal a. Ner nang chungin, "Mipa ziak emaw ka tia," ka ti hlak a.


"Ngati nge?" Min en hu pahin a ti a, a kalphung ka hmuh dan dik tak chu hrilh chi a ni pawh in ka hre lo. Â min ti leh dawn em mai.


"Lut vat teh ang, tunlai chu ruah hi a phing phi suau reng mai a, a vawt reuh bawk si," tiin thil dang ka sawipui leh daih a.




Inchhung a kan in zui luh rualin u Chawiteii pawh a lo chhuk thla ve a.


"Khawnge kan naute hmelțha kha?" tia Lucy-i'n a zawh chuan a nui har har a.


"I naute hmelțha ve kha tukin chu a nuar ngut ngut reng a, ka ti mu ta daih a nih kha," a ti a, " thei thur deuh ka ei chak. Nimbu hi bawl ang u aw Lucy," a ti leh bawrh bawrh a.



Fridge atang Nimbu lian țha leng lawng pathum ngawt a phawrh chhuak a, "khawi ka lo vel ang," tiin ka chuh thuai a.



Meme-i te an lo thlen chuan Lucy-i pawh a bengchheng leh tawh khawp mai. Meme-i hi keini aiin u deuh mah se a la naupangchhia ve a, kan pathum a kan awm tlan tawh chuan a nui ring ber ber ah ațang ziah zel.



U Mapuia'n min lo koh vanga inchung a ka chho zawk, ka zu let leh chu rang deuhin an phone en lai chu an hmet thim nghal a.



"Ngati nge a?" ti pahin an bul ah ka țhu ve leh a. An inmelh dun ralh hnu ah Meme-i zawk chuan, "hre ve rawh se," a ti sap a. U Chawiteii pawh choka ah chuan a lo lut ve mek bawk a.


"Eng thil nge a?" ka ti a. Rang deuh a phone an thuhruk chhan kan han hmu ve chu tawite in ka nui ta ringawt.


"Lalruatpuii te an ni hrim hrim ang," Lucy-i chuan a ti vang vang a.


U Mapuia nen kan thlalak chu FB group pakhat ah post in min lo troll nasa hlawm khawp mai.



Kan inneih zan, a mal chunga ka țhu lai ka khabe ah lo dawm a u Mapuia'n hnai zet a min en lai kha a ni a. Kan photographer khan a page ah a post ngei tih chu ka hria a. Mahse, FB troll group lam daih daih a an lo pu lut chu a nuam duh lo tak zet.




'A hmeichhia zawk hi ka hria, PUC ah a lut ţhin, a chhelo viau nangin RV ami a nih hi,'


'Tunlai nula chhelo deuh chuan sum vangin mahni aia upa neih pawh an hreh tawh lo'



'An induat hmel vel lutuk hi ka lo zak.. an induat rei leh awm tawp lo si lo a'



'Ka pasal hian hetiang taka duat hmel hian min en ngailo mah se ka lungawi tawk, hetia midangte hmuh a induatna tih lan te hi an zak miah lo amaw ni chu le'



tih ang reng vel te in comment a lo tam hle tawh a. Caption an siam danin a zir bawk a. Gold digger thawthanga min chhuah bakah u Mapuia min melh dan te chu an sawisel tawk a tling em em mai a ni.



"An va han ti mak tak aw" ti pahin u Chawiteii chuan phone chu a lo ban a. Comment chu a chhiar kual malh malh a. Rilru nuam lo deuhin ka lo inhumruh ngat ngat thung. Ka collage kalna te nen lama min hrechiangtu te an lo awm ve bawk nen a zahthlak ka ti e..




"Ahriat, ngatan mah ngai miah suh, Mama hian a nghak rei tawh che a, kum tam tak chhung a lo nghah tawh nupui ah a nei thei chu duat pawh a duat ve loh che in le," u Chawiteii chuan a lo ti a. Tawite hian ka nuih let a.



Phone chu hmet thim hmakin dawhkan ah a dah a, "tunlai nutling tam tak, mi nupa induat hleuh hleuh lai hmu thei miah lo tu te hi chu maw an dinhmun a an lungawi loh vang mai mai alawm," a ti leh zel a.




Chair chu pawt chhuakin ka bulah a lo țhu ve a. "Family counselor te sawi tam ber chu, 'ani ang hi mahni chan tawk a lungawi lo mihring an ni a, ngaih khat a ngaih tur. An kawppui te'n duatin an ngaihsak ve hliau hliau si lo a. An lungawi loh thu sawi ngam siloin, 'ka kawppui nen chuan kan inhmangaih lutuk, mahse, min duatna a ti lang thiam lo țhin a. Kei tak pawn induat hliau hliau ang hi ka ngai thei lo,' ti te in an insawi thiam chawp a. Mahse, an dinhmun ah lungawi tak tak nise mi nupa induat hliau hliau lai va sel vak thu a awm lo,' an ti țhin a, a dik ngei ka ring bawk" a ti sauh sauh mai.




Lucy pawh chuan, "A dik chiah, 'khawsak in a zir loh vangin ka pasal hi chuan min ngaihsak hman lo' ti te in an insawithiam char char a. Duat leh ngaihsak an thlakhleh zia bak a lang lo. Chuti chunga nupa induat thiam deuh te an sawisel hleng hleng tawh chuan an awh lutuk vang a ni mai," a lo ti ve bawk nen kan nui ta țha hlawm mai.



U Chawiteii chu a fing leh hawi zau ber a ni a, ka rilru nawm loh hlau deuhin min hnem zui mial mial a. A tawpah chuan min ti harh kuar kuar thei thil a lo sawi leh a.



" If he wanted to he would te an tih fo țhin hi. Mipa te hian an mi duh leh hmangaih ber an neih phawt chuan 'zeilo' tih ang reng velin hmun a chang zo lo. A duh leh duh loh a thu a ni tawh mai. 'Mi tute pawh hian kan hmangaih ber te hi kan lo nei thei lo deuh vek a. A nei thei te chu mi vannei ber ber te an ni,' tiin Mizo te chuan kan sawi fo zel hi. Mipa in a hmangaih ber nupui ah a nei thei a nih ngat chuan a lungawi em avangin a tih tur hrilh chawp a ngai ngailo. Mipa, mahni hmangaih ber nei thei silo te hi an kawppui te duat leh ngaihsak kawngah pawh hrilh chawp zel an ngai a. Chung mi te kawppui te chu an khawngaihthlak, mi nupa induat leh inthlahlel tak tak te an hmu mawh duh. An kawppui te lak ațang an dawn ngai loh vang a ni bawk a," a ti duah a. A khat liam ve ngang aniang, " Mi nupa hlim țha hle hle lai lo hmu mawh tlat țhin ang ho hi chu maw chhut chhut ila a hmei a pa in hmangaih ber nei theilo tu te vek an ni a. An khawngaihthlak rual rualin midangte tihnat an hreh bawk silo a. An vanduai ania," a ti leh siam siam a. Ka ngaihtuahna a ti kal thui khawp mai.



Hun a liam a, ni a ral ve zel a, Khawbung a kan chhoh dawn zan ah chuan Lucy-i pawh a lo riak chho a. Khawbung thleng a min zui a tum ve miau a. Nu Zari te nupa pawn an lo rem ti hlauh a. Ka nu hoin Meme-i te nen an pathumin min lo zui dawn a nih hmel a. A khawhar thlak loh deuh ang chu.


Quarter luah in u Mapuia chu a lo awm hmasa tawh nangin ka fin ve tawh dawn si a. Mamawh neuh neuh inla khawmin kan buai nileng a. Chung kan thil lei te chu Lucy-i nen kan pack fel leh thlap a, "hmanni khan inhrilhna hun a awm miah lo a. In in ațang kan haw chho kha u Cecilia-i pasalin u Mapuia a lo bia sin," tiin thil thlen dan chu ka hrilh ve mial mial a.



A tawpah Lucy-i chuan, "keichu Cecilia-i hi ka ringhlel deuh tlat," a ti ta hmak a.


"Ngati maw?" ka tih chuan, "a awm dan hi tider a ang ka ti. A pasal hi pastor a nih vangin a țhen mualpho ngam dawn lo tih a hrechiang a. Chu chu remchangah a hmang a ang," a ti leh a.



"A tider duh bik dawn ami?" ka ti deuh ringawt a.


"Keichu ka ringhlel deuh tlat tawh. A pasal hi pastor ni lo ta se hetiang hian a khawsa ngam teuh lo. Pastor te leh speaker te hi an dinhmun chelh hian a phuar zual a. An mahni thiam loh vang pawh niloin an nupui te uire in mipa dang nen lo tlan palh pawh nise an hnain a tuar thei a. Chuthil chu Cecilia-i pawn a hriatchian vangin a pasal hi a hlau lo a. Suah sual a chhuah khum țhin ni ber in ka hre tawh," a ti ve tlat a..



"U Mapuia hi an lo tih buai leh hun ah pawh 'kal turin' hrilh tawh miah lo ang che," tiin min zilh zui leh hlak hlak a. Ka nui pat pat chu, "i â bik e... thik ve te tum la..." min ti leh deuh ringawt a. Inveng hman lo a ka nuih chiam chuan a bakcheh ken laiin ka lu ah a lo khawng keuh a.



"I pasal a ni a, thikthu te ti lang ve țhin rawh," a ti leh hlak hlak a. Ka intihfel ve meuh chuan ka thlan ban deuh chuap a.



Zan dar 8 a pel daih tawh nangin intleuh leh thuak chu ka tum a. Lucy-i bulah chuan, "Ka inbual zuai dawn asin, i inbual ve duh em?" ka ti a.



"Ui.. in nupa bathroom țawm ve ngawt cheu chu ka tim e a. Wet wipes i neih chuan ka lo hmang zawk ang," a ti a.



A thil duh chu ka pe thuai a. U Mapuia erawh ka thil pack fel sa a lo thiar thla zel a. Ani pawh a inbual duh ve ngei dawn si a, hmanhmawh ru deuhin batroom ah chuan ka lut zui a.




Bathroom ah chuan ka awm rei hran lo. Ka chhuak leh chu bathlar lama u Mapuia leh Lucy-i te lo inbe thawm ka hriat chuan ka ding deuh dat a. Ka thawm chu an hre lo anih hmel. Thlang lam thlir in an lo ding dun a.



Nui deuh hak paha Lucy-i'n "ka fel lo lutuk zawk, Ka tet lai phei chuan anu te'n Ahriati an duat thei lutuk kha ka thik țhin a." a tih chuan ka chanchin an sawi dun tih hriain pawh tur nge pawh lo tur tiin ka inngaihtuah zui nghal a.



"Mahse, ka len hnu hian ka lo thik țhin kha hreawm ka ti leh hnuhnawh țhin," a ti leh mial mial a.


"U Mapui, Ahriati dinhmun hi i hrechiang vek tak tak tiraw?" naupangchhia taka ka țhiani zawhna chu u Mapuia chuan "hrechiang thaw khat chuan ka inhria," tiin a chhang let a. 

"A mitmeng hi a ruak i ti ve tho em?" zawite tak taka Lucy-i bawkin a tih leh chuan ka lo insangmar nasa ngang mai. U Mapuia chu ngawi rengin a bu nghut a.


"Hei, an in awkhlum tih kan hriat thut te hi an dam lai a kan hmuh hnuhnun ber țum ngaihtuah let chuan an mitmeng a ruak huai ni te in kan hriat țhin hi maw. Chutiang chiah chu Ahriati lan dan pawh hi a ni țhin," ka țhiani chuan a ti leh mial mial a.



"A dinhmun hi ka hriatthiampui ve hle țhin amaw ka ti a. Mahse, ka ngaihtuah chiang a, nu leh pa te'n thinrima vawi khatmah kut an la thlak loh hian Ani, a nu leh pa te zuruiin an duh hun hun a kut an thlak hrep zel rilru chu ka hriatthiampui tak tak ngai dawn lo. I bulah a rilru put hmang tlang tak tak a a sawi chhuak te hi i lo hrethiam lo ang tih ka hlau țhin a. Ihmaw, Ahriati hian tu bulah mah a rilru put hmang dik tak a sawi chhuak ngam ngailo. Ka bulah bak a thinrim ngam ngailo a. Mahse, i lo lang kha a tih dan ngai reng reng lohin a rilru put hmang engkim hrilh che in a tawng let ngam tlat che a. Ani chuan a inhrethiam kher lo ang. Min rinngam tluk zetin nang hi a ringngam tawh che. A mizia hi luhlul leh tihmawh zet angin lang mah se a invenhimna hmanrua ve a nih tih hriat sak la, dawhthei deuhin dawm hram hram ang che aw," a tih leh lai chuan u Mapuia chu thinlung rih hmel zet hian a thaw chhuak ham ham a.



Chetsawn ngaihna ka hre lo a. Ka dinna ngaiah chuan dingin an pahnih chu ka melh dun ngat ngat a.



"Ka fa te nu tur hi hliam neia a awm reng ka phal dawn hauh hleinem, theihtawp chhuahin ka enkawl ang a, a dam bawk ang. He a mitmeng ruak hiai ngei hian hlimna te nen a fa te nui hmel a la thlir dawn alawm," nghet churhin u Mapuia chuan a ti let nghut nghut a.



Chutah u Mapuia bawk chuan, "Lucy, i țhiannu hian a naupanlaia thil thleng danglam deuh hrilh che a nei em?" tiin a zawt leh a.



"Eng thil maw? A nu leh pa in kut a thlak țhin tih loh chu thil thleng engmah ka hriatpui ve vak lo. Chu pawh amah tak chuan a sawi chhuak ngai chuang lo, a hliam ka hmuh ațangin ka hrethiam țhin a" Lucy-i'n a tih let chuan u Mapuia chu a insangmar leh țeuh tawh tih ka hmu thiam a, "a pawi lo e. A hrilh loh che a nih chuan a theihnghilh tawh teh pawh a ni mahna," a ti chhuak hulh a.



"A hriatreng ka hlau reng a ni" a ti leh nghut chu hriatthiam loh hmel deuhin Lucy-i chuan a en chho ha a.


U Mapuia thung chuan a darah a ben sak dat a, "i fel e," a ti deuh sup a. Lucy-i a nuih hak chuan zawite in u Mapuia pawh a nui ve huk bawk.



Zan ah chuan u Mapuia muhil lai chu ka thlir ngawih ngawih a. A fate nu tur tia min sawi hial laia ka duh ve em tih tal pawh ka la inhrechiang ve thei silo te chuan min tihreawm thar a.




Ka laka a dawhthei lutuk te, min duhsak lutuk mai leh ka rilru dam nan a inhuam thui lutuk te chu a mak ka ti a. A hmel lang dam thlup te chuan amah chu min khawngaih zual tir ngawih ngawih mai.




"Kei lo hi hmeichhe țha deuh thlang zawk ta che u Mapui," zawite a ti pahin a biang ah kut ka han nghah chuan thaw huaiin ka kut chu a rawn vawn hnan a.



Ka phut deuh zawk laiin a lo meng chhuak ruai ruai a.

A mitmeng ril ruih ka han hmu chiah chu ka chet dan te kha a lo hre vek tih chu ka hrethiam nghal a.


Thawk pawh thaw chhuak lo a ka en let kiau laiin u Mapuia chuan ka kut chu a awmah a pawm bet leh hmiah a.


"I țawngvai leh a nih pawhin kha tiang thu kha chu sawi nawn tawh ngai suh," a rawn ti hluk a. A thinrim lo ti erawh ka hria.



Za vak lo hian ka nui seih a, ka thil sawi te kha a lo hre vek tho bawk nen, "Kei ai țha i phu alawm," ka ti let ve a. A mitah pawh en ngam tawh loin a awm zawn ka melh rual chuan a rawn thaw chhuak hawk a.



Pek let theih engmah ka nei silo, duat a ngaihsak let thei tu thlang se a hlim pawh a hlim daih zawk ang. Ka laka țhat a chhuah nasat leh pek let theih ka neih loh zia ka hrechiang zual a. Amah ka khawngaihna hian min tihreawm tak zet a ni.



U Mapuia chuan ka khabea lo dawmin amah en thei turin min kuai dak a, "khatiang ngaihtuahna kha tun aţang chuan paih bo hmak ang che," a lo ti leh khawlh a. Ka rilru hreawmna a zual sauh thung.



"Phu i in ti ve lo em ni? Kei chuan engmah ka pek let ve theih loh che hi," rilru tawt deuh a ka ti let ve zel chu min kuai dak leh salh a, hnai setsawt a min lo en pah hian, "Pathian hnena ka dil ka țawngţaina chhanna i nih hi," a rawn ti hniam ruih a. Chungte hlei hlei chuan rilru a tihreawm zual.




"Hmeichhe dang te chu awlsam takin ka lakah an inpumpek thei pawh a ni mahna. Mahse, an ni nilovin nang hi ka dil a ka nei ta reng bawk che, ka kianga i awm hian ka hlim tawk tih hria la khatiang ngaihtuahnate kha paih bo vang vang rawh," a lo ti leh duah a. A mitmeng ril ruih chuan a thil sawi chu hrethiam tur a min duh hmel zet hian min en vung vung bawk.


"Mahse," ka ti halh a, thil sawi tur a ka an leh ziau laiin a lo rum hawk a, hneh zetin a taksa chungah min pawt kai a, a lungphu dup dup zawnah chuan min kuah bet zui hlun bawk.



Chutihlai tak chuan pawnlam ah chuan ring zetin țek a rawn tla zui țhuai bawk nen inring hman lovin a nghawngah ka kuah rawk rawk a. U Mapuia chu zawite hian a lo nui huk a. A kutphah hrawlpui chuan ka hnung a lo chul zui hauh hauh bawk. Țek tla chu thli thaw vuk vukin a rawn zui a. A chang phei chuan thli na lutuk chuan tukverh te chu a rawn ti ri dawt dawt a.




Thlipui thawm te chuan a ti buai ve lo emaw tih mai turin u Mapuia chuan ,"mutthilh tum rawh," a rawn ti dut a. A kutphah lian zet chuan na miah siloin ka sam a rawn țham salh salh a. Chutia a kut tawhna dam dap hnuaia ka awm reng takah chuan hriat loh karin ka inthlah dul riai riai a.



"I fel ngawt mai," zawite hian ka ti leh a. Ka biang a rawn khuap chuan hawi chhuak duh lovin a nghawng ah hmai ka phum tlat a.


"Naute, inngaihtuah buai chiam țhin lo teh," zaidam taka a lo tih leh laiin, "Hetiang hi i ni dawn tih hrelawk ila chuan ka nei miah lo ang che," rilru tawt țeuh chungin ka ti chhuak tawlh a.



U Mapuia taksa hrawlpui chu a țang nghal țawlh țawlh a. Ka thil sawite khan a ti na hle dawn tih ka hriatchian vanga hawi chhuak ngam lo pawh ka ni reng a. Mahse, ka rilru put hmang zawng zawng hi ka hrilh vek lo a nih chuan kan hreawm zual tulh tulh dawn.



"U Mapui, ka lakah hian țha lutuk suh, ka inthlahrun phah mai mai" ka tih lai chuan ka sam a țhamna chu a rawn ti nghet sauh a.



"Mipa sual deuh ni zawk rawh. Thinrim taka min hauin min vin hrep zel la. Tuk țha nei thei lo khawpin in hnial buai hrep zel ila, chutiang chu kan pahnih inkar hi nizawk se i lakah hian ka inthlahrung lo deuh ang. Chutiang chu a ni dawn emaw ka tih vangin ka nei bawk che. Mahse, ka rin angin engthil mah a thleng bawk silo. Nanglah ka chungah i țha em em a, min hau ngai bawk silo. Min duatin min ngaihsak em em reng a. Hetiang thil hi ka beisei a nilo, a duh pawh ka duh lo.. min tihreawm zual, min vin la, min hrethiam duh miah lovin min hau hrep zawk rawh, awm dan ka thiam zawk ang," rilru chiai deuha ka tih leh chuan a lo thaw chhuak hawk a.



A nghawnga ka kuahna chu ti nghet zual sauh pahin thawk ka la ve halh tho. A rimtui hman rim nilo, a mipa rim dik tak ka hip luh rual chuan a rim chu ka theihnghilh tawh ngai dawn lo tih ka hre zui nghal a.


"Thinrim a inhauh hrep chu i duh em ni?" zawi ruih hian a lo ti ve ta a, a nuih chu a zat hmel viauin ka hre bawk.



"Umm, min hau hrep zel la, nuam ka ti daih zawk ang," ka ti sap a, thawk ka la leh ham ham a. Ka pa ang chiah khan khawsa ve se kei tak pawn awmdan ka thiam daih zawk ang.



Mahse, u Mapuia chuan, "chutiang chu i duh dan a ni hauh lo," a rawn ti khauh a. Rang zeta ka hawi chhuak chu ka chal ah a lo fawp tawk a, hrethiam lo zetin ka en ta ran a.



"I seilenna inchhungkhur boruak kha hreawm i ti hle a ni lawm ni?" tia a zawhna min zawh chuan min deng dawt a.



Ka thisenin kan chhungkaw boruak hrisel lo lutuk kha a țhan hnan miau tawh a. Kan chhungkaw hlat a ka awm tawh hnuah pawh ka thlakhlelh vang ni miah lovin ka thlah fel thei lo a lo ni reng zawk.




Zingkar thawh hlim ațanga ka pa zu rui inhrosa thawm te khan ka thisen a ti tlanchhe fo a. Mahse, tun ah tak hian hrethiamtu ka neih rual rualin amah ah chuan ka pa mize bawraw zet kha thlahlel ang hrimin ka zawng leh si a. Hriat loh karin kan chhungkaw boruak hrisel lo lutuk ngawl kha ka lo vei reng tawh zawk a lo ni.



Ka thil ngaihtuah zawng zawng te chu lo hrethiam vek ang hrim hian, "I hun kal tawh an nih kha Naute, thlah fel tum rawh," a rawn ti leh a, thawk pawh thaw chhuak lovin ka en let ngat ngat a. Ani thung chuan hriatthiamna a khat mitmeng dam ruih hian min lo en let a.



"Engvangin nge hauh ngai hlei lo chu ka hauh ngawt ang che?" tia zawhna hmang bawkin ka pa angchhungah nilovin a angchhunga awm tawh zawk ka nihna chu min hriatfiah tir leh a. Chuthil chu pawm dan thiam tura min duh tih hriat zetin ngenngawl takin min melh bawk.





"I nun dan ah hian han thinrim chhan tur ka nei em?" a lo ti leh charh charh a.



Ka pa kha chu chhan awm lovin a inang thinrim chawp a, kut min thlak turin chhan țha a mamawh ngailo bawk.



A zawhna min zawh te chu chhan let ngaihna hlawl hre lo a ka insehruh ngat ngat laiin, "Chhan leh vang awm a duat che ka ni lo ania. I pasal ka ni a, duat taka ka sawngbawl lai che a ngaihțha taka min lo dawngsawng lai kha hmuhnawm ka ti a, hmuh nawn fo ka duh avangin ka thiam ang tawkin ka duat che a nih hi," a lo ti leh dap dap a.


Chu thil tak chuan alawm ka rilru ti hreawm zual em em ni. Ka hrethiam tawh biklo, duattu leh ngaihsaktu nei ngai miah lovin hetitak mai a duatna ka han dawng ta thut mai hi lawm tak viau awm. Mahse, a laka ba nei angin min inngaih tir tlat a, min hau reng se ka awm thiam zawk daih ang.


"I lak ah hian phut let ka nei ngai hauh lo, chu chu hrereng tawh rawh," a lo tih leh chuan ka tal phat a, u Mapuia pawn min lo dang bik lo, a taksa aţang chuan let thlain ngaihtuahna vak kual thui zet chungin khum lu nghengin ka țhu ngawi ta reng a.



U Mapuia pawh chu lo tho chhuak vein ka awm ang chiah chuan a rawn insiam rem a, nghet zeta ka kut a lo hum lai chuan, "min lo hrechiang tak tak a nih dawn hi," ka ti sap a.



Amah chu ka bia pawh a ni chunglo. Mahse, ani hian ka chhungril a thil awm, sawi chhuah ngaihna ka hriat siloh te chenin a hre fai vek a. Min hmu tlang vek ni maiin ka hria.



"Eng thilin nge nang ai țha zawk ka phu anga ngaihdan neih tir che," tia min zawh leh chuan ka melh zawk a, mah se rei en ngam lovin ka hawi sawn leh nghal a.



"I chet dan zawng zawng te hian.." ka tih laiin ka kut chu a lo hmer nghet salh a.


"Min hrethiam lutuk leh min ngaihtuah em em zel te hi a mak ka ti em alawm. Hrethiam let ve tur che a min phut ka hlau a, min phut ta la chu..." sawi zo duh lovin thawk ka la leh halh a.



U Mapuia chuan zawi ruih hian, "min hrethiam ve lo em ni?" a rawn ti a. A aw ril ruih avang chuan ka pumpui chu a lo sa pupin ka hria a. Sawi mai tur hrelo zet a ka en leh chuan chiang zetin min lo melh ve run a. "Tuna a lan dan ah hi chuan nangmah i inngaihtuah ai nasa in min ngaihtuah tawh zawk a nih hi," thum chhak hian a lo ti leh ta mai a.



Hamhaih zet a ka han ang ziau chu min lo nuih suk a, "A dik em? Ka rilru tur i dawn thui lutuk vangin i muhil thei lo bawk a," a lo ti leh zel a.


A sawi zawng zawng te chu a dik vek bawk nen bang lam chu ka melh ta daih a. Min ngaihsak anga ngaihsak let ngaihna hlawl ka hre ve silo te hi hreawm a tih phah ka hlau a. Duat let ve chiam dan ka thiam miau loh avangin amah duat thiam tu kianga a awm chuan a hlim zawkin ka ring bawk.



Kan ngawih dun vang vang hnuin u Mapuia bawk chuan, "Sawi dun duh i la nei em?" a rawn ti a, a aw chu a zawiin a dam ruih a, melh ngai melh a ka nuih sak chu a taksa ngheng thei turin min lo kuah a



Ka hnial duh bik ta lo. Khum lu chu a dup vek avangin thatchhe deuh a nghengin a țhu awn duai a, a dara lu nghata ka ngawi zui veng veng chu ka kut bawk a lo hum leh a.


Chumi zan chuan thil tam tak sawi dunin kan meng ta reng a. Ka hriatchian zual tak em em chu seilenna inchhungkhur boruakin a zir loh chuan midangte tana thil pangngai tak te pawh 'Phu lo' a inhriat bik tlatna rilru put mai a lo awlsam tih hi.




Ka hringnuna mipa hmasa ber leh a awm chhun ni țhin chu ka pa a ni a. Mahse, ani chuan pa nihna chanvo a hlen chhuah miau loh avangin ka tan chuan mipa țha leh mahni dinhmun hlen chhuak țhin mi chu dangdai riauva ngaihna ka neih phah tlat tawh a. Ka chungah țhat a chhuah nasat poh leh hahthlak ka lo ti daih a. Ka inkiltawih phah a, a țhatna te chu rilru hreawm nan ka lo hmang let daih a. Ka rilru buai dan zawng zawng te chu țhangharh san hlawl thei ila ka ti khawp mai.



A tuk zinga ka han harh chu u Mapuia pangtilum hriat zui mai ka inbeisei a. Mahse, ka zik mar țalh țalh hnuah pawh min lo kuah ta reng reng si lo nen thawh phan neilo lekin ka meng hlawl a. Khum zau zet ah chuan keimah chiahin ka lo mu reng mai.




Ka hawi kual nghal ruai a, bathroom lam ah lah thawm a awm mai silo nen ka chiai lek lek mai a. Tuk dangah chuan kei aia a harh hmasak pawn ka men ruala ka hmuh hmasak ber turin a lo awm țhin a. Chutia ka harh hnu pawha hmuh tur a awm nghal mai lo chu ka hrethiam lo lek lek a ni. Chutihrualin ka harh rual chiaha ka zawng ru nghal zat chu mak ka inti hle bawk.



Nizana a sawi ang tak tak khan kei hian u Mapuia hi ka lo ngaihsak hle tawh zawk em ni ang.



Chutihlai tak chuan kan nupa mut pindan kawngka chu thawmdim te in a lo innam hawng a. Thawm dim tak bawka u Mapuia lo lut mekin ka lo harh tawh tih min rawn hmuh chuan cool ruih hian a rawn nui nghal suk a.


"I lo harh hman a ni maw?" ti pahin a tshirt hak lai chu a hlip nghal hmiah a.



Khum lam a lo phei pahin computer dawhkan bula chair ah a tshirt chu a bang zui zat bawk.



"Khaw nge i kal a?" ka lo ti deuh ringawt chu mit zim sun hian min en deuh vang vang phawt a. Zingkar boruak chu a vawh tehlul nen a taksa hrawlpui chu thlanin a bual huh dap a, a hrawk bawk langsar zet ațang a awm tihrawl lian leh uk sen khurha a thlan luang thla ngiai ngiai chu a kekawr kawng chhung ah a luang lut zel a. Chutia ka en lai reng chuan a kekawr kawng chu a pawt hniam salh bawk nen rei en ngam loin ka hawi sawn daih a.



U Mapuia thung chuan a khabe ruh kual tuai rauh rauh pahin min la en ngur tih ka hre thei a, "min lo zawng hman em ni?" a lo ti zawi leh ruih a.



Ka melh leh chuan ngunthluk fe hian min lo la melh run a, a mitmeng thim khup chu meipui alh hluah hluah ang mai hian a lang lum huam bawk a, thawh phat ruala zawng tu nih chu ka lo zak ve tumhrang bawk si nen, "zawng lo," ka tih san a, a kiai zui suk chu hrelo derin puan sin lai chu ka theh hlip a. Ka tho tur chu min rum khum nghutin a rawn che ta phut mai pek a!



Ka kê rek ve ve ah lo manin khum mawng lamah chuan min pawt thla nghal hrawk a. Ka khek țhat rualin ka kê pahnih chu dawrh zeta dahin ka mal inkarah chuan a rawn tla zep nghal a.



Khum nghing dawt khawpa ka lu zawnah a rawn innam khalh tak run ah chuan zam zet hian, "eng.. eng nge i hriat a," ka ti nghal vak a. Chunglam ațanga min en chhuk run paha a lo nui suk chu ka melh rum chiam bawk.


"Tukin chu inbual dun teh ang," a han ti zet chu ka meng phar nasa ngawtin ania ka rin.


"Ka duh lo" rang deuh a ti let pahin a awm ah chuan ka nam dat a, ka kut chu lo man hmiahin a fawp zauh zauh a, min lo bawh bet zual sauh chungin ka beng chu a hmuiin a rawn nawr a, a lo thawk khum zui ham ham lehnghal , "inbual dun ang," a hma ai a zawi mah hian a lo ti ril leh ruih bawk. Ka thinphu lah chu a lo rang zaih zaih a.


"Ka duh chuang lo," ka ti leh tak nangin ka beng bulah thatchhiat hmel deuh si hian a lo nui zawi ruih a, a nui riin a fan chin lah chiang takin ka hria, ka beng hnuaia thisen zam ațangin ka awm chhungah a fan lut rawih rawih a, u Mapuia bawk chuan "tukin chiah...," lo tiin min thlem sur sur bawk nen ka thawk lak a buai vek tawh.



Mitchhingin thawk ka la hak a, "ka nupui," a lo tih sup chuan ka chhungril chu a țek chuai mai, meng chhuak lo mah ila ka mitthla ah a hmel lan dan tur chu ka hmu thei a.



Ka maimitchhin lai reng chuan dimte a ka biang lo khuapin min rawn fawp ta mawlh mawlh a, min fawhna ril ruih chuan ka tiril a fan a, țum dang ang lo takin nuam ka ti veng veng bawk. A hmui chu a nemin a lum nuam hle a, duhthawh em em si hian min tih nat hlauh hmel zetin chet a la a...


"Ka ruala inbual chu i duh em?" a lo tih leh chuan rilru a buai ta map mai. A mi sawmna chu a zamawm tluk zetin kan pahnih a bathroom chhunga kan awm huna thil thleng tur chu hriatchakna ka nei ve ta a. Ka thinphu chu huphurhna leh phurna te'n rawn luhchilhin awmze neilo zetin a phu dawt dawt a.



U Mapuia chuan thatchhiat hmel deuhin chunglam ațang ka chalah a chal a lo nghat a. Tun bak hi min sawm nawn tawh lo mai thei. Tunah hian a sawmna hi ka pawm lo a nih chuan bathroom kawngkhar phena thil thleng tur chu ka hrelo kumkhua tawh bawk ang.


"Aw.." ka ti chhuak a, ka aw chu boruak ah a thamral a ni mah.



Kan chal a insik reng lai chuan a lo nui lum hawk a, a inbengkang rual chuan ka zak lutuk chu min nuih leh mai ka hlauh avangin a nghawngah ka uai ta tlat a. Amah pawh chuan ka lai lutuk chu a lo hrethiam ve tho aniang, engmah sawi zui tawh lovin zo zet hian min pawm tho ta nawlh a.




Bathroom kawngkhar chu a darin a nawr hawng a, engthil pawh tih dawn mah se țang buai turin tha ka nei tawh pawhin ka hre lo.



Bathroom chhuat ah dimte a min nghah chuan ka lai leh zak lutuk chu ka kaihza tha te chu a zawi vek hian ka hria. U Mapuia chuan ka kawngah nghet zetin a lo man a. Ka mut kawrfual hak lai min hlih sak lai chuan rang zetin ka lo inhup a, nui hawk pah hian, "min induh san țhin lo teh," a lo ti dut dut a.



A aw thum zet ri te chuan ka pumpui a lo nghawr nghing hial thei. Ka inhupna ban chu min lak sawn sakin shower awmna lam ah min kai phei a, amah chu a palianin a hrawl bawk si a, saruak deuh thaw a ka awm chu a lakah chuan ka te hle hian ka hria. Tui lum a herh chhuah hnuah a kekawr chu a hlip ve a. Ka ip zui chawih chu min nuih suk mah se engmah a sawi zui tawh lo.



Thuamhnaw a inbel lai aiin a saruak taksa chu a lang lian zual sauh a. Shower hnuai ah chuan min pawt lutin rei ngial min fawp leh mawlh mawlh a, ka taksa chu tui lo luang thla karah chuan chul kualin khawih loh lai a neilo a ni tawp mai.



Ka kut lo mana a taksa min tawh tir ve chuan zam lutuk vangin ka khur ti tih tawh. Mahse, u Mapuia chuan ka khabe a lo dawmin chiang tak hian ka mit ah min en run a, timna tello leh thunei tu zeta ka taksa a khawih kual ang chiaha thuneihna te nen amah chu khawih ve tur a min duh zia pawh ka hmu thiam ve ta mai a.




A awm hrawl zet a ka kut ka vah kual tir laia min lo dawnsawn dan mawlh mai chu....



A tawpah chuan ka kut chu lo humin a mipatna chu min khawih tir a, ka ip chawih rualin amah zawk pawh a lo rum chhuak ve hawk a. Khur ru hluk chung hian, "Zin kawng thui tak zawh tur kan nih vang chiahin a tawp ka thlen pui rih lo ang che," a lo ti hrawih bawk.



A hnu leh lam a thil thleng chu ka tawn a tan chuan a romantic mah mah a ni tawp mai.

U Mapuia chuan ka samah shampoo lo hnawihin uluk em em hian a nuai phuan a, a khat tawkin min lo kuai daka, ka chalah a lo fawp leh vang vang zel a. Lai zeta ka nui leh rah rah țhin chu darthlalang lianpui ațangin min hmu leh vek zel sia.



" ka ruala i inbual ve ziah chuan engmah i tih ve a ngai miah lo ang," tiin min thlem zui a. Ka lai chhe țhin lutuk chu min kuai dakin min han fawp leh vawng vawng zel bawk a. Nichin khan a mî sawmna kha pawm ngam lovin lai chhe leh tlat ta ila chu; hetiang taka hmeichhe tana siam, ngaihsaktu zei a nihna hi ka hrechhuak mai mai hauh lovang.



Ka inthlak fel laiin sam chhemro na chu plug ah a lo vuah mawlh mawlh a, "lo kal rawh le," tia dressing table hmaa chair a melh vut chuan thuawi takin ka pan nghal a.




Ka țhu fel chiah chu dim em emin ka sam chu a hui darh a, hair dryer chuan a lo chhem zui zat bawk a. Darthlalang ațang chuan hmuhnawm ti deuhin ka lo thlir reng a. Mipa a nihna angin a thuneihna hman chhuah hun a hre em em a. Min nawr lui tut tut siloin ka zahna te min um bo sak chunga a duh zawng tihpui lo thei lo a min cho chhuah a thiam lutuk te chu a mak ka ti thlawt.




Kei ang hi chu thlem dem dem chi ka ni ve vak lo tih a hriat chian vang nge maw ni dawn ni. Ka taksa a khawih chang lahin min zah loh vang ni miah siloin timna tello leh ka taksa a thuneitu ber ang maiin chet a la hmiah a. Min dil vei du du se chu zah vang emaw te in ka țang țo ang a. Kan inkar a nuam lo duh viau zawk ang. Mahse, ka laka a thuneihna hman chhuah hun a hriat miau avangin zak deuh chung pawn a duh chin chu ka kal tlangpui ve zel mai a. Mi thlem lah chu a han thiam em em mai leh nghal a...



Ka ngaihtuahna te chu ka lo nuih chhuahpui nge ni u Mapuia chuan darthlalang ațang chuan min lo en run a.



"Eng nge," ka han tih deuh ringawt chuan, "nupui ka nei hmelțha em a.." a lo ti ve sup a, lai deuha lei ka chhuah zeuh chuan nui ruh ruh in plug chu a off ve ta a.



"I va thiam tak, hetiang hian hmeichhe sam i chhem ro sak ngun a ni maw?" ka sam chul hliau hliau paha ka tih chuan a lo meng dur țha khawp mai.



"Han sawi leh teh," a lo ti bung vut a, rang deuhin ka ding a, "kei lo hi hmeichhe dang sam eng zat nge i chhem ro sak tawh ka ti.." ti pahin kawngka lam ah ka tlan nghal daih bawk.



U Mapuia pawh chuan hair dryer hrui chu tum tel tawh lovin dressing table chungah a dah tawp a, phun hluk chunga min lo umzui ve nghal avangin kawngka chu ka pawt hawng rawk rawk a. Ka tlan chhuah hnu ah ka va hawi let leh chu naupangchhia tih hmel deuhin min lo nuih ta huk huk a. A va han pa chiang tak aw...



Keipawh chuan a lo chhuah fel hun chu ka lo nghak leh ta tho . Duh aiin ka chhuk thla tlai si a. Keimah ngawt a midang te zuk hmachhawn chu ka chak der lo.



"Nichin khan Sumo ah i inthawn fel ami?" ka bul a lo thlen rualin ka lo ti nghal a.


"Yeap... an lo han thleng hmasa ang a, midangin an lo buaipui mai ang," a lo ti ve dut dut a.



Inhnuai kan zuk thleng thla chu Lucy-i'n min lo en chik ngang mai. Rang deuha min lo pan pahin," i damlo ami?"a rawn ti nghal a.



A ngaihna hrelo fe hian, "ngatinge?" ka ti let hu a. Ani lah chuan ka pang a lo dek a, "i va sa ve.. khawsik sang nei ang hian i biang te hi a tai sen vek," a lo ti ta reuh a. Zak lutukin u Mapuia chu ka han melh ralh a, kan bulah a awm ve reng chuan ka zak zual tulh tulh dawn tih chu a lo hrethiam aniang, kan țhian dun chu min kalsan nghal vut a.



Lucy-i lah chuan, "i nuam lo ami?" a ti sek sek a.


"Chutiang pawh a nilo..." ka ti deuh ringawt chu awmze nei deuh hian min melh ta ralh a. "In ti ami?" ka bengbulah a rawn ti sa sa a. A va han â thei tak..


"La ti lo.. ui, lo kal rawh eirawng va bawlpui ang," ti pahin choka lamah ka kai phei rawk rawk a.


A nui vei pat pat reng bawk nen ka biang chu a tai zual vekin ania ka rin.




U Allan-a a lo lang ve hlawl a, a țhianpa thlah na ni pah fawmin chaw a lo ei ve dawn a ni awm e. Tunlaiah chuan mi tu te pawh mahni hnaah kan buai țheuh tawh a. Ţhian țha ngawih ngawih pawh eizawnna nei tawh chin chu an inkawm tluk tluk thei tawh lo a. U Allan-a pawh hi kan inneih hnu lawk khan a hna vangin a zin chhuak leh nghal a. Sawrkar hnuai ah thawk lovin mimal anga a kal avangin a thawhrim leh hlawkna zawng zawng a hui vek tur a ni a. A hna ah hian a insawrbing viau pawhin ka hria.



Chaw ei laia ka pa thil sawi chuan ngaihtuahna a ti thui duh hle a. " Khawdang daih ah nu leh pa te tello a khawsa tur in ni tih inhrereng ula. Khawvel mit hmuhah chuan nu leh pa ni mai tawh tur, mahni a chhungkaw hran din ve tawh tur in ni tawh a. Zahawmna pawh in nupa a inhlawh chhuah zel tur a ni tawh tih hrereng ula. Fakna hi thlemtu a ni a, sawichhiatna te erawh insiamțhat nan hmang zel ang che u. In han awmna tur khua hi mahni Khua ang tak takin en ula, nuam pawh in ti hma ang. Mahse, fimkhur hle thung ula. A bik takin Mapui, i tan tak hian fimkhur a țul dawn ania. I hnathawh țhat vanga chawimawina leh fakna i dawn changin a karah mi verther te an lo inrawlh ve țhin dawn tih hrereng la, thliar hrang thiam turin fing takin rilru hmang țhin bawk ang che. Mi țha te chuan hna i thawh țhat vangin nangmah an fak tawp ang che. Mi verther te chuan nangmah fak chung chein i hmaa hna lo thawk tawh tu te hming lam telin a sel zui kher țhin ang. Chungmi te fakna țawngkam chuan chapona tlang ah bak a hruai thleng ngai dawn lo che tih hrereng la. I bula midang hming lam tel chunga faktu che thusawi chu i ngaithla ngai tur a nilo.. kar lohah an rilru ang i pu ve ang a, thil țha i tih ve țum pawhin midangte nen i inkaikhin zel tawh mai ang," a ti dap dap a.



Ka pa thu min chah chu U Mapuia pawn a ngaithla uluk viau mai.


Thleng te kan han sengfel zo chu U Maliani ka call ve ta a. Rei a in ring hmain a lo chhang thuai a.



"Hei, Khawbung panin kan chhuak dawn tawh a," ka ti deuh hliai a.


"Chaw te in ei fel tawh em?" A lo ti ve nghal zat a, kan ei kham tawh thu ka sawi chuan, "zingkar ah tal kan lo lang ve lo a ka lo tih lai takin i lo call a..." inthiam loh hmel deuh hian a lo ti ve leh a.



"A pawilo... ruah hi a tla reng bawk sia, lo kal duh pawh ni ula a buaithlak alawm," ka ti ve thuai a. Kan in leh Xenver-a te in inkar hmun reh laiah ka phei pah a.


"Kan inhmu khat tawh vang vang dawh si a, țha deuh khan awm ula, nangpawn i pasal thu zawm thiam la, hmeichhia te chu pasal te kan zahthiama an thu kan ngaihchan thiam chuan mipa fing chin chuan mi an duat thiam em em tawh mai a... fel deuhin awm rawh aw Ahriat," a lo ti leh mawlh mawlh a.



Tawite a nui halh pahin, "ka fel dawn alawm," ka ti a. Ral lehlam tlang dung a chhum zing paw chuk chu ka thlir pah veng veng bawk.



"I pa hian ka lo be ve ang e a ti anih hi," a lo tih takah chuan ka insangmar nasa kkhwp mai.



Tlang lam chu hnung chhawnin tualzawl lam chu ka hawi a, u Mapuia leh a tupa Noah te lo inpawm kual chu ka han hmu zui a. Noah kawhna lamah u Mapuia chuan a hruai zel bawk nen an hmuhnawm tak tak a ni.



"Mate.." ka pa in a lo tih chuan zawite in ka thaw chhuak hmasa phawt a. "Khawbungah chuan i chho tawh dawn amaw?" a lo ti leh a.


"Umm, hei kan chhuak țep tawh a"


"I va ngaihawm dawn ve aw.." zawi ang reng tak hian a lo ti ban chalh a. Thawk ka chelh zui nghal tlat mai. "I ngaihawm dawn hle mai... i awm lo chu kan in te hi a ruak asin," tiin a nui hul leh hak a. Ka insehruh nasa lutuk leh thawk chelh tlat bawk si chu ka thisen zam a lo phu zaih zaih hial thei.



"Engpawh nise i pasal nen khan in inkar țha se la, keini lam chu min rawn ngaihtuah reng reng suh aw," zawi tak bawkin a lo ti leh a. Chhan let ngaihna hlawl ka hriat loh avangin ka la ngawi tlat a.



"A reng rengah i chhungte hi min ngai ve țhin em?" fiamthu anga lang si a a lo tih leh chuan ka mittui a lo tla ringawt a. Ka hrawk chhung a na ut ut bawk.


U Mapuia te putu inpawm kual chuan min lo hmuh hlauin rang deuhin tlang lam chu ka hawi leh nghal daih a.


"Pa..." ka aw chu a lawi lek lek.


"Eng nge ni?" min ngaihsak hmel taka a lo tih thuai phei chuan ka lung a chhe zual sauh a. Ka ngaih vang nge hetianga min ngaihsak har lutuk vanga ka thinrim zawk pawh ka inhrethiam tawh bik lo.


"Kan.. kan chhuak tawh dawn a ka dah a nia.." hmanhmawh deuh hian ka ti ta ringawt a.


"A ni maw... tluang deuhin kal rawh u aw, i nu pawh hian a ngai teh mai che ania, min rawn be ve țhin rawh aw Mamte," phone ka dah hnan mai hlauh hmel tak hian a lo ti mawlh mawlh a. Chhang let tawh lovin phone chu ka off hmak nangin ka mitthla ah chuan an nupa hmel chu a lo lang zui a. Nghet lutukin phone chu ka hum zui ngat ngat a.


"ka ngaih che ka ring ngailo asin le pa" ral hla tak melh vang vang pahin ka ti rilru mawlh mawlh a...



Rei tawk fang chutianga ka din hnu chuan thawk te laa ka hmel landan te chu insiam țhain ka inher a. Mahse, ka hnung lawka Cecilia-i lo ding reng ka han hmu thut chu ka phu deuh dawrh a.



Amah lah chuan min lo la nuih sak zui.


"I lo kal ve a ni maw?" țha te te chuan ka ti hap a. Tualzawl lam kha ka han melh leh a u Mapuia te kha an lo in pawm lut tawh a nih hmel.


"Min thlah tura lo kal em ni i nih a, lo kal rawh inchhung lamah lut ang," ti leh pahin a ding ngawi reng chu ka pan phei a.


Ka kal pel dawn lai tak chuan," Mapuia hi kal san rawh," a lo ti vawt raih a. A sir ah chuan dingin kan in melh dun ta ran a.



"Kalsan nachhan tur ka nei hleinem," ngaihsam hmel zet hian ka ti puat a.


"Ka chanchin hi a hrilh tawh che em?" a lo ti ve leh a. "Ka hre ve nual chuan ka hria," tih zawngin ka chhang let.


"Phai ah lehkha zira kan awm lai khan nupa ang chiahin kan cheng dun a, a fa hial ka pai tih te pawh i hria em?" ka mitah tak min en kal chunga a lo tih chuan ka nghilh dup maiin ka hria.


Cecilia-i chu a nui sak a, "i hriat ka ring lo reng a ni. A fa ka pai a. Kan chhungte'n an hriata kan mualpho a hlauh avangin min vau bet a, damdawi țhahnem tak min ei luih tir a, ka pum chhunga kan pahnih fa kha min tih hlum sak asin.. tihian tun thlengin keichuan ka chhiat phah a. Tuna ka natna te hi kha a pawi rapthlak tak tihin a nghawng chhoh zel kha a nih hi," rilru nat hmel zeta min en chung hian a lo ti leh zel a. 

🖋GROUP LO JOIN THAR LEH THAWNTHU LO CHHIAR THAR KAN AWM BELH NUAL A. A lawmawm tak zet. 🤗


Mahse, he thawnthu hi love story ngawr ngawr tur a nilo a. Tunlai hian love story ngaihnawm tak tak a tam avangin chumi hun chu chuhin love story lutuk lo deuh hi ka lo ziak ve a ni a.



He thawnthu hi chu love story ai mahin awarness leh survey neih nan ka hman duh avangin, thawnthu dang ngaihnawm tak tak inchhiar kar laka lo chhiar ve mai mai tur ang ah khan ngai ula aw. Tum nei a ziak ka nih avangin ka duh ang a ziah tlang ka duh si a.


A hma pawhin ka lo tisual tawh a. Utopia: 1996 S1 leh TETAKTEI te ah khan changtunu dinhmun ang deuh hi ka ziak tawh a. Mahse, ka tihsual miau avangin ka duh ang taka ziak chhuak lovin changtupa te zun vel khan in rilru a luah ta daih zawk sia.🙈


Hei erawh inlo chik chuan changtupa zun ah in uai hlauin ka ziak romantic lo lui deuh ngar ngar tih pawh min hmuh thiam sakin ka ring. Hei hi tum ka neih vang tih kha min lo hriat sak hram hram ula aw.🤗



Inzawhna țhenkhat te chhang nghal lawk ang.


TETAKTEI kha engtik ah nge i chhunzawm dawn?
Ans: He thawnthu zawh hun ah hian aw. Tetaktei kha lo khawih hmasak ka tum deuh nangin ka chawlhsan rei tawh lutuk a, lo khawih leh thut chu ka ngam ta lo deuh a.🙈


STORYFB i chhuah san em ni?
Ans: San lo ve. Story fb ah post kha ka tum deuh a. Mahse, youtube lamah he thawnthu bik hi chu pek kha a lang leh deuh zawk sia. Storyfb ah dah chuan thla 6 hnu ah bak youtube lamah a pek chhuah theih silo a. Tihian hei bik chu ka mimal group lamah ka dah tlang ta mai a ni.