THINLUNG KHAWNGAIHTHLAK-8

THINLUNG KHAWNGAIHTHLÂK

CHAPTER 8

Ririni Khiangte Abbra Pitartei

Ka thil hriat zawh chiahte chuan min țhàwn êm avângin sawi ve mai tùr pawh ka hre lo, Cecilia-i hmêl chu ka en țhìn a, rilru natna chiah a hmêlah chuan ka chhiar thiam bawk.

Ka ngaihtuahna chu a buai lo tih chî rual a ni lo bawk, phai lamah lehkha zir tùrin an liam dùn tih thleng chiah hriat ka nei a. Meme-i lahin an chèn dûn leh dûn loh lam a sawi ri miah si lo a, an lo chêng dûn a nih ngat chuan chesual a, nau an lo pai ta hial pawh chu thil mak a ni hauh lovang; mahse, a fa paitu chu tharum nêna vau betin damdawi ei luihtîr tùr ang a, u Mapuia ka han mitthla chuan ka pawm duh loh vàng zâwk nge, rin harsa ka ti kher mai.

Rilru hrehawm hmêl zeta thâwk la hliaiin amah bawk chuan, "kan inkâr hi eng mah i hre lo tiraw? An hrilh che ka ring lo rêng a ni," a lo ti leh a. Min tih-elna ai mahin amah chu hre thiam tùra min ngen ni àwm tak hian min nuih leh a. A tâwpah chuan râl hla tak lam chu a thlîr zui vang vang bawk.

An inkâra thil thleng ka hriat ve chhunte pawh u Mapuia hnên ațang ni lovin a nau hnên ațang zawk a hria ka ni a, u Mapuia nên tak phei chuan hman zàna, a pasalin a lo call țuma kan sawi chhuah bâk kha eng mah kan sawi zui leh tawh lo hrim hrim.

"Ka natna chungchâng hi i hre ve em?" zàwi tê bawk hian a lo ti leh a, ka chhâng lêt lo nâin, "ka chhûl lam hi a fel lo a. Ka naupai min tih tlâksak nan a damdawi min ei luihtîr te kha nau tih tlâkna damdawi pângngai a lo ni si lo a," a tih melh melh lai chuan ka mitthlaah u Mapuia hmêl a lo lang a. Cecilia-i sawi lai mêk mipa nên chuan mi thuhmun an lo nih tak zet chuan, lem a chang thiam hlè a ni khawp ang.

"....A duh ang takin ka pum chhûnga nau insiam lai kha ti hlum thei mah se ka chhûl lamin a lo tuar êm êm si a. Nau min paihsak hnû khân ka inenkawl zui mai si lo nên, tihian kum tam tak hnuah pawh ka țha chhuak thei tawh lo a nih hi. Ka laka a chêt dàn nunrâwng lutuk mai kha mi dangte hian an hriat ve a hlau a, pasal ka neih tawh hnuah pawh min buaipui anga lang siin min la vau chhunzawm ta zêl a nih hi," a lo tih leh lek phei chuan ka inhumruh vak a. Ka thin chhûngah chuan ka la hriat ngai rêng rêng loh nâ a lo awm veng veng lehnghâl.

A thil sawite leh u Mapuia khawsak dànah hian hmelbel theih thil chu a awm ve tho bawk si nên rilru buai ru deuh hian, "Enteh.." ka ti hliai a, ka sawi zawm hmâ hmâ chuan, "I duh phawt chuan amah i zawt fiah thei reng a nia," tiin min lo pawt chat ve leh hmiah bawk si. Ka lam lo hawi leh pahin inrintâwk hmêl zet hian min melh rân a.

"Ka thu sawite hi i ring lo a nih chuan amah i zawt fiah thei reng alàwm," lo tih nawn leh ngat pahin a darah a bag hrui chu a bat țha a.

"A finfiahna i hmu duh țalh a nih chuan min lo dîl leh dâwn nia," a ti leh a. Ka hamhaih êm avànga ka dinna ngaia ka ding ngawi reng chu min en vang vang chungin thâwk a la leh ham ham a.

"In pahnih chauha inchên dùn hunah a mizia dik tak chu i hre thiam ve mai ang. Pâwn lama a lan dàn ang hi a nilo Âhriat, a nunrâwngin pawisak pakhat mah a nei lo," tih pahin ngun zet hian min melh a, "Kei ang bawk hian a tlai tawh hnuah i inchhir ang tih ka hlau khawp mai," a ti leh a. Țum dang angin min elsen hmêl a pu tawh lova, ka hma min ngaih pui hmêl takin ka darah a lo beng dat dat a.

In lam pana a kal chu ka thlîr mãwl tawp ringawt, tûn thlenga Cecilia-i te nupa inkâra a inrawlh ve chhan chu an ințhian țhatna a zah vang a ti tawh a; mahse, Cecilia-i sawi ang deuh khân vau behna hun remchângah a hman zâwk vàng a nih theihna lai a awm ve thei tho bawk si.

Meme-i thil sawi zawng zawngte kha ka ngaihtuah lêt a. Vai ram lama an hun hman dun dàn chiang takin a sawi miah lo a nih kha...

"Âhriat.." Lucy-i'n a lo tih rî-ah chuan ka inthing harh deuh nak a.

"Khatah te i lo la awm veng veng a, chhuah a hun tawh dâwn, lo phei rawh," a lo ti leh lang lang a.

Rilru buai nuaih chungin ka lêt phei a. Veranda-a ka chuankai rualin u Mapuia nên kan intâwk thut a, "kal sawn tawh lo la aw, chhuah lam hi hnaih tawh ang u," a bâna Sana bih thuak pahin a lo ti nghâl vat bawk.

Chîk zetin ka melh vang vang a. Min lo en ve paha, "lût phawt ang le," a lo tih leh laite chuan Vai ramah lehkha zira, a awm laia a kum zat tùr vêlte chu ka lo chhût neuh neuh a. A lo berah kum 19 ațanga 22 inkâr vêl a ni ngei dâwn a. Râwlthar tha zat zual hun lai taka mitmei vèn tùr awm bawk si loh naah, amah duh êm êmtu nên inkhatah an khawsa dûn a nih ngat chuan a insûm thei bîkin ka ring miah lo.

Inchhûngah chuan U Allan-a leh Cecilia-i te pawh an lo awm ve a. Synod office lamah ka pa a kal chhuah tawh avângin ka nuin țawngțaina hun a hmang a, a zawh fel hnuin u Chawiteiite chhûngkua nên chuan kan inchibai tawn nak nak a. Ka nute Khawbunga an cham chhûngin anni chhûng hian heti lamah ka pa an lo awmpui thung dâwn a.

U Allan-a pawhin min chibai vein, "Pi Âhriati i nih tawh dâwn kha hre reng la aw," a ti a, a nuih zui kur kur laiin Cecilia-i paw'n min lo chibai ve a. Mi dangte hmuhah chuan a nui ve tak nâin, u Mapuia ka zui tùr chu min hlauhthàwnpui ni àwm takin ngaihthat loh hmêl zet hian min melh vang vang a.

Eng mah a sawi belh tawh lo nâin kei tak pawh ka ngaih a țha bîk zân lo.

Aizawl khawpui kan chhuahsan fel meuh chuan a tlai ang reng tawh hlè a; mahse, Chaw ei a chawlh khawmuan kan ngai dâwn lo thung a. Ka nu chu seat hmâah kan țhuttîr a. Kei erawh Lucy-i te nên seat hnungah kan țhu ho a, u Mapuia țhutna hnung chiahah ka țhu bawk nên motor dârthlalang ațang chuan min thlîthlài zauh zauh tih pawh ka hria.

Meme-i leh Lucy te chu an ri barh barh reng a; mahse, Hmuifâng kan pelh fel meuh chuan an chau ve ta deuh ngê ni, min lo nghèngin thatchhe deuh hian muthilh an tum ta mai a.

"Zawi nguai suh u, motor in rui zâwk mai mai ang," ka tih lahin, "Nizân kan meng rei lutuk a, mut a chhuak," an lo ti deuh tlat a. Chutia a thâwm nei peih berte pahnih an ngawih tâk tlatah chuan, motor chhûng thâwm pawh a reh ta hlê a.

Fùr ruah tui tlâk tam lai ni mah se boruak chu a thiang nuam hlè a. Kan tlãn pelh Tlângdung ruamte chu chhûm vâr thianghlim zetin a bawh paw chiai chiai hlawm a, an vêng ràl lehlam tlângdung ang deuh kan tlãn pelh lai chuan ka pate nupa bawk rilruah an lo thar a. Ka hriat ngai rêng rêng loh khawharna mak tak hian min lo luhchilh zui bawk. Kan in tlabal zet tawhte pawh mitthlaah a lo lang thar iar iar a, mite in angin a ropui ve lèm lo nâin, kal bo vang vang hnuah pawh 'hawna' tùr ka neihna chhun a nih ve miau avàngin ka ngaithar ta hlê a. Mitchhingin kan kawngkapui a pên lût mêk angin ka han insuangtuah zui a, u Maliani lo nui var var leh țhutthlèngseia ka pa țhu ngawi ngul tùrte chu ka hmu zut zut mai. Nichin lawka kan inbiaknate kha ka ngaihtuah lêt ta zêl a, 'ka pa kher hi chu a awm loh hnûah pawh ka ngai zuiin ka ring lo' tih tùr hial khawpin a lakah chuan ka rilrua sehhel emaw ka inti țhin kha a nia; mahse, a țawngkam nêm vawi khat lek ka dâwn rualin ka hnuk a no a. A lakah ka rilrua hel lai ber pawhin, amahah chuan thlâkhlelh rûk ka lo nei reng zâwk tihte ka hriat thar phah bawk a. Tûnah te hian eng nge an tih ve ang le? 'Ka awm loh hnuah kan inchhûng a ruak' te kha a lo ti si a, kan thlen chin tùr chhutin tlângdung lam an lo thlîr ve reng maithei a ni.

Lunglènna sawifiah hleih theih lohte nêna mit ka han meng chhuak chiah chu ka îp zui châwih a. Wing mirror ațangin u Mapuia chuan ngunthlûk zet hian min lo melh reng a. Ka meng chhuakin ka va hmu nghâl tih chu lo hriain, dârthlalang ațang vêk chuan min lo nuih suk a.

"I lunglêng deuh em ni Naute?" lo ti zuiin hnung lam chu a lo hawi zawk a.

"Aih.." ka ti lêt ringawt a. Ka nu zâwk chuan, "Âhriat i nu leh pate i ngai deuh em ni?" a lo ti ve thuai a. Min titi pui nachâng hre lova, a lo ngawi veng veng chu thuphâ a chawi zui luam bawk.

"Ngai hran lo e.. thil ka lo ngaihtuah mai mai a," ka ti niah niah a. U Mapuia te nufa chu ka chhàn lêtna naupangchhia zet avâng chuan an nui dun a. Heti chung hian bial khat BDO nupui chu ka ni ve dâwn ta reng sia, ka mize nawi niaihte nêna inlêngte lo dawnsawn lah a chi dâwn dèr si loh. A hmâa ngaihtuah tel nachâng ka hriat ngai rêng rêng loh; thil tam tak ngaihtuah kai chho zelin, ka dinhmun luah tùr chu a huphurhawm hlein ka hre thar riau lehnghâl.

"Memteite lah khân an muthilh san daih che a ni maw?" ti lehin ka nu chu a lo hawi lêt a. Anni pahnih lah chu, 'an nghâwng chu nâ an ti lo em maw ni' tih tùr khawpa kawisawi hian an in nghèng a, ka nu chuan a lo nuih zui kar kar bawk.

"Kai tho rawh, mu daih bîk suh se," u Mapuia chuan a ti nghut a. "Ahh.. mi mut chhuak ve te, tihian muhîl mai mai rawh se," ka ti thuai a. Keimah min ngaihtuah vang ngawt a, mi mu tui lai kaih harhte zawng a tih chi loh lutuk tlat!

Ka nu chuan titi a vawrh ta char char a, nakin deuhah phei chuan kan nupa inkârte chu a sawi chho ta zêl a. U Chawiteii leh u Dingpuiite khân 'fa neih ka duh loh thu vêl ka sawi kha' tumah an hrilh miah lo tih ka hriat phah ta bawk.

"Pathian zârah nangni nupa pawhin fa in nei ve thuai ang a, Mapuia hna vàngin nangni lah inpui hlata in awm zêl a ngai dâwn bawk nên inchhel a țul viau dâwn nia," a ti mial mial a.

U Mapuia nên chuan kan ngaihtuahna a thuhmun a nih ka ring, ka nu thil sawite chu sawi lêt pui lovin kan ngawi dûn rân a.

"Nu leh pate zawng zawng hian fa țha neih kan duh tlâng vek a. Naupang enkawl thiam leh fa țha neih chu nu leh pate mawh a ni bawk; mahse, nu leh pa tam zâwk te'n a kan hriatfiah har êm êm thil chu, fate kan vei tluk zeta mahni invei nachâng kan hre lo țhìn leh kan insiam țhatna lai tùr kan hmu thiam lawk lo țhìn hi a ni," a ti leh dap dap a.

"Nu leh pate zâwk pawhin țanpuia kaihhruaina kan mamawh ve tho a; mahse, chu kan nihna chu inpawm duh lovin țanpuinate kan zawng duh lo a. Inchhiar zau deuha thil tam tak hriat belh thei reng kha, kan inchhungawng lui tlat zêl a, a tâwpah a tuartute chu kan fate tho anni leh țhìn si a, chutiang thil kan hmuh thiam ve meuh chuan 'fa sual' kan lo nei hman reng tawh țhìn," a ti a. Ka nu chu nu ber a ni bawk nên a thil thlîr dànte pawh chu a danglam bîk deuh hian ka hria.

"Fate kiangah thu țha pui pui leh nun dàn țha ber berte sawi kur dup si a, nu leh pate zâwkin kan nunpui leh si loh chuan kan fate rilrua buai a, 'ka nu leh pate thu sawi hi ka zâwm ang ngê an nun dàn hian ka nung ve zâwk dâwn' tiin zawm tùr zâwk hre lovin tui lâi rapin an awm phah mai țhin. A tâwpah chuan benga an hriatte aiin mit a an hmuh theih; nu leh pate awm dàn zâwk kha an entawn ve leh mai țhìn. Nangni pawhin fate in lo la nei ve ang a, chutih hunah chuan in thu țha hrilh aiin in nun dàn zawk kha in fate entawn tùr a ni tih hre reng ula. Nun vawng uluk hlè ang che u," a ti a.

Fate țhanlen chhoh dànah nu leh pate mawhphurhna san zia ka hriatfiah belh tluk zetin ka nu chu a ropui ka ti khawp mai. A fate nun kawngzawh chhoh dànah mawhphurhna la ngam khawpa nû nih tling a niin ka hre bawk.

"Nu leh pa tam tak te'n an fate zîngah a danglam bîk leh sual bîk deuh an awm changa, 'Tu hi nge maw a chhun ni le?' an ti mai zêl te, 'a nî, a puteate lam a chhûn a nih hi' tia an fate sualnaah in hranga an laichin hnaite an mawhpuh daih zêlte hi thil dik a ni ngai lo. Kan fate chuan in hranga chêngte nun dàn ni lovin nitin zântina an khawsakpui, nu leh pate nun dàn ațang zâwk a inzir chho zêl an ni tih hriat a, nun vên uluk êm êm tùr. Pa berin a fanu hnenah, 'kawppui atân chuan hmeichhiate duat thiama zah thiam mi chiah thlan tùr' tiin hrilh hrilh ta se. Amah berin a fate nu chu inchhûngkhurah vînin hrâwk hrep reng bawk si se. A fanu chuan a pain a nu a cheibâwl dàn ang a cheibâwl tu mipa tho a ni kawppuiah a thlan dâwn, fa enkawl kawngah chuan a sawi a sawi ni lovin, kan nun chhuah pui thilin nghawng a nei thui zâwk a; Chuthil chu hre reng chungin fa inneih ve hunah pawh in enkawl dâwn a nia," a ti a.

Chu a thil sawi chuan nizàn boruak kha min hriat chhuahtîr rauh rauh leh nghâl, kei ngei paw'n ka duh vang ni miah lovin u Mapuia ah khân ka pa nun dàn bawraw zet kha ka zawng a. Chu chu ka phû tâwk niin ka ngai hial bawk...

Ka nu chu a titi tui hlè a, a hnu deuhah phei chuan u Mapuia'n nunkawng a dai sual chhoh dànte pawh a sawi kai a. Mak tak maiin u Mapuia râwlthar sual chhanah pawh a basketball khelhna kha puh mai lovin, 'a unau dangte tân entawn tlâka kan nun laiin Mapuia tân erawh a pa nên a kan nun dàn kha hriat thiam a lo harsa a, kan lo ngaihthah bîk deuh a ni,' tiin mawhphurna a la ngam thlap a. U Mapuia tân tak paw'n a nu chu zah loh a har viauin ka ring.

E. Lungdâr kan thlen chuan thingpui inin kan chawl zuai a. Rei khawmuang lovin kan tlãn chhuak lehnghâl a. Tuipui kan thlen leh meuh chuan khua a tlai hlè tawh.

Tuipui dai-ah chuan kan chawl a. Motor ațang kan han chhuak sap sap chu u Mapuia chuan, "Memte," a ti dût a.

Meme-i lahin hre thiam zetin ka nu chu a kai a, "sawlai-ah sawn thla la ang u," a ti a, ka zui ve tùr chu u Mapuia chuan min man bet ta tlat a.

"Thla ka la ve duh alàwm," ka tih pawh chuan, "a ngai lo," ti nghutin a âwmah min kuah bet ta hlü hlû a. A zial hûm chhuahsa chu a țan pah bawk a.

"Humm, i hemi zûk châk vàng hi a ni maw, Meme-i kha ka nu hruai hrang tùra i tih ni," tiin a âwm zâwn ațang ka en chho vah a.

Cigarette chu tui tih hmêl zeta sî lût ham hamin min lo melh chhuk ve a. Ka ner khum nâng nâng nâin ka nu leh pate mit hmuh laia zial êm pawh a zu duh miah lo chu ka ngaisâng ru tak zet tho.

"Kan thleng țep tawh em?" ka tih leh chuan, "umm, Tupui khaw dawt chiah hi a ni tawh," a lo ti bul bul a, zial chu sî lût leh vang vanga, a kut lehlam chuan ka biang a lo dawm tel bawk.

"I lunglêng em?" min ngaihtuah hmêl deuh hian a ti leh daih a.

"Lêng hran lo," ka ti ve tak nâin, "khawhar hmêl deuha kan tlãn pelh tak tlângdung i thlîr lai kha ka hmu alàwm... i pate paw'n an ngai ngawt ang che. Kan thlen chin i hrilh ve zêl em?" a lo ti lehzêl a. A bulah hi chuan eng mah tak tak ka zêp thei dâwn lo a nih hi.

"Hrilh hran lo," ka tih leh tawp chuan a lo rum nghut a, "Khawbung thlen hunah law law ka hrilh ang," rang deuhin ka ti a. A kut lehlam chauha ka biang chu dawm deuh vang vangin ngunthlûk fê hian min melh a, "rilru a vei deuh i la nei tlat," a lo ti leh ta khauh a. Cecilia-i thil sawite kha ka ngaihtuah lêt ve zat bawk.

"Min hrilh dâwn em?" zàwi tak bawkin a rawn ti leh a, thaw halhin a âwmah chuan ka bei a. A leather Jacket chhana a lungphu dup dup rî chu ngaithlain thâwk ka la leh ham ham a.

Ka suangtuahnaa mipa ang hi a lo ni lo ang tih mawlh chu ka hlau thar a, ka chhûngril lama awm nawm lohna ințham kual vêl avàng chuan, ka hîk sung sung leh nghâl.

Min ngaichâng takin u Mapuia chuan, " Naute," a rawn ti hniam leh ruih a.

Cecilia-i sawi ang khân lo che tak tak si se amah ka lo ngaih dàn zawng zawng hi a danglam vek dâwn a. Tûn ang hian thlamuang takin a kiangah ka awmzui thei tawh miah lo bawk ang, chutiang thil ka ngaihtuah lai reng chuan thil dangin min lo luhchilh ve lehnghâl a. A hun kal tawhte chu hriat chian kher ka mamawh ber em? Cecilia-i nên an inkârah chuan eng thil pawh lo awm mah se ka buaina tùra ni lo. Neih hlen ka tum bawk lova, an inkâr chu ngaihven lo a en liam tawp a țha zâwk..

Ka sam lo hui kiang pahin u Mapuia chuan a zial zûk lai chu a hîp lût leh vang vang a. Min thlêm pah ti tih hian, "sawi rawh le," a lo ti leh a.

A ngaihțhat nân tal tiin a taksa hrawlpui chu ka kuah nghet vak a, "u Mapui, nau tih tlâk hi eng nge i ngaih dàn?" pehhêl deuhin ka ti ta a, ka thil sawi avâng chuan a hamhaih hmêl khawp mai.

Ka bek sam a hui sawnna kut pawh a lek kãng uk a, a âwm zawn ațang chuan rilru nuam lo deuh chungin ka en chho ve reng bawk.

"Mipa țhenkhatin nau ti tla tùra an fa paitute an nawr lui chiam zêlte hi eng nge i hmuh ve dàn?" ka tih leh lai chuan a hmêl chu en chîk tak ka ni tawp.

Dik tak chuan a rilru nat theihna tùr thil ka sawi chhuah khum phawng phawng zêl a. Tûnah pawh hian Cecilia-i thil sawi kha lo dik ta silo se, kei lahin ringhlel ang hrimin lo zâwt ve ting tang tawh si ila, a rilru a na viau mai thei. Chuvàng chuan hetianga pehhêl deuh a zawh hi a fuh ber ang.

"Nau tih tlâk chu tual thah nên a danglam miah lo," a lo ti nghutl a, thu tak hmêl fê hian min melh vung vung bawk.

"Dik chiah e.. Mipa țhenkhatte hian an fa paitute kiangah ti tla tùrin an hrilh țhìn tho bawk sia. A țhen phei chuan tih luihnate an hmang a.." mi dang daih chanchin sawi anga ka lan theih nân vei zui loh hmêl zetin ka awm lui vêl a.

"Chûng mipaho chu an pà ve lo a nih chu," ngaihsam hmêl fê hian a lo ti deuh nghut a, ka lo nui a. Min duat tih hriat zet hian ka biang a lo khuap ve leh bawk a.

"Engati nge chutiang thilte chu min zawh a?" a lo tih chuan tãwi têin ka nui ta ringawt a.

U Mapuia chu a lo kûn hniam zual sauh a, hnai zetah chutiang chuan kan inen dûn vang vang a, fûr khawthiang dai reih rawih hnuaia, lungchim taka min thlîr ngawih ngawihtu mitmengah chuan Ceicilia-i mipa sawi kha hmuh tùr a awm lo, u Mapuia chiah a ni ka hmuh!

Kan piah deuh ațang ka nute thâwm a lo awm zui ta bawk nên, inti patling zet hian a rûm chhuak ta hawk a.

Keini chu duhdah zeta țhuin kan che kual vêl thei a, ani erawh kawng en uluk a lo ngai ve bawk si nên țhut dàn ngaiin a țhu rei ang reng țhìn si a, a taksa chu a kham țhêm țhûm ang.

"I kâwng a kham ngawt ang a?" ka ti ve thuai a, a zimar ur ur lai chu nghet deuhin a kâwngah chuan ka la kuah tho. A taksa chu a lianin a lum nuam hlê a, khawchhe lutuk vànga boruak vâwt vur kâra a pangtilum nuam zet han kuah chu a lum nuam bîk asin aw.

U Mapuia pawh chuan, "Kham ve khawp mai," lo ti hawk pahin a kutphah lian zet chuan ka biang a lo khuap leh a, mi dangte lo thlen phei hmâ chu chuh ang hrim hian ka chalah a rawn fâwp nghâl tâwk bawk. Lâi deuh bawk hian ka lo nui leh a.

"Tui lum sa ver vawrin inbual la, a reh ve leh mai ang," ka tih lai chuan a nuih a zat hmêl hlè a, mitmeng awmze nei zeta min melh chungin a lo kûn hniam a, ka beng bulah zawi ruih hian, "kuah chung che a mut ka châk tawh viau a nia," a rawn ti dût dût a. A hmui lum thup chuan ka beng hnuai a lo nûl thuak bawk nên a fan thlen chin chu a lum kual leh rawih rawih tawh! Laih luat vànga ka biang lo sa nghâl hat hat chu min kiai khum sukin ka biang a khuapna chu a thlah ta a.

Motor bul an lo thlen phei rualin ka nu chuan, "Mapui, zial i zûk zawh tawh chuan kal tawh teh ang u, kan khawmuang rei tlat," a rawn ti ta lang lang a. U Mapuia chek hluk chu ka lo nuih kar kar thung. A zial zu kha a hriat loh nân a nau a hruai hrantîr ve bawk a, ka nu lahin a lo man thiam ve reng tho si a. U Mapuia sawi tùr hre lo chuan ka țhutna tùr lam chu min pawh hawnsak ta ringawt lehnghâl.

Tuipui aţang chuan kan tlãn rei tawh lèm lo. Kâr lovah râl lehlam lawka Khawbung khaw lo êng iarh chu a hmuh theih ta a. Khua a thim tawh avàngin in-tin mai chu a lo êng deuh pap hlawm a. Khaw chung lamah chuan chhûm a lo zîng deuh châk châk bawk a.

Saw khua ngei saw u Mapuia nên nun bul kan țanna tùr chu a ni.

Chu ka ngaihtuahna avâng chuan kâr lovah ka thin chu a rawn phu rang dawt dawt a. Kut hûm ruh vak chungin tukverh ațang Khawbung khua chu ka thlîr leh țhìn a. Kan hnaih tulh tulh a, hlauhthàwnna sawifiah hleih theih loh hian min lo tuam ta hlup hlup a.

"Kan khua tùr chu a nuam dâwnin i hria em Naute?" zângkhai zet hian u Mapuia chuan a rawn ti a, thil rit takin a delh beh tlat ang maiin ka âwm chhûng chu a rit nghâl lûk thung.

"Naute..." tih paha hnunglam a lo thlêk leh chuan, "ka hre lo.." ka ti chhuak thei țâwk.

"A mi chênga te pawh an felin an taima a nia. Mipa lam phei chuan heng in-sak leh thil siam neuh neuhte hi an ti thei mai hlawm a, khaw taima an nih hi," tiin Khawbung tual chhûng mite a hmuh dànte chu a sawi belh luam a.

Ka nu pawh chuan, "Kum 2006 a golden jubilee an lawm țuma Memtei hruaia kan kal ve bâk kha ka kal leh ta miah lo a. A lo danglam tawh hlè mai a.." a lo ti ve vang vang bawk.

"Nu, khami țum khân eng ti tùrin nge kan han kal ve kha?" Meme-i chuan a ti ve bawk a.

"Kan pu Rev Saithanga pualin hla kûngpui mualah lung an phun ve a, a tu leh fate'n kan han tel pui ve a nih kha.. Khami țum khân ka pu lung bâkah hla phuah thiam leh ziak mi dangte lung pawh an phun tel nual tak asin," a ti zui siam siam a.

Higher kan zirlai khân hla kûngpui mual tlawh tùrin zirlai naupangte leh zirtîrtute kha an kal a. Chumi țum chuan Mark a pu hran chuang lo tiin a kal lo zîngah ka tel a. Hla kûngpui mualte hi vawi khat mah ka la hmu ve lo.

Khawbung khaw pêng kan thlen chuan Assam rifle check gate a lo awm a. Kan in report hnuah kan tlàn leh deuh chu ramngaw dur țha zet hmunah kan tlàn lut leh a.

"Helai hi Sasaw hmun an tih țhìn chu a nih hi. Heng thing zawng zawng hi Sasua vek an ni a, khaw chhûng lam boruak thlenga vawng daitute an nih hi," u Mapuia chuan a ti dap dap a. Meme-i leh Lucy te chuan video in an la a, kan ramngaw tlãn luhna chu a nuam bawk nên motor headlight in hma lam a chhun êng pap pap bawk si a, a eng emaw ti lunglèn thlâk riau lehnghâl.

A khaw chhûng tak tak kan han lût chu kàwn zau tak hi a lo awm a, building lian berah chuan ZAWLBÛK tih a lo inziak kulh bawk. Chuta țang chuan kan tlãn leh zar zar a, ruah hmí a tlâk reng avàngin khawlai chu a lo reh hlè a, u Mapuia chuan kan tlàn pelh tak vêng hmingte chu min hrilh pah zêl a. Bethel vêng kan tlàn luh chuan, "Kan vêng tùr chu a nih hi," a ti dût a. A hnunga ka țhu chu min lo thlêk leh vut bawk, tãwi tê tak takin ka lo nuih lêt a.

BDO quarter thlen tak tak hmain PHC damdawi in leh a hmunhmate chu kan tlàn pêl leh a. Kan chenna tùr hmun a lo lan theih tâkah chuan thinphu a inthum rawn leh dup dup tawh.

Ka awm dàn chu ka sawifiah thiam lo, Khawbung kan thlen hmâ zawng kha chuan u Mapuia nên kan inneihna khân min nghawng vakin ka hre lo, mumang ang deuhin ka țhanharh san thuai dâwna ngaihna ka neih vàng te pawh a ni mai thei; mahse, hetia kan nupa chauha kan chênna hmun tùr kan han thleng ta chiah mai chu kan inneihnate kha a tak ngei a nih zia a chiang tawh a. Mumang ang a thâmral lehnghâl mai tùra ka lo rin kha, a tak ta lutuk si chu ka hmachhawn hlau a ni ber zâwk ang.

Kan hmâa Gate lian zetah chuan 'BLOCK DEVELOPMENT OFFICER'S COMPLEX KHAWBUNG RD. BLOCK' tih a lo inziak kulh a. Ka chhûngril hrehawm lutuk chuan 'ka tan in tùr' a nih thu min min lo hrilh ni ber hian ka hria.

Tual zâwl fai huna kan tlàn luh rualin staff ni ngei tùrte pawh an lo lang zui sap sap a.

Staff-te chuan u Mapuia chu nèl tho siin an zahthiam hmêl hlè a. Patling pui puite paw'n Pu Mapui an ti vek mai a.

Zànriah an lo buatsaih avângin ei an lo rêlna in lamah chuan kan inzui nghâl a, a tlai ang reng tawh bawk nên zànriah chu kan ei zui a ni nghâl mai.

"In inneihna hmang zo an rawn lêt khân kan pi tùr chu an rawn fak haw khawp mai a. Hei, an lo fak sual lo tawp che a nih hi," ti tea min fiam nak nak laite chuan ka nui tãwi thei hlè a.

Kan inneih nî khân u Mapuia hi an rawn țawiawm țha hlè a, Khawbung BDO staff ang zawngin thlâte pawh kan la ho nghe nghe. Chûng mite nên hetilai ngeiah kan han inhmukhâwm leh te hlei hlei chuan, ka hun tawn mêk chu a tak ngei a ni tih chu a nem nghet a, ka ni deuh nghulh reng mai.

Staff-te leh an chhûngteho chu an fel êm êm hlawm a, chibaitu neuh neuh ka nei deuh reng a, Lucy-i leh Memeite lahin ka rilru tâwt ipik zia hre thiam lêk lovin min lo nuih vei țhâw zêl bawk nên ka lung a zîng deuh tlat a.

Zànriah ei kham hnûa BDO chênna in pui ber kan han pan leh tùr chu hreh tak tê hian ka hreh tawh.

Kan awm mêk dàn chu Games ni zâwk se, Game thunun tu chuan, 'hun a tâwp ta e' lo ti hlauh mai se, kan zavai chuan mahni duhna lam lamah kal darh vek mai ila...

"Naute" ti paha u Mapuia'n ka kut a lo hûm rual chuan ka îp deuh chawih a.

Mi dangte chuan kan awm dàn chu lo hmu ve se chuan, u Mapuia chu ka hlau ta mai emaw an ti ngei ngei ang.

Mangang ru lutuk a hawi chhuakin u Mapuia mit takah chuan ka melh rân a, ka âwm chhûng te chu a lo sa deuh hut hut a.

"Dik lo a awm em?" min ngaihtuah hmêl takin a lo ti a. 'Innei leh lo mai ang' lo tih khum mai chu ka duh ut ut mai.

"U Mapui kan innei tak tak tihna tiraw?" ti chuai raihin ka nui lui halh a. Ka kut hûm mêk tupa chu a lo insehruh nghâl țeuh bawk, kei tak pawh hian țah chhuah chiam mai ka châk a. Tûna ka awm mêk dàn hi a mak ka ti lutuk, a tak ngei a ni bawk si nên, ka hrilhhai thar leh tak zet a ni tawp mai!

"Kan innei ang a, kan pahnihin Khawbungah kan chho ang i ti a, kan chho tawh tak tak si a, kan innei tawh tak tak," ka sawi tum ber pawh hre si lovin chîâi zet hian ka riat nawi niah niah ni berin ka hria.

Ka rilru chîâi zia chu hre thiamin u Mapuia chu a inthunun leh thuai a, ka kut a hûm chu a hmui bulah a la kãng a, kan inneih zungbun kha fâwp pahin chiang taka ka mitah min lo melh chuan, thaw chhuak hakin ka hawi sawn daih a.

Mi dangte chuan min lo fin ta bawk nên ka darah a lo kuah ta hlùn a, "i chau hlè a nih hi, zànin han mu hahdam la khua a lo var leh meuh chuan i rilru buai lutuk pawh hi a reh mai ang," dawhtheihna a khat âw dam tak hian a lo ti a.

A lo luah lum tawh inchhûnga ka pên luh laite chuan ka khùr ru dar dar a. Ka awm dàn chu zam vang ngawt a ni lo tih lah ka chiang hlè bawk si.

Staff-te chu rei awm khawmuang lovin an hâw darh ta hlawm a, keiniho pawh kan chauh deuh avângin bungrua eng mah dah fel hmasa lovin mu tùrin kan intintuah zui nghâl a.

Ka nute hriat loh laiin Lucy chuan, "Âhriat, i țha em?" a ti sar sar a. Chhâng lêt lo a ka melh reng ringawt chu ka darah kut a lo nghat a.

"Biak in chhûnga i awm ang chiah khân i awm leh tawh a nia," a ti a, min ngaihtuah hmêl tak si, u Mapuia leh a chhûngte vènthàwn hmêl tho bawk si hian, "eng thil âtthlâk mah tih tum miah suh aw," a lo ti leh sar sar a.

Tãwi tê in ka nui ringawt, ka rilru hrehawmna chu ka hmêl hmaia hmuh theih khawpin a nasa tih lah a chiang reng.

Kan nupa mut pindan tùr ațang ngei mai chuan u Mapuia'n min lo au ta a. Thâwk pawh thaw chhuak lova ka ngawi ngal chu Lucy-i zâwkin ka bânah a lo kai a.

"Hahdam i mamawh a nih hi, mu phawt rawh," a ti a, kan nupa mut pindan tùr lam min pan phei pui laiin kawngka chu chhûnglam ațang a lo inhawng ve chiah a. U Mapuia lo chhuak tùr nên chuan kan mit a intawng chiang ngang bawk.

Ngunthlûk fahran hian min lo melh a, Lucy-i zâwk chuan, "Âhriati hi a chau deuhin ka hria," a ti a. Min hre thiam hrâm hrâm tùra ngen ni àwm takin u Mapuia chu a melh pah bawk.

U Mapuia chuan Lucy chu a bûk khum nghut a, "Naute, intifai ila mu tawh ang le," a rawn ti dam ruih a, ka kutah a rawn kai nghâl a, dîm têin pindan chhûngah chuan min kai lût a.

Chhûngkua ang vek kan ni tawh a, mikhual ang mai a buaipui zui chiam an ngai lo niin a hria nge ni, ka nu te chu a 'mangțha' hnuah pindan kawngka chu a khàr phui nghâl hmiah bawk.

Khum lamah chuan min kaih phei mai a tum a, ka lo țang ve ta tlat si chu min lo en leh pah chuan, " 'Ka nei duh lo che' i ti leh tawh mai dâwn em ni?" a rawn ti ta mai a!

Ka sawi tawh kha min hre chiang lutuk tawh mah mah a ni.

"Lo ti ta ila engtin nge i tih chuan ang?" ka ti kawlh nghâl hrá chu min nuih suk a.

"Ka hnial ang che," awlsam zetin a lo ti ve nghut a. Rum deuha ka melh chuan a lo nui chhuak huk huk a. Țha tê tê hian, "current a awm lai hian inbual vat teh ang. A nih loh zawngin tui lum a awm dâwn miah lo a nia," a lo ti ta duah a.

Hnial chiam chhan tùr lah ka nei dèr bawk si lo, inbual rual a rawt leh țo a, inhnial chiam tùrin thâ ka nei rih thlawt si lo nên, min tih ang ang chuan ka awm ta zêl mai.

Ka sam chu a huh hlau deuhin min bawk fel sak vek a. Ka rilru insual buai nasa lutuk chu min hriat thiam sak vek avângin bualin chhûngah pawh engtin emaw a min awmpui tumna a nei lo, kâr lovah kan zo thuai ta rêng a.

Khumah chuan sîr deuhah ka mu a, light a tih hlum dâwn chuan nui ruh ruh chungin min lo en a, melh pawh ka lo melh țha duh lo vêl chu thinrimah a la duh mang bawk si lo.

Light a tih thim fel hnuah chuan ka taksa thlâwp thlapin a rawn tawlh hnai a, hnung lam ațangin ka dulah a lo kuah a, a taksa lamah min hnuk hnai salh bawk.

"Naute min hlau thut em ni?" a rawn ti zàwi ruih a, a hmai chuan ka dar lo nawrin a thaw chhuak zui ham ham bawk. Ka awm dàn chu a hre thiam lo ngawt tak ang. Ka khawngaih leh ta deuh si chuan, "ka hlau lo che," ka ti ve sap a, ka dul a lo kuahna bân chu ka chùl sak thuak a.

Chutia ka pawh leh deuh tâkah chuan u Mapuia chu a lo rûm chhuak hawk a, a lam hawi turin min kuai let nghâl vut a. Dîm light êng sen ruih hnuaia u Mapuia hmêl lan dàn chu hmuh a hrehawm ngang mai.

"Rilru i tibuai țhìn khawp mai," a lo ti deuh khawl a. "Inpawh taka kan awm hnu lawkah pawh hleih theih lovin i inlahrang leh țhìn a," zàwi ruih hian a lo ti leh ta a. Ka awm dàn chuan a bei a ti dawng ru ve hlè tih lah a âw thûm leh zàwi ruih ațang chuan a chiang hlè a.

"I hlauh tùr zawngin ka awm țhìn em ni?" a lo ti leh zet chu hriat hrehawm ka tih êm avângin a hmui chu ka hup sak chawt a. Ka bânrêka lo man pahin thâwk a la huai bawk.

"Engtin mah i awm lo, nangmah vang a ni lo," ka ti nghâl mawlh mawlh a, amah leh amah indem a, tihsual a neih leh neih lohte a ngaihtuah chiam chiam tùr chu ka duh bîk dèr lo.

" Ka hre thiam țhin lo; mahse, nangmah vàng a ni lo tih hi hre hrâm rawh u Mapui. Nangte chu i țha êm êm a, khawvêl a mipa țha ber angin ka hre reng tawh bawk ang che," ka ti melh melh a. Ka thil sawi awmzia chu hre thiam tùr pawhin ka beisei lo, kan kal hran hunah pawh ka hriat rengna ah chuan mipa țha ber dinhmun a luah kum khua tawh dâwn...

Ka bânrêk hmer chungin u Mapuia chu a lo che phut a. Khumah chuan hneh zet hian min nam bet hrâwk a, "Engati nge?" chîâi deuha ka tih chuan za lo tih hriat fahran hian min lo khîk khum suk a, chunglam aţang chuan hnai set sawta min lo bih rùn pahin a kut zungchalin ka thin zâwn chu a rawn kâwk ta a.

Thaw dep dep chung hian eng nge a tih leh dâwn tih chu ka lo nghâk tawp, chutah zàwi fiah fek fawk tak mai hian, "Hetah hian i pasal angin min hre reng rawh," a rawn ti chang rût a, ka țim sawk mai!

A hre thiam! Ka sawi awmzia kha chiang takin a hria...! A hre vek!

"U Mapui..." ka ti tîm dai chu lu min lo thin san nghut. Chîp leh hmak paha a mitah tak ka melh lêt ve chuan, natna ka la hriat thiam ngai rêng rêng lo bawk khân min fan leh riai riai tawh.

A pâwn lam chu mahni inring tâwk tak leh tawh khirh hmêl zet angin a lang a, a chhûngril erawh chu awlsam taka ka tihnat sak theih khawpin a nêm lawi si. Chuthil chu a mitah chuan ka hmu tlang vek a, ka tihnat theih thinlung a nei chu a thiam loh zâwk nge ka thiam loh zâwk pawh ka hre thiam tawh lo.

"Naute.. 'tawh' tih chu thil kal tawh chungchâng sawi nân bâk an hmang ngai lo a nia," a lo ti hul leh hawk a, a bianga han khawih ka tum chuan lo rûm nghutin ka bân pahnih chu khumah min nem beh sak hmiah a.

"Enteh..." ka ti leh hman țâwk, "kan chanchin hi vawi khat mah hun kal tawh angin sawi tawh ngai suh," a lo ti chhum vut a. "A chiang em?" khuma ka kut nem beh sauh paha a lo tih leh chuan ka bu ta nghat a, lungawi zo tak ang maw...!

"Vawi khat mah," hlauhawm zet hian a lo ti chang leh hrawih a. Dîm lo lutukin ka hmuiah a rawn fâwp zui buan buan a, ka lo țang ve phat chu a hma aia na mahin ka kut chu khumah a lo nam bet tlat a, a hlauhthàwnna zawng zawng chu hrîkthlâk a tum ta mai emaw tih tùr hian a duhthawh a. A tâwpah chuan harh chhuak thutin ka thiam ang tâwkin ka fâwp lêt ve ta mawlh mawlh a. Thinlung la dam kim hlawl lo ni àwm tak hian na zetin ka kut chu a rawa nem bet leh nghek mai; mahse, ka fawh lêtna chu tâwp san duh bîk lovin a dam thei ang berin ka fâwp lêt zêl a. A tâwpah chuan u Mapuia chêt dàn koham lutuk pawh chu a dam tial tial a, ka kut chu thlahin a kutphah hrawl zet pahnih chuan dîm têin ka biang a rawn khuap a, dam leh ngènngawl zetin min fâwp ta ngawr ngawr a, a chêt phung dam leh ril ta ruihah chuan ngenna a tel tawh a. Vawi khat mah amah kalsan tùr anga țawngkam nei tawh ngai lo tùra ngenna ngènngawl zet chu!

"Ka thinlung ti mangang thiam nu," min fawhna a chawlh san rual chuan a lo ti chhuak hlulh mai. Boruak kham lo zeta thawk ka la lai chu na zet hian min rawn fâwp leh chawk pek a, a tâwp ruala thâwk ka la leh tùr chiah chu min fâwp nawn leh ngawr ngawr a. A tih ngaihna tak pawh ka hre tawh lo!

Thâwm ri deuh rak rak chuan min ti harh a, mit thial ûrhin ka meng chhuak a, u Mapuia chuan kamis hmâ inhawng huai chungin eng emaw hi a lo zawng kual a.

Ham hak chunga ka zik mar țalh țalh tâkah chuan, "Good moring," lo ti nghalin khum lamah a rawn lêt phei a. A kamis hma chu kilh mual mual pahin ka chalah a rawn fâwp zauh bawk.

"I kal chhuak dâwn em ni?" ka ti țial rian a, "hnà a inhnawh khawl nasa lutuk a, office-ah ka han kal lawk ang e," ti pahin khumah chuan a lo țhu a, a țhutna chin chu a hniam zui suih avângin ka tawlh thla ti tih a, a lo nui suk chu ka rinchhan ta ar ar bawk.

"Inrinni a ni sia," ka ti zauh a, amah pawh chuan uang deuh hian, "Inrinni a ni sia," a lo ti fân ruih a, a kut phah sîr lamin ka biang a lo nul pah thuak bawk.

"Thawhțan lama Aizâwl leh Champhai thlen pui ngei ngei tùr thil a awm nual a, ka signature tel lo chuan a thawn chhuah ngawt chî si lo va," dam thlup hian a rawn ti a, "I pawimawh tawh bawk siah.." ka ti fiam leh hrâm chu min nuih mai a.

"Ka chho ang aw," a tih takah chuan huphurh ru deuh hian ka lo ner deuh nâng a. Chumi rual chiah a U Mapuia hmêla lungawina lo lang chhuak ka hmu thiam nghâl erawh, mahni indemna lian tak ka neih phah ta a.

"Hetiang hian awmziah rawh," zawi ruiha tiin ka hmuiah a rawn fâwp zauh a, a in la hrang lehnghâl chu ka melh ngat ngat ta mai.

A rilru chawk buai tùr tawk lekin ka inhawng a, rei lo tê hnuah ka inlâkhran san leh a. Beiseiawm a ka awm rualin ka tân a inhawng nghâl dâwn tih chu ka hre chiang lutuk tawh a, a thinlung chu infiam kual nân ka hmangin ka inhre deuh tlat ta mai.

"I la chauh viau chuan tho chhuak duh kher suh, eirawng bàwltu a awm a. Ei dâwn hnaiah tho la min rawn ko dâwn nia," tih thu min chah chungin a kal chhuak a.

Rilru insual buai zetin khumah chuan ka mu ta reng a, tho chhuak a ka inphih fai ve meuh chuan dâr 9 a lo hnai hlè tawh a.

Inthlahrung rilru deuh hian ka chhuak a; mahse, Meme-i leh Lucy-i te pawh an lo la tho bîk lo tih ka hriat chuan ka thaw huai mai.

Choka lamah chuan ka nu leh nu la valai tak pakhat hi, chaw ei dawhkàn kilin an lo titi melh melh a.

Ka nu titi pui nu chuan min rawn hmu hmasa a, a ri zui hliai a, "Nizân in lo thlen lai kha dam lo kanin damdawi in a ka awm lai a ni si a, ka lo dawngsawng ve hman ta lo che u a nih kha," a ti nghâl barh barh a. Kan inchibai hnû ah u Mapuia sawi kha amah hi a ni tih ka hre thiam ve nghâl a.

"Hei, ei ka siam peih vek tawh a. In pa khân chaw ei peih hnua i koh kher a phut a ni awm a," a ti leh chuan ka nu pawh a lo nui a. A kal chhuak tùr khân min chah ang deuh kha a lo chah ve tho a nih hmèl e a.

"Ka han ko ang e, kawm chhak lawk khi tiraw?" 

"Aw.. vei lama building-ah zâwk khân an awm ang," tiin kawngkapui ațang chuan u Mapuia țhutna zâwk chu min kawh hmuh a.

Nizàn kan thlen lai kha a zàn thil tawh bawk nên, khaw ênga han hawi kual chuan quarter hmun hmâ chu a lo nuam khawp mai. Kan luah lai hian gate hran a nei a, gate-ah chuan Saron a zam kual chiat bawk a.

La tlangnêl lo ru tak chungin office building lam pan chuan ka chho zel a. Tûkin lam hian ruaha la tla miah lo nâin nizàn lamah a tlâk tam avângin kawng chu a huh dap a. Kawng chhoa ka chhuak chho fel chiah chu inchung thawm țha a hna lo thawk mêkte chu ka han hmu zui a.

Anni mipa rual deuh chuan min lo en duh phian bawk si chu ka lâi lek lek a ni.

"Pu Mapuia nupui chu a niang, nizàn khân an lo chho an tih tak kha,"

"A nupui tùr atân chuan a la nau deuh lo maw, a farnu pawh a lo kal tel an ti a, a farnu zâwk a niang," tih velin ka nihna tùr chu an inrin siak deuh roh hlawm a.

Ka kal duhna building chung chu an thawm țha dâwn aniang leihlawnah chuan lâwn chhoin mipa pahnih te chuan Rangva khawng hmêl zet chu an zâwn chho a.

An zinga sa pan ber chuan, "Pu Mapuia nupui nge i niha a farnu zâwk?" min lo ti a.

Inchhaih nawmnah vang ni lovin, u Mapuia nupui chu tu nge tih an hriat châk vàng zâwk a ni tih ka hre thiam ve mai bawk.

"A nupui" ka tih lêt chuan, "kha.. ka ring dik," tiin rangva zâwntute chu an han inchhaih zui ngei bawk a.

"Kan khua chu a nuam i ti dâwn em?" Pakhat chuan a lo ti ve thuai a, an fel hmêl hlawm phian mai, "Umm, a nuam dâwn a nih hi," ka ti a. Chutih lai tak chuan inchunga lâwn kai tawh zâwk chuan rangva huh deuh chu a rap pial palh a.

Inrinna hman awm lêk lovin inchung rangva-ah chuan a tawlh pawp a. Leihlawna la awm mêk pa lahin Rangva chhah chi chu amah ngawtin a châwi zo bîk lo a niang. Mit khap kâr lek chhûngin an rangva zâwn lai chu a rawn thlâwk thla ta mai!

Ka tân lo chêt sawnna hman a awm tawh bîk lo, mit ka chhîng nghâl châwih chu tu emaw hian min kuai her lawp a, chumi rual chiah chuan Rangva chu a ri bur a. Leia a tlâk rîk leh bur rual chuan hlau zetin ka khêk chhuak zui nghek a!

"Mami i țha em?" lo titu âw nghet churh rî ka hriat rual chuan thinphu dawt dawt chungin ka meng chhuak a, ka dara lo kuah tupa chuan hnai set sawta min lo en pahin, "I țha em? Hliam i nei em?" a lo ti leh mawlh mawlh a.

Thaw chhuak hawk a lei lam ka bih chuan, ka ke bul lawka rangva-ah chuan thisen a lo dir thla tluk tluk a nih chu! Hliam ka neih leh neih loh min en kualtupa kut chu ka melh a. Ka îp nghâl châwih mai.

Rangva vuak per nâna a hman tih hriat zet Perek phawina ang deuh thir tlâwn hi a lo hum a, rangva khân a kut chu a ât tih hriat fê hian thisen tharlam zet chu a lo chhuak zaih zaih reng a.

"Enteh.. kha i kut kha a thi a nih kha," ka tih lai chuan min lo melh leh siah a, a mitmeng chu a rum lam hret a ni.

"I kut a thi," ka ti leh chuan a hmâ aia chiang mahin min lo en leh a, a beng a chhet em maw ni chu le?!

"Hei, i kut hi a thi," ti nawn leh paha a kut ka kawh chuan hawi sawn pahin a nui deuh suk a. Chutih lai tak chuan Office chhûng ațangin u Mapuia pawh a lo chhuak ve hlawl bawk.

Chak zeta kan awmna lam a lo pan phei lai chuan ka bula ding pa chu mak ti fê hian ka en a, a kut thi zawih zawih chu ner sak sak a hûm pahin, "a va thi duh reuh ve maw le," a ti duh lek a nih chu!

"Eng nge ni thil awmzia?" kan bul a lo thlen phei rualin u Mapuia chuan a rawn ti hlut. Ka darah lo kuahin min thlêk kual nghâl zung zung bawk. Ka inhliam a maw a lo ti anih hmel.

Leihlawna lâwnte khân thil thlen dàn chu an hrilh zui mawlh mawlh a. Hliam tuar pa chu en pahin u Mapuia chuan, "Dana.." a ti zui a.

Pakhat pui chuan, "a na lo," a lo ti nghâl thâwr pek, za lo zet a țhen suk pahin u Mapuia chuan office bathlara hmeichhe lo ding chu a va signal a. Chu nu pawh chu office chhûngah a tlãn lût nghâl leh a, Dana an tih pa lah chuan a thîr tlâwn hûm lai kha rangva chûngah tak a thlauh ri bur a, a thisen chhuak chu tih tâwp tum ni àwm tak hian a kut chu a hûm leh ringawt țhìn.

U Mapuia chuan, "damdawi leh a tuamna tùr an lo la dâwn a nih kha, lo nghâk rawh," tiin zaidam deuh hian a hrilh a.

Hmeichhia kha hmanrua nên a lo tlàn chhuak leh thuai a, "Dana, hetah lo țhu teh," ngamtlâk hmêl zet hian a lo ti nghâl bawk. Office bathlarah a thil lo ken chhuah chu a țhutpui nghâlin inhliam-pa chu a rawn melh ran bawk. Mahse, kan hmâa pa lianpui chu a dinna ngaiah dingin a phun deuh bul bul ringawt, chutia a thisen a chhuah zawih zawih laia a tàwi khawmuang tlat chu ka ngei deuh thut a, "khatia nangmah a hûm hûm lo khân va kal vat mai la awww," ka ti chhuak hlawl a.

A kut hûm tawm leh tùr chiah chu tâwp chutin a lo hawi chhuak ta ruai ruai a..

Ka mitah chiang taka min lo en siah chuan u Mapuia phênah ka tawlh lût daih lo chauh a ni. A kiai vei suk a, ka beisei loh zet hian, "Aw le ka pi," a la rawn ti nghut zui, ka lo khak ve zeuhna kha ngai huaa min vîn lêt nek lo chu ka thaw ru huai mai; mahse, min koh dàn nghal lutuk avâng thung chuan ka melh rum zui hrâk a.

Ani lah chu office bathlar lam panin a kal zui vut a, u Mapuia nên chuan kan zui ve nghâl thuai bawk, "hliam i nei ve lo maw?" min ngaihtuah hmêl deuhin min zawt nawn leh a, "Nei lo, amah khian rangva lo thlâwk thla kha a rawn vaw per hman a. Chuti ni lo se chu ka nghâwngah hian min lo khawh ngei ngei ang," ka tih lai chuan ka kut chu a lo hmer nghet khawp mai, Rangva rawn thlâwk lai hmu si a chêt sawn ngaihna ka hre bawk si lo, hlauthâwng lutuk lai kha ka ngaihtuah lêt a; Râpthlâk ti zetin thâwk ka la zui kâwk a. Rangva lah kha a khawng țha bawk si, ka nghâwngah rawn khawh mai se chu ka lu hi a bung daihin ka ring!

Dana chu hmeichhe bulah chuan a țhu nghâl thurh a, Staff-nu pawh in a kut hliam chu a lo en sak ve thuai a, "Ehe! A va ât thûk êm êm ve, țhui a ngai lo maw Dana," chek tlak tlak chungin a lo ti a. Dana lah chuan ngaihsam hmêl zet hian, "Han hrufai phawt la a hriat chauh ang chu," tiin zûk chhàng a! Ka lo thaw ru halh a, ka ngeiawm thiamin a nghâl ru roh ngawt ang ka lo ti ru neuh neuh.

Hmeichhia chuan a hliam hmuamhma chu dettol-a leihsakin, a kut phah chunglama thisen kai deuh luai mai a han leih fai meuh chuan a hliam chu a lo thûk ang reng hlè a. Țhui chu a ngai tak tak ang.

A hnathawhpuite pawh khân an lo kîl ve laih laih a. Thuphâ chawi âw tak hian pakhat zâwk chuan, "Inchung rangva kha a lo nâl deuh sia, ka pheikhawk hnuai lah a lo mam ve tawh bawk nên ka invêng hman ngang lo a ni," a ti mawlh mawlh a.

A hliam tuar tu ber lah chuan, "chaw ei ti tui tham lek a nih hi, in lâwn leh hunah chuan fimkhur tawh ula," a ti lêt duh lek a. A hliam buaipui sak tu chuan țhui ngaihna a hre bîk dâwn dèr si lo nên a tuam sak deuh mawlh mawlh a, "tihian a ni deuh tawp mai, kal teh damdawi inah sawn phei teh ang," a ti ta rêng a.

Dana bawk chuan a hnial zui leh zat a, a ding zui hluai bawk. U Mapuia ang tho in a palian țha thelh thawlh viau a; mahse, u Mapuia angin a dam ve ruih lo tih erawh rei lo tê chhungin ka hre thiam hman vek. A lu chu a nawr kawlh mul a, tlangval nghâl leh khawlo ve deuh hi a nih ka ring hial bawk.

"Chutin hnial ringawt suh, a kak kha a thûk a nia," hmeichhia bawk chuan a ti ve leh a.

"I tuam bo vek tawh hi," nui hul huk pahin Dana chuan a ti ve thung.

"I va khawlo mai mai e aw, i enkawl vat loh chuan a pûn ang a, hna i thawk thei lo reng mai tur asin," hmeichhia chuan a ti lêt ve nghâl bawk a, an pahnih a ngamtlâk deuha an inhnial lai chu kan lo thlîr tawp a ni ber tawh.

U Mapuia leh a ţhiante pawh chuan damdawi in a țhuitîr tùrin an lo nawr ve bawk nen a tâwpah chuan a țang zo ta bîk lo a niang, phun deuh bul bul pahin a hnathawhpuite chu a en a.

"Lo khawih zawm mai r'u aw, fimkhur tawh ula," tiin a hrilh vei thlup nia. A nelawm hmel viau nain a thawhpui te chu a ngaihtuah ve hmel khawp mai.

U Mapuia sîr ațang a chet dàn apiang nghâl ti ru deuh a ka lo thlîr ve reng lai chu na zet hian min lo melh leh ta pek a, "Ka pi nang pawh lo fimkhur tawh la," min rawn ti deuh kher a nih chu! Mipa nghal tak nia ka hriatna kha a la dik tluang zêl e. Mî țawng khum dàn a hre bawk si, a bula hun hman chu a ninawmin thinrimna tùra tam duh ngawt ang.

Keiniho chu min ngaihven zui lo zetin office tual zâwlah chuan a kal nghal nul nul a. Hmeichhia pawh chuan zui ta nge a ti chuang hlei lova, Gate pâwna Bike inhung neitu chu a ni tih hriat zetin a lâwn nghâl zat a.

"Kan Dana țhìn hi chu aw..." ti vang vang chungin a tlàn chhuak chu a țhiante chuan an thlîr liam a.

"Damdawi inah chuan in kalpúi dâwn lo em ni?" a hliam buaipuitu chu melhin ka zâwt leh hnuhnawh.

Dana mizia kha an lo hre chiang hlè zâwk te pawh a niang, ngaihsam hmêl zet hian, "tikhân a inkhalh phei ang a damdawi inah a peng kawi ve mai ang," a lo ti let deuh puat a. Ka bu liam vêl ta mai mai ringawt; mahse, min lo țanpui avâng khân lâwmthu êm pawh ka hrilh si lo a, ka awm chu a nuam lo ve det mai. Ani kha lo awm hnai lo se chu, keimah zâwk hi damdawi ina hruai ngai hial tùr chu ka ni. Aaa.. damdawi ina hruai tlâk pawh ka awm lo hial zâwk mai thei.

"Ngaih ti țha lo duh suh, khatiang hliam te chu atân chuan eng mah tham a ni lo a nia," a țhiante chuan an lo ti a, tãwi tein ka nuih lêt ta ngawt.

Hliam tê tham mai maiin a tih buai phâk loh zia chu min rintîr an tum dun ve hle a, "Khatia kut hliam chung khân Champhai lama site tlawh tùrin Bike-in a inkhalh thleng leh ţhak dâwn, ani chuan nâ-te hi a hre ve lo, robot ang deuh hi a nia," te an ti ta vei ngawt a! Ka nui ve ta hak hak tho. Hmêlhriat thar ka neih dàn erawh a manganthlâk lam hret chu a ni.

U Mapuia chu a office chhûngah ka zui lût ve a. A chhûng chu a zau viau lo nâin cabin hran a lo nei thlap a. A chamber chhûng bîk pawh chu a lo fel fai hlè a, dawhkàn erawh a khawih lai mêk tih hriat takin file inhawng sa pathum ngawt a lo awm a, chûng file-te chu a khup fel zung zung a. Chaw ei tùrin kan inzui chhuak leh nghâl a.

Hnathawkte chu inchung lamah an lo lâwn fel diam tawh a, u Mapuia nên office tuala kan kal lai min lo hmuh rualin, "Pu Mapui zànin chu i farnute kan lo rim dâwn a nia," an lo ti fiam hluai a.

"Lo rim tak teh u, khawtual tlangvâl lamin lo rim nachâng inhriat loh chuan an lo zin nawn duh tawh miah lo mai ang," u Mapuia paw'n a ti lêt ve a. Uluk deuh hian a chêt phung chu ka lo thlîr reng a, khawpui mipa ah pawh tlangval lai ațanga officer ni pha ngat a ni ve a; mahse, a awmna thingtlâng lam nun mil zêla a mizia a her rem thiamte, mi dangte nèl theiha a awm thiam lutuk te chu a mak ka ti a ni. Khawtual mite pawh hian an ngaisâng ru ve ngawt thoin ka ring!

In kan zuk thleng thla chu rei min lo ti deuh a niang, nu Tlingi ber chuan chinchâng min lo zâwt thuai a. Thil thlen dànte ka han hrilh chuan pawi tih hmêl takin a chek ve tlak tlak mai. Meme-i te pahnih pawh tho phang hlim tih hriat deuh hian an lo țhu zâwi ngiai tawh.

Chaw ei kan siam nghâl zung zung a, nu Tlingi paw'n a ei ve nghâl a. U Mapuia chuan hmai uang zet hian, "Nu Tling ka nupui chuan i lung a dum meuh a maw?" a ti fiam zauh a.

"Eee.. Khawbung ațanga zân chhuah phah rum rumna tham a lo nih khawp hi maww," tih pahin nu Tlingi chu a nui zui hak hak a. An thil sawi awmzia hriat thiam loh hmêl zeta, ka nuin u Mapuia a melh laiin kei erawh ka lo sa deuh pap pap mai!

Palai lo kal hmâa a lo zân chhuah ngawt țum kha an lo inhriatpui vek tih lah a chiang a. Nu Tlingi hian thil dang tam tak pawh hriat a la nei ngei ngei ang.

U Mapuia chu chaw hma chhûng tal office lamah huna hman a țul hmêl a. Chaw eikham rual chuan mut pindanah min ko lût a.

A hna chungchângte chu min hrilh ve zung zung a, "chawhnu lamah chuan kan mu hman ang," a tih chuan ka ner khum nak ringawt.

Ka biang a lo khuap a, "Lo che hah lutuk suh aw, i taksa a chauh deuh chuan i rilru a chîâi tel tlat țhìn," tih pahin min melh vung vung a. Min ngaihtuah êm êm a, min hre chiang êm êm bawk.

In ațang office-a pan chho lai chu ka thlîr liam a. Office chung a hnathawk mêkte pawh chu an hmuh phâk a. Khua chu a dur uap chur a, ruah erawh a tla bîk mai rih lo. Ruah tlâk hmâ ngeia inkhawih fel chu an tum ve a niang, an țûl hlawm mawlh mawlh khawp mai.

Ka thuamhnaw rem fel nân chawhma hun zawng chu kan hmang zo a, a khât tâwkin inlêng kan nei ve leh zauh țhìn bawk. An khaw BDO nupui an hmuh châk vànga lo lêng lûtte kha an ni ve hlawm si a, Lucy-i te pahnih chu ka chhuahsan leh veng veng țhìn a. Anni pahnih erawh an fel viau, phûr takin u Mapuia thuamhnaw bawmah ka thuamhnaw chu an lo rem lût ve zêl a. Nî a sa lèm lo nâin boruak lum uap lutuk vàngin ka thlan ban deuh chuap reng bawk.

Meme-i leh Lucy-i te chuan khawlaia lèn chhuah an châk tih ka hriat rûk ve reng avângin, "duhtâwk rih ang u, a dang hi chu nakin lamah keimah pawhin ka rem ve thei mai ang," tiin indahfel chu ka rawt ta a.

Anni pahnih paw'n an lo hnial lo khawp mai. Thuamhnaw ka ngah vak lo hrim hrim a, Luggage pakhat ami hi chu thlasik thuamhnaw deuh dah khawm a nih avângin tûn rum ruma hâk chhuah a țûl lèm lova. Nakin ah, u Mapuia hna kal hlana tih tùr awm loh laite in lo inrem chhuak ila a țha zâwk ang.

Ka nu pawh nimin lam a motor chuanna a la chau ve deuh a niang, common room sofa-ah chuan lehkhabu chhiar pahin a mu zâl a. Nu Tlingi erawh chaw eikham kan han insengfel zawh khân a haw zui nghâl a. Zîng leh tlai lamah eirawng bâwl tùrin a lo kal a, chhun lamah erawh inah mahni hna khawihin a buai ve hlè țhìn a nih hmèl.

Ka inbual zo chu u Mapuia lo haw hun nghâk pahin tual zâwlah ka chhuak phei a. Hawi na lam apiang chu vawi khat hmuhna vek a nih vàngin a hmuhnawm êm êm zêl. Rilru chuan, 'Khawbung leh a tlângdung vêl a mite hian hmun hmâ an lo nei nuam ber a nih hi' ka ti neuh neuh a, boruak in lum let kual tup tupte chu a lang chiang bîk riau lehnghâl.

"I lo lêng ve dâwn lo em ni?" Lucy-i lo chhuak chuan a rawn ti làng lâng a, a lam hawiin ka inher nghâl thuai a, ka dinna lam pana a lo phei mêk chu ka lo nuih pah var var bawk.

"Lêng ve rih lo ang, pawi i ti em?" ka ti thuai a.

Ka rilruah chuan u Mapuia'n chawhnu lama mut a duh thu a sawi kha ka hre reng a, mak ka tih rilrûk deuh bawk chu; a thu sawite hi zawm loh ka duh bîk ngai miah lo lai tak hi. A thu chhuakte chu ka ngaichâng a, ka zah ru êm êm tlat zêl.

"Pawiti lo ve, nangte chu heta awm reng tawh tùr kha i nia, hné hléi hlùi khawpin in la chhuak reng dâwn alàwm," rawn ti ve pahin ka bulah a lo ding a, ka kâwngah a lo kuah rual chuan, "enteh, tlângdung saw a lang hnai tawp tiraw?" a ti zui hliai a. Râl lehlam chu kan thlîr zui vang vang a.

A sawi dik chiah, kan chênna râl lehlam lawkah sawn tlângdung a inkhawh phei zui a. Tlâng chu a len êm vàng a niang hnai tê ang hian a lang a, ram dang daiha awmte hi kan ang lek lekin ka hria.

"Sialsuk tlângdung ațang daih tawh khân an tlângdungte hi Mizoram tlângdung dangte aiin a danglam bîk tawhin ka hria," ka ti ve siam siam a.

"Uii, ka lo chîk ve lo rêng rêng," tih paha a nui nghâl vak chu a darah ka tauh sak dat a. Thutak deuh zâwk hian, "Nizân ai thlâwt chuan i hmêl hmuh pawh a nuam ta deuh," a rawn ti leh a. Sawi tur hre lova ka nui seih chu, "I va en a, a lo en tawh sa reng che hian a nuam veng veng țhìn em?" awmze nei deuh hian a han ti leh ta vêl a.

Hming a lam ri miah lo nâin ka thinlungah chuan, chiang takin hming pakhat a lo lang nghâl a.

"U Mapuia hi i duh ve tawh tiraw?" tiin min lo zâwt ve zat bawk.

"Ka hre lo.. chutiang sawi suh," tia sawi zui pui theih loh a ka awm lehnghâl tùr chu min lo pawt chat thuai a, "Âhriat, duhnate hmangaihnate hi engtia lo thleng tùrin nge i beisei a?" a ti a, kan innuih dûn hak bawk.

Mahse, thutak deuh hian, "Mawh.. hmangaihnate hi mihring ang hian a lo inlan ang a, 'hmangaihna ka ni a, nang hian ani hi i hmangaih a. Ani hian nang hi a hmangaih che,' tia hmaichhanah a rawn hrilh kher che i beisei em ni?" thutak fê hian a ti leh ta zêl a. Chutiang taka chiang chu a nih ka beisei bîk miah lo; mahse, duh leh hmangaih kan neih chuan kan hre nghâl chat thei tùrah ka ngai. Hnial buai leh sawi buaina tùr awm miah lovin a chiang êm êm tùrah ka ngai ve tawp.

"Thlahrang chanchin a nih chu i sawi," ka ti lêt chuan a lo ner nasa nâng nâng viau mai.

"Zep lovah chuan rilru i ti nuam thei hlawl lo," thaw halh chungin a lo ti leh hliai a, "Ngawi reng hian i luhluh ngil ngel si a, rilru dang i pu tawh emaw tih theih tùr hian i awm a; mahse, in inneih hmâa i rilru puthmang kha ngawi rengin i lo la tum tlang ngal ang tih mawlh ka hlau," a tih leh chuan a sawi awmzia ka hriat chian êm avângin Tlângdung lam chu ka ensan nghâl daih.

"U Mapuia nên in intawn dàn hi a felhlel deuh tih chu ka hria; mahse, hmangaihna dik tak lo thleng tùr hian hun leh hmun ruat bîk a awm hran lova. Beisei lawk ni miah lova lo thleng a ni a, i rilru sehhelna hian i hun țha lo thleng tur hi a hlohtîr mai che ka hlau," a rawn tih zâwm leh a. Thin phu a ti rang duh dat dat viau mai.

Chutihlai tak chuan ruah mal lian pui pui hi a rawn tla ta fuap fuap a. Lucy-i chu chhuah mai inpeih a inchei vek tawh anih avângin a hmai hliahin a râk nghâl teng tung a.

"Ka make up a chhe vek dâwn tlàn ang," a tih chuan in lam panin a tlàn nghâl dèr tawh. A hnungah chuan nui kar kar chungin ka ûm ve nghâl a, Meme-i pawh a lo inbual zo ve chiah bawk nên Lucy-i chu Inchhûngah a tlãn lût nghâl a.

Veranda hul chinah chuan u Mapuia lo haw hun nghâkin ka ding khawmuang rih thung.

Inchung thawm țha tute pawh kha hmanhmawh deuhin kan in chhak waiting shed-ah chuan an rawn tlàn lût a, u Mapuia pawh a rawn lang ve hlawl a.

"Saka, office bathlar khi a hul zâwk asin," shed a țhu te chu office bathlar a tawm hul zâwk tùr chuan a hrilh a, pahnih te chu an tlàn lêt leh niin ka hria.

A taksa hrawl leh inkhaithli thlup mai rem deuhin kamis body fit a ha kher bawk nên, amah chu a lang lian zual a, Veranda-ah ka lo nghâk reng lai min rawn hmu chu kan la inhlat deuh nâin, a kiai pui suk tih ka han hmu thei a.

"Lo tlàn rawh, i huh hmàin," naupangchhia zet a ti pahin Veranda hmawr lamah ka tlàn chhuak ve nghâl a. Ani pawh chu ka sawi ang chuan a rawn tlãn thla thauh thauh a, waiting shed-a la țhute chu an lo hawi thla tih pawh ka han hmu; mahse, an mitmei chu ven en ah ka en lo hrim hrim nge ni, gate-a a lo tlàn luh lai chuan a lo thlen hman loh hlau ang hrimin, kut phar chhuak meuhin u Mapuia chu ka lo au chul a.

"Naute.." rawn ti deuh hulh chungin ka kut chu a rawn man nghal chawt a, a taksa-ah min pawm bet zui thlawp in Veranda hul chinah min nawr hnung nghâl rawk rawk bawk.

"I huh mai dâwn asin," a ti hniam zui ruih a.

A taksa lianpui chu kuahin ka nui zui hak hak a, u Mapuia pawh chuan min melh vung vung pah hian, "ka tlàn chak em?" a rawn ti ve bawk a.

"Chak lo deuh a nih hi i kamis pawh a huh hman," thlek chho hâ hâ chunga ka tih laichuan a nui ve huk huk a.

"Exer lak țhat ka ngai a nih chu," tih nghut pahin ka nuihza lutuk lai chu ka biang a rawn khuap nghâl a. A savun kâwnghren chu ka lo hûm nghet vak ringawt.

"I lo inbual tawh bîk a," tiin, ka sam la hnawm dap leh ka kawr hâk laite chu a melh kual zui dun dun bawk. Chhûm lo zim nghâl tup tup leh ruah sûr bur bur kâra, a mitmeng lang thim nghâl khup avâng chuan thil eng emaw a ti duh mai dâwn hian ka hria a.

"Lût tawh ang," ti pahin a hrawk bâwk zawn chu ka melh nghâl daih.

Zàwi têa nui huk pahin a mita en thei tùrin min kuai dak salh a, a mitmeng thim ruih a min melhna chuan ka biang a lo ti sa nghâl hat hat a, "Engati nge min lo inbualsan a?" zàwi lutuk hian min zawt a. Ka laih êm avângin chhàn lêt ngaihna pawh ka hre lo, a tâwpah u Mapuia chu a nui leh deuh suk a. "Duhawm reuh lutuk," lo ti zui tawlhin ka chalah a rawn fâwp zui a.

Ka lâi chhe nghâl zêl mai hi dem chi ka ni bîk lo, tleirãwl chhuak tir ve mai ka la ni a. Inngaihzàwnna kawngah lah tawn hriat pakhat mah ka la nei ve lo a, ka rualpui dangte ang bawkin mi mit fûkna ka nih ruala chêt phung buai nghâl vek țhìn. Chêt sual palh chânga zah avânga zum nghâl châwih châwih thei ve tho ka la ni a. U Mapuia lah a huhang a nâ in ka laka a thil tih duh te chu, zep țhen nei miah lovin a lan chhuahtîr mai zêl a. Zak hmasa phawt lova lo dawnsawn tawp chu ka thei ngang rih lo a ni.

A hmui luma ka chal lo nawr si vang vang laiin thâwk a la zui hawk a, kei lah chuan din hnaih sauh pahin a âwm chu ka hmaiin ka nawr vak a. A taksa ka kuahna ban chu a rawn chùl thla thuak a, ka kutphah chu hneh zet hian a rawn hûm nghâl a. "Lût ang," a rawn ti zui khawl bawk.

A âwm zâwn ațanga hriat thiam loh hmêl zeta ka en chho nghâl vat chu, a mitmeng hmangin a taksa a danglamna thleng mêk chu min lo hrilh ni mai hian ka hria.

Rang zetin ka bûk khum nghal a, kawngkapui pana a kal nghâl chu zui tuma ka inher ve chiah chu waiting shed lam kha ka han melh fuh leh kher a.

Thâwk ka la ru nghâl hak thei! Kha pa, Dana ngei mai khân chhûm zîng kârah chuan min lo thlîr reng a. An lam chu ka en chho tih a hriat vek tawh hnuah pawh țhu kun deuh ngul chungin min lo la en lêt ngam ngat nia maw le!

U Mapuia chuan ka kut a chelh tlat avângin kawngkaa a pên lût tùr chuan min pawt deuh dat a. Rang deuhin alam chu ka en leh thuai a. 'Dana nên khian an inhriat țhat hmel tho sia, ka hauhtîr dâwn em maw ni' ka ti rilru rauh rauh a.

Kawngkapui ka khàr phui dâwn thleng paw'n a lo la hawi thla char char a, office bathlarah tawm hul tùrin a țhiante an lêt daih laia, khita a lo la țhu bîk tlat te chu a ti lui a nih hial te ka ring rum rum mai!

Inchhûng kan han lût fel ve chu, "U, ruah hi a bang leh vat dâwn em?" Meme-i'n a lo ti nghâl a. A û chu khawchin chungchânga an hotupa-ah a ngai deuh em maw ni?!

U Mapuai chuan a ban ve leh mai a rin thuin a chhâng ve mai bawk, "A bân lawk loh leh inlêng chhuak rih lo anga a ni mai alàwm," a tih zui lahin Meme-i chuan a lo hnial ve tlat a.

"Naktûk lah inkhâwm inti a, vawiin a lèn loh chuan lèn kualna hun a awm tawh miah hleinem," a ti ve nang nang a. A dik ve tho. Thawhțanah an lêt lehnghâl daih dâwn si a.

A tâwpah chuan a mimal car-a driver tela lêng tùrin thu an rêl thlu ta a. An driver chhawr lai chu a call sak a, rei lo tê hnuah ani pawh chu nihliap nên a lo lang ve thuai a.

"Sawma i buai lo tiraw?" u Mapuia chuan a lo ti nghâl a, "Buai lo ve, i hnuai a thawk kan nia, mi hi i chhawr inthlahrung tlat țhin," driver chuan a rawn ti zui bawrh bawrh a, a nui zui sun sun bawk.

A sawi chu a dik chiahin ka ring, kan inneih dâwnte khân ka lo chîk ru ve țhìn a, mi tam tak chu ni se, an sawrkâr motor kawl lai an hmanna tùr angah ngei ngei pawh a chelek duh miah lova. Aizawl ațang Khawbung kan pan țum thleng khân a private motor a hmang ngat mai asin, a thlâwnin Sawrkâr sum a ei ve mai mai ngai lo tih chu a chiang reng.

Ka nu hoin phûr takin Driver- te nen chuan an chhuak ta diak a. U Mapuia paw'n kawngkapui chu khàrin a kal țha sauh sauh a, mut pindan lamah min luh pui zui hmiah bawk.

A inbual hlan chuan tukverh bulah dingin paw'n lama ruah sûr chu ka thlîr reng a, a lo tlâk tirh lai ang êm êmin a tam tawh lo nâin do chî rual chu a la ni lo.

Chutihlai chuan hriat chhuah ka nei thut a, kei hian chinchâng hrilhin ka pate ka la be ve rêng rêng lo!

Rang deuhin khum chunga phone chu ka ban nghâl a, Signal a lo awm lo mai ang tih chu hlau ru deuhin ka hmet êng a, a lo bo lo hlauh chu ka thâwk pui huai mai.

U Maliani number ka hmeh chhuah lai chuan ka tâwp leh rih a, eng thil nge ka sawi chuan ang le? Nimin lama ka pa nên kan inbiakna kha chu tihpalh thil thû bâk a nih ka ring lo. Tûnah te hian be leh ila, min lo dawnsawn dànin nimin boruak kha pha ta silo se, ka hrehawm phah mai mai lo'ng maw?

Thâwk la hak pahin u Maliani chu ka call ta tho a. A in 'ring' laite chuan pâwn lam melhin ka inpet ruh deuh ngat ngat reng a, a la tawh dâwn lo emaw tih tawh hnuah, "Âhriat.." zângkhai zetin a rawn ti a.

"Nizân kha Khawbung kan thlen hunah ka lo hrilh ang che u ka ti ve reng a; mahse, ka lo theihnghilh daih a," thâwk pawh la lovin ka ti nghâl mawlh mawlh a.

U Maliani chu a lo nui zui kar kar a, ka beisei loh lutuk hian, "In pain i pa a rawn bia alàwm, i motor chuang i chau deuh em ni, i mut hnu ah a lo call alàwm," a rawn ti lêt ta mai a. U Mapuia chuan min rawn hmu dâwn lo tih hre reng chungin bathroom kawngka lam chu ka va melh thuai a. Ka chhûngte chungchâng ka ngaihven loh tehlul nên, biak nachâng a lo hria chu a mak ka ti tak zet.

"Nia.. Kawng a thui ang reng sia, kan thleng kha chu ka chau êm êm ringawt," nuam ti vak lo chungin ka ti let deuh duah, "A ni duh dâwn lutuk, Khawbung chu a nuam i ti em?" a rawn ti ve leh zung zung a.

Ka la tei chhuah ve loh thute chu ka hrilh ve lej luam a. Ka hmuh phâk chin erawh nuam ka tih viau thute pawh. U Maliani pawh in, "Khawbung kha chu a nawm bâkah kan pi leh pute'n thlang an lo tlâkna kal kawng pawimawh tak mai a ni a, sulhnu hlu tak taka tam asin. Khuate hi han nuam chho se, la tlawh kual ve rawh," min tih phûr zual tum takin a rawn ti barh barh a.

"I pa i be ve duh em?" a lo tih leh chuan ka hnial lêt rang khawp mai. A hmêl pawh a danglam nghâl vek ang ka ring, "Ih, ka lo bia che tih hi lo hrilh ve mai rawh.. nangmah kha i țha em? Ka pa kha a rui sual leh lo maw?" ka ti zui ve zat a.

"Tûnlai chu a ngai khawp che a, chu chuan a ti ziaawm ve deuhin ka hria, zu a in paw'n ngawi rengin a in deuh tawp mai," a lo ti a, engtia lo dawnsawn tùr nge ka hre thiam mai lo.

"Nakin zêlah pawh i hman châng chuan i pa hi lo be ţhìn la aw," a nui tel nâin a âw chu a ngènngawl hlè hian ka hria. Chhàn lêt ngaihna hre lo zetin ka thaw chhuak hak ringawt.

Ka pa nêna kan inkâr chhe lutuk hi a siam țha tu zâwk a țan a, be hmasatua țan te chu ka tlawm la thar tlat a. Puitling zâwk mahin a tum hmasa lo a nih chuan a tuartu zâwk hian bul chu ka țan hmasa lul lovang.

Chutia ka rilru hel a lo chhuah thut lai chuan hnung lama ațang nghet zet hian min rawn kuah a. Ka dul chhûng chu a lum țek chuai ni maiin ka hria, ka benga phone la ngaithla reng chungin ka thlê let a, u Mapuia chuan ka darah khabe a lo nghat ve nghâl a.

"U Malian, ka dah rih dâwn, nî dangah ka lo be leh ang che," ka ti vat a, a lo sawi leh tùr pawh ngaithla tawh lovin phone chu ka hmet tâwp nghâl a. U Mapuia lam erawh ka hawi nghâl mai lo, amah pawh  chuan ngawi rengin a taksa nghèng tùrin min kuah ãwn salh a, a âwm tihrâwl nghet țha zet chu nghèngin pâwn lam chu ka thlîr zui doh doh a. Ruah pawh a lo hân deuh tawh a, râl lehlam tlângbâwk lian zet ruamah chuan chhûm a lo zîng vâr lûk a. Boruak chu a lang thiangin a daih nawm hmel tak zet. 

"I pate em ni?" țawng chhuak hmasa zawkah țangin a rawn ti deuh dut, "Aw.. nizàn khân i lo be tawh reng a," ka ti ve mai a.

"I mu tui reuh lutuk a, thlen hnu khân i be leh si lovin ka hria a..."  

"a nachâng i hre zâwk ngawt mai," ka ti nghat lai chu ka beng hnuaia lo thâwk khum lum ham ham a.

"I pa khân a ngaihtuah êm che alàwm," Thutak zetin a rawn ti ve leh a. Ka rilru dam nân a sawi ve mai maiah ka ngai. Aniin ngaihventu chhûngkua a neih khep khup laia riang bîk deuha, ka inngaih a duh loh vàng chauh a sawi a ni ang.

"I hre sual a nih chu hun kha leh chen kha min ngaihsak tawh lova, tûn a taka min ngaihtuah thutna chhan tùra awm lo," ka ti a, hun kal tawh ka ngaihtuah tel rual chuan u Mapuia nei tùra min hrilh laia kut min thlâk hial țum te kha ka hre chhuak thar a, ka pa laka ka helna chuan u Mapuia pawh a kangkai thar leh a, tha na zet hian ka insehruh ta ngat ngat a.

U Mapuia chuan eng emaw hi a sawi a. Hriat a mumal ka nei lo thung, amah vànga ka pain min ben chawrh lai kha chiang takin ka mitthlaah a lo lang zêl a.

"Ti natu che ngaihdam hi thil pêk hlu tak a ni.." tia a sawi tawp lam chu ka hre vuat a. Inhnial pui hrep inpeih at hian ka inher thut a.

Mahse, towel vâr chiah venga ka han hmu chiang chiah mai chu ka ip zui chawih ni mai hian ka hria. Ka tih ngaihna hre lo chuan,"Vanlalramdinthar thawmhnaw va inbel nghâl rawh," ka tih khum nghâl tuarh a. Tukverh dârthlalang nghèngin ka tawlh hnung rang ngang mai.

U Mapuia chuan chek hluk chungin min hnaihchilh leh nghâl a. A kut pahnih chuan ka kawng a rawn hmer a, a taksa si thlawp a min pawt betin tukverh darthlalangah chhuan min nawr bet ta hmiah a, ka dul zawnah khauh leh lum bîk zetin min do nghal run a, ka îp chawih chawih mai, "Khatiang tea mi'n koh chu le..!! Patling ka nih tawh hi," a rawn ti bung hluk a. A nuih suk chuan ka nui ve tho nâin thâwk lâk a harsa vek tawh.

"Thawmhnaw va inbel rawh," ti pahin ka tal nak nak a, thawmhnaw bawm lam ka kâwk vah bawk.

Nghâl fê hian kan taksa inkâr chu a bih a, "Towel ka veng tho a.." a rawn tih muan fan ruih lai chuan, a mitmeng awmze nei leh ril ruih chu hup sak daih mai ka lo duh tawh.

"A hnuaiah eng mah i ha hleinem," rang êm êm hian ka ti lêt ve a. Chutia towel hnuaiah eng mah inbel a nei lo tih ka sawi chhuak chu a phûr phah sauhin ka hre leh ta si a.