THINLUNG KHAWNGAIHTHLAK - 1

 Thuhmâ 📖🖋

He thawnthu ah hian Childhood trauma thlúr bing deuh bîk a ni dâwn a, chhiartute zîngah fa nei tawh kan awm a nih chuan, he thawnthu chapter tin mai inchhiar lai hian chhiar liam mai lo a, 'hetiang rilru hi ka fanu/fapa te hian an lo pu reng lo maw?' ti a mahni inzâwt chunga min chhiar sak tùrin ka chah duh che u a ni. 

Family Counselor te'n kum 20-30 chhûng teh meuh chhûngkaw chi hrang hrangte, an lo kawm tawhna ațanga an Lehkhabu ziah te, an Article ziak te ka chhiar ațanga finna ka chhar thar a ni ve tho. Ka Mizo pui; a bîkin Nu leh Pa dinhmun a ding mêk te'n hre ve tùr a ka duh tam tak ka ziak tel dâwn a. Nutling pakhat chauh tal paw'n hlâwkna in lo neih phah chuan 'ka hlawhtling' ka in ti thei ngei ang. 💓

Țhalai lamte paw'n in seilenna chhûngkua kha, toxic family nge healthy family a nih zâwk lo chhût ve u la. Inner child healing mamawh ve tak tho in lo ni reng em? tih te pawh in inhriatchhuah phah ngei ka beisei.

THINLUNG  KHAWNGAIHTHLÂK 

CHAPTER 1

Ririni Khiangte Abbra Pitartei 

Mut pindan ațang ka chhuak chiah chu ka ding leh chawt a, țhutthlèngsei ah chuan ka nuhrawn leh mipa pakhat hi inkuah chialin an lo muhìl bawrh bawrh a. Thâwm dìm têin pindan chhûngah chuan ka tawlh lût leh rih a. Pindan indaidan nân a puan kan zar chu ka keu țhem țhem a. An Khum ah tui zet a ka pa lo muhîl bawrh bawrh ka hmuh tâkah chuan thâwk ka la hap a. A chatthla pawh a ni zâwk mai thei.

Pindan ațang chuan chhuah leh nghâl pahin ka khuh lui deuh vak bawk, ka khuh rî avàng chuan ka nuhrawn zâwk chu a harh thuai a. A mutpui pa kuah pah reng chunga a lo hawi chhuakin min rawn hmu thut chu a țhu chhuak hluai a. Keimah pawh min en tawh lovin a mutpui pa chu a sawi zui nawk nawk a. 

Kei erawh bathroom lam panin ngawi rengin ka kal a. Bathroom kawngka ka khàr phui chiah erawh ipik zetin thâwk ka la zui nghek, ka ven phah chuang hlei lo a. 

"Tho rawh... tho vat teh, inha la chhuak nghâl rawh," vîn leh zawi tak si a ka nuhrawn in a tlangvâl a kaitho thâwm chuan ka pa ti harh lo se ka duh ber. 

A riahpui pa pawh chu a harh ve ta a niang, a țawng zui bual bual a. Ka nuhrawn chuan thâwm dìm tùrin a khap nghâl hlak hlak bawk. An in nam chhuak thâwm a reh fel rualin kei pawh bathroom ațang chuan ka chhuak a. Chhuat laia ka nuhrawn lo ding mêk chuan, "Ahriat.." a lo ti sap a, a inthlahrun hmèl hle bawk. 

"Ka bulah insawifiah a ngai lo," tih puat pahin ka nui tel sak a, ka kal pelh lai chuan a sam hui chho thuak chungin min lo la en reng a, pindan chhûnga ka luhsan leh tâkah chuan Gas a On thâwm ka hre zui a. Khum a ka Zirlaibu chu dawhkàn a dah pahin Khumah chuan ka țhu hnawk a, ipikna in min luhchilh leh tak ngial dâwn a hriain inthinharh nawk pahin Lehkhabu chu ka keu zui a. 

Eirawng a bàwl zawh vek hnuah chaw ei tùrin min lo au a. Ka Zirlaibu khup a dâr zat ka han en chuan a lo hma tawh lo khawp mai. 

Hmanhmawh deuhin ka inthlâk sawk sawk a. Țhutkhâwmna lam thâwm pawh chu a țha leh viau tawh. Zîngkâr ațanga zû lo in nghâl țhin hi mi pahnih thum tal an awm reng reng a, thil thar vak pawh a ni lo. 

Class kal inpeih sa vek a ka chhuak phei chu, "ti khân nangmah in lo ei mai rawh, kei chuan i pa ka lo nghâk ang e," a lo ti puat a, chhàn pawh ka chhâng lêt lo.

Zu lo in mêk te zînga pakhat chuan ît hmèl zet hian min lo melh leh duar duar tawh, "Class i kal dâwn maw Ahriat? keini pawh kan lêt leh thuai dâwn a kan rualin kal rawh aw," a lo ti ham ham chu ka melh rum ngang mai.

"A ngai lo mai," ka ti hmak a. Ani hi patling pui tawh lêrh zet mai a ni a. Nupui nei reng chungin ngaihzâwng a nei lâwr zut a. Min beiseina rei tawh viau mah se ka ten ngawih ngawih thung. 

Rilru hmahmawh ru zetin chaw chu ka bâr nghâl mawlh mawlh a. Zu in ho in uangthuang taka min chhawnchhaihna pawh chu ka ûksàk lèm lo. 

Pa Huma bawk chu zu no nên ka chaw ei na lamah a lo chho a, dawhkàn hnuai a stool chu pawt chhuakin a țhu ve nghâl a, ka chaw ei lai chu ka darah min lo kuah thuak thuak a, "class i kal dâwn maw, pawisa i duh em?" a rawn ti sur sur a, a rimchhe bawk si nên ka uak nghek lo chauh. 

"Duh lo.. kal sawn teh," tih hmak pahin rum zet hian ka melh a, ka nin zia chu hre thiam lo ni àwm takin a la nui sûng zui, "I Pa Huma hian pawisa chu ka tlâkchham loh zâwng tak a nia sin, i duh zat zat sawi la, ka pe nghâl ang che," a ti bual bual a. Nang a pawisa kha ka mamawh chhetê lo tih khum sawk sawk chu ka châk tet tet. 

"Eng vàngin nge pawisa chu ka dìl ngawt ang che, kan chhûngte pawh i ni lo," ka ti hmak a. A la nui vur vur tho, "A seh hmeh tur i nei em?" ti pahin ka darah a lo kuah leh a. 

"Dâl leh Âr tui bâk kan hmeh lo, i țhiante bulah khuan zuk țhu ve hle hle rawh," ka ti lêt hlar a, min kuahna chu phelh sak ka tum bawk, a taksa zawi hnuang chuan min uai titih bawk nên ka țhutna ațang chuan ka tla lo chauh. 

Chawhmeh chu a bih dúk dúk a. Phakar zeta ka dar a min kuahna lama ka hnute lo țhâm a tum chu na fê in ka nam nghek a, ani zîngkâr ațanga rui tawh lah chu a lo nghet lo nasa, Stool ațang chuan a let thla tawp a, chhuata a thal huang rualin zu chu a âwmah a in leih buak nghâl vek bawk.

"Khanglang che chuan le!" thinrim fê hian a lo ti a. Thawh mai a tum chu thâ a neih loh êm avàngin a mu leh tual a, a țhiante rui ngaihsam tawh laklawh chuan an lo nuih kur kur ringawt. Kei pawh ka thleng chu thawhpui in ka kal sawn nghâl daih a. 

Pa Huma chuan thei leh thei lo a inbengkàn pah hian, "Zu zuar fanu ve tê tê si hian 'ka chapo e' te hi i ti ve khanglang a, i la hre khawp ang Lalhriatkim," a lo ti tun tun. Kan inchhûng ngei ah hetia min țawngkhum ngam hi thil mak a ni hauh lo, he inchhûng pa ber hian a zir miau lo a. Tute mah hian mi hi an zah tawh lo. 

"Kha ti khân vau tun tun suh aw, nang a pawh engah nge mi chaw ei lai i han tih buai țalh a," Maliani chuan a lo ti vîn țhak a, "Nang pawh kha lo ngawi mai mai rawh. Pu Fala hmei mai mai lehnghâl, ka sawisa hrep mai ang che," ti paha ka nuhrawn lam a zuk hawi chu a ti fuh lo khawp mai. Maliani Chappal lo thlâwk chho chuan a hmai ah tak a fuh siah a, thinrim lutuk in pa Huma chu a ding chhuak a; mahse, a țhiante pahnih chu lo inrawlh thuai in eng êm a ti hman lo. 

A țhiante pahnih chuan kawngkapui lamah an nawr chhuak nawk nawk a. Pa Huma lah chuan, "in la hre khawp ang, tu nge ka nih inhre lo a nih hi, ka duh phawt chuan in chhûngkua hian Jail-ah ka tântîr thei che u," a ti tun tun a. Maliani chuan a hlauh loh hmêl khawp mai. 

Nuihsawh zet in pa Huma chu a en a, "Nang, a hming a sawrkâr driver hnathawk ve satliah khân Jail- ah min khung lul lo ang e. I hna ațanga i bàn theih nân ka hêk nghâl loh che," a tih khum a. 

Pâwna an in nawr chhuah hnu paw'n pa Huma chu a la inhrosa nasa tun tun khawp mai. A chappal bun țhat leh mawlh mawlh pahin," engtin nge a lo tih che a?" Maliani chuan a rawn ti a, "Ka hnute lo khawih a tum a" ka ti puat nâin kan chhûngkaw nun dàn hi ka ning ngawih ngawih tawh. 

"A va han zakthei lo per pur tak aw... He mihring hur lutuk hi chu lo kal ve tawh lo se ka ti ngawt mai," a ti leh hmawk hmawk a, "An zu in na man min la pe rêng rêng lo," hre chhuak thut ang mai hian a ti leh hlut a. Chak deuhin pâwnah chuan a han chhuak veleh a. 

Pa Huma inhrosa kûk kûk chu a motor ah an lo țhut luh fel tîr tawh a. Maliani'n zu man a han dîl chu țha tê tê in a țhiante zâwk chuan an lo pe teh mial a. Pa Huma'n hmusit deuha a lo an khumna pawh chu pawisak loh hmêl zetin a hnial lêt ve hmak hmak. 

"Pa Hum, sawrkâr department pakhat a driver satliah ve mai mai i nih kha, țawng chapo vak duh suh, in pu te bulah ka hêk che chuan i chuti dèr thei a nia" èlsèn hmêl taka a tih leh tâkah chuan Pa Huma pawh a meng zuk zuk a. Kawngkapui ațang chuan ka lo thlîr ve reng mai. 

Pawisa dawng fel a, a lo lêt leh chuan cheng 500 chu min pe a, "Vawiin ah exam in zo dâwn a ni lo'm ni?" a ti nghâl a "Aw" ka ti ringawt, "i țhian te'n lên kual an rawt palh chuan pawisa nei lo bîk a țan a țha lo, kha kha nei rawh," a ti leh tawp a. Ani hi misual tak chu a ni hauh lo, kei aiin kum 6 vêl lekin a upa a, 'nu' tia han auh êm tùr atân chuan a la nau mah mah, chuvàng chuan ka mãwl biak mai zêl. nuhrawn ka lo hrawn tawh dangte angin min ti duhdah ve lo a, 'Nu' ti a ka auh a phut ngai lo bawk. 

Ka pa hi zu ngawl vei dik tak a ni a. Zîngkâr ațang zu in țanin chhûn ah te a in belh leh a, tlai chaw ei hmâ ațang in leh nghâl in a rui chhum hmawk zêl. A rui reh hi zànlai ah lo harh ta ang se la, zu bawk a in leh nghâl a. A in tùr awm lo a Maliani'n a lo hralh zawh palh châng chuan kut a thlâk hrep mai țhìn. Kei thlengin ka tuar a, zànlai pawh ni se a zu in tùr zawn sak tùrin min tîr chhuak ziah zêl.

Duhthusàm pakhat ka nei a, chu chu thih daih a ni, keima nunna la tùr khawp a ka huaisen loh vàng chiah a, la dam ve mai mai chauh ka ni. Intihlum tùr a huaisenna ka neih hun chu ka duhthusàm ka tih puitlin hun a ni ang.

Pindan ah lût lehin ka pa bawk chu ka thlithlai leh a. A lo la mutui ngang mai, a nupui leh fate hi mi kut tuarin thi chhawngin lo awm palh pawh ni i la ani kher hi chuan min chhan lul lo ang. Amah leh zu chiah a hmangaih a, engtik ah emaw chuan a hmangaih ber zu chu a la thih puiin ka ring.

Ka khum lam ka pan lai chuan ka phone a lo in 'ring' tâwp ve chiah, rang deuh a la kãngin min lo call tu, ka țhiannu Lucy chu ka call lêt nghâl a. A lo chhâng rang êm êm zui, "Lalhriatkim, exam tùr kan nih hi i hre lo em ni? Lo hmanhmawh ve ta che," bak hlur hian a lo ti nghâl a, "Ka lo tlàn," tih leh phone chu off ka rual a, Bag-ah mamawh chu khung fel sawk sawkin an in lam pan chuan ka tlãn nghâl a. 

Lucy chuan a scooty bulah dingin sana a lo bih sek tawh, ka han thleng chho chu rum taka min lo melh pahin min lo lim leh nghek a, "Chaw pawh ka ei hmanhmawh ve lutuk; mahse, Pa Huma te nên buaina kan nei leh deuh a, ka lo tlai vek a nih hi," thaw hlawi hlawi paha ka tih chuan a mit meng chu a nêm ta deuh.

"Engati nge, i pa nên an insual ei ni?" hlauhthàwn hmèl deuh hian a ti a. Lu thin nak pahin scooty-ah chuan lâwn tùrin ka mit mei nghâl a. A hnungah țhu nghâl in thil thlen dàn chu ka hrilh mawlh mawlh a. Keimah ai ai in a thinrim leh tawh. 

"Awi.. pa Huma hi chu a tenawm chiang e, a chapo ve ropui si. Nichin lawk khân min lo tlàn pêl tak a sin, an rui àwm si a, um vak i la chhaih buai i la accident daih se," a ti a. 

"I ngam ngawt em ni?" ka tih fiam chuan, "eng nge ka ngam loh ang, ka tibuai châk tak tak a sin, anni zu rui kha lo accident pawh ni se an ruih vàng ah bâk tuma'n an ngai lo ang," thu tak deuh hian a lo ti lêt a. A tih duh tak tak mai chu ka hlau leh hnuhnawh. 

A chhan chu Lucy hian min chhan nân chuan eng mah tih hreh a nei ngai lo. Thla hmasa lawk paw'n ka pa zu rui in kut min thlâk a, Lucy te in ah hian ka tlân chhia a. Ani thinrim lutuk hi ngawi rengin a kal chhuak a, kan in ah a lo zuk kal a, zu in dangte awm țhep țhawp laiin thingfâk nên ka pa a lo zuk luhchilh hmiah tawh. Khami țum ațang khân ka pa paw'n kut êm chu min thlâk tawh ngai lo; mahse, a țawngkam chhe lutuk erawh ka dawng nitin a, a țawngkam malsàwm lo tak tak ka dawn țhin te hi engtikah emaw chuan a lo thleng dik ang tih ka hlau țhìn, ka lei Pathian a ni ve miau si a. 

A hmâ chuan ka țhiannu Lucy te pawh hian zu bâkah damdawi lam thlengin an zuar ve țhìn; mahse, ani chu a nu leh pate an â lo a. An mahni'n ruihhlo an tih ngai loh chu thuhran, an inkhawl thiam êm êm a. Kum nga chhûng vêl kha an inzuar hmingchhe ve deuh a, a hnuah chuan 'In' țha tak an sak bâkah wholesale dàwr siamin ruihhlo zawrh an bansan leh hmak a. Tihian, kum li nga a liam leh meuh chuan mi tu mah in ruihhlo zuar țhìn an ni tih an hre zui tawh lo, nuam sa takin an khawsa chho mai a. Keini chhûngkua erawh ka nu nu leh pate ațanga zu zuar thlah kal zêl kan ni chung pawh in, In tlabal deuh ah kan khawsa ve naw naw a. Ka nu hi class X ka zir laiin a boral tawh a. Vawi khat pawh ka ngai chhin ngai lo thung, a thih pawh khân ka mittui far khat mah a far ve lo. Ka nu leh pate hi zu hmun a intawng tho an ni a, ka nu hian school a chawlhsan hmâ a, zu in tùra an In a chuangkai ţhìn te lo chhawnchhaih kha nuam a ti ber țhin ti i la a dik ang. Ka pa pawh kum naupang tê si in zu hmun ah a tâl hmâ a. Tichuan ka nu nên chuan inhmèl duh chho țanin inneihna mumal pawh awm lovin ka pa chuan a awm chilh ta tawp a, ka pi leh pute pawh zu vàngin an thi ve ve tawh. 

Tichuan ka nu leh pate pawh chuan thiam dang nei ta lo chu zu bawk an zawrh chhunzawm a. Kum 20 êm pawh an la tlin hmain kei hi min nei ve ta ringawt a, ka pianhlim ațangin nu leh pa hmangaihna ka dawng ngai lo ti i la ka sawi sual in ka ring lo. 

An kum a la naupang ka tih tawh kha. Chuta kârah zu an in ve ve bawk a, ka pa aiin ka nu in zu a la heh zâwk zui! Ka sen laia min enkawl dàn zawng zawng hre lo mah ila kum 3 kum 4 chho a min enkawl dàn erawh tun thlengin ka la hre fai vek. Chutiang vàng te pawh chu a ni mai thei, ka nu leh pate hi ka hmangaih in ka hre lo, an ni pawhin min hmangaih lo bawk. Ka nu leh pate mizia sawifiah nân a țha ber chu 'Nu leh Pa ni tlak lo tawp te'n Fa an nei ve ringawt' tih hi a ni. 

Kan In chu zu in mite fuan khâwmna hmun, Lehkha an den tlaivâr țhakna In, pawmlai nei leh nei lo te inthliar hrang lova, mipat hmeichhiat na an hman na hmun 'Lawi lo dawrpui' dik tak a ni. Ka dam loh châng paw'n damdawi in ah min hruai tâk ka hre ngai lo, ka nu khân zu rim nam phial phual chungin damdawi mûm a ràwt dip mawlh mawlh a, chu chu min tulh tawpin khumah min muttîr mai zêl. Khawsik vàngin tlun hluah pawh ni i la min mut lum pui chu sawi loh, 'thi law law la ka buai lo zâwk tùr' min tih khum fo a, khawsik sâng vàngin khumah ka mu reng tih hre vek chung khân tlaivâr țhakin Card min den san thei tho! Ka pa aiin a țawngkam a chhia a, a chhan hriat si loh a kut min thlâk chiam lah a hrat, a châng phei chuan a tih duhdahna tuar tùr ngawta a hrin ka ni ni mai te hian ka inhre țhìn. 

Naupang dang damlo te'n thlahlel taka an nu te hming an lam mawlh mawlh chânga an nu te'n duat taka an lu ah te chùl sak a, 'nachhawkna khân a chhâwk che ang a, i dam leh vat dâwn alawm' tia an țawng thlamuan țhin ang kha kei chuan ka nu lak ațangin țum khat mah ka dawng lo! Ka țawngkam dawn ve țhin chu, 'A damlo leh ta ngawt e, damdawi kha ei la ngawi rengin Khumah khân mu rawh' tih ang reng te, 'Hetiang naupang hrisêl lo lutuk hi chu dam reng lo in thi daih la i tân pawh a țha zâwk ang' tih ang reng te kha an ni țhìn a. Min hringtu ka nu kha nuhrawn râpthlâk ber an sawi țhin ai pawhin ka lakah a nunrâwng zâwk. 

Ka naupan zual lai tak tak chuan nu ber in eirawng bàwl a ngaihsak ngai miau loh avàngin chaw ka nghei ngun țhìn a sin aw. Khatih hunlaia ka dinhmun kha fahrah enkawltu neilo te nên a danglam chuang lo. Kum 6 a upa ka nih tawh hnuah zàn khat chu ka hâpui nâ avàngin ka khua a sik hluah a, keimah in nachhâwkna ka in zawn chawp a, ka ei hnuah ka khawsik a sàn êm avàngin ka mu lum leh a. Ka nu leh pate erawh mi dang te nên Card dêngin țhutkhâwmna lamah an awm tlat a, ka chanchin lo ngaihven tùr tal paw'n a tu zâwk mah kha pindan chhûng ah an lo lût miah lo. 

Nachhâwkna in min chhâwk hnuah chuan ka hâpui na ngut ngut pawh a ziaawm ve tial tial a. Mut chhuakin min lo zem a, mumang ramah ka cheng riai riai hman tawh tihah mipa pakhat hi ka mut na khumah chuan a lo lawn thut a. Ka harh chiang leh hlawl chu ka kâ lo hup bet nghâl in ka kêkawr hâk lai min hlih thlâk sak ta mai a!

Kum 6 mi lek la ni mah ila puitlingin khatianga min rawn ti nghâl bawrh bawrh kha thil țha a ni lo tih ka hre thiam chawpchilh thuai a, min chhan tùr a ka nu leh pate auh ka tum lahin ka kâ a hup bet tlat mai bawk si, "Bengchheng i siam chuan ka that nghâl ang che," tiin min vau khur khur a. Ka hlau thlabâr lutuk khân khum lu tail bang chu ka chùm ri ta vak vak a, a tâwpah chuan kan mut pindan ah chuan mipa pakhat lo tlàn lût in min pawngsual tum tu chu khum ațangin a rawn phih thla tawp a. Khum bul chhuat ah chuan țhutchilh in a hnek zui siah siah bawk. 

Min lo chhantu chu ka pa emaw ti in thlabâr deuh a ţap chungin "Â pa" ka lo ti lawm lawm a. Chu pa in a duhtâwk a min pawngsual tum tu a sawi sak hnuah lo ding chhuak in bang a plug chu a hmet êng a, pindan chhûng light êng hnuaia min lo chhantu hmêl ka hmuh rual a ka awm dàn kha tûn hnu thleng a min ti na ngut ngut tu a la ni fo mai.

Ka hlauh thlabâr ber laia min lo chhantu chu ka pa ni lovin vawi khat pawh ka la hmuh ngai loh mipa dang daih a lo ni!

Chu pa mitmeng ah chuan min lainatna nasa tak ka hmu thiam bawk, țap țuau chunga "â pa" lo ti mawlh mawlh tu hmeichhe naupang khân, a pa thlamuanna a mamawh êm êm a; mahse, a beisei angin a hlauh thlabâr ber lai paw'n a 'Pa' hmêl rêng rêng a hmu si lo mak ti leh hamhaih hmêl kha a lainatawm ngawt ta ve ang. 

Vawi khat pawh ka la hmuh ngai loh Mipa chuan saruak titih a ka awm chu Rizai in min lo khuh nghâl mawlh mawlh a. Rizai chawp chuan min pawm nawlh a, min chhuah pui hmain chhuat laia mipa let reng chu a chhir leh țawk bawk. Pindan chhûng ațang min pawm chhuah laia ka thil hmuh khân min ti hamhaih a, ka na êm êm a, ka nu leh pate hian min hmangaih rêng rêng lo tih ka hriat thiamna hmasa ber a ni ta bawk. 

Bial hnih ah in țhenin țhutkhâwmna lamah chuan lehkha dêng an lo țhu kual țhup a. Ka pa chu mipa lam ho den naah a lo țhu ve a, ka nu pawh hmeichhe lam te in Card den na lamah a lo țhu ve bawk. Misualin min sual a tum laia ka thâwm siam kha an hre lo a nih pawhin chhantu ka hmuh ruala ka țap thâwm tal kha chu an hre ve àwm reng si a. Pindan chhûngah an fanu chiah ka mu tihte pawh an hre vek dâwn a. Chuti chunga Card an lo la dêng mai mai thei kha fate hmangaihtu nu leh pate tih tùr a ni dâwn em ni? 

Min lo chhan tu pawh chu ka nu leh pate lakah chuan a thinur hle a niang, thinrim zetin Ka nu Card dêng lai chu a au a, "In inlêng pakhat in in fanu pawngsual a tum tih hre duh lo lêk a nu leh pate zâwk in han awm chu le...! Police ka pun zâwk mai dâwn em ni? In nupa hian fate ngaihthah case in ka mantîr mai ang che u," a ti ta thlâwt a. Chutiang thil a sawi hnu pawh chuan ka nu leh pate awm dàn chu a ngai reng a, Card la dêng mawlh mawlh chung chuan keichu an Card den na bul țhutthlèngsei a mu tùrin min hrilh ringawt! 

Pindan chhûng ațangin min pawngsual tum tu pawh a lo chhuak a. Kut tuar belh leh hlau takin kawngkapui ah a tlàn chhuak nghâl a. Kha pa kha tu nge a nih ka hre ngai lo, kan In hi ruihhlo ti țhìn mi chi hrang hrang lo fuankhâwmna a ni a. Kei naupang mai tân tute nge kan In a lo chuangkai țhìn te chu tih lah lo hriat vek sèn pawh a ni lo, ka nu leh pate erawh in an hriat ngei ka ring. 

Mahse, a tâwpah chuan min lo chhantu khân a thil sawi chu ti tak tak duh dâwnin an ring ta deuh nge ni ka pa zâwk chuan ka nu bulah, "va mutpui rawh," a ti ta a. Ka nu lahin a lo duh bîk hauh si lo, an pahnih chuan an inhnial leh hrep a; mahse, ka pa zâwkin a chappal a ka nu a vawm tâk țawlh ah chuan ka pa chuan kut a thlâk belh hreh dâwn lo tih ka nu paw'n a hre thiam ta a niang, thinrim eng phiar chungin ka nu chuan a Card ken lai chu a paih thla a. Țawngkam chhe deuh deuh a keimah zâwk min puh chung khân min lo chhantu lak ațang chuan min la hrang nawlh a. Chhuatah min dintîr a, ka tukkhum ah dìm lo deuh a min nam nawk nawk pahin pindan ah min luhpui leh a. 

Chumi zân a min țawngkhum dàn te chu a râpthlâk a sin aw, "naupang tê si hi i za lutuk a, nangmah zâwk hian mitmei i lo hmuh hâwrh hâwrh a niang chu lo mutpui che a tum ni," min ti zêk a. Khum a ka țhu ngawi dâk chu min sual tum tu in ka thuamhnaw a pawhthler te kha min hlih sak paha. 

Ka thiam lohna ni miah loah keimah zâwk min hau hrep mai kha mak ka tih tluk zetin, khatih lai khân naupang mai mah ni i la, 'Â nu hi chu a sual e, awm ve lo daih se nuam ka ti zâwk ang' tihna rilru ka pu dèr tawh. 

Ka pa kut tawrh a hlauh vàng chauhin min mutpui ta a. Chutia kan mu te chu Card a la dêng ve châk tho bawk si nên ka lakah a thinrimna a hrithla a, hlauhlawp a ka mu tawm hle hle te kha min kêk leh nawk nawk pahin, "naupang tê tê si tlangvâl i ngaizâwng ngam tawh a nia.. tûn lo hi țum engzat nge mipa i mut pui tawh?" ti te chuan min hau zêk a. 

Amah leh amah chu a in âng thinrim zual a. Chhàn ngaihna hre lo a, ka ngawi reng chu ka hnungzâng ah min chùm zui dawt dawt a, naupang mai ka nih lai aţang rilru rualban lo a min siamtu chu ka nu ka ti lo thei lo. Rilru na tâwp khâwk leh dawnsawn ngaihna ka hriat loh chen thlengin min ti hrehawm a. Hmangaihna te khawngaihna te hi a awmzia ka hre thiam ve lo. Ka naupan têt aţang hmangaihna ka dawng ngai miau lo a. Ka nu leh pate ber in vawi khat mah khawngaihna leh lainatna te nên min enkawl ngai tlat loh avàngin an mahni ngei pawh hi khawngaih lêt ngaihna ka hre lo.

Class X board kan exam laiin ni khat exam zo ka haw chu pumna in ka nu chu a lo vial ngawih ngawih a. Țanpui miah lovin ka thlîr tawp, thlanin a bual huh vek a, a rûm a rûm bawk; mahse, ka damloh chânga vawi khat pawh min buaipui ngai lo ang chiah khân vawi khat pawh ka buaipui lo. Ka uniform kha ka thlâk mawlh mawlh a, Lehkha ka zir san daih. Chumi tlai ah la la chuan a thi a, a ruangte pawh ka kîl ve tak nâin ka mittui far khat pawh a tla lo. A thi kha ka làwm chu ka ti hauh lo; mahse, pawi ka ti lo tih erawh ka inhria. Ka pa erawh zu rim nam huam chungin a ţap hluam hluam a. A ruang chu kan tlaivâr pui a, a tûkah kan vui liam a, a tûk leh a lo thlen chuan in Exam tùrin ka kal lehnghâl a.

Mite chuan ka nu boralna chu ka tuar an ring a, 'i in exam țha thei dâwn em ni? In exam lo law law la, beinawn leh mai rawh, tuma'n an dem lo vang che,' te kha an tia. Ka nu thihna in keimah ah nghawng pakhat mah a nei lo tih an hriat loh avàngin an sawi ve mai mai ah ka ngaih sak.

Ka nu thih ațang thla thum êm pawh a ral hmain ka pa chuan nupui ang reng deuh a nei lehnghâl a; mahse, chu hmeichhia nên chuan thla 3 vêl chiah an in kawl! Chumi hnu ațang chuan nuthlawi zu heh deuh deuh te leh nula senior zu heh zet zet te chu nuhrawn atân ka nei dawt ta zut a. Class X board kan in exam zawh ațanga BA final Year ka zir thleng hian Nuhrawn 13 vêl zet ka hrawn hman. 

Tûn a ka nuhrawn ni mêk Maliani hi ka pa nupui tawh te ah chuan a la naupang ber ang, mah se amah pawh hi sex worker ni țhìn tho a ni. Call girl an tih ang chi hi a ni, an Veng chhûng ațang an hnawt chhuak a, ka pa nupui lo ni tawh țhìn dang te ang bawkin a tirah chuan a ruih êm avàngin a lo riak a. Chumi hnuah chuan zu in tùr a duh avàngin ka pa zu chhuang chu pui ve țhìn in, inchhûng sekrek thleng a khawihin kan In ah a riak ve mai zêl a. Hun a lo liam leh deuh hnuah chuan tihian an in kawl ve leh ta chu a nia. 

Sawi leh sawi hnu ka pa hi zu ngawl vei dik tak a ni miau a. Harhfîm lai nei lêk lova zu ngawt a buaipui avàngin Maliani paw'n tlangvâl dang a riah pui zauh zauh țhìn, ka pa zu rui hi zànlai ah te a lo harhfîm châng chuan Maliani te chu a phâwk fo a. Chutiang te a lo thlen chuan kut an inthlâk leh hrep mai zêl. 

Chutiang chu ka hringnun hman chhoh dàn a ni. Damchhan ka nei lova, hmathlir lah ka nei bawk hek lo. Ka naupan zual lai ațanga ka nu min enkawl dàn khân nasa takin ka rilru ah nghawng a nei a, thluak lam zîr mithiam te'n Childhood Truama an tih natna hi ka nei bawk. Keimah ka inringtâwk lova, chutih rualin ka luhlul êm êm lawi bawk si. Mi dangte pawisawi ka hlau êm êm a, ka thiam lohna ni miah loah pawh ngaihdam ka dîl fo țhìn. Ka thinrim chângin ka thinrim na sawi chhuak thei lovin ka ţap tawp zêl. Chumi awmzia chu, 'naupan lai ațangin ngaithla tu leh hre thiam tu ka neih ngai loh vangin ka rilru awm dàn kha sawi chhuah dàn ka thiam loh vang zâwk a lo ni'. Ka hlauthâwng hma êm êm a. Chutih rualin achâng chuan hlauh eng mah ka nei leh ngai si lo, ngaihsaktu leh hre thiamtu mamawh rêng rêng a țhanglian ka nih avàngin ka laka țhat chhuah der tute chu ka ngaina thuai țhìn; mahse, an mizia dik tak ka hriat chian hnuah erawh ka nu leh pate ang tho an lo ni leh țhìn. 

Class Xi ka zirlai khân duh deuh mai ka nei a. Amah pawh chuan min be țha ve țhìn lutuk, a tâwpah phei chuan min 'BEM' ta hial a. Hlim êm êm a 'ka duh ve thu' chhânna ka pêk hnu lawkah min 'BEM' chhan dik tak pawh a lo lang chhhuak nghâl a. 'Inrinni ah hian Tlawng a kal kan rawt a, lo tel ve rawh aw, zu i thawh ve ang a' a han ti mai kha chu ka nâ in ka zak êm êm a. Kha thil thleng avàng khân tu mahin min duh ve tak tak ngai dâwn lo a ngaihna lian tak ka nei ta a, min kâwm a an zîng a tel ve tùr a min sâwm țhìn tute paw'n ka lak ațangin duh pakhat chauh an nei, chu chu kan zu zawrh a thlâwna ka thawh theih an beisei țhìn vàng a ni. 

Ka țhiante ni a ka lo ngaihte pawh ka thlauhthla tial tial a, a tâwpah chuan Lucy chiah hi 'țhian' ti a sawi tùr ka neih chhun chu a ni tawh mai. 

College kan han thleng chu țan hun a lo ni lek lek tawh a. Exam tâwp nî a nih bâkah kan huphurh lo tlâng hlawm nge ni, mi dangte pawh chu an lo thawven hmêl hlawm khawp mai. Rei lo tê hnuah exam pawh kan țan ta a, ka chhâng țha viau chuan ka inhria. A chhâng zo hmasa te pawh haw mai lovin College campus-ah chuan kan awm khawmuang rih a. Class inthlahna tùr ang reng deuh a zàn khat riak a kal chhuah an rawt a, Lucy chuan min ngaichâng deuh hian min melh leh țhìn a, a hmêl ațang chuan a kal ve châk hle tih ka hre thei. Kei erawh in an zînga kal chhuah chu ka tum lo bur. 

Kal ve tùr ang a mitmei ka hmuh lêt loh vàng chu nge ni, " Keini chu kan kal ve theih hmel si lova, tikhân lo rêl zui rawh u, kan lo va kal hmasa ang e," a ti a. Ka bânah min lo kuah nghâlin a scooty hunna lamah chuan min kai phei dat dat a. 

"Ahriat," ti a min lo kohna rî avàng chuan kan ding dat a. David-a paw'n kan bul chu lo thleng chawpchilh ve nghâlin min en deuh vang vang a, "Hmalam hun a hriat si loh, tûn bâk chu kan department ho hi kan inhmu khâwm thei tawh lo mai thei a. Hriat reng tùr atân tal pawh tûn țum chiah chu lo tel ve la?" a ti a. Keiin kal ka duh chuan ka țhiannu Lucy chu kal duh tùr chiang sa ah a ngai pawh a ni mai thei. Min en bîk run a. 

"Ka kal châk lo," zawi tê in ka ti lêt a. David-a chu a lo thaw hluai a. Lucy chu lo țawng ve tùra a duh ni àwm tak hian a mitmei rulh rulh a, ka hre thiam ve vek sia, ka nuih a za viau mai; mahse, ka rilru zawng zawng min hriat thiampui tu Lucy chuan, "Aaa.. Vid, kan lo kal ve lo zâwk mai ang. Tikhân kan tel lo khân nuam deuhin in va hmang dâwn a nia," a ti a. David-a chu nuih lui var var pahin min inher pui a. 

David-a bawkin zawi tê a, "Ahriat" a lo tih leh chuan hawi lêt in tãwi tê in ka nuih a. Sawi duh tam tak nei hmêl pu chungin min lo en reng mah se kan kal san ta tho. 

Kan inchhûngkhur boruak ka nin êm avàng chauhin zirna hi ka chhunzawm hrâm hrâm a. In a awm chuan zu chhuan rim nên, zu rui rì bual bual thâwm leh Lehkha dêng a pawisa inthâp thâwm kârah hun hman a ngai a. Chutiang thil tlàn san nân chuan college-te hi ka kal vêl mai mai a ni ber ang chu! Mahse, khawi hmunah pawh awm mah ila 'Zu zuar fanu' ka nihna chu ka tlânbo san thei chuang lo. Class-ah zirlaite leh Professor te'n kan tûnlai ram chhûng chanchin sawi ho na te han nei i la, 'ei rûkna leh ruihhlo' lamin khel zui a hlawh ber țhìn a.

Kan zirtîrtute mai bâkah ka zirlaipui te zawng zawngin kan zu zawrh hi an hre ve vek a. Ruihhlo țhat loh zia leh a zuartu te'n ram hnuk an khawih pawi nasat zia an sawi ho bawrh bawrh changte hian inkiltawih deuhin ka lo țhu ve tlawk tlawk zêl. 

"Vid-a hi chuan a duh tak tak che maw le?" Lucy-i'n a tih chuan ka melh ralh a, "Hey.. mi dang angin zu a in ve ngai lo tih chu i hriat reng kha," a ti leh nang nang a. 

"Zu in ngai lo mi a nih vàng tak chuan ka hnaih duh lo zual alawm," ka ti lêt chu hriat thiam loh hmêl deuhin min lo en hâ a.

"Eng nge a awmzia? Mipa dangte i hnar chhan chu a thlâwna zu i pêk theih an beisei țhin vàng a ni a. I hnar țhìn pawh ka hriat thiampui lutuk che; mahse, Vid-a chuan zu a in ve si lo va, eng vàng ngawt in nge i hnaih duh loh a?" min hau ti tih pahin a ti zui kha kha bawk. 

"Zu a in lo a, a awmzia i hria em? Chhûngkaw țha tak ațang a seilian a ni tihna a nih chu..." ka ti lêt chu min melh rum deuh vak nâin ka sawi awmzia dik tak a man thiam rualin a ngawi ta reng a. 

Ka seilenna chhûngkaw mil pui tawk te lah ka hnaih duh bîk si lo. Chhûngkaw inenkawlna țha tak ațanga seilian; min lo duh der ve tute pawh phû lo intihna lian tak ka neih avàngin ka hnaih ngam chuang bawk si lo, ka nun ah hian mahni insitna lian tak a bet tel miau tawh a, chu thil lah chu mi dang vàng ni lovin ka nu leh pate vànga ka neih a la ni zui bawk. Duhthlanna dik siam thiam tùr a zirtîrna ka dawng ngai lo a, kawng dik leh dik lo kawhhmuh ka ni ngai lo bawk. Mi tute pawh hian pian chhan țha tak kan nei vek an ti țhìn a, tûn thleng hian ka lo pian ve chhan tùr àwm ang rêng ka la hre thiam ve lo! Duh thlang thei ni i la chuan pian ve hi ka thlang ngai miah lo ang! 

Nun beidawng dang tam tak te chuan an lo pian ve avàngin siamtu Pathian an dem fo a. Kei erawh chuan min hringtu ka nu leh pate ka dem ber, an mahni nupa inkâr lek pawh rêl fel thei lo tute hian min hring ve ringawt a. Khawvêl pian ken nu leh pate leh fate inkâra hmangaihna piang nghâl tùr a ruat sa tak ngial pawh min hlui ve thei bawk si lo. Eng rilru nge an put a; hmangaih miah loh tùr si a min neih chu le!? tih zawhna hi ka dam chhûng a ka zawhna neih tùr a ni kumkhua tawh bawk ang. 

"Naktûk chu kan Pahnih lekin Tuipui D ah zin i la?" Lucy chuan a ti barh barh a. A Putea te chhungkua hi Tupui D ah an awm tih a sawi fo țhìn. 

"Ka châk ve reng. E, u Maliani'n chêng 500 min pe tak a sin, Cafe-ah châwl kawi i la?" ka tih chuan a nui kar kar a. Amah nên kan inhmachhawn chângin mãwl biak tawp zêl mah ila Lucy bula a chanchin ka sawi chuan 'u Maliani' ka ti ve hrâm hrâm zêl. 

"Châwl i la a pawi hleinem, Tuipui D a kal chu lo ngaihtuah rawh aw. Kan kal dâwn chuan khu lamah kan dàwr bungrua semtu tùrte kan zui dâwn a nia," a ti leh mial mial a. Zin chhuah daih pawh chu a châkawm viau mai. 

Dik tak a sawi chuan ka naupan laia thil thleng avàng khân zànah hian thin thi in ka mu mang ngai lo. Tûnah phei chuan nula ka ni ve tawh a, zu rawn in țhìn tam tak te hian ît hmêl tak takin min melh fo tih lah ka hre thiam ve vek a. Kha zân ang khân pindan ah min lo luhchilh a min lo khawih duh mai tu an awm ka hlau tlat tawh a, chutiang thil a lo thleng a nih paw'n ka pa hian min chhan dâwn lo lutuk tih lah ka hre chiang bawk si nên; kan In a awm zawng ngaih a ngam lo țhìn êm mai. 

Chumi nî nilêng chuan Bazâr ah te kalin kan vak kual nasa hle a. College exam zawh nî a nih avàngin college dang zirlai exam zo tawh te pawh an tam khawp mai. Lucy hian hmêlhriat a ngah avàngin min lo be ding sek leh nghâl.

Kan haw a kan veng chhûng kan tlãn luh meuh chuan khua a thim titih tawh. Ka pa in rui bial bual chungin min lo àn khum leh hrep duh dâwn tih pawh ring lâwk vek mah ila vawiin na nâ nâ chu ka haw tlai lui pakhat ve deuh bawk a. 

Rin lâwk ang ngeiin kan kawtah Lucy-i'n a scooty a tih din rual chuan kan kawngkapui inhawng huau sa ațangin ka Pa chu a lo chhuak nghâl a, "Mihûr nu, khawiah nge tun chen chen i vah khaw tlai a?" a lo ti nghâl khur khur rêng bawk! Rang zetin Lucy chuan, "Pa Fala chu țawngkam i duh tui lo thei ngawt mai," a ti nghat a. A Helmet phelh pahin pai țuang țuang chunga kan awmna lam pana ka pa lo kal chu a melh rân bawk. 

Kei pawh ngawi rengin Scooty ațang chuan ka chhuk a, ka țhiannu a hmaizah vàng nge ni, ka pa pawh chuan engtin min ti zui tawh lovin kan bulah chuan a lo ding ve a.

Irhfiak uk uk pah hian, "Lucy i nu leh pate an dam maw? I țhiannu nên chuan khawi ah te nge in han lèn a?" nèlawm hmêl deuh hian a ti țha leh hnuhnawh. Lucy chuan ei loh hmèl zet hian a nuih lêt a, "College kan in exam zo chiah tih te pawh i hre ve nange?" a tih chuan, "E.. a lo ni maw?" Mak tih hmêl deuhin ka pa chuan a ti hû a. 

"Ni e, ni e, Ahriati hi ngaihsak țha ngai hek lo che, eng chen nge a zir tawh tih takngial pawh i hriatpui lo chu a nia," Lucy chuan a ti zui bai bai a. 

Zirna chhunzawm zêl tùr a keimah leh keimah ka inbuaipui chhoh dàn te chu mitthla ah a lo lang thar leh iar iar a. Primary kha chu lehkhabu leh uniform te a thlâwn vekin ka dawng țhìn a. Middle school ka rah ve dâwnah erawh ka nu leh pate berin ka zirna lam rêng rêng min ngaihvenpui loh avàngin an zu fûn dah țhat țhenkhat ka ru chhuak a. Lucy nu bulah hian tlàn chhoh puiin ani'n min lo hralh sak leh țhìn a. Chuta țanga ka pawisa hmuh chhuah chuan buaipui ngai zawng zawng ka inbuaipui ve mai zêl. 

Vawi khatmah ka exam result min zawt ngai lo a. Nitin school kalin chhuak ziah mah ila 'mamawh i nei em?' tih tal pawh min zawt ngai hek lo, kumin hi ka last year a ni tih pawh a hre ve hauh lo tak tak ang chu!

Ka pa chuan, "Fanu college zir zo thei ka lo nei reng a ni maw! kan làwm dâwn em ni? Eng a lâwm nge in duh?" a ti hluai a. Ve ngei chuan a! Lucy Scooty bula ka ding chu ka darah min lo kuahin pa nèlawm tak ang mai hian a nui vei huah huah a. Lucy nên chuan ei lo tak hi kan ni tawp. 

"Naktuk ah Tupui D ah Ahriati nên hian kan zin dâwn a nia. Keiman ka sâwm a keimah bawkin i hnênah ka sawi thlap tawh hi aw, lo phal lo hnuhnawh leh vêl lo la, Ahriati hauh nân te khân lo hmang lo ang che" Ka țhiannu in a mizia hre chiang deuha a tih leh chuan, ka pa chu a hmâ zawng aiin a nui ring lui vêl a. 

"Lallucy țhìn hi...!" ti pahin Lucy chu a han kuah deuh thuak thuak a, "I pa Fala hi min va'n ngai sual awm êm êm ve a, in țhian dun hi ka hmangaih ber che u a, ka hau phal rêng rêng lo che u a sin," a ti duah a. A thu sawi chu a tak tak ni thei se a tihawm ngawt mai. 

"Awi, min kuah lo teh, i thlan rim ah pawh zu rim a lo nam tlang tawh a nia, ka rimchhe vek dâwn," Lucy chuan a ti hlur a, ka pa chu a nam deuh vak bawk, ka pa lah chu a kâ ah pawh zen sak i la min seh lovang tih mai theih tùr hian a nui huah huah a. 

"Mate lo lût tawh rawh le, college zir zo thei fanu ka lo nei reng tawh a, i nu in âr sa a roast kha i ei țeuh dâwn a nia," ti a min lo kuah leh chuan ka hnial lem lo. Lucy chu mitmei in ka ngaihtuah awm lo tih chu ka hrilh bawk a. 

Ka pa nên in lama kan inzui phei chu, "Pa Fal naktûk chu lo theihnghilh miah suh, zîng kârah Ahriati kha ka lo sâwm dâwn a nia," ti in a lo àu leh hrâm a, ka pa paw'n pâwr tâwkin, "All zaw, all zaw," a ti lêt a. 

Inchhûngah chuan mipa pathum hi an lo awm ve a, ka pa chuan, "Hei, ka fanu hian college a zir zo ve tawh a nih chu, kei ve mai hian fanu college zir zo thei ka nei ta mai chu awm dàn ka thiam lo lek lek mai. Matei hi ka chhuang a nia," a ti lût lûng lûng a. A thu sawi tâwp lam avàng chuan ka pa chu ka en ngawt ngawt ringawt.

Ani erawh ngaihsam hmêl tak hian țhutthlèngsei ah a țhu hnawk a, nui deuh sûng a min lo en chhoh pahin, "Kan thlah te zîng a college zir zo thei awm chhun i nih hi, ka chhuang lutuk che," a lo ti leh zêl a. Ka piantirh a ta, a vawi khatna atân tak tak chutiang țawngkam a hnên ațang a ka dawng chu a mak ka ti a. Engtin emaw ni hian min fan a, ka pa chu ka en ngawih ngawih ringawt. 

"Ehe!! Ahriati chu i va'n chhuanawm êm êm ve, khawi a lawm nân pawisa kan pe ang che," zu lo in mêk te pawh chuan an lo ti ve a. Ka pa lak ațang mit la sawnin ka nui hak a. 

"Aaa.. Kan exam zo ringawt a result pawh a la chhuak hleinem, lo lawm te chu a zahthlâk em mai," ka ti ngial nâin an Pathum chuan pawisa min pe den den a. Amah ang lo takin ka pa pawh chu a nui hûih reng bawk. 

"Chaw ei kha han siam teh u, fanu college zir zo thei neih man ah Âr sa roast kha ei țeuh i la a ni mai alawm," a ti pâwr leh huarh a. Inlêng te chuan, "Ekhai! Zanriah in la ei ve nange, ei rawh u.. Titeh u keini paw'n kal na tur te kan la neih kha," an ti a, a tho zui mai chu ka pa in chaw ei ve tùrin a sâwm zui ngial nâin min chhuah san ta tho. 

Ka pa rui mood chu a inthlâk leh mai ang tih hlau ru zetin ka mit sîr zauh zauh reng a; mahse, a khât tâwkin, "Ka fanu pawhin college a zir zo ve ta chu a nia, keini ang fanu in college a zir zo ve ta mai chu a mak a ni tih bâk sawi tùr a vàng khawp mai," a ti bual bual reng a. In àn thinrim chawpna lam rî va a ni lo tih ka hriat thiam hnuah chiah ka hahdam ve thei.

Maliani nên chuan chaw ei kan siam nghâl mawlh mawlh a. Lehkha dêng tùr te pawh an lo lût khâwm leh ţêp tawh ang, chaw kan kîl laite chuan ka pa chuan min ngaihsak ve khawp mai. Chutianga min ngaihsak thut chu kei lah in lo dawnsawn mai dàn tùr ka hre bawk si lo a, College chanchin te chu min zâwt ve ngial a, a thinthawk chawhthawh sak hlau ru takin kan education system chu ka hrilh ve mial mial a. Maliani paw'n eng êm êm sawi ve lo mah se min nuih var var reng a, ka pa pawh amah ang lo takin chaw ei chhûng chuan a âng miah lo! 

Thleng kan seng fel laiin Inlêng hmasa chu an lo lût khâwm leh țak țak tawh. Thleng ka sil zawh chuan ngawi rengin pindan ah ka lût nghal daih a, ka thawmhnaw chu thlâkin khumah chuan ka mu zâl mai mai a. Nichin mai a ka pa in min chhuan thu a sawi kha ka ngaihtuah zui rauh rauh bawk. 

Nu leh pa te țawngkam khat lekin fate rilru ah nghawng a neih thui theih dànte chu ka chhui kual rauh rauh a. Thing leh pangpâr te pawh kan chîngin kan phun a, lei țha a vurin tui nên kan chawm a, hnim te'n an dîp chhe mai ang tih hlauin kan thianfai reng bawk. Chutiangin mihring te pawh nunna nei dangte ang bawkin têt lai ațang uluk tak a enkawl ngai kan ni a, chu chu Bible-a Thufing ziakah khân a lang chiang êm êm bawk. 'Naupang chu a kalna àwm kawngah chuan zirtîr u la, a upat hun pawhin a thlah lovang' tiin a ziak a nih kha. 

Zirmi mithiam te sawi dánin, ' Naupangin an têt laia an ngaih dàn siam hi mi tlêm tê chauhin an puitlin hnuin an ti danglam thei,' an ti țhìn. Chu chu ka nun hman dànah pawh hian a chiang hle chuan ka hria. Eng mah hre lo a min ngaih laia min enkawl dànte avàng khân ka dam chhûnga ka khawsak dàn tùr duangin ka ruahman fel vek tawh a. Ka tihsual ni miah loah pawh min puhin min mawhchhiat a, nu leh pa thlahlel rual lêk si kha ka tâna awm lo in min inthiarfihlîm san daih zêl a. Ka lungngaihna ti punlun zual tùr tingin țawngkam chhe tak tak min hman khum a. Chu chuan hmangaih phû lo a inngaihna te, mahni țha lova inngaiin mi dangte paw'n ka lakah rilru țha an pu dâwn lo a hriatna lian tak ka țhan len pui a. Ka hlim tak tak thei lova ka khawvêl chu a hahthlâk in a thim êm êm mai a ni. 

Zân dâr 9 bâwr vêlah chuan Lucy nên text in kan inbia a. Tupui D a kal tùr chuan min ring bur tawh, kei pawh chu zin tùr chuan ka insiam zui ve a. Khua te lo vâr se ka pa hian a phal lo leh țung ang tih erawh chu ka hlau viau mai. 

Zànlai a ni tawh a, ka mut chu chhuak tawh viau mah se ka muhîl nghet ngam chuang lo. Țhutkhâwmna lamah chuan mipa țawng bul bul rî a awm reng a. Tihian ka pa hi lo chatthla daih pawh ni ta se, tlaivâr țhak a Card dêng hi chu an awm reng zêl tho. 

"Tu nge i nih?" ti rì ah chuan ka phu nghek a. Ka meng nghâl kâwk bawk, ka lo chhîng hman sek a niang. Ka khum bul lawkah chuan hlimthla pahnih hi ka hmu zui a; mahse, ka chechâng lo hrim hrim.

Pindan chhûng chu a lo thim vek tawh a, "Eng nge pindan chhûngah te i tih a? Chhuak nghâl rawh," Maliani aw rî vek chuan a ti leh kha kha a. Hlimthla pakhat zâwk chu a che hrut a, hmanhmawh deuh a hawn tih hriat deuhin Pindan kawngkhàr pawh chu a inpawt hawng zui a, Țhutkhâwmna lam ațanga êng lo lût avàng chuan pindan chhûnga Maliani ding chu chiang takin ka hmu thei a. Pindan kawngka a chhuak mêk pa lam chu en ngar in a thaw zui ham ham bawk. 

Ka hlauhthàwn ang chiah-in ka muhîl lai min khawih tum an lo awm leh tawh a ni tih chu hrilh nawn ka ngai lo. Maliani chuan ka harh tih a hre lo a ni mai thei, thâwm dìm tê in ka khum tlângah chuan a lo țhu thla a, ka sam ah lo chùl thuak pahin, "Khawngaihthlâk reuh lutuk," a ti sap a. Thâwk la leh ham ham in a tho a, pindan ațang chuan a kal chhuak ve leh ta a. Ka inthlah dul meuh chuan ka mittui a lo tla zui pap a. 

Sexual abuse hi a tawng tawh tu lo chuan a râpthlâk zia an hre thiam ve lo ang. Sexual abuse ka tawh hmasak ber țum lah khân ka nu ber in keima thiam loah min puh lêt daih a, kha khân nasa lutukin ka rilru ah nghawng pawi tak a nei zui tih chu ka upat hnu hian ka hre chiang tulh tulh. Țawngkam dêngkhâwng tak tak te a min țawng khumin kut hial min thlâk zui avàng khân ka thiam loah ka ngai a, heng ka thil tawnte hi mi dangte bulah phei chuan ka sawi chhuak ngam lo hrim hrim. Min hringtu ka nu ber paw'n min ring duh si lo a, mi dangte phei chuan min ring lo lehzual dâwn lutuk. 

Naupang te'n Pawngsual tuar kher lova mawi lo taka an taksa pêng khawihsak an nih thu an sawi chânga an nu leh pa ten lo ngaih thu tak nachâng an hria hi a ropui ka ti tak zet zêl, ka ngaisang a an mahni ang nu leh pa neih ve châkna in ka khat a. An mahni ang a fate thu sawi ngaihthlâksak a, hriat thiamna te nêna fate dawngsawng țhìn tu nu leh pa nei ve i la chuan tun ai ngawt hian ka huaisen ve theiin ka ring bawk.

Kei chu ka nu ber in min ring lo mai ni lovin, keima thiam loh ang hial ah min chhuah tlatna khân nasa takin ka rilru a thunun a. Puitling ni ve tawhin ka naupan laia ka nu min dawnsawn dàn kha a dik lo tih hre thiam vek tawh mah ila, ka rilru put hmang hi ka thlâk danglam thei tawh lo. Chu chu Childhood trauma sign zînga pakhat a ni bawk. 

Tlai ni tla tùr chuan Luipui chu a chhun tle suar suar a. Lui lian pui luang dulh dulh ah chuan Lawng hmangin kan lêng kual vêl a, kan chheh vêlah chuan Tuipui luang rì tih chauh lo chu thâwm dang a awm lo. 

Tuipui chhûngah chuan Lei sei pui a indawh ruah a, chu Lei chu mi țhenkhat te'n an lo zawh zauh zauh reng bawk. Chutia hmuhnawm ti zet a, kan chheh vêl thlîr kual a ka ngawi vang vang chu tui in ka hmai ah a lo per țhat a, ka phu zawk chu Lucy chuan min nuih zui kar kar bawk. 

"Mi inrin loh laia min lo theh kher," tih bai bai pahin tui chu ka kut a zuk hui in ka theh ve țhat a. A khêk zui tuarh tuarh a, kan Lawng khalhtupa lah chuan, "Mami, che vak vak suh u, Lawng hian balance a hloh chuan kan in khup thawk mai ang," a lo ti sawk sawk a, Lucy nên chuan in nuih pat pat chungin kan tâwp ve mai bawk. 

Tûkin khaw var rual khân kan inah a lo kal a, ka pa lo la muhîl bawrh bawrh kha a sawi nawk nawk a, "Nizânah ka hrilh vek tawh che kha, Ahriati nên Tuipui D ah ni hnih châm tùrin kan zin dâwn a nia," a tia. Ka Pa lahin phak chial chualin a lo rem ti ve ta a nih kha. 

Duhtâwk a rei Lawng a kan chuan kual hnuah chuan kan thlen In lam panin kan lêt chho leh hnak hnak a. Lucy chuan, "MZU ah em ni kan zawm dâwn?" a lo ti a. Ka ner nûng chu min chek khum nghâl hlak bawk, "Aw, result la chhuak lo mah se kan fail awm bîk lo ê. Chuvangin kan zir zawmna tùr chanchin lo sawi te chu a theih vek aw.." a ti zat zat a. 

"Kei chu ka zir zawm tawh dâwn lo em maw ni te ka ti mai mai," ka tih chuan min en rân a, "Master chu BA ang mai mai a kal pah a theih ve tawh loh te an ti zêl bawk sia, min ti huphurh zo vek," ka ti niah niah a, amah paw'n, " Nih chu a ni tho mai," a lo ti ve bawk a. 

"Hna te hi zawn ve daih ka duh, hei, sawrkâr hna ni kher lo. A țûl chuan dàwrah te inhlawh hmasa lâwp lâwp i la, pawisa ka khawl hunah eng emaw ber training leh i la te ka ti deuh a," ka ti leh a. Tûnah hian Hotel managment te pawh lo training duh ve mah ila sum hlâwm a ngai nghâl dâwn a. Chutiang sum hlâwm chu khawi ami mah keini chhûngkua hian kan nei lo ang. 

"Kei chu âpa in zir zawm ngei ngei tùr min ti tlat a, i zir zawm dâwn loh chuan ka zir zawm peih tawh bîk lo e," a ti chu ka nuih hak hak a. Ka rilru tùr a dâwn vàng mai mai a ni tih ka hria, kei ai daihin Lehkha a thiam thei a, ani chu a chhûngte'n an tuipui êm êm bawk nên Lehkha zir hi nuam a ti ve a. Keiin University ka zawm tùr thu sawi chiang i la chuan hetiang thu hi a sawi miah lo ang. 

"Nangte chuan i zir țang țang ang chu le, PHD tal zawh tum la, damlo te râwn țhin Doctor ang hi ni kher lovin hming bulah Doctor awm ve ngei ngei tùrin zir sauh sauh rawh, hna țha deuh i thawk ang a, i hnuai a hnaruak ah te min la thun ve dâwn alàwm," ka tih lai chuan duh lo zetin min lo nam bu lâwp lâwp tawh. 

In ûm paha râk teng tung chungin a putea te inchhûng ah chuan kan tlãn lût a, a putea nupui chuan, "naupang nghâl lo, chutia in sapa râk tâk chiam chiam mai chu le," a lo ti a. A nuih țha dànah erawh a thinrim chuang lo niin ka hria. 

Tuipui D a kan châm chhûng chu a rei lo viau nâin a nuam ka ti kher mai. Kawmthlang lawkah lui luang rî hriat tùr a awm reng a, zân lamah lah ka mu tui na-ngiang zêl. 

Lucy te dàwr bungrua sem kual tute motor bawk in kan haw leh ta a. Chaw ei a kan chawlh lai chuan phone-a kan thlalâk te chu kan en kual mai mai a Lucy-i chuan, "Lalhriatkim i hmêl țha vêt vâwt lutuk hi chu ka thîk ngawt mai che," tih paha a phone screen min lo entîr lai chuan ka nui sak ringawt. 

Ani lah chuan kan thlalâk a keimah bîk chu zoom meuhin uluk deuh hian a han en leh rih a, "I sam bu thleng hian a nalh, i sam hi tan miah suh aw. A bu a chhah bawk si, Pinterst-ah te hian AC siam ve la, hair care lam video post ve țhìn rawh. Tûnlai GenZ ho in sam bu țha leh sam nung țha deuh chu an làwm êm hi, sum i la lût țeuh țeuh mai ang," a ti leh mawlh mawlh a. Tãwi tê in ka nuih lêt leh ringawt. 

Dârthlalang a ka in en apiangin ka nu hmêl ka hmu țhìn a. Mite chuan ka hmêl țhat thu an sawi fo a, kei chuan ka nu ka chhûn lutuk chu ànchhia ah ka ngai hial zâwk. 

Ka laka a thil tih zawng zawngte kha theihnghilh duh viau mah ila a hmêl ang chiah ka put miau avàngin ka hre nawn fo a. Chu chuan ka nun a ti hahdam lo zual hlê in ka hre bawk. 

Chaw te kan ei kham ah chuan muangmar in Aizawl lam pan chuan kan tlãn leh ta a. Lucy leh an driver te chu an titi bawrh bawrh a. Kei erawh ngawi rengin kan piah ràl a Tlâng ruam țhenkhat a chhûm lo zâm chûk chûk te chu ka thlîr a. Ka hun hman chhoh zêl dàn tùr chu ka ngaihtuah ve bawk nâin beisei chuang tùr a awm lo lutuk a, thui pawh ka ngaihtuah zui peih lo.

Motor chu kan in kawtah a ding a, Lucy pawh a lo chhuk ve nghâl zat, ka pa in min hauh a hlauh vàng a lo lût tel ve duh kher a ni pakhat bawk. 

An Motor chu a tlãn leh nghâl mai a. Kan In piah chiah kawngpui zau lai deuh ah chuan Car nalh deuh hi a lo inhûng bawk, kan vêng hi chu mi chi tin chi tang lo fuan khâwmna a nih avàngin lîrthei pawh a tam țhìn hle; mahse, sawtiang a motor changkâng leh la thar hmèl tak bawk si ang saw chu Airport pana a lo tlàn thuak bak kan hmu ngai lo. 

"Motor la thar an awm em maw ni le?" Lucy chuan a ti sar sar a, "Ka hre lo, zu lei tùr a lo kal te ta pawh a ni thei tho," ka tih ve chuan a ner nak a, "A âwihawm loh e, saw Car saw Mizoram a car chhuak thar ber hmân ni lawka Hyundai-ho in an tlângzarh hlim hlawl kha a nih saw. Sawtiang car nei pha chin in kan vêngah zu a lo zawng dû dû dâwn em ni?" a ti hlak hlak a. A sawi tâkah chuan a àwm ang leh viau lawi! 

"A ho em mai, kan chuang pha ve dâwn chuang lo," tih hliai pahin kan kawngkapui lo inkhàr phui țhiap chu ka pawt hawng a. Inchhûng a lo awm te ka'n hmu chiah chu pên lût mai lovin Kawngka bulah chuan kan ding dùn chawt a. 

Inchhûng a lo awm mêk te pawh chu an lo hawi țhap a, ka pa chuan, "in lo haw ta maw? In zinna chu a nuam bawk em?" a lo ti nghâl a, Lucy nên chuan in melh dùn ralh in kan pên lût ve ta a. Kan Inlêng mipa pahnih te pawh chuan kan țhian dùn inzui lût chu uluk deuh hian min lo thlîr dùn a. 

"A nuam kan ti lutuk a, ni khat dang kan châm belh leh lo chauh, tute nge in inlêng te hi,ka va'n hmu ngai lo?" Lucy chuan a ti nghâl bawrh bawrh a. Mipa lian zâwk leh upat hmêl deuh zâwk chuan Lucy țawngkam avàng chuan 'Ani chu In neitute fanu a ni lo' ti ni àwm takin keimah chu min en bing ta run a. A mitmu chu a dum fiah hle a, 'kan In angah eng ti tùr a lo kal tak chu ni ang maw?' tih chu ka ngaihtuah rauh rauh a. 

"I Putea te chhûngkua chu an lo dam maw Lucy?" ka pa chuan a ti leh thluam a, mak deuh mai in rui hmêl a pu hauh lo bawk.

"Umm, an lo dam tlàn lai tak a ni, chaw in ei tawh em?" Lucy chuan a ti leh a. Kei chu min lo melh pah ralhin kan Inlêng te țhutna ep chiah țhuttlèngsei ah chuan a țhu a, kei pawh chu tìm deuh dai hian ka țhu ve nghâl a. Pa lian-a zâwk chuan min en chîk êm avàngin ka thawmhnaw dahna bag hrui chu ka sik neuh neuh reng a. 

"Kan lo nghak che u a nih hi.. Hei, Ahriat, i U Mapuia te hi han chibai rawh," min lo en pahin ka pa'n a lo ti leh a, hre thiam lo deuhin amah chu ka en lêt hû a. 

Ka hamhaih hmêl chu pakhat zâwk chuan a lo hre thiam nghâl a niang, "Allan-a ka nia, ka țhianpa hi Mapuia, U Mapui i ti mai dâwn a nia," a ti thûm dût a. Tute nge an nih ka la hre chhuak mai thei chuang lo; mahse, min chibai tura Allan-a zâwk a lo din chhuah tâkah chuan rang deuh a ding ve nghâlin kan in chibai a. Mapuia a tih pa erawh chuan a țhut dàn ngaia la țhu reng chungin min lo melh run a. 

A lamah kut phar pahin, "Ahriati ka nia, eng nge in duh a kan In ah te in lo len ve a?" ka ti satliah a. Ka kut chu nghet chet chawt tak hian a lo hmer a, a kut phah chu a lian in a lum viau leh nghâl. 

"Kan lo lêng lût satliah a nih hi," Allan-a bawk chuan a ti leh a, ka țhutna ngaiah ka țhut leh hnu thleng paw'n U Mapuia mit chuan min um zui zel a, awm a ti nuam lo thei mai dâwn alawm. 

"Pu Fal chaw in la ei ve bawk si lo, kan kal rih ang e aw," Allan-a bawk chuan a ti leh a. U Mapuia pawh chu a ding ve ta hluai a. A din chhuah meuh chuan a pa lian thelh thawlh khawp mai, Allan-a nên chuan inchen thuak mah se, Mapuia sa chu a țha zâwk a, thau ni hauh silo hian a taksa chu a inphut țha hle bawk. 

Ka pa pawh chuan țha takin a thlah a, Kawngkapui ah an chhuah fel hmain Lucy chuan, "Hriat kei pawh kawt thleng min lo thlah rawh," a ti ve nghâl a. Ka bag chu țhutthlèngsei ah kalsan rih in Lucy nên chuan kan inzui chhuak ve nghâl a.

"An rim a va'n tui bik ve," a tih sa sa chuan ka pawmpui khawp mai. An hnung chiah a chhuak ve nghâl kan ni bawk a, an rim tûi hman rim chu boruak ah a la lêng chèk chèk a. Mi pângngai mai chu an ni lo tawp ang!

Car nalh zet kha an tà a lo ni chiah bawk, kan țhian dùn inzui phei ve chu Allan-a chuan min lo be khawmawi veleh rih a. U Mapuia zâwk erawh driver side lamah a lo ding a. Message pawimawh tak a dawng te pawh a ni mahna, a phone chu bih ngurin a type zui mawlh mawlh bawk. 

An Car dinna In piah kan thlen rualin Lucy paw'n, "lêt leh tawh rawh," min ti a, "Ummm, whatsapp ah kan inbe dâwn nia," ti a ka inher nghâl tùr chu min kuai ding leh rih a, "Tute nge a?" zawi tê a tih sa sa pahin an Car dinna lam chu a va melh zauh bawk. 

"Ka hre bîk lo," ka tih chuan, "I hre ngai lo maw, i pa khân a chibai tîr bawk che sia," a ti niah niah a, mak ti rilru deuh takin kan in en dun leh rih bawk, "Hre lo tak tak.." tih sap pahin an Car awmna lam chu ka va en ve a. Car chhûngah an lo țhu lût ve ve tawh. 

"A mak ka ti e, i pa kha a rui miah lo bawk a sin!" a ti leh hap a, a sawi dik chiah. Kan țhian dùn chuan rilru buai ru deuh hian kan in en leh rèn râwn phawt a, a tâwpah chuan, "va haw phawt teh, nakin ah kan sawi țha leh dâwn nia," a ti ta a. 

Kan In pana ka lêt phei leh lai paw'n an Car chu a lo la ding reng a. Ka kal pel ve mai bawk; mahse, kawngkapui a ka luh hma chiah si in Car head light chu a rawn êng pup a, min lo chhun chiang bawk nên ka kut a ka mit zawn hliah deuh chung hian ka hawi lêt leh a. Driver side a țhu mêk u Mapuia zawk chuan ngunthlûk êm êm a min lo en in ka va hawi phei chu min lo nuih suk bawk, Alann-a zawk chuan a țhutna lam dârthlalang chu a ti hniam a, "Ahriat Muttui aw," a rawn ti vei ngei a tãwi tê a nuih pahin, "Muttui u le," ka ti lêt a, ka lut zui nghâl mai bawk. 

Maliani nên chaw ei kan siam laite chuan ka Pa chu thil tam tak ngaihtuah nei hmêl pu chung hian a ngawi ràn a. Chaw ei kan siam zawh rualin Maliani zâwk chuan, "Hei, kan siam zo a nia, lo kîl rawh," a ti a. Ka pa pawh chu a țhutna ațang chuan a lo tho ve mai a, țum danga kan boruak tawn tawh nên zànin kan boruak chu a danglam tak zet. 

Chaw kîl lai paw'n an pahnih chuan an ngawi reng a, hetianga an mizia a danglam chhan hi kan Inlêng te pahnih vàng kha a ni thei mai ang em? Lo ni ta pawh ni se kha mite kha tute nge an nih? tih vêl chu ka ngaihtuah ve rauh rauh a. Sawi leh sawi hnu, mi chi tin chi tang lo lèn luhna kan nih avàngin hmêlhriat ngai loh pawh an lo lêng lût fo a; mahse, vawi khat mah ka pa hian chûng mite chu chibai tùrin min hrilh chhin ngai lo tlat. Chuvang chuan zànin tlaia anni pahnih min chibai tîr ringawt kha thil mak tak a ni. 

"Kan Inlêng te kha tute nge a?" ka ti satliah a. Ka hre châk tet tet chu kei ngei paw'n mak ka inti. 

Maliani zâwkin, " Ka hmêlhriat te an nih kha, Mapuia kha BDO ania, Allan-a zawk kha chu Engineer a nih kha," a lo ti a, ka pa erawhin ngawi rengin chaw a bâr mawlh mawlh a, 'Maliani nen an inhria a nih chuan amah lo dàwr ve tawh tute tho an nih dawn chu,' tih ngaih dàn ka nei hman a. Chutih rualin Maliani dinhmun chu ka lo teh ve phâk a nih loh zia ka hre zawm a. Eng mah ka sawi tawh lo bawk.

Zànriah chu ka ei hnem phian a, ka kham ruala Thleng ka thawh pui mai tùr chu ka pa'n, "Lo la țhu rih teh, chhûngkua a sawi ho ngai a awm," a lo ti a, ka en chuan a hmêl lan dàn pawh a lo thu tak khawp mai. 

"Englam nge ni a?" tiin ka țhu veleh mai a, hetiang taka kulmûk hian ka pa hi ka la hmu ngai lo. College ka exam zo tawh tih a hriat khân a lâwm ve hle si a, ka zir chhunzawm zêl dàn tùr a lo ruahman ve emaw ni chu aw!?

A chaw thleng chu nawr hlat tê tê pahin thu tak hmêl deuh hian min en a, "Mapuia khân nupui a neih che a duh a, min rawn bia a nih kha," a ti chiah chu ka ding thut a, "țhu leh rawh," khauh zetin ka pa chuan a lo ti lehnghâl a. Kut thawh duh mai tùr hmêl hi a pu chawpchilh nghâl bawk. 

Maliani pawh chuan, "Ahriat țhu leh phawt rawh, pa-a nang pawh ri hlut suh, Ahriati pawh a țhâwng dâwn tih hre thiam la, țha tê tê a sawi ho tùr," a lo ti a, ka ding reng chu ka bânrêkah lo hmer in min pawh țhut mai a tum a. Thinrim zetin a bân chu ka lo vai per nawlh a, ka pa zâwkin, "Khatiangin sual kawhmawh bàwl tum hauh suh, țhu rang rawh," a lo tih leh tuar tâkah chuan kut min thlâk duh mai dâwn in ka hria a. Thinrim țeuh hian ka țhu veleh mai bawk a. 

"Kâr thar ah hian Palai an lo kal ang, a ranglam a inneih a duh a nih kha," ka pa chuan a ti charh charh a, "A va zakthei lo ve, a hriat pawh kan inhre ngai lo a, eng vàngin nge min neih chu a lo tum ve rîkngawt a?" ka ti khùr hlak hlak a, ka thinrim êm avàngin ka țah a lo chhuak tut tut a, ka duh ang pawh eng mah ka sawi leh thei dâwn lo tih ka inhria. 

Lungawi loh hmêl deuh a min melh chungin ka pa bawk chuan, "Chuti'n a chanchin sawi nghâl ngawt suh, ani ang BDO meuhin nupui ah a duh che hi lâwm viau zawk rawh," a lo ti khur khur a, amah chu rum zet a melh in ka mittui a tla zawih zawih tawh. Chu erawh ka țah chhuah vàng a ni lo, ka thin rim lutuk lo lan chhuah dàn zawk a ni. BDO pawh lo ni sawm sarih mah se a hriat ngai loh hmeichhia nupui a nei tùrin thu neihna a nei ngawt bîk lo. 

"Keiin ka duh ve hleinem," ka ti țiau a, "Khanglang che chuan," tih paha a tho nghal hluai chu, Maliani zâwkin a lo dang a, "Nang pawh hian min lo dang țung suh, hlap zal deuh in ngai a nih hi," tiin Maliani chu a khak zui nek bawk, kei chu min lo melh leh pahin, "Kâr thar ah palai an lo kal dâwn a, i nei ngei ngei dâwn tih inhria ang che," a ti a. A mitmeng thîp zet ah chuan min neih luih tîr ngei ngei dâwn tih chu a lang chiang hlè bawk. 

"Ka nei duh lo ka tih tawh chu," ka ti lêt ve tuarh a. "A hma zawng paw'n min ngaihtuah ngai lo. Tûn a taka ka awm dàn tùr min hrilh pawh a ngai lo," ka ti leh chu Maliani zâwkin ka pa chu lo dan tum viau mah se ka ri nghâl chawrh a, ka beng a kiu nghâl vawng vawng bawk. 

A hmâ aia na mah in ka tukkhum chu a lo ri leh chawrh a, a kutthlâk chu a nat êm avàngin chaw ei dawhkàn chu ka bawh rawk rawk a, na fê hian ka tukkhum sam ah min lo kêk a, dîm lo zet a min kawih dâk pahin, "Min hnial zawt zawt tawh suh, i nei ang ka tih chuan i nei dâwn a ni tawp mai," a ti khur khur a, min kehna a thlah pah chuan min nam tel leh lawp bawk. 

A kal sawn nghâl a, hawi chhuak in ka sam chu ka tuai mâm nghâl thuak thuak a. A kut min thlâkna avàng chuan ka mittui far khat mah a far eih lo; mahse, ka thinrim lutuk chu țah hlawp hlawp ka châk tak zet thung. 

Pindan ațang zu a va la chhuak a, luhlul zetin kei lah chu ka țhutna ngai ah ka lo la țhu ngawi ngal a. No in lakin a thli chhuak a, amah pawh chu a khûr dur dur a, chu erawh a zu châk lutuk vàng a ni thung. 

Zu chu no hnih ngawt a tuisik in pap pap a. Chumi hnu chuan a khûr deuh dur dur pawh kha zia awm veleh maiin dam deuh zawk hian, "Mapuia kha BDO a ni a, nei ngei ngei la ka duh. Keini hi chuan thil țha eng mah kan tihsak ve thei lo che, ani bulah chuan i duh duh i nei thei ang a, i zahawm bawk ang," a ti duah a. A Zu in na no chu dawhkàn ah dah tawpin a kal chhuak nghâl daih bawk.