THINLUNG KHAWNGAIHTHLAK- 5

THINLUNG KHAWNGAIHTHLÂK

CHAPTER 5

Ririni Khiangte Abbra Pitartei

Ka suala chhuak leh deuh thut a, *In inbiakna hi ka chhiar zo vek a; mahse, ka țap miah lo* ka ti lêt ve leh kher a, ka chêt dàn chu ka nui a zà ru viau thung.

Cecilia-i paw'n ka text chu a hmu a, min lo reply tawh bîk lo. Ka sawi ang tak tak khân an inbiaknaah chuan han țahna chhan tur ka nei lo miau a ni; mahse, Cecilia-i'n min lo biak hma lawka an in text na a ni tih chu dâr zat aţang chuan a hriat theih a. Huat tùr leh ngaih kawih theih awm hran lo mah se an inbe ngun tâwk tih erawh a chiangin ka hria.

Muthilh mai erawh a harsa ru viau mai, ka duh loh dàn deuhin rilruah u Mapuia leh Celelia-i te pahnih ngawt chu an awm ve reng bawk si a, ka in lêt tawn sek ringawt. Chutih rual erawhin tûn hnai zàn tlêm tê chhûnga kan ina Card dênga ri luih luih țhìn an awm ta lo chuan ngaih a ti ngam viau thung.

Zàn ka mu țha lo bawk nên a tûka eirawng ka han bàwl te chu ka ni deuh nghulh a, nizàn ata tawh u Mapuia'n min lo la be miah lo a, Cecilia-i nên khân an inbe zui zêl ang em? tih vêl te chu ka ngaihtuah rauh rauh a.

Mahse, ka rilru puthmang chu duh lo zetin ka inthing deuh nak a, kan inkârah eng mah a awm lo a, a lakah chuan beisei neih ka duh lo hrim hrim. Min lo biak hun nghâk àwm zia zânga rilru ka pute chu ka duh lo thar thut a, rilru lâk pên nân zài rat rat chungin chawhmeh tùr ka chan pah a.

Ka phone rî ka hriat tâkah chuan rang deuhin pindan lamah ka tlàn lût zui a, zîng thawh chhuah ruala phone ken chhuahna châng ka hre ngai lo hi ka pa paw'n min hauh phah ziah. Kei lah hian ken chhuahna châng ka hriat phah thei chuang hauh lo zui.

Min lo call tu chu Lucy tih ka hriat rualin mak ti rilru takin ka chhâng zui a, pindan ațang ka chhuak leh nghâl bawk.

"I va tho hma ve a, thil dik lo a awm em ni?" ka ti thuai a. Ani lah chu a thinrim hmêl khawp lehnghâl, 'zìng zîngah eng tak ni ang maw' ka tih lai takin, "Kan departmet group kha i en tawh em?" a lo ti nghâl hluk a.

"Aih, engati nge a?"

"Uii.. an over hlawm lutuk, nimin a Meme-i ig post kha an screen shoot a, an lo suan lût a" a ti nghat nghat a.

"Aw.. engati nge chutiangte a an lo suan luh a, eng rilru puin ngê an tih rêng rêng le," ka ti hap a. Nimin tlaia kan han lèn khân thla kan la ho chiang a, Instagram lamah Meme-i'n a post a, kan țhian dûn pawh min tag thlap a. Chutia kan mimal thil lutuk zirna group-ah lehnghâl an pu lût chu a chhan tùr àwm rêng ka hre lo.

"Ruati khân a lo post a, a tîrah chuan i pasal nei tùr hi an lawmpui ve mai dâwn che emaw ka ti a; mahse, awi.. ka sawi peih lo. Enteh an thîk ngawih ngawih che ni berin ka hria," a lo tih leh lai chuan min tha nat pui êm avàngin a țah âw țuau tawh a. Chuti khawpa Lucy a thinrim a nih chuan, thil thleng chu a theu neu lo ang tih ka ring hmak bawk.

"Lalruatpuii mai mai chu," ka ti hlak a.

"Lo lût ve rawh, ka inhnialpui hrep hlawm a, Ruatiteho kha an over tawp. He nu hi ka hmuh leh hun chu ka insualpui ngei ngei dâwn a ni tawp," a ti a. Call chu a off zui daih bawk nên che chang lovin chhuat laiah chuan ka ding ngawi deuh vang vang a.

Ka mimal buaina ngawt pawh hi a thaw ipik thlâk êm êm a, chuta kâra hmêlhriat te nêna buaina danga lo awm leh tùr chuan thâwk a ti zîng zual.

Kan department whatsapp group-ah chuan lût mai lovin tui lum ka in hmasa nghek a.

Ka chaw chhuan lai chu off hmasa leh tê têin chaw ei dawhkàn chu ka kîl a. Whatsapp-ah ka han lût chu kan department group bîka message 200 chuang zet lo awm chu ka hmu zui a, zîngkâr mah ni se typing tâwkte an lo la awm nawk a. Rilru nuam lo țeuhin thâwk ka la leh ham ham a.

Ka luh rualin screen shot Ruati lo put luh chu ka hmu nghâl a. Meme-i post kha a nia. Caption pawh 'ka unau-nu tùr hmelțha êm êm leh a țhiannu cute zet te nên hian inkâwm reng thei ila ka ti e' tih tê mai hi a ni a. Ruati lo put luh dàn rilru erawh a dang khawp mai.

A tirah chuan 'Ahriat pasal i nei dâwn a maw?' te chu a ti mawi hnai ve a. Group a pu lût kher lovin private-ah te min zâwt ve mai se țha tùr.

Mi dangte pawh chuan Ruati zawhna ang bawk chu an lo zâwt ve sap sap hlawm a, an chats dâr zat ka en chuan Cecilia-i nên kan inbiak zawh hnu deuh lawk kha a ni a. Kei lahin phone ka khawih zui ta miah lo kha a nia.

An zawhna tam tak chu Lucy-i'n ţha deuhin a chhâng lêt a, 'palai lo kal thawh hnihna kan nghâk mêk' tih chenin țha takin a hrilh a. Chuta țang chiah chuan Ruati leh a close zual pathum te chuan u Mapuia thlalâkte an lo dah tel a.

An chats chu ka chhiar thui poh leh ka inhûm ruh nasa a, ka thinphu a rangin ka bing deuh mup mup hial a!

'BDO meuh kherh thlu tur chuan inphal zau a ngai viau ang' tih ang reng te.

'Officer chin kherh thluk ve duh chuan a tui ril lam hi zawrh ve mai a ngai dâwna ang riau' ti vêl tein an țhian li chu an rak zui char char a.

'Tûn ang laiah officer chin te chuan Ahriatite zawrh lai ang chi hi an in ngai tawh hleinem' ti tein an mahni ho chu an inchhâng lêt char char a. Ka taksa pumpui chu zahna vàng leh hrehawm tih luat avàngin a lo sa chhuak pup pup a.

Ruati mawlh chu a mak ka ti a ni. 'Aw, a tuiril lam kher an in khilai bik nâng,' tih zâwngin ka taksa hmanga u Mapuia thlêm țhìn anga ka lan theih nân țawngkam a chhep lui char char a. Mualpho hlè se kan zirlaipui te zawng zawng chuan min nuihzat hluah hluah se a duh ni berin ka hria.

'Uii, engati nge heti hian intih zui vak a' Lucy chuan a ti lêt ve a. A tirah țha tê têin an inchhâng a, chutia țawngkam chhe pui pui an hmang zui daih chu a hamhaih ve viau a nih hmèl.

Ruati bawkin 'engtin mah kan tih loh hi, kan ngaih dànte kan sawi mai mai alàwm. Ahriati chu a hmêlte hi a țha ang reng a, officer chin ngat a zem thlûk kha kan ring lâwk rêng a, ani em David?' tiin David-a number te chu a tag vêl a.

'Vid-a i bem ngat ngat pawha a chhàn duh miah loh chhan che chu a chiang ta viau lo'm ni? Inzir char char la, officer i nih ve hunah meuh chuan an pa hi i luahlan nalh dâwn nia,' Ruati țhiannu pakhat chuan a hnuai chiahah a lo ti zui ve bawk.

Zirlai hmeichhe dangte chuan Ruati te țhian li ang êm êm in țawngkam an thlah dah ve lo; mahse, Ruatite thil sawi apiang chu 'On' nân ti ni àwm takin an nuih lêt tuarh zêl a. Mipa țhenkhat chuan an lo khap ve bawk a.

Lucy paw'n țawngkam duhtui lo deuhin a hau lêt ve ta zêl a, a tâwpah phei chuan Ruati chu, 'David-a i duh si a, ani lahin nang aiin Ahriati a lo duh fê zâwk si a. I thîk lutuk hi i rilrua chhe zo vek tawh a nih hi, i chêt dàn hi a țhing uih tih hre rawh. Vid-a hian a duh phah chuang dâwn dèr si lo che a, ka khawngaih che Ruatsaum' a ti lêt ve ta nghek a.

Chuta țang phei chuan an boruak chu a sosâng zual a, mipa lamin a țhen chu an remove a; mahse, private lamah link a inpêk rûk zêl theih avàngin an remove zawh chiah te pawh an lo lût lehnghâl zêl bawk a. Boruak a sosàn lai takin awm ve lo mah ila chats ka chhiar lêt ngawt paw'n ka sahâl thei a nia, nizàn khân an chats hi hmu phei ila chu ka â mup thei ang tih tùr khawpin min lo diriam nasa.

Kan zirna in hminga kan group siam ah meuh chutiang teh thlawt a, ka chanchin an sawi duh mai chu a râpthlâk tih bak han sawi ve vak tùr pawh ka hre lo.

*I chhiar tawh em? Chhàn lêt duh leh sawi ve duh te i nei em? I inrawlh duh lo a nih paw'n Keima'n ka sawi sak vek ang che* priavate-ah Lucy bawk chuan a lo ti leh a.

*Sawi tùr pakhat mah ka hre lo, hetiang leh lutuk hian ka lakah rilru chhia an pu thei hi a mak ka ti hlè a ni mai* ka ti lêt a. Phone chu chaw ei dawhkànah kalsan tawpin bathroom-ah ka lût a. Zîngkâr pum no lai a ni kher bawk nên ka uak zui tuarh tuarh a, tui lum chiah ka la in avàngin luak chhuah tùr ka nei lo; mahse, ka chilte chu a lo rial but but a. A tâwpah phei chuan Bathroom chhuata țhu sawp hnawkin ka rûm chhuak hak a.

Țhian angin min en thei lo a nih paw'n kum kha leh chen class khata awmho kan nihna ang tal paw'n ka lakah zah an ngai thei deuh lo'm ni?! Kan chhûngkaw dinhmun avàngin kei chuan ka hnaih țha ngam lo a, hmusita min diriam palh ka hlauh avàngin an zîngah pawh ka tel tam ngam ngai meuh lo; mahse, a tu a te mah hi a chhe lamin an chanchin ka sawi zui ngai lo thung. Sawi chhiata hnêkin an nun chu ka awt êm êm zâwk a. Zu zuar chhûngkuaa an piang ve lo te, rui chunga an pate'n kut an thlâk ve ngai lo te, an Inchhûngkhurah thlamuang tak leh duh duh ngen leh sawi theia an awm avâng tein kei chuan ka awt êm êm hlawm a. An dinhmun aia dinhmun chhe leh chhâwng zâwk he ti taka min diriam duh mai chu an dinhmun țhat zia an hriat thiam loh vàng a ni phawt ang.

Tukțhuan chu ka ei miah lo a tih theih ang, u Maliani nên thlêng kan sengfel laiin Lucy a lo lût a, kan zirlaipui dangte nêna kan boruak chu sawi chhuak lo tùrin ka lo mitmei rang hlè a. Ani paw'n hre thiam deuhin thâwk a la hliai a.

Ka tih tùr ang ang ka zawh fel rualin pâwna min zui chhuak tùrin ka mitmei leh a. Kan in leh țhenawmte in inkâr hmun awl reh laiah chuan kan ding dûn a.

"I rilru a na viau em?" a lo tih chuan tãwi tê in ka nuih lêt ringawt, "Eng atân mah ngai duh miah suh, an tluk loh vang che a nih hi," a ti a.

"Enteh, mi dangte nên pawh lo inhmu leh ta ila, a zahthlâk vek tawh dâwnin ka hria," ka ti hliai ringawt a, "Zak duh rêng rêng suh, an mahni zâwk kha alàwm zak tùr chu. An nunah buai lovin i nunah zâwk an buai tlat te hi a dik lo. Misuaksual zia dik taka nih hi," tih te chuan min han hnèm ve ngial a.

Lucy chu a âng zui hlak hlak a, Ruati chu insualpui ngei a tum thu a la sawi fan bawk, "Vawi khat tal ka kêk dâwn hrim hrim, a nih loh chuan ka rilru a dam dâwn lo. A țhiante pathum kha chu Ruati uitê dik tak an ni a, a fuihpawrh chawp dâwn tih ka hria a. Ruati ber kha a bul tumtu a nih avàngin ka sawisa dâwn a ni tawp mai," a ti nghat nghat a.

"Group kha ka chhuahsan daih dâwn em maw ni ka ti deuh a, Collage kan zo tawh tho bawk a, kei phei chuan ka zir zawm tawh dâwn lo chiang sa bawk sia. Awm ve reng pawha țûl tawh lo, a zahthlâk," ka ti ve melh melh a.

Ka țhiani chuan a lo pawm lo nasa ngang mai, "La leave rêng rêng suh, Ruatite țhian li kha alàwm zak tùr chu, nizan kha chu an rui aniang. Zîngkâr ațang khân an reh hmak a, an harhfîm hunah mipa lam khân an zilh dâwn alàwm. Chhuak tùr an awm chuan an mahni kha kan pêt chhuak zâwk ang" a ti hlaih hlaih a.

Thâwk lak ham ham pahin ràl lehlam a Tlâng dung lang ruih chu ka melh veng veng a. Lucy bawk chuan, "thinrima lo hau lêt ve tùrin ka duh viau che a; mahse, eng mah i lo sawi lo kha a fin thlâk zâwk. Lo sawi ve chiah la chu anni level ang lek kha i ni dâwn a," a lo ti leh rih a.

"Uii, hetiang hunah hian țawng ve ngaihna vak ka hre ngai lo hrim hrim zâwk alàwm," nui pahin ka ti a, "A țha daih zâwk, thinrima i âng ve buan buan ngai lo te hian i nun a vawng zahawm zâwk; mahse, u Mapuia bulah chang hian i âng thei reuh a," boruak tih zângkhai tum tak hian a lo ti ve a. Inen in kan innuih dùn a.

Kan ngawih dûn vang vang laiin, "I ngaihtuah ve ngai em?" a lo ti leh thut a. Kan Inah chuan zu la tùra lo chuang lût an awm phauh phauh a. Kan dinna ațang chuan ka thlîr reng a.

"Han belhchian deuh hian Mizo thufing aiin Sap thufing zâwk hi a lo dik fumfe leh nge nge zêl," a lo ti mauh mai.

"Teh daih a che," ka tih chuan a nui zui kar kar a.

"Tak tak alàwm, Mizo chuan 'harsatna han tawh chiah hian țhian țha chu an hriat țhìn' te hi kan ti ngawt a. Hmânlai atâ tawh tûn hun thleng hian țhian țha te pawh ni miah lovin buaina leh harsatna tâwk ta se; Mizo tawh phawt chuan țanpui kan inhuam tlâng vek, mangang leh harsatna tâwkte țanpui tu ni tùrin an țhian țha nih kher a ngai lo, mihring nunphung a bet reng tawh sa a ni zâwk," a ti a.

"Hnampui (sap) lam chuan, 'Tute nge i țhian țha i hriat duh chuan hlawhtlinna i chan țum a lawmpuitu che kha en mai rawh' an ti ve tlat asin. Mi tute pawh hian mi dang țanpuitu nih kan duh vek a, tanpuia an lo chhawmdawl țang țang tawh te'n dinhmun țha leh hlawhtlinnate an han chan chiah hian, țhian țha leh duhsaktu tak tak te chu an lang chiang zual țhìn. Țhian der leh duhsaktu der te chuan an puihna mamawh reng i la, anni kha Hero ang maiin ngai reng zâwk ila an duh; mahse, dinhmun țha a kan din ve chiah hian Hero angin kan en tawh dâwn lovin an inngai ta tlat a. Min lawmpui thei lo a, kan lakah rilru chhia an pu zui mai țhìn," a ti leh duah a.

"Tûnah pawh hian i țhian țha leh duhsaktu che tak tak chu an hriat mai alàwm, Ruatiteho chuan officer chin meuh pasala nei a, i nuam sa tawh tùr hi an hmu thei lo, an thîk che! Hmâna an sawi duh loh thil tam tak an sawi chhuah phah rêng hi, mualpho deuha siam che an tum zui a, an lawmpui ve thei lo che; mahse, hetihlai kârah hian duhsak tak tak tu che hmêla lo lan phah a. Nizân khân mipa lamin group hran an siam alàwm, 'Ahriati chuan țhian man' min eitîr ve rawh se' an ti a. Innghahna tlâk pasal i nei tùr hi an lo làwm ve lutuk" ka beisei loh lam daih a lo sawi chiah chu eng mah sawi lovin ka melh deuh ngat ngat a.

Amah lah chuan a phone chu lo lek va va in, an group siam thar chu min hmuhtîr a, "Hetah hi chuan kan add ve dâwn lo che a nia, i tel lovin thil kan rêl țhìn dâwn," a ti zui a.

"Tu nge lo siam a?" ringhlel ru zet in ka ti lêt a. A mak ka ti em a ni, thiante ti a sawi theih tùr khawpin a tu a te mah chu ka hnaih êm êm si lo a; mahse, ka man ei hial an lo inhuam reng zâwk bawk si chuan min țhâwng tak zet.

"Ka sawi dâwn lo.. nizàn khân Ruatiteho kha ri zui chiam lo se chu, kan group pângngai ah khân țhian man ei ve duh te pawh an lo insawi tùra nia.." a ti leh bai bai a.

Lucy-i'n min hâw san hnu chuan kei pawh inchhûng lamah ka lût a, Whatsapp message dangte chu ka enkual mai mai a. Ceceilia-i message bawka lo awm leh tawh, u Mapuia thung chu nimin tlaia ta tawh a la reh vung vung a. Cecilia-i chuan u Mapuia nêna an chats screen shot bawk chu min thawn leh hi a lo nia, tûkin lam thlengin an inbe zui tih lah a chiang reng bawk a. Chhâng lêt lovin David-a message lo awm chu ka hawng ta zâwk a.

*Pasal i nei dâwn a maw?* tih tê mai hi a lo ni a. Zêp buai lovin, *aw, a nî tùr tak erawh kan la rèl lo* ka ti țha ve mai a.

*U Mapuia kha ka hria asin* a lo ti lêt ve thuai a; mahse, chhàn lêt ngaihna vak ka hre lovin, a message chu ka melh vang vang ringawt.

Vid-a vek chuan, *U Mapuia chu a fel lutuk a nia, Ruatite thil sawi ho kha chu ngai pawimawh duh rêng rêng suh. Nangmah hre chiangtute chuan an sawi ang kha i ni lo tih kan hre vek, anni kha chuan an tih àwm tawk lêk an ti ah ngai tawp rawh* a lo ti ve duah a. Chutiang thila lo sawi chu ka lâwm khawp mai.

A chhan pawh Ruatite khân min chhuah khaw lo bawih bawih si a, an thil sawi kha âwih tâwk an lo awm phei chuan, min hmuh pelhê să tawh tehlul nên khû-ah min dah reng tawh dâwn tlat a. *Ka lâwm e aw Vid* ka ti lêt a.

*lawmthu sawi a ngai lo.. i hlim ang tiraw?* a lo ti ve a. Tãwi tê hian ka nui a, u Mapuia ka nei tùr hi ka hlim kher lo maithei; mahse, ka pa kut ka tuar tawh ngai lo tùr leh zu rui kam nam zual te'n uang thuang taka, an kuah thuak thuak phâka ka awm tawh lo tùr chu ka thlahlel a. Ka hlim loh paw'n ka him tal ang.

*Ahriat, i hlim ang tiraw?* a lo ti nawn leh a, *aw, ka hlim dâwn alàwm* ka tih lêt chuan, *A țha, i hlim chuan i nui tam dâwn a, i nui hmèl kha a țha zual tih hria la, hlim reng ang che,* a lo ti ve a. Ka reply tawh lo nâin a mi duhsakna chu nunpui thei i la ka ti kher mai.

Whatsapp ațang ka chhuah dâwn lai takin u Mapuia message ka dawng ve ta nawlh a, ka chhâng lêt lo chiang asin aw.

Tlai lamah chuan zân riah ei hun tawhah pawh ka pa chu card dêngin țhenawm in lamah a tawm tlat a, u Maliani'n a va ko țhìn tak nâin lo hâw a tum rêng rêng si lo a.

'A lo hâw hunah amah in ei ve mai rawh se' tiin lo ei san ta ngawt ila, a in âng thinur chawp leh ang a, kut hial a thawh leh chiam duh dâwn bawk si a. Pasal neiin ka kalsan ţep tawh a, kan ina ka la awm chhûng tal chuan a kut tuar tawh lo ila ka duh avàngin, a awm dàn chu en liam zêl rih mai chu ka pawi ti lo lui a.

"Ahriat lo lût lâwk teh," pindan lam ațang u Maliani'n a lo tih chuan rang deuhin ka lût ve mai a, "Lo kal teh, hei hi eng zatin nge hralh ila ţha ang?" ti paha țhî a lek nelh nelh chu mak ti deuh hian ka en hû a.

"Eng țhî nge a?" khum tlânga țhut ve pah chuan ka zâwt a, "Ka rangkachak țhî a nih hi, hralh ila i thuamchhawm tùr lei nân kan hmang dâwn nia," nui var var chungin a lo ti lêt a, ka mak ti leh hamhaih lutuk chu ka meng kâwk kâwk a ni ber.

"Kan zu hralhna ang ang chu tihian i pa in Card den nân a hmang zo zêl bawk si a. Tûnah tak phei chuan pawisa kawl lai kan nei miah lo. He țhî hi ka tleirãwl chhuah tirha ka lei kha a nia, man to tak phei chu a ni lo; mahse, Ka dah țha ve char char a, tihian a țangkai hunah tak kan hmang thei dâwn ta a nih hi," phûr hmêl zet hian a ti leh siam siam a. A țhî chu ka kuta a lo dah lai thleng paw'n sawi tùr ka hre lawk lo a.

"Tikhân kawl țha la.. duh leh i țhiannu Lucy-i nu kha a tih ral dàn tùr chu zâwt mai rawh, a ngaihna a hre deuh ang," a tih leh tâkah chuan rang deuhin rangkachak țhî chu ka pe lêt a.

"A chi loh.. nakinah kei aiin ila mamawh zâwk maithei, chuta tân chuan dah țha zâwk rawh," mangang ru deuhin ka ti zui mawlh mawlh a. 

U Mapuia nên kan innei tùr hi mi dangte inneih chhan ang a ni ve lo a. Hmangaihna leh induhna tel lo inneihna a nih avàngin kei ngei paw'n rei tak neih tumna rilru ka pu lo. Chutih lai kâra a thil neih hlu ber ti ral a, ka thuamchhawm tùr lo inlei te zawng thil tihchi a ni lo lutuk.

U Maliani chuan, "Keite chuan ka mamawh tawh dâwn hleinem," a lo ti thuai a. Ka kut bawk chu lo banin țhî chu min hûm behtîr nghâl a.

"I tâna ka tihsak ve theih chhun che a nih hi, kawl ţha la, hralhna tùr zawng vat vat rawh; mahse, i pa hian hre miah lo se a țhain ka ring," a ti leh mawlh mawlh a. Țhî chu pêk lêt ngei ka tum dâwn tih chu lo hre lâwk ni àwm takin a ding zui hliai a, "I pa chu ka va ko leh ang e, duh leh chawhmehte kha lo chhuang lum leh mai la," a ti zui a.

"U Malian," chelh din tum a ka ûm zui ngial paw'n a kal chhuak zui daih a. Ţhenawmte in lam pana a kal chu ka thlîr zui vawng vawng ringawt.

Duh ni se chu he țhî hi hralhin a dinhmun sawh ngheh nân a hmang thei dâwn reng si a. Amah aia keimah zâwk min ngai pawimawh tlat mai chu, a hlu ka tih êm êm rualin a mak ka ti tak zet a ni.

Thil thlen dàn Lucy-i ka hrilh ve chuan, "u Maliani hi chu a fel satliah ngawt lo, a rilru a țha êm a nih hi. Dinhmun tleu laklawh hrehawm zia a hre chiang a, a theih ang angin a dinhmun anga i awm ve mai loh nân a humhim hrâm hrâm che a nih hi. A duhthusàm ang ngeiin a țhî kha laksak la, i thuamchhawm tùr lei nân chuan hmang ngei ngei ang che. A nih loh zawngin a rilru a nuam dâwn miah lo a nia," a lo ti mial mial a.

"I tàn thil țha a ti satliah mai a ni lo, a dinhmun anga tawp ve mai tùr hmeichhe pakhat hmakhua thlâk danglamin a puihna ve ang a ni dâwna, a duh ang ngeia thuamchhawm tùr lei nân i hmang a nih chuan a rilru a hahdam ngawt ang," a ti zui bawk.

U Maliani nunah chuan zir tùr tam tak ka hmu a, call girl a nih vànga vêng chhûng ațanga hnawh chhuah hial tâwk tawh tu nun chu a lo hausak sì zia te pawh ka hriat thar phah bawk. A nunah chuan inzirna tùr tam tak hmu siin amah chu ka tluk thei ngai dâwn lo tih chenin ka hre fiah zêl a. Ka tân chuan chu nawhchizuar chu vântirhkoh ang mai a ni.

A tûk lamah chuan nu Zari-hoin rangkachak zawrhna dàwr kan tlawh rum rum a, Țhî chu an han en deuh vang vang a. A to berah chêng singthuma min laksak theih thu an sawi a, Rangkachak hlutna an teh dàn eng mah ka hre ve lèm si lo a. U Maliani paw'n man to lutuk a nih loh thu a sawi vàng khân kei chuan chêng singthum a laktîr mai chu ka duh a.

Nu Zari chuan dàwr kil lamah min pawt phei deuh a, "Keima'n singnga in ka laksak mai ang che," a ti a, mak ti fê a ka en chuan, "Zàninah i pa Hrila ka sawipui ang a, ani paw'n a rem ti êm êm ang. I nu Maliani rêng a inhuam thui êm mai, a man to deuh zâwka lo chan chu ka tih ve tùr rêng a ni," a ti ta tlat a.

"Nu Zar, i chan dâwn tho chuan singnga lo deuhin i chang dâwn nia," ka ti chhuak hap a.

Ani thung chuan, "Ni lah lo e.. I phû ve alàwm," a lo ti leh mai sia. Kan inzui hâw leh ta phawt a, Rangkachak țhî pawh chu, 'lo la kawl țha rawh, i pa Hrila zàninah ka sawipui phawt loh chuan ka kawl duh rih lo a nia,' a ti a.

In ka zuk thleng thla chu hlim deuhin u Maliani bulah chanchin chu ka hrilh nghâl mawlh mawlh a țum dang ang bawkin eng êm êm sawi si lovin min nuih lêt var var a, "Ka inthlâk lâwk dâwn," ti sapin rang deuhin pindanah ka lût zui a; mahse, pindan chhûng ka luh rual rual chuan ka mittui a lo tla nghâl zâwih a. Min ngaihtuahna hmêl mawlh khân rilru a ti no lo thei lo.

Ka inthlâk zo pindan ațanga ka chhuah leh hmâ siin u Mapuia'n a lo call a, nizân hmasa ațang daih tawh kan inbe tawh lo a. Tûn țum pawh a call chu ka chhâng lêt duh miah lo a, pindan lamah phone chu ka kalsan tawp a, ka va chhuak phei chiah chu thâwk ka la zui halh a.

Ruati leh a țhiante pathum chuan min lo nuih sâwng thung a, ka la hmuh ngai loh mipa pahnih an lo kalpui tel bawk si nên bangbo zet hian, "eng nge in lo tih dâwn?" ka ti deuh hû a. Pindan kawngka bulah ka ding a, anni pawh chu kawngkapui bulah chuan an ding rân hlawm a.

Ruati ber chuan, "thil lo lei kan duh a," a lo ti a. A țhiante chu awmze nei deuhin an lo nui zui hak bawk.

Țhutthlèngseia u Maliani țhu mêk chuan, "Eng thil maw in duh a?" a lo ti thuai a. Ruatite chu râpthlâk ti zetin ka melh ngat ngat a. Tûna taka zu lei tùra an lo kal kher hi chhan danga awmin ka ring lo.

"Zu kan duh, fûn khat engzat in nge in zawrh ve a?" Ruati bawk chuan a ti leh zat zat a.

"Zu kan nei miah lo," u Maliani chuan a lo ti lêt khauh a. Kan lam a lo pan lai chuan Ruatite chu ka hmêlhriatte an ni tih chu a hre thiam ve nghâl chuan ka hria.

Ruati bawk chuan nui deuh sâwng chung hian, "In țhenawmte sawn in nei an ti sia," a ti hlang hlang a, a hawi vei lah bawk nên nam thlûk tawp mai chu ka duh tut tut tawh.

U Maliani chuan, "An hre sual a nih dâwn chu, zu kan nei miah lo," a ti lêt zêl a. Ruati ep-ah chuan a ding a. Nuih deuh halh pahin Ruati chuan min lo en a, "Hetia inthup vêl kher hi a ngai em ni Ahriat... Zu inzuar tihte chu kan hre vek alàwm, zak duh suh, khawi fûn lî kan lo la ang," a tih leh zat zat lai chuan insûm zo lovin ka din hnaih nghâl ruak a.

Mahse, Kawt ațang ring zetin Lucy-i chuan, "Lalruatpui," a rawn ti tuarh a. U Hmingmuana nên an lo inzui lût zui zat bawk, Ruati hmâah tak Lucy chu a ding zui rân a. Ruati chala nawr si pahin "Inring rawh," a ti leh nghat a.

Ruati hamhaih lutuk lah chuan, "Eng vàngin maw?" a lo ti lêt hû a, "Insual ang, inring rawh, mi inring lo lai kutthlâk chu ka duh lo," ka țhiani lah chuan a ti zui chhar chhar a.

"Nizàn hmasa paw'n ka inhmuh leh hun hunah ka sawisa dâwn che ka tih tawh kha, nizànah țhian dangte'n an zilh liam liam tawh chu a, in duh tâwk mai ang chu tih laiin engah nge an inah leh zêl in lo kal vêl a. Inring rang rawh, ka sawp hrep dâwn che," tih pahin Lucy-i chu a tawlh hnung leh hret a. Ruati hlauthâwng lutuk chu chhantu mamawh hmêl deuhin a hawi kual ruai a.

A țhiante lah U Hmingmuana'n rum deuhin a lo melh khu khu hlawm a, chhan ngam an awm dâwn lo tih chu a hre thiam ta a niang țap mai tùr hmêl hi a pû a.

"Inring vat rawh," Lucy chuan a ti leh țhak a, Ruati bek sam ve ve chu a kêk ta nghek a, na fê in a phih thlu zui bur bawk. Chhuata Ruati a hlawm nawk rual chuan, "min khawih lêt ve ngam em?" a ti rûm al a. Ruati chu a ngawi ta reng a, Lucy pawh chuan, "Kawngpui chârah khian ka hnuh kual hrep che i duh loh chuan hâw vang vang rawh u, Class khata la awm ho zêl tùr kan nih hi aw Ruati. Lehkha zir zawm zêl châk lo rum rum khawpin ka siam duh mai dâwn che a nia," a ti leh nghat nghat a.

A țhiante chuan Ruati chu an kai tho a, an mipa lo hruai vete lah u Hmingmuana a awm tlat avàngin an zum dui a, an chhuak fel tawh chu kawngka biang vuanin Lucy-i chuan a âu zui a.

"Vàna nangni pawh hmeichhe thu thuin awm zul zul tawh suh u. Ruatsaumi-te nên khân lo kal nawn leh nâ teh u, ka u-te țhianho ka sawktîr tawh dâwn chu a nia," a tih khum leh nghat nghat a.

Anniho an han tlàn chhuak fel chiah chu boruak pawh a reh zui duk a, eng mah ka zawh hman hmàin u Muana chuan, "Kha nu i insualpui duh vàng lek khân maw, ka inthiar tùr min pawh chhuah chûk chûk a," a ti hluk a. U Maliani melh pahin, "Bathroom ka hmang lawk dâwn," a ti a. Rang deuhin a lût zui a.

"Ruatite kha an lo kal tih engtin nge i lo hriat daih a?" ti a Lucy-i ka zawh chuan, "Kan In an lo tlan pêl lai ka hmu alàwm, mipate an tel ve bawk si a, a'u Muana ka pun tawp a nih kha," a ti a. Lo kal miah lo pawh ni se kei tak paw'n Ruati kha kut ka thlâk duh maiin ka ring.

"In țhiante em ni?" U Maliani chuan a lo ti ve thuai a, Lucy-i nên chuan kan in melh ralh a. 

Ka khap lèm lo nia a hriat tak hnû chuan, "Kan department-a mite an nih kha, kan department-ah hian MZU a an professor fapa a awm ve a. Chu pa chu ka keh thlûk nu khân a ngaihzâwng lutuk a, ani lah chuan Ahriati hi a duh zâwk si a. U Mapuia leh Ahriati-te innei tùr hi a lo hre ve leh zêl nên u Mapuia lah BDO-te meuh a lo ni si a. Ahriati a thîk lutuk na lamah khua a hmu tawh lo a nih kha.. Tûn hnai deuh ațang damdawi a khawih an ti tak asin," a ti a. Min hrilh ni àwm tak hian min lo melh pah ralh a.

"Damdawi an ruih vànga nih dâwn chiah chu kan in thleng thlenga an lo kal ni," ka ti ve a.

"Kan lo thlen hmâ khân engtin nge an lo tih hman che?" min chhan zet hian a ti leh a.

Thil thlen dàn ka hrilh chuan a sa thar leh phat mai a, "Nichin khân ka khawih na lo mah mah a ni" a ti vang vang a.

U Muana lo chhuak leh chuan, "Kal teh, hâw chho ang, i kawlh hlik hlek êm mai, Mulukawlh i nih hi," a ti a. An unau chu inhnial bap bap chungin an inzui chhuak leh mai bawk nên u Maliani nên chuan kan nui rah rah reng a.

"I zirlaipuite'n an hmusit viau țhìn che em ni?" thutak deuh hian a lo ti chhuak hlawl a.

"Ngaiah ka nei tawh zâwk, chu loah anni kha chu damdawi an rui tak tak a niang. Tûn hmàin khatiang leh lutuk khân an awm ngai lo," ka ti lêt thuai a.

Chumi zân chuan Cecilia-i hnên ațang message ka dawng leh a, chu pawh u Mapuia nên an inbiakna screen shot bawk a lo ni leh a. An inbiakna a an thil sawi lah chu a ho ang reng viau bawk sia, chutia min lo thawn thlap thlap zêl chu a peih ka tih rualin ka ning deuh thut a.

A hming ka save chu ka delete a, Number hlang langin kan inbiak tawhna chu ka screen shot leh vek a. Chumi hnû chuan *Enteh, heti hian min lo ti reng suh, ka ning a nia. I lo ti lui zêla nih chuan kan inbiakna hi ka screen shot ang a, i pasal Pastor kha ka thawn vek ang* ka ti lêt ta thawr a.

Chutia ka tih lêtna chuan awmzia a nei khawp mai, tûn maia a message min lo thawn kha a delete nghâl a! mahse, screen shot in ka lo dah țha hman vek tawh tho si a. A pasal chu ka thawn miah lo ang; mahse, ka hriat duh ang hi hriat ngei ka duh tawh.

Cecilia-i ka vau lêt zo chiah chu u Mapuia call bawk a lo lût ve zat a, chhûngrilah chuan ngaih dàn mak deuh a insiam chawp chilh nghâl a. Dân ngai têin ka chhâng lêt duh chuang lo.

*Meme, thil ka zâwt duh che,* ka ti a. Rang deuh hian min lo reply ve nghâl a.

 

U Mapuia bulah ka sawi thei reng tih chu ka inhria; mahse, ka chapona zâwk hian chutianga tih chu a duh bau lo thung.

*He number hi i hria em?" ka ti a. Cecilia-i nên kan inbiakna screen shot chung lama a number chu thai bial kalhin ka thawn nghâl a.

Rei lo tê hnuah a call a lo lût nghâl rêng a. Ka chhan rual chuan, "U Cecilia-i number a nih hi. A lo bia che a ni maw.." a lo ti chuai raih a.

"Aw.. lo vuan lawk rawh, Message dang pawh hi ka lo thawn ang," ka ti a. A whatsapp-ah screen shot dang chu ka thawn leh nghâl a. Meme-i rûm deuh hak rî avâng chuan ka ngampa zual sauh a.

"A sawi ang hian u Mapuia nên an inkârah awm a awm em ni?" ka ti tawl a. 'Ka u zâwt zâwk la' a lo ti mai ang tih erawh ka hlau ru viau a.

"Awi, sawi dâwn chuan sawi tùr a tam lutuk," rilru ipik hmêl deuh hian a lo ti a.

"Tihian ti ang, naktûkah i hman chuan inhmu ila, kan inah chuan ni lo se," a lo ti leh a. A thil sawi duh chu thil mai mai a ni lo ang tih ka hre thiam ve nghâl a.

"Karaoke kan book ang a, tah chuan free deuhin tuma tihbuai lohin kan sawi dûn dâwn nia," a lo ti leh ta a. Kan inhmuh hun dâr zat tùrte kan sawifel hnû chuan phone chu ka ti tâwp a.

Ngaihtuahna chu a kal thui duh rauh rauh khawp mai, Cecilia-i leh u Mapuiate inkâra thil awm a chhûngte awm lai pawha sawi chhuah chî si loh chu eng thil tak ni ang maw?!

U Maliani pindana lo lût chuan, "Ahriat, Mapuia țhianpa a lo lêng a," a lo ti a. U Allan-a lo lèn chhan àwm tùr ka hriat loh êm avàngin ka hawi buai nak a, u Maliani chu ka zui chhuak ve a. Țhutthlèngseia u Allan-a lo țhu chuan, "E.. hotupa i ti mangang bawka nih hi min lo tîr rum rum mai alàwm," a lo ti hluai a. A nui zui kur kur bawk.

"Aaah.. ti mangang tùr paw'n engmah ka ti rêng rêng lo," rang fahranin ka ti lêt tung a. Nuihzat hmêl zetin u Allan-a lah chuan, "Eng mah i ti lo tak chu alàwm a mangan phah le," a lo ti zuk a, a nui zui leh kur kur a.

"I be duh lo em ni?" a ti ta roh a.

"Chutiang pawh a ni lo," ka ti hliai chu nuihzat hmêl deuh hian min la en reng a, "I be duh lo a niang, in lum chhuahsan meuhin palai hnà ka thawh a țûl phah zui a," a ti a. Chhàn vak ngaihna hre lovin ka ner nang nang ringawt a.

U Mapuia tak pawh chu ka ngei roh khawp mai, a call ka chhàn duh loh vàng mai maiin chinchan ngaihven tùrin a țhianpa a lo tîr duh hial a ni a, ka tlanbo dâwn pawh a ni tawp si lo.

U Allan-a chu dârkâr chanve dâwn a țhu khawmuang ve a, ka pa chu țhenawm inah Card a den daih avàngin u Maliani ho chuan kan inkawm a. A țawngkam a fel fai bâkah a mizia chu a zãng vûk a, fiamthu a la duh tel cheu bawk nên, kan nui leh hak țhìn a. Ka thingpui lumte a in zawh fel chuan dâr kua a hnai ruak ta bawk nên hâw tùrin a ding ta hluai a.

"Min lo thlah ve rêng rêng rawh," min ti a, a nui tak nâin a mitmeng chu a thu tak hlè a, kei paw'n thu âwih takin ka zui chhuak a. A motor hunna bulah chuan kan ding dûn a, "a lo biak leh che chuan lo chhâng tawh la aw," a ti sup a.

"Chu leh bawk chu!" ka ti nai nai a. U Allan-a chu a lo nui hawk a, "Inbiak tam hi a țha a nia, nakin zêlah pawh hna vàng tein a zin chhuah a la țûl fô dâwn a. Chumi hun atân chuan i inzir lâwk angah ngai ula, awm hran paw'n inbiak mawlh mawlh reng tùr," a ti leh duah a.

"Tûna ka lo kal chhan tak pawh hmàn zàn ang khân buaina i tâwk leh ta mai a nih te a ring hman hial a," a tih leh chuan a hmêl pawh a lang thu tak tawh khawp mai.

"A biak tumna che i chhâng lêt thei bawk si lo, i pa number a neih lah kha a lo call ngial paw'n chhângtu an awm ngai si lo a.. zah pawh dâwn lovin min rawn pun ta tawp a nih hi," a ti dût dût a. Ka pa chu call mah se a chhâng mai mai hauh lovang, a kekawr iptê-ah ak ve reng mah se a rîk tluk tluk pâwn hre lo ang maiin Card a den san mual mual thei tho.

"Nakinah nangman eng buaina mah kan neih loh thu chu hrilh rawh aw," ka ti a, "I hrilh ang chû.." tiin a lo nui leh hawk tawh. Ka ner deuh nâng ringawt a.

"Bawiha hi i hlau deuh em ni?" a lo ti thut a, "teuh lo," rang zeta ka tih chuan, "A țha, hlau miah suh," a lo ti zui ve zat a.

"Ngaihtuah ta che, i be țha duh lo dek deka, a tal buai chiam mai hi, hlau lovin nêl takin bia la. Nakin lawka chêng dûn tùr innih avàngin tûn ațanga inbiak tam in mamawh," fiamthu phêna min fuih tel chungin a lo ti leh a.

"Sawi tùra vàng thei em alàwm," ka ti ta ringawt. U Allan-a chu a lo nui suk mai! "Sawi tùr awm miah lo paw'n rei deuh a inbiak theih asin, tactic țha deuh ka hrilh ang che chu," a lo tih chuan, "I mak!" ka ti deuh hlak a. A nui zui kur kur a.

A tâwpah chuan, "Lût tawh rawh, a lo call leh tawh zâwk maithei che asin," a ti dût a, kan in mangțha fel hnu chuan ka luhsan a. Inchhûng ka han lût leh chu ka zak deuh țût ringawt, u Maliani lah chuan, "Kan Val-senior-a chu i chhaih mangang viau a ni maw," a lo ti ngei a, a lo nui kar kar bawk nên ka lâi tak tak a ni.

U Allan-a sawi ang tak takin u Mapuia chuan min lo call leh tawh a. Eng ka hria chu ni maw, ka chhâng duh miah chuang lo!

Ka induh khum chu ka ti ngam lo; mahse, inbiak tam hi ka duh lo tak tak. Min lo biak loh zàn pawh khân min lo biak hun nghak ru ang maiin ka awm tawh a, ka theih chen chen chu a lak ațang hian hran zêl ka duh.

A tûkah chuan nu Zari chuan Rangkachak țhî chu min khul fel sak ta a. Ka bank account-ah pawisa pawh a lo thun fel nghâl vek a. Ka chunga an țha lutuk chu làwm thu hrilh leh dàn tùr vak pawh ka hre tawh lo.

Meme-i nên kan inhmuh dâwn avàngin in ka ti fel sawk sawk a, ka inbual leh tê tê hnuah ka insiam țan a. Lucy bulah pawh engmah ka sawi lo, Meme-i nên kan inbiak dàna zirin engkim hrilh ve vek erawh ka tum thung a.

Kan inhmuhna tùr hmun ka han thlen ve meuh chuan min lo nghâk reng tawh a.

Kan inhmu chu phûr deuhin min lo kuah nghâl that that a, Pindana kan luh rualin ei tùr kan chah fel nghâl a. Hna thawktu lamin kan thil chah an lo dah fel rual chuan thil dang vak sawi belh tawh lovin Cecilia-i'n min lo biak dàn chu min zâwt chiang nghâl a. Kei paw'n țha takin ka hrilh ve zêl a.

Meme-i chuan, "in lo kal laite khân ka nu nên lah an inbe țha ropui si a, i rilru a nuam lo ngawt ang a," a ti a.

"Aih, nuam lo hran lo," ka ti ve vat a. Tãwi tê a nui pahin a ngawi deuh vang vang a, "Ih maw, thil zawng zawng sawi vek dâwn chuan u Cecilia-i hi a mualpho dâwn lutuk a.." a ti fân raih a. Sawi chhuah chu a hreh hmêl hlè hian ka lo hria a.

"A'u Mapuia'n High school a kal lai hian u Cecelia-i pa hi kan vêngah an lo sawn a. E, i la hre ve lo tak ang a, u Cecilia-i pa pawh hi Pastor tho alàwm," a ti a. Mak ka ti dâwn viau nâin an ina Cecilia-i lo tlàng nèl dàn ngaihtuah chuan a mak ka ti leh vak lo, u Mapuia pa lah kohhran upa a ni a. Mak deuh tùr kha a mak tawh lo zâwk.

"Ka pa pawh a tlangval lai ațang tawh rawngbâwltu a ni ve a, u Cecilia-i te an lo insawn paw'n kan chhûngkaw hnih chu chhûngkhat ang mai hian kan inpawh nghâl a. A pa leh ka pain Pathian rawng an bâwl a, an fate lah inkâwm rual vek kan nih avàngin kan inlèn pawh nasa. Khâng lai khân ka la naupang viau nâin thil engkim ka hre thiam ve vek tawh a. Kan unau rau rau-ah pawh a'u Mapuia nên hian kan inzui nasa a, min duat êm êm a, kei paw'n kan unauah chuan ka ngaina ber. Amah hian naupang a ngaina a, mi kha a kâwm hlim thiam tlat a," a ti zui mial mial a.

"An lo insawn tirh ațang u Cecilia-i hian ka û kha a ngaizâwng nghâl a. School khatah an lût dûn chho ta zêl bawk nên an pahnih pawh an inzui nasa lutuk, ka u erawh chuan ka pa țhianpa fanu ang leh a țhian ang bakin a en ngaiin ka hre lo. Kan unau dangte aia u Mapuia nên kan inpawh bîk zia pawh a hre thiam thuai a, u Mapuia'n ngaihzâwng a neih leh neih loh te, tu nge a bialnu tih ang rengte kha min zâwt vak vak zêl a. Kei lah ka la â sia, ka thil hriat ang ang kha ka hrilh vek zêl a," a ti a, thil hlui ngaihtuah lêt ni àwm takin a nui zui har har bawk.

"U Cecilia-i tân chuan u Mapuia hi a tleirãwl chhuah ngaihzâwng hmasa ber ang kha a ni a, ka u in ngaizâwng lêt ve lo mah se a kalna a piangah a zui kawi peih a. Kan Pate ve ve lah inzui chawt an nih avâng khân mite paw'n, 'țhian țha' inzui mai mai angin an ngai vek a; mahse, U Cecilia-i hmangaih hmasa ber leh a awm chhun chu ka u hi a nih phah ta rêng a nih hi," a tih lai chuan ka lo țang ru țeuh mai.

"Higher an zir chho kha u Mapuia hian basketball a khel chho țan a. Under 21-ah a khel țhìnin ka hria. Chutih laia infiam mite chuan tûn anga ruihhlo leh a kaihhnawiha insûm theihna ang hi an la nei lo a, ka u pawh Basketball a luhchilh chho chiah kha a nun a buai phah ta vek a. An châk a piangin zu leh sa nên an làwm țhìn si a. Kum naupangtê si in zu te kha a in hmâ asin aw.. Ka u hi tun ang hian a țha bîk reng lo a, a che bãwrãw ve thei lutuk tih i hria em?" tiin zawhna min zâwt leh daih a.

"Umm, mi sawi ațangin ka lo hre ve tawh a," dik takin ka ti lêt ve thuai a.

"A țha, eng mah i hre lo ang tih ka hlau a, tihian sual kawng zawh nawn tawh miah lo mah se a nupui tùr i ni a, a nunhlui te pawh hre ve vek zawk la, inneih fel vek hnua hriat chhuah chiah ai chuan i tàn paw'n a nuam zâwk ang," a ti a. A rilru tluangtlam lutuk chu a mak ka ti ru kher mai, mite chu an unaute sualna zêp sak tumin an inphat pui ngar ngar ngai a nia..

"Ka pa lah fa sual a nei ang tih inring chhin ngai hauh lo kha a ni a, u Mapuia nun buai chho kha a enkawl thiam lo ta reng a. Kutthlâk a vuak sim a tum a, ka u lah a luhlul tulh tulh mai si a. Higher zir rual lêk si khân chhungkua a chawk buai hneh țhìn asin, a school kal tùrte pawh pawisa paitîr duh lovin an hrêk ve țhìn tak nâin ngawi rengin a lo inkhel a. A ruihna daih tùr chu a lo nei leh mai zel, ina a awm leh ka pain a zilh a, țawngkamin a daih loh chinah kut an inthlâk a. A chang leh ina lo hâw miah lovin khawlaiah a tal kual thul, chutia khawlaia tal tawp a chîn tâkah phei chuan ka nu hian, 'mi kut tuarin a lo tlu hlawm reng palh ang' tiin zân lamah zawng tùrin a chhuak fô a. Rui chungin an lo inhruai hâw a, ka pa lahin a rui ber kha a lo haw leh êm êm țhìn si a. Khâng hunlai khân kohhran upa chhûngkua si kha kan mualpho ve țhìn a nia, u Cecilia-i paw'n ka u chu a duhin a âtchilh tlat tawh si a. A theih ang angin ka u zân lêng chhuak țhìn kha a ûm zui a, a țhat leh theih nân theih tawp a chhuah ve tak zet. Zàn khat phei chu ka u lêng chhuak kha a zui ve ngawt a, ka u lahin khatia zui kualtu a nei reng kha a lo ning ve tum hrang bawk nên, zân rei ah an awmna khawpui daiah u Cecilia-i chu hnutchhiahin hmun danga pansan daih a. Chu chu u Cecilia-i ûte-ho-in an han hre leh kha an lungawi lo khawp mai a, u Mapuia hi kutthlâk an tum hial a. Tlêm a tlêmah an chhûngkua leh kan chhûngkaw inkâr kha a buai lo chauh asin," a ti a.

"I rilru nat nâna sawi ka ni dâwn miah lo a nia. Ih maw, ka u tâna u Cecilia-i inpek ang êm êm khân tu hmeichhiate mah hi mipate tân an inpe theih tawh chuangin ka ring lo. Zân laia khawpui daia hnutchhiah tû kha a chhûngte khapna kârah pawh a thlahthlam thei lo a. Chûng hunlai phei chuan ka û teho rual kha a huho a insual an chîng a, VDP hràn zual lai tak ni mah se khawi emaw lai kâwnah chuan insual buai tâwk an awm reng zêl tho, u Cecilia-i hian ka u kha a zawn a a zawn țhìn avàngin ka u insual hliam tuar te kha a rawn kuah hâw fô a. A û te'n ka u ngaihven tawh lo tùra an tihna te kha a ngai pawimawh zo ngang țhìn lo, a țawngțai sak fo a. Kan in leh pastor quarter chu a inhnaih êm hi.. ka pa in ka u kut a thlâk thâwm a hriat chuan a lo lang thuai zêl, a châng chuan ka pa khân Inchhûngah ka u awm ve phal lovin Veranda-ah a awmtîr reng zêl a. Chûng hunah te chuan u Cecilia-i hian a rawn țhutpui reng ang a, a phâk ang tâwkin Pathian thu hrilhin ka u nun kha thlâk danglam sak a tum nasa țhìn asin," a tih lai chuan thâwk ka lo la ham ham a.

Cecilia-i leh u Mapuia te an la inbe ngun êm êm  pawh thil mak vak ah ka ngai tawh lo, Meme-i sawi ang khân Cecilia-i hian u Mapuia hi a lo hmangaih êm a nih dâwn hi; mahse, engati nge pasal dang a neih daih le.

"Vawi khat chu maw kâr khat dâwn u Mapuia hi a vak bo a, zànah pawh a lo hâw ngai ta silo kha ka nu phei chuan a thi tawh ang hialah a ngai a. Kan zawn lahin hmuh tùr a awm ngai si lo, chanchin thar leh news paper vêlah ruangchhar chungchâng an lo tih chhuah hlek tawh chuan, 'Mapuia a ni mai ang a' ti rêng rêngin ka nu hi ruangdahna hmun hrang hrangah a vak kual țhìn. Mak deuh maiin zân khat chu zîng dâr thum tlângah kan kawngkapui a lo inchum ri bur bur a. Ka nu leh pate chuan, 'zualko kan dawng ngei dâwn e' a ti hman hial a. Ka lo muhîl tawh te kha min kaitho a, zualko hmêl hmuh inbeisei ru tak chunga kawngkapui kan han hawng chu him dam pialin u Mapuia a lo lût hlawl a. A thi tawh mai emaw tia kan lungngaih tlãn lai ni mah se, a hmêl a hmu thut kha a thinur thar leh a ni ber ang chu, ka pa khân a lo hrâwm nawk a. Kutthlâk zui mai a tum kha, 'Ka pa ka rui tawh dâwn lo' ka u chuan a lo ti teh ngawt a. Ka pa hamhaih paw'n kut a thlâk zui ta bîk lo. ' Min ngaihsaktu nu leh pa ka nei che u a, min ngaihsakna hlut zia hre thiam lo lêka ka lo tal țhìn kha min ngaidam rawh u. Vawi khat mah ka rui tawh lo ang, in duh loh zâwngin ka nung tawh lo bawk ang,' a ti zui mawlh mawlh a. A duh a sawi zo kha ngawi rengin a room lam a pan nghâl a. A sawi ang tak takin chumi țuma u Mapuia lo hâw chu a nun a danglam vek a, vawi khat mah a rui leh tawh ngai lo," a ti a. U Mapuia nun inthlâk danglam chhoh dàn a sawi lai chuan a hmêlte chu a eng sar sar ni mai hian ka lo hmu a.

"Chutia ka u a han țha leh ta chu u Cecilia-i pawh a làwm khawp mai, an tih fo dànin school an kal dun leh thei tawh a, an inzui leh chawt tawh a ni ber; mahse, u Cecilia-i beisei angin ka u hian ngaihzâwng angin a en ve thei si lo lai tak kha a buaithlâk chho ta a. Higher an zo kha phai lamah ka u in zirna chhunzawm a duh a. U Cecilia-i paw'n a zui ve zêl a, ka nu leh pate paw'n u Cecilia-i'n ka u a duh zia chu an hre ve vek a. A châng phei chuan ka u kha an nawr a, 'ani aia țha chu nupui tur an awm tawh chuang lo ang, innei mai rawh u,' te kha an ti fiam fo a. Ka pa tân tak pawh a țhianpa ve ber fanu in a fapa a âtchilh êm eum laia lo en liam tawp kha a harsa ve țhìn ang, u Cecilia-i zia an hriat chian bawk avàngin innei mai mah se pawi an ti miah lo; mahse, ka nute'n fiamthu ti tak deuha u Cecilia-i nên innei mai tùra an tih châng chuan, 'ka nupui tùr a ni lo,' a ti deuh țo zêl a. 'A nih leh tu nge i nupui tùr chu' an tih lahin, 'A la țhang lian mêk' a ti zêl mai bawk si a," A ti a. A u in a nu leh pate chhânna a pêk țhin dàn chu a nuih chhuah pui hak hak bawk.

"A tâwpah phei chuan an fapa chu nawr luih chi-ah pawh ngai tawh lovin an en liam ve ta tawp a. Ka pa erawh a țhianpa Pastor lakah a inthlahrung țhìn viau chuan ka hria, Collage kha chu țha takin an zir zo thei mai a; mahse, u Cecilia-i kha a beidawng ve ta nge, 'mi dang ka ngaihzàwn chhin chuan a thîk ang a, min duh thu a sawi ve tawh ngei ngei ang' a ti zâwk ni. Collage an zo kha Mizoram lamah an lo hâw chho a. E, Chutih lai chuan u Cecilia-i pa hi khaw dangah an sawn tawh. A pa te awmna khuaah chuan a hâw tlang a, tah chuan tuna a pasal hi Pro Pastor in a lo awm ve mêk bawk a. Khatih laia a rilru kha ka hriat sak vek miah lo; mahse, ka u thîk tùr atân a ti chuan ka hria. Pro Pastor nên chuan an inngaizâwng chho ta a, an inzui dàn chanchin engkim kha ka u a lo hrilh ve vek zêl. Ka u lahin eng teh vak ah a lo ngai si lo a, ka u chuan a zirna chiah a ngaihven a ni tawp," a ti a.

"A tãwi zâwngin sawi tawh mai ang, ka u hian exam hrang hrang a pe țhìn a, a tirah chuan a hlawhtling nghâl mai bîk lo. U Cecilia-i paw'n a tihsual zia a inhria a, ka u in a bialpa lah a thîk miah si lo nên Pro Pastor chu a țhen rèn ráwn rih a nih chu; mahse, a pate lamin an nawr lui ve ta deuh a. Ka u in a ngaihven lêt loh zia an hre chiang ve bawk nên ka u ngawt a ngaihven mai chu tlawmah an la ve a niang. Pro pastor lahin a thlah hlei thei tawh dèr si lo a, ka u in hna a zawm hnu rei lo têah Pro Pastor nên chuan an inneihtîr ve ta chat a. A pasal pawh Pastor ah te an hlângkai ta bawk nên an hlim zui viau tùrah kan ngai a; mahse, beisei loh deuhin pasal a neih ațanga rei lo têah u Cecilia-i a chiang lo riau ta țhìn a," a ti a.

"Engtia chiang lo in maw?" ka tih chuan, "Hei.. chhûl țha lo an tih ang deuh hi, i hre thiam mai em? Chhûl paih vêl ngai miah chuang si lo, engtin nge âw ka han sawifiah ang, chian loh riau châng a nei," a ti hap a. A sawi tum chu ka man thiamin ka hria.

"A chian loh châng chuan maw ka u hi a pasal emaw a ti tlat țhìn a," a lo ti ta mai a. Mak ti zeta ka en kâwk lai chuan, "pasal a neih hnu rei lo tê ațang a chiang lo țan a, keini chuan kan hre ve lawk lo; mahse, nau a pai laiin damdawi a lo ei vak a, nau chu a chhiat ta a. A pasalin chutianga a tih chhàn a zawh chuan, 'Mapuia nên a kan fa lo chu ka pai duh lo' a lo ti a ni àwm e," a tih lai chuan ka țim sung sung mai.

"Chuta țang chiah chuan chhûl lam chian lohna a lo nei ru reng tih chu an hre chhuak a; mahse, ka ngaihtuah lêt rauh rauh hian pasal a neih hmâ daih tawh; ka u a âtchilh chhoh țan lai ațang daih tawh khân a chiang lo tawh in ka hria," a ti leh zêl a.

"Heng zawng zawng ka hrilh vek chhan che chu nakin zêlah pawh u Cecilia-i hian ka u hi lo tihbuai châng a nei dâwn a. Chutiang huna lo thlen palh pawha i invên lâwk theih nân ka hrilh vek che a nih hi, a pasal pawh hi a beidawng ve țhìn lutuk, han țhen ngawt dâwn se Pastor meuh a ni si a. U Cecilia-i lah a chian loh châng apiangin a pasal rilru nat dàn tùr hlirin a awm zêl mai bawk si a. A châng phei chuan a mualpho loh nân tiin a pasal hian ka u hmu tùrin a hruai tawp zêl alàwm," a ti leh zêl a. A thil sawi tâk te chuan min țhâwng lutuka sawi ve mai tùr pawh ka hre lo.

"'Ka u hian nupui nei se u Cecilia-i awm dàn pawh hi a reh mai lo em maw le, te kan ti mai mai zêl, ka u lahin, 'ka nupui tùra la inpeih lo' a ti mai zêl bawk si a. Tu mahin nupui nei tùrin kan nawr lui ngam si lo a; mahse, tihian kum tam tak hnuah a nghah ber chu i inpeih ta a," ti a min lo nuih chuan ka îp ru chaih a, kei kher hi a mi nghah chu ka ni dâwn lo lutuk tlat.

In lam pana ka hâw kawngah chuan Meme-i thil sawi te kha ka ngaihtuah zui nasa khawp mai.

U Mapuia leh Cecilia-i te chu an inngaizâwng lo tih ka hre tawh nâin, keimahah danglam pakhat mah a awm chuang lo.

A chhan chu Meme-i sawi hmang ațang khân, a buai zual châng apiangin a pasal meuhin u Mapuia hmu turin a hruai țhìn a. Chu thil chu thil pângngai a ni lo tih ka chian êm avàngin, an inngaizâwng anga ka hriat lai ang tho kha an pahnih ka hmuh dàn chu a ni.

Chutiang bawkin Cecilia-i pasal chu ka lainat ber tho, a hmangaih êm êm a nupui, a hrisêl loh lai ber pawha enkawl a huam êm êm tùrin, a bawrhsawm lai bera mipa dang a mamawh zâwk tlat mai chu a khawngaihthlâk tak zet. A nupuiin 'U Mapuia nêna an fa lo chu a pai duh loh' thu sawia, an fa a tih tlak vanga a rilru hrehawm dàn tùr zia te. U Mapuia chu a haw ru hlè a nih pawhin a nupui mualpho loh nân a pan pui țang țang a țûl bawk a, a nun ram chu a hrehawm ngawt ang.

Zànah chuan Lucy a lo riak a, engtikah emaw Cecilia-i chungchâng hriat hun a la nei dâwn a. Chuvàngin keimah ngeiin ka hrilh lâwk veka țha a hriain a chian loh dànte chu ka hrilh ve mial mial a, nau a tih tlâk thu erawh ka hrilh lo.

"Uii, a mak ka ti e, chhul lam chian loh vàng mai a mahni pasal nilo mipa dang ngaihven daih mai chu a ni thei dâwn em ni?" a ti hû a.

" ka hre bîk lo; mahse, chhûl lam chiang lo te chu an chêt duh dàn a mak theih êm hi, kan têt deuh lai paw'n vêng hmâwr a nutling pakhat a in awh hlum daih kha," ka ti ve thuai a.

"A ni tho mai, amah pawh kha a buai nasa tiraw, Pathian thute kha a sawi vak vak a. A hnu lawkah saruakin a vak kual leh chiam zêl a," a ti ve melh melh a.

"Nichiah e, chuvàng chuan Cecilia-i awm dàn pawh hi dem ngawt theih a ni lo," ka ti hap a.

"Mahse, in inneih hunah u Mapuia hmu tùrin lo zin chilh hial ta se engtin nge i tih ang?" a tih chuan nghet deuhin ka kuah vak a.

"Chutiang sawi suh, kan ruahmannaah chutiang chu a tel lo," ka ti hlak a.

Thli a thaw vuk vuk a, hmun țhenkhat ah chuan ruah a tla hial mai thei, naktûk mai hi YMA day a ni tawh a. YMA day ah chuan ruah a sûr ngei ngeiin ka hre țhìn.

Ka phone nghawr chur chur chuan ka mu tui lai min ti harh a, phak zeta screen ka en chuan ka hmu sual emaw tiin mit ka nuai zui chat chat a, call chu a tawp a; mahse, a lo call nawn leh nghâl zat a. Zîng dâr 2 a pêl daih tawh sia, egati nge a lo call le?!

Ka bula ka țhiannu muhîl lai chu tih harh hlau zetin, "Hello" ka ti sa sa a.

"Lo chhuak rawh, pâwnah ka awm," a lo ti thûm dût a. Ka nghing dawtin ka hria.

"Eng a? Tun ang tlai tawh ah engati nge i lo kal a?" ka ti zui hlak hlak a. Min lo bàwl kuala nih te chu ka ring deuh thut thut a, "Infiam hun a ni em ni? Ka dah ka mu dâwn" ti leh nghâlin phone chu ka off hmak a.

Mahse, video call in a lo call leh zui zat a. Ka lâk rualin screen-ah chuan kan In a lo lang raih a, a uang miah lo a nih hi.

"Lo chhuak rawh, i lo chhuah loh chuan kawtah hian ka riak dâwn a nia," a lo ti nghut nghut a. Phone chu a off zui daih bawk.

Phone chu melh hrepin thâwk ka la ham ham a, eng tak chu hria ni maw, zîng dâr 2 tlângah kan kawtah a lo awm ringawt chu a nia.

Khua a lum êm avàngin kawr bah leh kekawr bul nên ka mu tawp a. Light tih en a thuamhnaw zawn leh lah ka ngam dèr bawk si lo. Banga kamisz vâr inkhai chu la thlain ka inthawlh sawt sawt a.

Thâwm dìm thei ang berin kawngkapui chu ka hawng riai riai a, kawta ka pên chhuah rualin a lu zawnah a phone lek kangin u Mapuia chu a lo țhen suk a.

Lungawi lo zetin ka melh kha kha thung, a car kawngkhàr chu a lo hawng huau a. Seat ațang chuan țhu chhuak deuhin car kawngka hnuai chu a lo rah chhan rùn bawk.

Ka dinna ngaiah ding tlat a ka melh kha kha lai chuan, "Lo kal teh," a lo ti zawi ruih a. Ka ner nak ringawt.

Ka chet sawn mai loh avàng chuan a rum deuh nghut a, a kut phah hlai zet pahnihin hmai a tuai thuak a, a lan dàn chu a chauh hmêl riauin ka hria, u Mapuia bawk chuan, "Naute, lo kal hnai teh," ngènngawl zet hian a rawn ti leh a. Amah chu pan tùrin min duh tih hai theih miah lohin min melh vung vung bawk.

A tâwpah chuan ka pan phei ta nge nge a, a lo kiai zui suk chu, "engati nge i lo kal a, ka pain zànlaiah ka chhuak tih hria se min hau nek dâwn asin," zawi vîn zetin ka tih khum hlak hlak a.

A bul ka thleng phei chu min lo ban thut a, ka kiu ve ve a lo manin a kap kârah min pawt lût zui rawk rawk a, "Khawi teh.." ka ti leh chiah chu ka âwmah hmai a lo phum hmiah a, min thlâkhlelh hmêl takin thâwk a la zui suai suai bawk. Ka âwm bâwr lo lum ham ham avâng chuan, "awm sawn vat teh," ka ti hlak a.

A ban hrawl leh lianpui chu ka kâwngah a suih bet rân tawh, ka țang phat phat lai chu muangchânga lo hawi chhuak ruai ruaiin min lo en chho rùn a. Car chhûng eng avàngin a mitmeng chu chiang takin ka hmu thei a, a sen deuh rûm in ka hria, "Min va ngai lo ve," zawi ruiha a lo tih leh chuan a chalah ka nam sak vak ringawt, u Mapuia chu a lo nui huk a. A hmâ ang bawk chuan ka âwmah hmai a lo phûm leh nghâl a. Thâwk pawh ka thaw chhuak tawh lovin ka hria.

"engati nge i lo kal?" ka ti halh a. A chau tih ka hriat vàngin ka khawngaih ve deuh a niang tâl chhuah tumin ka țang tawh bîk lo.

"Ka ngai che a," ril ruiha a lo tih chuan ka îp chawih a, u Mapuia thung chuan ka kalsawn ang tih hlauh hmêl zet hian nghet deuhin min kuah sauh sauh a, a thâwk lâk dàn mawlh chu a chauh hmêl tak zet.

"I lo zân tlãn em ni?" ka tih chuan, "ummm, tlaiah ka lo chhuak," a lo ti thûm bul bul a. Zawh leh mai tùr ka hre tawh lo bawk nên ka ngawi ta rauh rauh a.

 

"I tlanbo daih emaw tih theih tùrin i khawsa tlat a," a lo ti chhuak sup a, a lungawi lo viau emaw tih laiin a bei țha sauh sauh thung a.

"Ka tlanbo loh zia chu i hria alàwm, u Allan-a pawh a lo kal reng kha," ka tih lêt nghâl zat chuan a lo rûm nghut a, ka îp leh chawih tawh.

A âw a thûm tluk zetin a rûm rî chu a thûm êm êm a, ka âwm zawnah hmai a phum tlat bawk nên ka chhûngril thlengin a nghawr che dar dar a, ka mûr a ni mah zâwk ang.

U Mapuia chuan vui âw zet hian, "A lo kal hnu paw'n min biak duh miah loh reuh kha," a lo ti bul leh hmuk a, a lo hawi chhuak chuang miah si lo nên, a awm dàn chuan nuih a ti za viau tawh.

"Chuvàng mai mai chuan maw i rawn zàn chhuah rum rum a," ka ti fiam a, lungawi loh hmêl zeta a lo rum leh nghut chu ka nuih zui kar kar bawk.

"Nui suh, hrehawm taka min siam man hi ka rul lêt palh mai ang che," a lo ti zàwi leh ruih a. Kei lah ka nuih a zà telh telh bawk nêna tâwpah phei chuan amah zâwk pawh a nui ve ta suk suk a.

"Engtin chuan nge min han rulh lêt chuan ang le?" ti lêt zêl pahin a sam kârah kut ka rawlh lût a, a lu chu ka tuai sak hauh hauh a.

"I hre duh chiah ang maw?" tih hniam chhak paha a kuta sawn thlâk rual chuan ka îp zui chawih a, u Mapuia erawh tifuh intih hmêl zetin a nui nghawr leh dawt a, a kutphah lian leh lum thup chuan ka malpui a zût kual nghâl dun dun bawk.

He pa pui hi a kut a hlei dâwn tlat.

Ka ngaihtuahna chu a lo hre thei a niang khap zui ngai lovin a tâwp leh mai a, "tikhân i chiang tawh em," a lo tih leh nghut lai chuan a lo hawi chhuak a, a mitmeng thim ruih chu van vâr ah chuan a de suar a, "i hur lutuk," ka lo ti hmak thung.

Nui rûm hawk chungin thâwk a la vang vang a, a tih dàn ngai bawkin a bei leh a, a thaw chhuak zui suai suai bawk.

Kan ngawih dûn leh vang vang hnû chuan, "I kê a kham tawh em?" a ti a, ding rei tawh min ti te pawh a niang, "aih," ka ti lêt thuai a.

"Umm, heti hian rei lo tê chhûng chauh awm rih ang," a lo ti zàwi leh ruih a, min thlâkhlelhna chu a aw ril ruih ah chuan a lang chiang hlè bawk.

Ka nunah a lo lang thut a, amah nei tùrin min nawr lui zui zat bawk a. Ka duh loh thu țawngkam na taka ka hrilh hnu pawhin a beidawng duh lo a. Ni rei lo tê chhûng chiah hun kan hmang dûn hman a, tichuan a hna vàngin a awm bo leh vang vang a, a lo lan leh meuh chuan nupui thlahlel êm êm tu pasal; hun rei lo tê chhûng lek awm hranna pawh tuar hlei thei lotu, lunglenna leh khawharnate tuar thei lo zet pasal ang chiahin a khawsa zui a.

Engtianga lo dawngsawng tur chein nge min beisei le u Mapui...?!!

Ka âwma hmai phûma hahdam hmêl zeta u Mapuia thâwk la chu ngaihtuahna tam tak nei chungin ka en ta reng a, ani erawh hahdam hmêl takin a maimitchhing chual a. Car chhung light a tih thim loh avàngin a hmai vun uk sen khurh chu a lang thim zual a, ka hmuh tirh khân mipa hmelchhe lo tak a ni tih chu ka pawm tawh; mahse, a dawhtheihnate, a zaidamnate bâkah a ze nghet churh maite ka han hriatchian tâkah chuan hmeichhe tâna siam Mipa dik tak hi a ni hluah hluah mai, ka pasal tur a la ni cheu zui a!

"I muhîl ngawt ang e aw," zàwi tê a ka tih chuan a nui tih hriat zetin a khabe ruh kual chu a che a. Țawngkâ chuan min chhâng lêt lo thung.

Mi tam tak nupui pasal atân an induh chhan chu an nunhlui an hriat chian vâng a ni. Mi tam tak nupui pasal atân an induh loh chhan pawh an nunhlui an hriat chian vàng tho a ni.

Kan nunhluite chu kan inhriat chian sak tawn ve ve tawh a, nunhlui chhuan tlâk loh lai tam tak nei tu ve ve kan ni. Kan chhûngkaw dinhmun chenin hriat loh a nei lo a, min iai phah loh zia min hmuhtîr tawh bawk. Chûng te avâng chuan ka hriat hauh si lohin kawppui tùr atân ka lo pawm ru reng tawh zâwk em ni ang?!!

Ka ngaihtuahna âtthlâk zet vâng chuan lu ka thing nak a.

Chutia ka chet tâkah chuan muang ruihin u Mapuia chu a lo hawi chhuak ta a, thli thaw vûk vûk kâra kan mit a han intawng siah chu thisen a lo lum nghâl pap pap a.

Eng mah sawi lovin thu tak êm êm hian min melh vung vung a, min melh dàn chu a ril ruih a ni mai. Zin kawng thui tak a lo zawh vànga a mitmeng chau ru takah chuan țawngkâ a, a sawi chhuah miah si loh eng thil emaw fiah riau si hi ka hmu a.

Inring lâwk lo zetin a hmai tlâng hrawl tham zet chu ka dawm ta ringawt a, a pangti lum thur thur leh hmul ziah faina hnua hmul thap deuh hraih chu ka hre rang hlè bawk.

Chutia a biang ka dawm sak lai chuan a lo thaw chhuak suai suai a, "I chau viauin ka hria u Mapui, inah haw la han mu hahdam rawh," zaidam thei ang berin ka ti a.

Amah thung chuan, "Ka la kham lo che," a lo ti ril ruih a.

A ngaihtuahnate thup țhen hauh lovin min melh rùn bawk nên ka zam thar thut a, ka thisen lo lum pap papte chu hre mah ila, "In i pan tlai chuan laklawh deuhin i chhûngte i ti harh dâwn asin," ka ti leh hrâm a.

Thli a thaw vûk vûk a, ruah leh rial te nên a beih chiam phei chuan kawng lakah a talbuai ngawt ang. U Mapuia thung chuan thatchhiat hmêl zet hian, "ka lo kal thu pawh an hre lo," a lo ti muang fan ruih a.

"Eng a?" ka ti deuh hliai a.

A mizia leh tûna a chet dàn chu inhmeh lo ti zetin ka chek khum zui tlat tlat a.

"Tlawh pawh ka tum lo, ngaihțha deuhin min siam la Khawbung lamah ka lêt leh nghâl ang," a lo ti nghut nghut a.

"I va â tak, kawng lakah chesual palh ta la tu mahin i chinchâng an hre dâwn lo asin," ka ti hliai a, chauh hmêl zet in a rum zui nghut a.

Ka âwmah bawk a lo bei leh hmiah chu, "I va'n ti ang lo tak," ka tih khum leh hrâm a.

Ka thil sawi nên a inrem lo lutukin, "Min kuah lêt ve rawh," ngènngawl deuh hian a lo ti hniam ruih a.

Kuah lêt duh lovin ka ding khawng lah a, " 'i chau' i tih kha, chau te chu duat tùr asin," a lo ti hluk a, a uang ve ngei ni tùr a ni a nui che zui dawt bawk.

Țha tê têa ka kuah tâkah chuan, "Nangmah vàngin alàwm ka lo kal, mi dangte chu ngaihtuah rih lo teh," a ti deuh nghut a, a phone call leh text message te ka chhàn lêt duh loh vàng khân pangchan lamah a ram țang taah ka ngai.

Hetiang mipa, mipa ah pawh mipa satliah nilo, mihring ațanga thlîr pawha hna zahawm tak thawk a mawhphurhna hlen chhuak țhìn mî, nu leh pa hlutna hrefiaha nun bãwrãw tak ata, mahni inkhai chhuak thei ngat khawp a mi tumruh. Chutiang mi chuan min ngaih vàng ngawtin zin kawng thui tak zawhin ka hnên a lo pan vang vang mai chu thil ni thei ni pawhin ka hre lo; mahse, rinhlel rual lovin a lo thleng a, min kuahin a chàwl hahdam mêk chu a ni si a.

"Zànin la la hian i lêt leh nghâl dâwn a maw?" ka ti a.

'U Allan-a lo kal hnu khân a call te kha lo chhâng ta hle hle ila tûn hun hi kan tawng lo ni mai tùr,' ka ti ru rauh rauh bawk.

"ummm, naktûk hi chawlh a ni tho a, thlen chhoh rualin ka'n mu nghek mai ang chu," a lo ti ve sup sup a. Zan reh lai taka nih vàngin thâwma bengchheng hma a, keini pawh chu kan țawng zàwi dûn hlè a. Thli lo thaw leh vûk vûk țhìn chuan kan thâwm chu min thup țhen sak ka beisei bawk.

"Naktûk chawlha nih tho te chuan in lam tlawh ve phawt la," ka ti ve zêl a. Tûn hi inhnial lo a kan inbiak thui ber țum a ni hial ang.

"Naktipah hna thil a zin chhuah a țul tlat alàwm, chuvàngin khi lam a thlen chhoh leh vat ka ngai," a lo ti ve thuai a.

Chumi hnu chuan kan ngawi dûn leh vang vang a, mak tak maiin ngawi reng mah ila kan thinlung chu a inhmu viauin ka hre lawi a, rei ngial kan ngawih dûn vang vang hnu chuan, "pawn lama awm pui reng che lah a dik hauh si lo," a ti ta nghut a. Min kuahna chu a thlah thawl ve ta a.

"Thil ka lo hàwn tak che asin," a ti zui sup a. A bân lehlama min la kuah rùn chungin a kut lehlamin motor chhûng lam chu a ban vut a.

Ka beisei loh lutukin Pangpâr bâwr nalh zet mai hi a lo lek chhuak ta mai a.

Ban mai lo va ka melh rân ringawt chu, 'la ta che' ti ni awm takin mit ti zîm sun hian min en rùn a. Pangpâr bâwr chu enin u Mapuia bawk chu ka melh leh phawt a, duat hmêl lutukin min lo melh ve reng a, min melh dàn chu a ril ruih mai a ni.

A tâwpah chuan tîm ru deuhin pangpâr bâwr chu ka ban de de a, Pangpâr ka dawn vawi khatna a ni bawk nên ka hlim êm êm a, min pe tu mitmeng vàng erawhin ka sa pap pap reng thung.

"Lavender a nih hi," ka ti hliai a, hlim zetin pangpâr bâwr chu ka hnim nghâl vang vang bawk. Lavender a nih ang ngeiin min ti hahdam nghâl sawng sawng a.

"A mâwi lutuk, ka lâwm e aw, u Mapui," hlim zet a ka tih lai chuan a lo bu nghut a. Phûr lutuk a, ka hnim nawn sek mai chu, hmuhnawm min tih hmêl deuh hian a lo nuih pui suk suk bawk.

"Hriat reng tùr a nih hi," zàwi supa a lo tih chuan, "eng chu maw?" ka ti ve vat a. Min chhâng lêt lovin ka biang a lo piai zauh ringawt.

Pangpâr bâwr dawn vàngin hetiang tak hian a hlim theih tih rêng ka lo ring chhin ngai lo. Fairytale ring lo khawp a rilru sak zet ka neiin ka hre țhìn a; mahse, ka tân liau liau Peter Pan a lo lan meuh chuan Fairytale chu ka ring mai ni lovin ka awm dàn chu Fairytale dik tak tih ka pawm thlap tawh.

U Mapuia chuan, "Thil dang pawh ka la nei a nia," a lo ti leh dût a, rang deuhin ka en leh thuai a. Hmuhnawm tih hmêl deuha min lo thlîr rengin lungawi hmêl zetin a lo kiai suk a, min hmeichhe naupang chei leh tlat tawh hian ka hre thut a.

"A dang pawh maw?" tiin ka zâwt ta tho.

Car chhûng ațang chuan nepnawi awmna ni àwm tak plastic bag a lo khai chhuak leh a.

"I lawm zâwng ka hre mai si lo a, i thlang mai dâwn nia," aw zàwi leh dam thlup hian a ti a.

'I lawm zâwng ' han tih kher chu a naupang thil in hawn sak deuh tlat tawh.

Plastic bag chhûnga mi ka en nâk chuan rin lâwk ang chiahin ei tùr chi hrang hrang hi a lo awm a. U Mapuia ka en leh chuan ka nui tak nâin ka chhûngrilah chuan che kual rawih rawih a awm!

Rilru chu ka naupanlai hunah bawk a lêt leh lo thei lo. Nepnawi ei châk zâwng ka neih ve pawha ka ei phâk ngai loh zia te, naupang dangte an pate kal chhuak lo hâwin thil an lo hawn sak ka hmuh chânga ka awh ve țhìn zia te kha ka hre thar uarh uarh a.

U Mapuia chuan a nachâng a hriat vàng chauha min lo hàwnsak a ni maithei. Ka tân erawh ka 'Inner child' hliam thawi damna (healing) pakhat ang a ni a. Ka ngaihlu ngawih ngawih.

Plastic bag chhûng ngawi renga ka melh deuh ngat ngat lai chuan, "i ei duh zâwng a awm lo em ni?" a rawn ti dût a.

Amah chu ka en leh a, ani erawh a thil min lo hàwnsakah chuan ka duh zâwnga awm loah ngaiin a rilru a lo buai hmêl hlè tawh.

Plastic bag chu a lo hai kual ruk ruk a, chocolate chu a lo la chhuak vut a, "Hei i ei duh em?" ti sup pahin, chiang taka ka mitah a lo en chuan ka hnuk a no lek lek mai. Ka ei duh zâwng vek annih mai bâkah ka Inner child chuan amah ah hian rinna a nghat nasa hlè tawh zâwk.

"Ka ei duh zâwng vek annih hi," ka tih lêt chuan a lo thaw chhuak huai a. Ei tùrho chu hlim zetin ka hai kual rak rak a.

"Ka zawngchhang palh mai ang e aw," ka ti fiam zui a.

Amah lah chuan nui deuh ruh ruh hian, "ka ti zawngchhang dâwn che alàwm," a lo ti nghut a.

Ka en hû chu awmze nei deuhin mit ti zîm sun hian min lo melh rùn a, a inrintâwk hmêl lutuk chuan min ti lai leh vek tawh. "Ka lût tawh dâwn," ka ti thut a, ka inher zui zat chu nui rûm hawk chungin min lo man bet hmiah a.

Ka chhûngte a ti harh ang tih hlau zetin ka inher a, a lo ding rùn tawh chu a hmui ka han hup sak chawt a. Thâwm siam ring lo tùra ka mitmei kha kha lai chuan, nui ruh ruh pahin ka kut chu a lo la sawn a, a hûm zui vang vang bawk.

"Khawbunga lêt lehnghâl tùr i nih kha, khawmuang tawh suh," ka ti deuh ringawt a.

"Inthlah nân vawi khat fawh chu ka phû lo maw?" a ti a. A âw ril ruih chuan min ti zâm chhe zo a. Hneh zeta ka kawnga lo manin a lamah min hnûk hnai zui hmiah bawk, ka biang a lo khuap laia kan inkâr boruak sosâng ru zet avâng chuan ka khùr ru hial a.

Ka hmai bula lo thâwk lum ham ham pahin u Mapuia chuan, "Min nei rawh Naute," a ti hniam ruih a, a hmuiin ka hmui a lo nawr si zui zat bawk. Chutah ka khawvêl chu a lo vir muai muaia, a chêt dàn chu a duhthawh êm êm a, thlâkhlelhna nên a ni tih chu ka lo hai bîk hauh lo.

A lungawi tawk fê hnua a duhtâwk meuh chuan boruak kan tlachham lo chauh a, "Min nei rawh aw," a rawn ti chhuak leh a, thâwk lâk la pangngai chiah lo nên a, ka en chho chu thu tak hmêl pu zetin a lo nui suk a.

A kutphah lian zet pahnihin ka biang a lo khuap a, min fawp chiah si lo hian a hmui chuan min chhaih kual vêl a. Ka âwm chhûng chu a țêk chhawk chhawk a, ka ding te chu ka nghet lo zo vekin ka hria.

A hmuia ka hmui a lo nûl thawi thuak lai chuan ka maimitchhing tawp tawh, "Min neih hi i hlau em ni?" a ti sup sup a.

"Hlau lo," ka âw chu a khùrin ka hria, "a nih chuan min nei ang tih sawi rawh," a lo ti chhuak hawk a, "ka nei dâwn che alàwm," ka tih ve chuan duhkhawp lo tih hriat zetin a rûm hrawih a.

"I mitmeng rawh," ti nghut pahin ka hmui a lo fâwp leh tâwk a, atâwp rual chuan kei pawh ka meng chhuak riai riai a. Hnai zeta min lo en tu mitmeng pa zetah chuan, hîp lût riai riai tu nei ang mai hian ka vai deuh riai a.

"Ka mit a en chungin sawi leh rawh," a lo ti ril ruih a, "ka nei dâwn che alàwm," ka ti a, "Ka tlanbo dâwn lo ngaihțha deuhin awm rawh," ka tih leh chuan a kiai ta suk a.

"Naupangchhia i nih lai ațang khân neih che hi ka lo duh tawh a," a ti hniam ruih a.

"Naupangchhia maw?" ka tih lêt chuan a ngawi leh daih a.

"Min nei tawp rawh, chu chu a ni mai," ti nghut nghutin a âwmah min kuah bet zui hmiah a. A lungphu ri dup dup ka hriat rual chuan, 'ka tlanbo dâwn lo' tia ka hrilh kha ka inchhir lo zual sauh mai, inneih ni a thlen hmâa ka tlanbo san a hlau tih kha, min hrilh miah lo mah se ka hmu tlang thei thung.

Thli lo thaw vûk vûk te chu engah mah ngai lo ang maiin, u Mapuia chuan ka hnung a chùl hauh hauh a, "zàn tlàn tùr i ni bawk si, ruah a sûr chuan chêt sual palh a awl dâwn a nia, kal tawh rawh," ka ti mial mial a.

Amah pawhin a kal chu a hun viau tawh tih chu a hria a; mahse, ka bula awm khawtlai dàn ngawt a dap niin ka hre thung.

"Min lo ngai ve tawh la aw," thu tak zet hian a lo ti sup a, insûm hman lovin ka nui a, "A ni lo'm ni? Min ngai ve rawh, lo call hmasa ve țhìn la, kan inneih huna kan nupa nun dàn tùrte pawh lo suangtuah ve țhìn la," tiin u Mapuia chuan ka bêng bulah min thlêm sur sur a.

'Kan inneih huna kan nupa nun dàn tùr maw?!' ngaihtuah ringawt paw'n ka hlauthâwng ru hial mai!

A tlãn chhuak thlîr liam a inchhûng ka luh leh meuh chuan zìng dâr 4 a lo hnai hlè tawh a.

Thâwm dìm lutuk bawkin pindan lamah chuan ka pên lût a, a tute mah chu an harh lo nia ka hriat chuan hahdam ru huaiin ka khum lam ka pan thla vat a.

Ka lehkha zirna dawhkàna u Mapuia Pangpâr bâwr min lo hàwnsak ka dah lai chuan ka nui var var reng a. Ei tùr awmna plastic bag pawh tih rîk bengchhen hlau deuhin Lavender bulah ka dah ve a, ka kamisz hak chhuah phelh paha, ka țhiani muhîl thaw sek sek ka en lai tak chuan a rawn țhu chhuak thut a.

Âu chu ka âu chhuak êm lo; mahse, ka phu nasa lutuk chu ka kat hnung dâwrh a. Àwm dawm meuha thâwk ka lak hawk hawk laiin, Lucy lah chu ka awmna lamah lo inbeng phei meuhin hnar a lèn kual that that a.

"Hummm, u Mapuia nên in inhmu chiang," a ti thâm țiak a. Eng mah sawi belh lovin a mu leh nghâl daih a. Ka hrilh haiin ka hamhaih bawk si chu bang kilah dingin thâwk ka la halh halh reng a. A tho â nge ani hi ka chhuah lai kha hria-in a lo harh reng zâwk chu le..!

Khuma ka lâwn kai leh chu thâwm siam ka hlauh luatah ka țang na vek a. Puana inkhuh țha paha ka bih dêk dêk laiin a lo meng leh hlawl a.

A harh chian leh chian loh ka hriat miau loh avàngin, "Lucy," ti pahin ka sawi deuh dat a.

A lo harh chiang khawp mai, "i muhîl thei tawh dâwn dèr si lo a," a rawn ti nghâl thâwr a.

"Uiii.. nichin khân i tho â emaw tiin ka hlauh hman zia aw," ka ti a, a chala ka nam vak chuan a lo nui kar kar a.

Ka mu țha ve chu min lo kuah pahin, "U Mapuia rim i nam leh tawh," a lo ti nawn leh a.

"I ninawm, muhîl leh rawh," kan inti mawlh mawlh reng mai.

"U Mapuia hian a hmangaih ngawt mai che," a lo tih chuan ngaithla lo ang deuhin ka awm lui tlat a, " in inneih hunah pawh pasal a nihna angin a chanvo a hlen chhuak hneh dâwn lutuk," a tih leh zêl tâkah chuan, "Eng vàng ngawt chuan maw?" ka ti ve ta a.

"I hre mai lo em ni, a ngaihsak êm che hi, tûnah pawh i be țha lo ringawt a, a rawn pan nghâl rum rum mai che hi," a tih chuan ka nui ringawt a.

"Nang pawh hian i la hmangaih ve dâwn chiang alàwm," a ti leh hrâm a. Eng thil emaw tak min sawi chhuahtîr chu a tum ve hlè a ni.

"Ka hmangaih kher lo mai thei asin,"

"Humm, Hmangaihna chuan kan hriat loh lai tak zêlin alàwm min hmangaihtîr țhìn," a ti mauh mai a.

"Hmangaihna chuan a lakah sawi tùra neihtîr lovang che ang a; mahse, nangmahah chuan a fiah hlè thung ang," a tih leh chuan ka tawm deuh chaih a. U Mapuia khân min thlâkhlelh thu a sawi miah lo; mahse, a mitmengah khân fiah takin ka hmuh sak thiam a nih kha....

Rei lo te hnuah Lucy chu a muhîl leh mai a. Kei erawh ka ngaihtuahnate chuan u Mapuia chu a ûmzui zêl ni maiin ka hria, Champhai lam khi u Nancy pasal nei tùr thlahin Khawzâwl thleng chu ka kal ve tawh a. Aizâwl khawpui a chhuahsan ruala a khaw luh leh na hmasa ber tùr te pawh ka mitthla thiam a, amah chauha zin kawng thui tak a zawh leh tùr chu ka khawngaih ru hlè a. A lungleng vung vung ngawt ang.

Khawvar hnuah Lucy lo harh leh chuan meng pawh la meng hlei lo  hian, "I muhîl lo tak tak," a lo ti nghâl ringawt a.

Ka chhàn lêt hmain, "Mahse, a pawi lo, i pasal tùr pawh khaw kâr kawngah a la tlãn mêk dâwn tho a, in in men pui ve a ni mai alàwm," a ti leh zat zat a.

Han hnial lêt ngaihna vak ka hre si lo chu ka saisîr san daih a, ka lehkha zirna dawhkàn chunga Lavendar pangpâr chu ka va hmu zui a, ka nui nghâl var var bawk. Lucy paw'n hnung lam ațang min lo kuah a; mahse, u Mapuia pangpâr min pêk a va hmuh ve rual chuan a țhu zui hluai a.

Tho chhuakin dawhkàn chunga pangpar chu a la kãng a, awmze nei deuha min lo melh ralh chuan lâi deuhin lu ka lo bûk khum nghat a. A nuam ti âu chhuak châk, ka pate vêng thâwng bawk si lâi hmêl chu a hmuhnawm asin aw...

Tho chhuaka ka inphih fai hnuin a chinchâng zâwtin u Mapuia chu ka be hmasa ve ta a, ka zàm viau rualin kawppuite lungawina siam sak tùra thil lian tham tak tih kher a țul loh zia ka hriatfiah chian phah hlè thung.

Ka inbe deuh reng a; mahse, zîngkâr Sumo chhuak te an awm ve țhìn si a. Amah lah nizàn mu miah tawh lo a ni bawk nên ka lo biak buai ve sek chuan, motor dang nên an intâwk sual palh mai ang tih ka hlau a, kan ti tawp ta rih a.

IG a ka lût chiah erawh mit ka chhîng zui sawk a, u Mapuia chuan ka thlalâk a post mai bâkah min lo tag thlap tawh a.

Driver side-ah ka țhu a, a pangpâr min lo hàwn ngei kha pawma ka nui lai chu a lo post hmasa a, Second slide-ah chuan kan pahnih selfie a dah tel bawk.

*Ngaihven a nih nân eng thil mah a tih a ngai lo* tih tãwi tê chu Caption-ah a lo hmang a.

A post na a la rei lo; mahse, comment section-ah chuan Meme-i leh u Allan-a te an nghâl dûn hlè a.

U Allan-a chuan, 'Ka phâwk e' a ti ngei a.

Meme-i lahin, 'Au i lo hâw elo? Mahse, In i rawn thleng miah si lo a😋' a ti ve bawk a.

U Allan-a chuan Meme-i comment chu a reply a, 'In tlawh miah lovin a khawsa kual vêl a ni maw?' a ti a,

Pakhat lahin 'a nih hi, thil tih rûk a chîng dâwn a ang țan riau, thlalâk hi post lo phei se Aizâwl a lo kal tih kan hre miah nâng' a ti lêt a.

U Mapuia lah a tlãn laklawh lai a ni dâwn si a, an comment hi a lo hmuh ve hunah chuan a nui a nui ve tho ang.

U Mapuia nên kan pahnih inkâr boruak chu a nuam chho êm êm a, Palai vawi hnihna pawh an lo kal ta a. Man hlan nî tùr bâkah inneih nî tùr thlengin kan rêl fel nghâl a.

Inneihna tùr atân kan inbuatsaih chho ve zêl a. U Maliani a felin ka mamawh tùr a hre ber a. A châng phei chuan kan pahnih chauha kal chhuakin Puan chhawm tùrte kan zawng kual țhìn a. Kan inzawmna pawha nghet țha zual a. Ka sawi hmaih loh tùr chu hmân deuha tlangval a lo riahpui ka phâwk țum bâk kha mipa dang a kawp leh tawh miah lo a, ka pa erawha ngai reng a.

Nu Zari'n a unaupa nia a hriat chanchin a zawh lahin, 'an chinchâng ka hre zui tawh lo,' tih bâk sawi tùr a hre lo.

A tãwi zâwngin sawi tawh mai ang, ka man hlan nî a lo thlen chuan mite angin mi tam tak hui khâwm tùr nei lo mah ila min lo tel pui chhun mi tlêmtê tê chu min duhsaktute tak tak vek an ni a. Min thuam mawi khawp mai.

Kan HOD bâkah kan class -a mipa pariat te leh hmeichhe pathum te'n min lo țawiàwm ve bawk a. U Mapuia leh u Allan-a te pawh Man hlan hun hman tâwp dâwn lamah an lo kal ve a, kan zavai chuan a tlêm a tlêmin zànriah kan kil ho a. Pa Hrila te'n senso engkim chu min tum sak vek a. U Nancy te pawh a pasal fanau te nên an lo tel ve thei bawk a. Lucy-i te chhûngku chuan min thuam mâwi ka ti lo thei lo.

Ka pasal neih nî tùr chu ni khat lekin a dang tawh a. Mak deuh maiin keimahah chuan ngaihțhat lohna reh fel tawh emaw ka tih kha a lo awm thar leh a. U Mapuia chhûngte lam lah an phur tlângin USA lam ațang u Chawiteiite chhûngkua pawh an lo hâw ve a. An upa ber Pastor Zomuanate chhûngkua pawh lo hâw khâwmin kan inneih nî tùr chu an er lâwk luih luih tawh a. Kei erawh hlauhthàwn rûk deuhna sawi mai theih si loh hian min tuam hlep hlep a.

Ka awm mai mai laite hi ka thinphu a lo rang leh dawt dawt zêl a.

Kan inneih dâwn zànah phei chuan mangchhia ti a, ka sawi fo țhìn ka mang zui lehnghâl a.

Hlim deuhin mo kawrfual vâr hain ka lo nui har har a, ka bulah chuan Lucy-i bâkah u Malianite an awm ve a. Eng thil emaw hi sawiin kan lo hlim êm êm mai a.

Chutia nui bawk bawk chunga u Maliani lam ka va en chu min lo nuih var var a; mahse, chutia a nui hmèl chu a lo danglam riai riai a. Min hringtu ka nu hmèlin a lo inthlâk danglam ta mai a!

Nui ver ver chung a, "Ka fanu," tia min lo ban tâkah chuan hlau zetin ka tawlh hnun san rawk rawk a.

Chhantu mamawh lutuka Lucy-i lam ka va melh țâwk țâwk laiin Lucy hmêl rêng rêng kha a lo pu tawh lo a. Rui chher chhawr chungin ka pa chuan min lo nuih vur vur a, mangang lutuka beng hupa ka âu tuarh chu ka harh hlawl a.

Ka khum tlânga u Maliani lo țhuin hlauhthàwn hmêl deuha min lo en reng chuan, "U Malian," tih leh kuah thlawp ka rual nghâl a.

"Bo miah suh aw," khùr hlawk hlawk chunga ka tih lai chuan ka mittui a lo tla tawp bawk.

Ka chêt dàn vàngin u Maliani chu a hamhaih deuh a; mahse, rei lo tê hnuah min lo kuah lêt a, "Mangchhia i mang a ni maw? Ka hming i lam i lam a, i harhin min âu a nih ringin ka chhâwn mai che a; mahse, min âu mawlh mawlh ta sia.. lo sawi harh che ka tum lai takin i lo harh a nih hi," a ti melh melh a.

Rei ngial chutia ka awm hnû chuan ka inla hrang a, ka chêt dàn avàng chuan ka zak thar hnuhnawh hlè bawk.

U Maliani chuan," i ziaawm deuh tawh em?" a ti a.

"Umm, a zia lo tak tak... mangchhe deuh ka mang a, i lo hlau hman em?" nui chung hian ka ti lêt a. Min melh dàn mawlh chuan min ti nâ. Ka nu leh pa dik takte lak ațang, hetiang mitmeng ka dawng ngai miah lo hi, sawi mah ila tuma'n min âwih sak ka ring lo.

"Engtin nge i awm zêl dâwn?" ka tih chuan a lo nui mai a, "Ka tih awmzia chu maw, ka pa hian kutthlâk che a hrehawm deuha, a siam che a nih chuan sawi hreh lo la, kan bulah i lo awm ve daih mai dâwn a nia,"

"Eee, kei chu min ngaihtuah suh ka tih tawh kha, țha deuhin Mapuia nên hian innei ula, inchanchin țha lam chiah hriat ka inbeisei dâwn a nia," a lo ti dam diai a.

Min duhsak poh leh ka lainatna chu a zual ting a, ka hlauh ber mai chu ka awm loh hnû chuan ka Pain kut a thlâk châng pawhin lo dangtu tùr an awm tawh dâwn si lo a. A chhe ber kan thlen ka hlau, ka pa kut ram lutuk leh nunrâwng lutuk bawk si hian, a lo sawisa hlum mai ang tih mawlh ka hlau.

"Ngaih țha deuha u Mapuia hnêna ka kal i duh chuan thil pakhat min tiam ve rawh," ngènngawl zet hian ka ti a. U Maliani paw'n, "han sawi ta che.." a lo ti ve thuai a.

"Ka pa in kut a thlâk leh che a nih chuan min lo hrilh ang che.. U Malian, ka sawi mai mai lo a nia. Ka tân engkim min tih sak i huam ang chiah hian kei pawh ka tlànchhe dâwn bîk lo, ka pa hian rilru nuam lo khawpa kut a thlâk che a nih chuan min lo hrilh ngei ngei tùr a ni, chu chiah chu min tiam rawh. A nih loh chuan rilru nuam deuhin u Mapuia hi ka zui thei dâwn miah lo a nia," ka ti mawlh mawlh a.

Ka tih tak zia hriain u Maliani paw'n min tiam ve ta a, Pindan lamah ka Pa a lo luh ve avàngin eng mah ka sawi zui ta lo.

Ka pa ai daiha a nupui zâwk ka ngaihtuah daih mai chu, mi tam zâwk chuan min haw ngawt ang.

U Mapuia te lawina Kohhran biak inah kan inneihna inkhâwm chu hman a ni a, u Mapuia pa kohhran upa a nih mai bâkah țhen leh rual an ngah a, biak in khat in mipui lamin min lo tel pui a. Inneih thu tiam kan chham laia u Mapuia min melhna thu tak leh thuk ruih mai avâng chuan ka zàm hlè a.

Pastor in Bible chhûnga mi a chham chhuah apiang chu a thinlung chhûngril ber ațang vekin a chham chhuak a.

Ka hun a thlen ve chuan ka țawng chhuak thei lo lek lek!

Rei tak neih tumna rilru ka put loh zia ka inhre chiang a, chutiang rilru pu chung renga Bible a mi han chham chhuah ve chu sual râpthlâk ber a ni hialin ka hria..

Dam chhûng atân a tâ ka nihna nem nghet tùrin ka kutțanga zungbun min lo buntîr laite chuan ka dang sawp sawp hialin ka ring. Amah lah chuan min en chîk êm êm a, a thinlung chu ka tih kehsawm sak vek dâwna inhriatna vàngin melh pawh ka melh lêt țha ngam meuh tawh lo!

Thlalâkna hun kan hman laite chuan a kâr lakah min ngaihven êm êm a, Suit nêna a han induang thlup erawh chu en kham a har ngang mai! Chuta kârah a nupui ka ni ta chu a hlimpui êm êm a, thutiam hlen chhuaktu, a thu tiam a hlen chhuah vànga lungawina a khat ni àwm tak a hmêl mawlh chu, hriat loh kârin ka lo melh ru leh veng veng zêl a.

Țum khat phei chu photographer ber chuan, "Kan mo chu a pasal lakah a lungawi viau a ni maw, mit a la sawn hlei thei meuh lo," a ti zuk nghe nghe a.

Mi dang nui ham ham kârah u Mapuia chuan min lo melh rùn a, photographer in min chhaihna chu a lungawi pui hmêl hlè lehnghâl.

Cecilia-i pawh a pasal nên ka hmu ve ta hlawl a, thla min lakpui zawh hnuah u Mapuia nên chuan min chibai leh a. Cecilia-i hmêl ngui zet leh mit hnuai val deuh kalh ka hmuh chuan keimahah inthiam loh rûkna a lo awm veng veng mai.

A pasal erawh a thlalâk a ka hmuh tawh ang chiahin a hmel a fel faiin a lang zahawm hlè a, a nupui dara dawm paha u Mapuia nên an inchibai lai chuan ka lo țang țeuh a; mahse, ka beisei loh dàn zetin Cecilia-i pasal chuan u Mapuia darah a bêng zui thak a. Hriat chhuah ka nei zui rauh rauh bawk.

Meme-i khân Cecilia-i awm dàn hi u Mapuia'n nupui a neih chuan a reh zawm ve mai an beisei thu a sawi tawh tak kha.

Chu thil chu a pasal pawh hian a beisei ve tho niin ka hria, ka lo rin ang êm êm in u Mapuia chu a huat hmêl loh a. Min chibai pawh chuan țha takin min bia a, a țawngkam pawh a zangkhai fu a. Tûna Cecilia-i lan dàn ațang chuan an beisei ang thil chu a thlen loh hmèlin ka hre tlat a, hunin a la hril zêl tùrah ngai ang.

David-a te chhûngkua paw'n thla min lakpui ve a, U Mapuiate lam vànga lo kal an ni a. Ka man pawh Vid-a hian a ei ve nghe nghe, Luggage lian țha deuh min pe a. Uangthuang zetin, "ka chang ta lo rau rau che a. Zin dâwna luggage i hman dâwn hunah tal chuan min hre chhuak ve a niang chu," a ti ve ngial a nih kha.

U Mapuiate In lamah mo thlahtute leh an chhûngkhat laina hnai zual te nên zànriah kan ei ho a, zàn lam chu u Mapuia țhiante'n 'after pary' ang reng deuh an buatsaih avàngin chu lam pan chuan kan chhuak lehnghâl a.

Car pakhatah u Allan-a leh Lucy te nên kan chuang ho a, ka awm dàn mûk ru riau chu u Mapuia chuan a hre thiam deuh nge ni, "I nuam lo em ni Naute," a lo ti sup a.

Lucy paw'n, "Nia, Ahriat i nuam lo deuh a em ni? I zàwiawi riau," a lo ti ve zat a.

Chhàn lêt ngaihna hre lovin ka nui tãwi tak ringawt, u Mapuia erawhin ka kut chu a hûm rauh rauh reng a, ka melh châng apiangin ngunthlûk zetin min lo en rùn zêl a. Inneihna a thlen hmâa ka lo tlanbo daih zâwk lo kha ka inchhir rum rum tawh!

Beisei tùr ka awm loh zia hre tlang vek zâwk se ni tùr. Tûnah hi chuan engkim a tlai zo tawh a, ka kalsan huna u Mapuia hrilhhai lutuk tùr mawlh chuan awm a ti nuam lo.

Party neihna hmun tùr kan zuk thleng thla chu a hmun hma an lo chei dàn mawlmang tak ang a lang, changkâng ru riau bawk si vàngin Lucy-i chu a phûl hlut a.

U Mapuia nên min lawmpui nân kut bêngin an lo âu dar dar bawk si nên ka kut hûm rùn tupa chu a nui suk suk a, uang zetin celeb te kut vai dàn angin a țhianteho chu kut a vai lêt ngei bawk a.

A țhiante nên min inhmelhriattîr laite chuan intitatu zetin ka kâwngah min kuah rùn a, Cecilia-i pawh a țhiannu nên an lo tel ve a. A pasal kha hmuh ve ka inring viau nâin a hmêl hmuh tùr a awm miah lo.

Mahni buai buai a kan buai tlãn lai chuan mi dangte awm lohna lai deuh chu panin ka ding deuh rèn ráwn a.

Thli thaw chuan min lo chhêm heuh heuh a, ruahtui tlâk tam lai a ni nâin vawiin chu khua a țha nilêng zak a. Zànin erawh a sûr ngei dâwn e. Kawl kil lehlam chu a dur thim khup tawh a, thli pawh a thaw nasa zual sauh a.

"Eng nge i lo ngaihtuah ve veng veng a," lo ti sup rî ah chuan ka insangmar nghâl țeuh a. Hawi lêt lo pawhin tu nge a nih ka hre chiang ngang bawk.

Kawrfual bah sîntê lêk ka hâk avàngin hnunglam ațang a coat chuan min lo khuh zui zat a, muangchânga ka inher riai riai chu pà zet hian min nuih suk a.

A coat bânah ka bân chu min thun luhsak mual mual laite chuan ka lo melh veng veng a, "thli a tam hrep a, ti kha chuan hritlàng kai pawha hlauhawm tawh lo ang," a ti nghut nghut a.

A coat hmâ min pawh phui sak paha min lo en chhuk rùn rual chuan, "U Mapui, inneihna hi fiamthu a ni lo asin," zàwi te hian ka ti sep a.

"Ka hria alàwm.. Inneihna chuan damchhûnga daih tùr a ni," tih nghut pahin min din hnaih sauh a, ka biang lo khuapin ka chal a lo fâwp zui vang vang bawk.

"Ințhen leh mai mai hi ka duh dàn a ni ve lo, chuvànga nang hi nghâk char char che pawh ka ni. Ka bul țanpui dàn che hi i dawngsawng fuh lo tih pawh ka hria; mahse, hetianga chêt ka lak mai loh chuan..." tiin a châwl dat a.

A sawi duh ber chu a sawi chhuak thei lo tih hriat zetin a rûm zui hrâwih bawk.

Thaw chhuak ham ham pahin a âwmah min kuah bet a, a tih ang ang chuan ka awm ve zêl a, a lungphu ri dup dup zâwnah zàwi zet a ka bei rual chuan, "I la hre thiam mai ang, min ring tawp rawh Naute, kan inneihna hian damchhûnga daih dâwn a, tûna i thil hriat thiam loh zawng zawng pawh ka hriat fiahtîr zêl ang che," a ti nghut nghut a.

A taksa hrawl leh lianpui chu nghet zetin ka kuah bet a, "Min hre chiang lo a ni" ka ti chuai raih bawk, ka thil tum zawng zawng hi hria ni se tûnah te hian min kuah lo tawp ang.

"I rin aiin ka hre chiang ang che," nghet zet hian a lo ti nghut a. Ka îp ru chaih bawk.

Eng emaw a sawi leh dâwn lai takin mi dangte chuan min lo âu a. U Mapuia chu a rûm deuh nghut a, hreh hmel zeta min kuahna a thlah thawl rualin ka kut a lo chelh nghâl a.

"I pasal kut hi chelh tlat mai la, engkim a dik vek a ni mai," uangthuang zet hian a ti zui a. A kal hmasa a, a hnungah chuan ka zui zêl a, mi dangte awmna kan pan phei lai chuan a kamisz kawr hma kilh chu a hmet phelh țhen mual mual bawk a.

"Egah nge kan țîn hmâ hauha in tawm fâl nghâl a," an lo tifiam hlut a, u Mapuia a nuih huk laiin kei erawh ka lâi hlum lo chauh.

An bul kan va thlen phei rualin ka kut chu a thlah zâwk a, a kamisz bân kilh chu hmet phelhin hnehsawh zet hian a thlep chho nghâl a, chutia duhdah zeta a kamisz a han sáwngbàwl chu a lan pà zual phah daih leh nghâl.

🖋Changtunu hi misualnu tùr aw👿😎