THINLUNG KHAWNGAIHTHLAK- 4

THINLUNG KHAWNGIAHTHLÂK

CHAPTER 4 

Ririni khiangte Abbra Pitartei 

"Damdawi ina kal i duh em?" tia u Maliani ka zawh chuan a lo ner sak a, "A ngai lo, ka țha leh mai dâwn alàwm," a lo ti a. A dinhmun chu ka khawngaih ve leh chhâwng tak zet. 

U Maliani mai ni lo hmeichhe dang tam takte paw'n an pasalte kut an tuar fo a. Chûng an nupa kut inthlâk thâwm chu țhenawm hnaite'n lo hre ve mah se an inrawlh duh ngai lo a, ngaiah te neiin an en liam vêl mai mai a. A tâwpah a pasal kut tuara hmeichhia zâwka lo boral palh hunah chiah khawtlang hruaitu lam lah an inrawlh a, a hmâ zawnga an en liam țhìn tute kha Media lamin an kawm châng lahin, 'ngaihsak ber leh an nupa inkâr buaina te pawh remsak tu ber' ang tein an insawi leh daih zêl a. 

 

Rilrua thil tam tak ngaihtuah chungin eirawng chu ka bàwl a, ka pa pawh țhenawm pa nên an rawn inzui lût zuai a. An chhuak lehnghâl mai a, nichin lawka hriamhrei thawh duhna rilru ka pu ta mai kha râpthlâk ka inti dâwn viau nâin, ka pa rîkrâpna hnuaia ka tân rei tawh zia ngaihtuah chuan a àwm tihna chen ka nei tawh zâwk. 

Mi pate paw'n zu an in ve tho a, an nupuite pawh ngaihzawng neih sanin an uirê san lâwp lâwp a. Chutichung chuan an fate chuan 'Pate chu pate ngê ngê' tiin an la hmangaih tho a. 'Pa ti a auh chânga lo chhâng lêt tu tùr an lo la awm ve ngawt pawh a hlu alàwm' te an ti fo a.

Ka pa hi rui satliah leh khawlaia lerh satliah ve ngawt ni se chu kei paw'n a hlutna ka hmu thiam ve mahna le! Mahse, a duh hun huna kut min thlâk fo mai te. Kum sawmhnih chhûng teh meuh a țawngkam chhia leh malsàwm lo zet dawn reng bawk si chuan, a hlutna hmuh thiam ngaihna hlawla awm lo. Ka nu ang bawk khân a boral ve a nih paw'n ka mittui far khat pawha tlâk ka ring lo, chutiang khawp chuan ka rilru puthmang a chawmawlh zo tawh a. Ka thiam loh a ni bîk pawhin ka hre lo, hetianga min siamtu chu an mahni anni miau a. 

Keimah ang hi mi tam tak an awm ve pawh ka ring; mahse, kan kristian-na avàngin fate chuan nu leh pate laka kan rilru puthmang dik tak, kan lan chhuahtîr ngam lo mai chauh niin ka hre bawk. 

Mi țhenkhat te'n an nu leh pate an thlahthlam hmak hian, 'mahni nu leh pate pawh hmangaihna châng hre lo' tiin kan dem rawn luih luih a; mahse, an hringtute meuh thlahthlam lo thei lova an awm chhan, an rilru natnate leh tawrhna te chu tute mahin kan chhût pui duh leh chuang miah lo.

Bible a 'Naupangte u, Lalpaah chuan in nu leh in pate thu zâwm rawh u; chu chu thil dik a ni si a. I nu leh i pa chawimawi rawh (chu chu thupêk tiam nei hmasa ber a ni); chutichuan, i tân a ṭha ang a, leiah hian i dam rei bawk ang,' tih thu hmangin mahni fate țheuh kan thunun a.

Mahse, he châng hnuai chiaha mi, 'Tin, nangni pate u, in fate tithinur suh ula, Lalpa thununnaah leh zilhnaah chuan enkawl zâwk rawh u,' tih inziak erawh nu leh pate zâwkin zawm kan tum leh hauh bawk si lo a. 

'Naupang châk lo zâwk te chiah hi em ni Bible a inthunun-na thute hian a huam chu le,' ti a ngaih dàn nei țhìn hi kei chauh ka ni bîkin ka ring lo. 

U Maliani chuan tûkțhuan pawh a ei peih lo a, ka pa lah țhenawm pa nêna an chhuak kha a lo lêt leh ta miah bawk si lo nên keimah in chaw chu ka ei a. Heti chung hian Pasal min neihtîr te chu a la tum ve ţo tho si. Palai hmêl kan hmuh hunah engtia lo dawnsawn nge a tum teh reng ni, kan chhûngkaw dinhmun tlabal zet hi ka pasal tùr chhûngte'n an lo hmuh ruala kei thlenga, min hmuh dàn a dan phah vek hlauhna nei lêk lova a awm te chu ka huat zual phah hlur a. Aaa... Ka pa han khawsak kual duh dàn vêl ah hian lâwmna tùr lai rêng ka hmu lo ti ila a dik ber ang. 

Zîngkâr ațang kan boruakin a zir lo bawk nên chaw chu ka ei tam lèm lo khawp mai. Ka ei na te ka seng fel zawh chuan Pindan lamah ka lût a, an mutna lam puanzar chu keu dà dá in u Maliani chu ka thlîthlai deuh a. Saisîr a mu chungin a melh ngai a lo melh veng veng ka hmuh chuan ka lainat thar zual sauh a. Keimah ang bawka ka pa abuse-na hnuaia a tâng ve ta mai chu a pawi ka ti a ; Ka pa hi kalsan daih tùrin duhpui viau mah ila pan tùr dang a nei chuang bîk bawk si lo a. Tûnah kher chuan ka dinhmun aiin a dinhmun chu a chhe daih zâwk tih ka hmu thiam a, ka khawngaih ngawih ngawih. 

Puanzar keu kau a ka en reng avàng chuan min lo nuih sak a, "Min ngaihtuah suh, hetia mut vang vang chuan nâ ka nei miah lo a nia," a rawn ti a. Tãwi tê in ka nuih a, ka khum lam chu ka pan san zui nghâl bawk. 

Tûkin a ka thawhsan ngai ngai a ka Khum lo la hnawk niai chu ka siam fel zung zung a. Phone ka check chuan u Mapuia missed call ka hmu hmasa ber bawk. 

Nimin tlai ațang tawhin a message eng mah ka chhâng lêt tawh si lo a, tûkin ngawt paw'n vawi sarih lai a lo call hman. Call lêt lo va Phone chu hmeh thim leh mai ka tum deuh ûk tawh; mahse, nimin lam ang bawk khân kan inah a lo kal leh mai ang tih chu ka hlau thar thut a, ka call zui ta nghâl vat a. 

A Phone chu a kuta a awm lai taka niang ka call chu a lo chhâng rang khawp mai, "Call leh Message i chhâng miah lo a, thil thleng a awm em ni, i țha em?" a rawn ti nghâl mawlh mawlh a. A mak lutuk, min ngaihtuah tak tak tih hriat zeta zawhna min zawh mawlh mawlh na chuan min ti hahdam huai thei nia! 

Ka chhàn lêt lawk loh avàng chuan, "Ahriat?" a rawn ti leh dût a, "ka buai deuha phone hi pindan ah ka lo dah daih bawk si alàwm," ka tih ve tâkah chuan thâwk a lo la huai mai. Car horn rî ni àwm takte ka hriat tel avàngin, "Motor i khalh laklawh lai em ni a, i buai chuan dah rih teh," ka ti zui hlak a. U Mapuia chu a lo rum nghut a, ka hriat thiam loh eng thil emaw hi a sawi zui hluk bawk. 

"Ka dah dâwn nia," ka tih leh chu, "Nimin tlai ata tawh ka lo biakna che min chhâng lêt miah si lova," a lo ti hniam ruih a, vuina awkâ niin ka hre bawk. A ngawih leh deuh vung vung hnu chuan, "chinchâng ngaihven tùrin ka lo chhuak mêk a nih hi," thu tak hmêl zet hian a lo ti leh nghut nghut a. 

Rang lutuk a, "Lo kal a ngai lo," ka lo tih san hmiah chuan, "Naute.." a rawn ti hriam hruih a. Ka inlâk hran sanna chu a tuar thiam loh hmêl tak zet.

"Ka ti tak tak, lo kal duh suh, Lucy nên tih tùrte kan nei a ka buai lutuk," tiin ka riat nawi deuh niah niah a. Tûn dinhmuna ka awm lai hi min lo hmuh ka duh lo. 

"I țha tak zet a maw?" âw zawi leh dam ruih hian a lo ti leh hrâm a. Kan inhmachhawn lai ni se chu a awkâ chhuak zaidam zet ang chiahin, min enna mitmeng pawha dam leh thlup in ka ring. 

"Aw, ka țha.. ka dah tawh dâwna nia. E, nilêngin kan buai maithei a, ih.. min lo call leh palh paw'n ka lo chhàn loh che chuan ka buai tih lo hre tawp mai rawh," ka ti zung zung a. Phone chu ka hmet tâwp nghâl daih bawk. 

U Mapuia ka be zo chu Khum tlângah zawi zetin ka țhu hnawk a. Ka duh aiin thil a kal thûkpui dâwn nia ka hriatna chuan min ti hlauthâwng ta hlè bawk! 

Ngaihsaktu leh thlamuantu ka mamawh êm êm a. Hetianga a awm tlat chuan a lakah hian ka tlu lût thuai ang tih mawlh chu ka hlau tel bawk, ka duh lo chung min neih luih tum tu ang a hriat reng zâwk ka duh. Hun lo kal leh zêl turah pawh ka nat phah lo zâwk ang.

*Thil thlenga awm chuan min rawn hrilh nghâl ang che* tih chu u Mapuia hnên aţangin ka dawng zui a. 

Nimin a ka țhiani thil sawi kha ka ngaihtuah lêt rauh rauh bawk, 'Mipa rilru nghet cherh chawrh leh chak deuh, hmangaiha ngaisâng taka enkawl thei tu tùr i mamawh,' a ti a nih kha. 

'Ngaihsak' ti mai lova Ngaisâng' a tih daih chhan kha a tîrah hre thiam mai lo mah ila, tûnah chuan a sawi awmzia ka hre thiam tain ka hria. 

Tu mahin an  ngaihsan loh mi chuan zahawmna a nei tih pawh a inhre dâwn miah lo, kei ang bawk hian. 

Chutia rilru buai ru zeta ka awm lai chuan Lucy-i'n min lo call a, 'ka nu kawr țhuitîr kha an khawih zo tawha ni àwm e, nakinah min lampui lawk la,' a lo ti a. Tih tur dang êm êm ka nei lo bawk nên ka hnial lèm lo. 

U Maliani chu a chanchin ka zâwt leh a, ngaihtuahawm a nih loh thu a lo sawi ve thuai a, ''I duh chuan lêng chhuak daih rawh, i pa a lo hâw leh ang a, Card bawk an dêng leh dâwn a, ina i awm chuan i ning thuai mai ang,'' a ti ve duah a. 

U Maliani chu ka inbual san ta a. Scooty a tlãn kual tùr kan nih avàngin inchei vak lèm lovin Lucy te in lamah ka chho nghâl a, ka han thleng chho chu an unau chu an lo inhnial fiam leh nasa tawh mai a.

U Hmingmuana'n, "tûnlai hi i lerh tlat, i inchei hliau hliau reng mai," tiin a nau chu a lo chhaih leh tawh a. Lucy lahin chutia a û in lerha a puh chu a duh lo khawp mai, "Kei aiin i lerh daih zâwk, nizàn pawh i bialnu te inah a nih kha i riah," a ti lêt pang pang a. 

"Kei te chu tlangvâl ka nia," u Hmingmuana'n a lo ti lêt si. Lucy-i tih ngaihna hre lo chuan, "A nih vêl chu, i bialnu a pawh lerh ve tho, lerh lo se in inngaizâwng tawp nang," a ti lêt páng páng a.

"Nu a û hi hau teh, ni lo deuh deuhin min puh leh tawh a nia," tiin a nu a pun zui bawk nên u Hmingmuana chu a nui ta ruh ruh a. A kal chhuah hma tak tak chuan Lucy sam a tuai thur sak vek a, Lucy-i'n ben a tum viau nâin a Helmet nên a tlàn chhuak hman ta sia. Veranda thleng a va ûm a, an unau inhau fiam chu nu Zari nên chuan kan nuihpui nasa ngang mai.

A û laka lungawi lo deuh chungin a rawn âng lut bai bai a. A nu leh pate bulah ka Palai hmuh tùr thu vêl kan la hrilh ve si lo a, a insiam lai nghâk paha kan titi fè hnu chuan kan kal chhuak kan hâw leh huna hrilh chu kan rêl thlu ta a. Man ei tùr neuh neuh te kha an awm a țûl dâwn a. Mahni a ka chhût rauh rauh châng paw'n an ni chhûngkua lo chu, ka man ei àwm tùr hmêlhriat țha dang kan nei pawhin ka hre lo. 

Dârthlalang hmâa hmai chei mawlh mawlh pah hian, "Make up i hmang ve duh em?" a lo ti a. Ani a inchei ang reng sia hmêl hil deuh lo put bîk chu ka ngaingam leh chiah si lo nên ka pan phei thuai a. 

Foundation inhnawih tùr a ka bek sam ka han hui kiang chu a lo chek nghâl hlak a, " I pa in a sawisa leh tawh che a ni maw?" a lo ti nghâl țhak bawk. Ka kut chu min dahsawn sakin ka beng chho lo vûng mar deuh țalh chu chiang zâwk hian a lo en a. 

"U Maliani a sawisa a, ka danna lamah min bêng ve palh a nih hi," tiin ngaihsam hmêl zetin a kut chu ka khak sawn sak a, Foundation ka inhnawih zui mawlh mawlh chu min lo en reng a.

A hmelțha zetah chuan min khawngaihna leh ka pa laka a thinurna chu a lo inlâr chhâwk zut zut a, "thinrim duh suh, a tihnat phâkah ka awm lo thuai dâwn alàwm," fiamthu ti tak deuhin ka ti zauh bawk. 

"Nimin tlaia ka thil sawi kha i haw miah lo tak tak maw?" a lo ti țha leh a, tãwi tê hian ka nuih lêt a. Ka naupan laia ka tawrhna te vàng chiaha tûna ka rilru puthmang hi pû ka ni lova. Tleirãwl nun ka rah ve hnu pawha nitin zântin deuh thaw ka pa kut min thlâkna hian ka rilru a tisak zual a. Hmangaihnate nêna enkawl seilente tân chuan kan inhumhimna tùr nu leh pate zâwkin kut min thlâk chhên mai te hi a natzia min hriat thiampui ngaihna a awm lo. Nimin tlai te khân ka têt laia ka hun tawn hrehawm tak vànga, la inhung bîk tlat angah min ngaiin min hau reng a. A ngaihtuah chian hnu hian a inthiam lo zual tulh tulh a ni ber mai. 

"Nangte chu ka haw phal lo che tih i hria alàwm," nui chunga ka tih chuan a thaw hluai a, "I pa hi chu police mantîr daih mai ka duh țhìn," tih nghat pahin ka biang bawk a lo dawm leh rih chuan ka lo nuih lêt sak ringawt. Kut min thlâk ţhìn avàng hian Police pun ta chiah ila chu, 'mahni pate pawh man mualphotîr hreh lo,' tiin hmeichhe râpthlâk nih ka hlawh lêt hial zâwkin ka ring. 

Ka bek tawn tawn chu lo thlêk țha lehin a ngawi deuh vang vang a, "I sam hi bâwk tawm lovin thlah mai rawh, a benna che hi a vûng deuh a, duh aiin a langsar deuh," a ti leh mawlh mawlh a. Thu âwih takin ka bûk khum ve nghat bawk. 

A nu kawr lam mai mai tùr kan ni nâin Lucy chu a insiam rei ta phian sia, an in ațang kan chhuah meuh chuan chhûn dâr 12 a hnai thuak tawh a.

"I insiam chhûnga rei lutuk a, kan hàw leh meuh chuan a tlai hman tawh ngawt ang," ka ti bai bai a. U Maliani chuan ngaihtuahna a luah ve reng avàngin rilru lah chu a hmanhmawh ru tet tet a. 

Lucy lah chuan, "Kan rei teuh lo, Milk Shake tui deuh ka treat ang che," a la ti ham ham zui. 

Dàwr kan han thleng chho chu mi dang pawh an lo awm ve nual a. Dàwr neitu leh Lucy chu an inhriat țhat tawh avàngin an ri zui bawrh bawrh a.

Dàwr neitu chuan, "Lo țhu lawk r'u aw, anni hi an lo thleng hmasa sia, kan inbuaipui fel hunah i nu kawr tùr chu inen dâwn a nia. I nu rêng rêng pawh amah lo kal țhin tùr hi nia," a lo ti a. 

"Uiii.. Call la nangman hrilh rawh, ka hawn hunah a'n ha chhin ang a 'heti lai hian min phuar deuh' te kha a ti tlai khawhnu leh ang a maw.. A lo kal lai ai khân a thau leh deuh tawh bawk sia, a tâwt ngei ngei ang," Lucy paw'n a ti ve a. Mi dang pawh chu an lo nui țha hlawm mai, an kawr zawrh laite chu kan en kual sak ve mai mai a. 

Lucy chuan awh deuha nei leh tawh a. Dawr neitu nu'n, "han ha chhin teh Lucy, i hak tâwk chuan tlâwm deuhin ka pe dâwn che nia," a lo ti ve bawk nên phûr zetin chawlhni kawr pahnih chu trial room-ah a luh pui nghâl a. 

Kawr ha chunga a lo chhuah chuan, "i inhmeh tawp," ka lo ti thuai a. Phûr zetin pakhat zâwk chu a ha chhin leh a, chu pawh chu a inhmeh leh êm êm tho.

"U Christy a pahnih hian la tel ta ila ka nu kawrte nên a pathum chuan 80% off talin min pe la," a ti ta mai a, Dàwr neitu chuan a lo melh ràng rak a. Lucy lahin dawn tlâwm a tumruh ve tlat bawk nên an invîn ta hlak hlak rêng a. A nu kawr tùrte pawh chu an han inentîr a. Counter lama an in dawn tlâwm ngang ngang lai chuan dârthlalang bang chhan ațang kawngpui lam chu ka zuk thlîr thla a. 

Chutia ka zuk hawi thla chiah chu building pakhat ațanga u Mapuia lo chhuak hlawl chu ka zuk hmu nghâl a. Tshirt vâr a ngaina ve hlè chuan ka hria, tun țum pawh Tshirt vâr leh short hring dal raih a ha a, Building bathlârah chuan dingin a hawi kual thuak thuak a. Ka awmna lam chu chiang deuh zâwkin lo hawi chho se chu min rawn hmu thei maiin ka ring. 

'An chhûngte dàwrah a lêng ve a niang a,' ka tih rilrûk lai takin u Mapuia chu a lo chhuahna lamah chuan a hawi lêt a, kawng kal dangte chuan an kal pêl nak nak nâin a pa lian bawk nên tu mahin amah chu an chen lo.

A lo chhuah tâk naah khân awm an la awm ve a niang, a lukhum hmathlâwk khum lai phawk zauh paha a sam tuai thuak chungin tu emaw hi a bia a. Ka ring sual lo tawp mai, u Mapuia'n lukhum a khum țhat leh mawlh mawlh laiin a lo chhuahna ațang khân Cecilia-i ngei mai kha a rawn chhuak ve ta zan zan a. Cecilia-i a lo chhuah ve rual chuan u Mapuia bawk chu a hawi kual leh tawh.

Ka beisei loh zeta Cecilia-i nên ka hmuh dun si avàngin u Mapuia hawi kual chuan min rawn hmuh mai hlauin Milem ding phênah chuan ka tawlh lût nghâl a. 

Cecilia-i chu nimin lam ang bawk khân a chhelo leh pek tak zet. Pastor nupui a ni a, a awm ãwl ve hlè a nih ka ring, ni hnih ngawt nalh deuh deuha incheia pâwn lama a awm lai ka hmu tawh tlat. An pahnih chuan indinchilha eng emaw an sawi dun leh ngial hnuah ding khawmuang lovin MC lam pan chuan an inzui phei ta a. An lan theih chhûng chu ka en zui ngat ngat a, kawia an liam fel chiah chu ka inthlah dul riai riai a. 

"A mak vung vung e..." tih paha Lucy-i'n ka dar a lo khawih chuan ka phu nghek a, phu chiang tak ka ni! 

Ka âwm dawm meuha thâwk ka lâk vak lai chuan, "eng nge i lo en veng veng a, hei, kan kal hman tawh a nia," a lo ti leh a. Ka lo enna lam chu ring fan meuhin a zuk thlêk zui ve vak vak bawk. 

U Mapuia te an lo kal liam fel hman tawh chu ka lo làwm ru hlè ringawt a. An pahnih khân a hmu dun ve a nih chuan zawhna a ngah dâwn lutuk a, ka hriat ang chhânna ka pe a nih chuan u Mapuia ka tawn avànga min hlimpuina zawng zawngte kha a chimit vek ngei ang.

"Ka hmêlhriat te ka hmu emaw ka tia.. I hman tawh chuan kal ang," pângngai deuhin ka ti a. A thil khai lohna lam bân chu ka kuah zui zat bawk.

"Hummm... Kei bâk hmêlhriat dang i nei ve emaw ni," a ti vei hlak a. Thlang lam bawk chu ngaihțha zàn lo tih hriat deuhin a zuk thlêk nawn leh hrâm bawk.

Dàwr ațang kan chhuak chu, "MC ah thil va ei ila," a ti ta chiah a. U Mapuia te pheina lam kha a ni bawk si nên kan inhmuh fuh palh mai chu ka hlau, "Naaa... Sawtiang lai Vai dàwrah sawn Chana Masala leh Paratha ei zâwk ang," ka ti tlat a. 

"MC a an Milk Shake kha ka in châk asin le," a ti bai bai lai chu a scooty hunna lamah ka pawt țang țang a. 

"Lawk, saw ti lai lawkah thil kan ei dâwn tho chuan Scooty hi hetah hian lo la awm rawh se. U Christy kha ka han hrilh leh lawk ang. Vai dàwr kawtah saw chuan park-na tùra awm miah loh saw," a ti hlut a. A thil khai lai chu min pe sawk sawk in Dàwr lamah chuan a tlàn chho leh rih a. 

U Mapuiate lo kal chhuahna building kha chiang takin ka en a. Kawng ân chu Dàwr a ni tak nâin a chung pan chhohna step a lo awm reng a, Dàwr aţang ni lovin khi tilai in aţang zâwka lo chhuak an nih chu ka ring mah tawh zâwk. Cecilia-i nên an inzui kha an mahni hre chiangtute'n an lo hmuh fuh a hlau hlè tih lah heti lai chhehvêl a en kual ngun dànah khân a chiang reng a. Pastor nupui nên meuh a fâlin an inhmu țhìn a ni àwm a. Mualpho chu a hlau ve ngawt tak ang chu. 

Lucy lo chhuk thla leh chuan, "u Mapuia nên in inbe leh tawh em?" a lo ti nghâl a. 'Ka thil hmuh kha a lo hmu ve reng zâwk em ni dâwn chu âw' ka ti rilru hman hial mai.

U Mapuia chungchâng min zawh chhan tak ka hriat chian loh avàngin tîm ru deuh hian, "Tûkin in ina ka lo chhoh hma khân kan inbia a," ka ti lêt sap. 

"Ummm, a hman lai ni se chu a ho a len kual a châkawm ka ti mai mai maw le, hriat chian ve te ka châk a," a lo tih lêt tâkah chuan ka thaw deuh huai a.

"Zirtawpah lo inring r'u a tih tawh kha" ka ti vat a. Inrinni-ah Khawbungah a chho dâwn tih pawh a sawi tawh tak kha...

"Ni chiah... Khawiah nge kan in kalpuitîr ang," phûr zet hian a ti zui a, "Khawpui pâwnah kal chhuak ila a nuam daih zâwk ang, a nih loh paw'n khutah Falkland vêlah te," a ti leh zat zat a. Kei chuan han kal châkna bîk ka nei lèm lo. Amah têreuh hian duh thlang se la, u Mapuia paw'n min hruai hrehin ka ring lo. 

"Nuam i tihna ber tùr kha ngaihtuah la, u Mapuia bulah i sawi dâwn a nia," ka tih chuan, "eehhh, Bialpa Motor nei ngat i nei bîk a, i țawng dàn vêl paw'n awmzia a nei țan riau," tiin a nui zui uarh uarh a. Henu tak hi chu âw!

"Ka bialpa a ni bawk lo," ka tih ve chuan, "Awh, ka sawi sual Pasal tùr hausa deuh i nei tawh bîk a" a ti țha leh a, ka lài deuh si leh lungawi lo tho bawk si chu min nuih tut tut reng lehnghâl.

"Nakin lâwkah chuan i duh nâ naah Driver in a hruai kual tawh dâwn che sia. Mi pawh i hre țha duh tawh lo ang a, Motor chhûng ațang khân melh pawh min melh țha duh lo vêl mai ang a," a ti leh zet chu ka nam nghek a. Kawng kal pakhat nên an insut buai phah nghe nghe bawk! mahse, za êm êm hian a la nui zui tlâwrh tlâwrh thei tho. 

"Ka ti tak tak alàwm.. Tûnlai nu hausa țhenkhatte ang deuh hian khabe kãn deuh vah chungin mi i melh paw'n min melh peih țâwk ang tiha hlauhawm," a la tih zêl lai chuan Vai Dàwr chhûngah ka pawt lût rawk rawk a. Mi dang an awm tâkah chuan nui pàt pàt chungin a duhtâwk ve ta chiah.

Kan in ei puar hnu chuan u Maliani'n a ei ve châk tho ka rin avàngin ka ei lai ang chu ka pack tîr a. Duh aiin kan tlai tawh bawk nên kan hàw lam chu Lucy ka tùr sek sek a. A nu bulah u Mapuia chungchângte sawi ve leh kan la tum bawk si, ei ka inrêl tlai dâwn lutuk. 

Kan vêng chhûng kan tlàn luh meuh chuan ngaih dàn dang ka nei tawh zâwk, "Kan inah min thlah hmasa mai teh, zànah ka lo chho ang a, i nute chu kan hrilh ve zâwk mai dâwn nia," ka ti ta ringawt a. Lucy paw'n a lo hnial bîk lo. 

Țum dang ang bawkin kan inah chuan Card dêng an lo khat leh hung tawh. Ka lût chu tuma'n min lo ngaihven lèm lo a, u Maliani chu a lo la tho harh peih lo tih hriat zetin an zîngah chuan hmuh tùr a lo awm lo. 

Pindanah lût tlanga puan-zar ka keu hawn chuan a lo țhu chhuak ve mêk a, "I la tho chhuak peih miah na nge?" ka ti deuh thâwr ringawt a. 

"Tlêm tal chaw i lo bar em? Ka pa lo lêt leh sawn rawn sawi leh îh te a nei lèm lo maw?" ka ti leh sawk sawk a. "Aih, ti sawn a rawn hâw kha Card an dêng nghâl a nih saw.. Eng nge i lo hawn a, a rim a va tui ve," tih paha ka thil khai lai a lo melh chuan, "Chana Masala a nih hi, i ei châk ka ring a," tih pahin ka pe a. 

"Thleng ka va la ang hetah hian ei rawh," tih leh chhuah ka rual a, Paratha leh Chana dahna tùr ka lâk pah chuan tûkin a ka chawhmeh siam ho chu ka bih thuak thuak a. Ka ei bang ang ang kha a lo la awm vek, ka pa paw'n inah chaw ei lovin țhenawmte in vêlah a ei ve leh tawp a nih hmèl. 

Card dênga mei zial an zuk khûk luih luihna kârah chuan ei ka rêl a. Tûkin a ka chawhmeh siam te kha tih lum deuh tawp a, chaw chhum thar bâk a ngai tawh lo bawk nên phone ka khawih pah mai mai a. 

Ka tum vang êm êm pawh ni lovin instagram-ah u Mapuia chu ka zawng chhin a, mak deuh maiin min lo follow tawh reng chu ni in. Ka Ac hi ka dah private lêm lo va, min lo follow hun lai àwm tùr ka hre thei mai lo bawk. Min lo follow tawh sa aia mak leh zâwk chu ka thlalâk a lo post reng a nih chu.

Rang lutukin ka thlalâk chu ka click a, like leh comment a lo nei nual bawk nên ka thin phû a lo rang zui dat dat a. An ina chaw ka ei tlaia mî kha a lo ni a, an tual záwlah Op-a nên Xenver-a te kan infiampui lai kha a ni a. 

Thlalâka ka lan dàn chu keimah pawh ka ang lo. Ka hlim hmêl êm êm a, ka hnungah chuan an ui pahnih te bâkah Op-a kha an lang ve a, Xenver-a'n min ûm vànga ka tlànchhe lai tak kha a lo click fuh a nih dâwn hi. 

A caption tãwi leh awmze thui tak nei bawk si chuan ka chhûngril chu engtin emaw ni hian a fan a, ka lung a chhe lek lek bawk. 

'Ka zawng lo che a, ka beisei ngai lo bawk che; mahse, kan intawng erawh vànneihna a ni' tiin ka hnênah ila sawi ang; I sawi ngei theih nân theih tâwp ka chhuah bawk dâwn a ni. Tih tê mai ni mah se thâwk ka la zui ham ham a. 

Zawng tùr pawhin tu nge a nih ka hre ngai lo a, beisei tùr pawhin a chanchin eng mah hriat ka nei lo; mahse, a lo lang thut a, ka zawn loh leh beisei ngai loh vâl chu ka pasal tùr a lo ni leh zêl a. Vànneihna min tiam tel bawk a maw?! A vànneihna sawi leh ka vànneihna hriat ve te hi thuhmun an ni chiah ang em!?

Tlûk luhna tùr mamawh êm êm ka rilru chu ti sak thar leh in ka insangmar a, a post comments za chuang zet chu ka chhiar kual a. Meme-i paw'n 'in inneih hunah min adopt r'u aw' tiin a lo comment a. Ka nui chhuah pui hak mai. 

Hnam dang comment-na pawh ka hmu nual a, a lehkha zirpui ţhìn te an nih ka ring ve tawp. An upa ber Pastor comment na pawh ka hmu a, hmeichhe pakhat comment na chuan mit a la nghâl zar a, eng mah sawi lovin u Mapuia post-ah chuan Cecilia-i a mention tawp a, Cecilia-i a mention naah chuan 37 replys a awm hial bawk.

'An in reply-na chu ka chhiar duh ang em?' tiin ka inngaihtuah chiam phawt a; mahse, Cecilia-i mention tu chu ka stalk ta zâwk a. Cafe a kan hmuh țum a tel ve kha a ni tih ka hre chhuak har lo, fapa pahnih a nei tawh tih pawh a post siam dàn ațangin ka hre thei mai a. 

Cecilia-i pawh chu ka stalk ve ta a. Ka teh phak chu a ni miah lo nâin Pastor nupui ve meuh si chu a chhuak tam tih hriat zetin, a țhiante pathum nêna Cafe leh tute emaw dàwr vêla an thlalâk deuh hlîr a lo post a. An țhianho chu inla high class deuh, awm khâwm châng pawha English ngata inbe țhìn ang chi kha annih hial ka ring. Sunday apiangin a pasal nên an thlalâk a post tel ziah bawk a. A bâk zawng chu ka sawi tawh angin cafe leh dàwr dang danga a lak ho hlîr a ni. 

'Fa an la nei ve lo emaw ni le' ka ti ta rauh rauh a. Amah chu ka hre chiang châk bawk nên kum ruk liamta a, a post te thlengin ka hai lêt a. U Mapuia lan ve na pawh a post zauh zauh, a châng phei chuan class xii an zirlaia mi thlalâk hlui tih hriat tak, u Mapuia nên chiah a an lanna te chu #Tb 'old is gold' tihte chu caption-ah hmangin a post a. U Mapuia lan ve na chu comments a off zel avàngin, eng rilru pu a post țhìn ngê a nih chu ka hre thiam mai bîk lo. 

Rei lo te hnuah a pasal neih kum pawh ka hre thei mai a, an pa nên chuan kum li zet an innei tawh; mahse, fa an la nei hauh lo chu a mak ka ti a. Chutih rualin rin dàn ka nei zui nghâl a, engtin emaw hian ka awm zui nghulh lehnghâl. 

U Mapuia khân an inngaihzàwn loh thuin pha chiang hlè mah se, Cecilia-i'n a melh dàn nghawl nghawl kha țhiante melh dàn tùra ni lo. U Mapuia a ngaihzàwn tlat avàngin a pasal chu fa a la neih pui duh rih lo niin ka ring nghet tlat tawh. 

Zànriah ei kham hnu chuan thlêng ka seng fel zung zung a, ka pa leh u Maliani te inkâr pawha pângngai leh viau tawh. Chhûngkaw dang tân chuan kut inthlâka insawisak hrep te hi thil râpthlâk tâwp khâwk a nih avàngin innghirnghona lian taka thlen phah ngai a. Keini ang chhûngkua erawh chuan ngaiah kan nei tawh ti ila a fiah ber ang. Duhthâl in pa berin kut min thlâk țhìn mah se tlàn tauhna tùr kan neih miau loh avàngin, kut min thlâkna khân rilrua ti na lo ang mai a langin, kan chênho zêl a ngai tlat a. Mi țhenkhatte lei vânramah an chên laiin, keini thung chu dam reng siin hremhmun nun kan tem lâwk a ni ber mai. 

Lucy te ina kal tùra ka insiam laiin u Mapuia message bawk ka dawng a, țûl lo zetin vawiin lama Cecilia-i nên an inzui lai kha mitthlaah a lo lang ve zat a. Sawi chhuak mah ila phatna tùr a neih leh tho ka ring ; Chuvang chuan eng mah hre lo angin ka awm zêl ang a, kan inneih hnuah pawh duh leh lo inngaizâwng zêl se la, ka țhen dâwnah pawh ka tân țanchhan țha taka tling thei mahna. 

*Call a inbiak i hman em?* a lo ti a. 

*Lucy te inah ka kal dâwn a, eng nge a?* ka ti lêt ve a. In ațang ka chhuak zui nghâl bawk. 

*a nih chuan i hâw dâwnah lo sawi la, ka lo kal ang* a lo ti teh ngawt a! Ka pên lai chu ding dat in a message chu ka en vang vang a. 

*Phone ațang hian sawi mai la* ti lêt mah ila, *i hâw dâwnah min lo call rawh* a rawn ti ve ţo a. Ka chhâng lêt tawh lo. 

Lucy message lo awm chu ka hawng nghâl a, *Zaninah kan sawi dâwn tho sia ka ti a, chaw ei laiin ka nute bulah chuan ka sawi thâwi mai mai a nia aw* tih hi a lo ni a. A pawi lo zâwk daihin ka hria. 

An in ka han thleng chho chu Sofa-ah Lucy chu a lo mu hlùn a, "Engati nge a?" ka tih chuan, "In kan thleng kha ka period alàwm, ka tãi a na lutuk. Enteh, ka taksa te hi a lo vûng leh tawh," chauh hmêl deuh hian a lo ti a, "A mak thei a, i period châng hian engati nge i vùn tel kher zêl le," ka ti ve niah niah a. 

"Tui lum ip i kuah em?" A bula ka țhut ve hma chuan ka ti leh rih a, "Aih, ânu kha min siam sak rawh ka ti reng a, a theihnghilh a niang," a lo ti ve a. 

Nu Zari khuhva ei tum mêk pawh chuan, "Aw, ka lo theinghilh daih tak tak," a ti hliai a. Choka lam a pan nghâl tùr chu, "Keiman ka lo ti mai ang," ka ti thuai a. Kan Lucy hi chu duat rawn a ni ve a, nâ a neih hlek tawh chuan a pangchang êm êm zêl.

A pindanah lût in a period châng apianga a tui lum ip kuah țhìn chu ka la chhuak a. Choka lamah tui chhuang lum tùrin ka phei tlang nghâl a, Thlêng silnaah hian Tui lumna an dah avàngin tui lum chu a awm sa reng a, chhuan so leh zuai kha a ni tawh mai. 

Chutia tui chhuang so a ka rik rak rak lai chuan u Hmingmuana lêng chhuak tùr pawh a Helmet lawk zet kuah chungin a pindan ațang a lo chhuak ve a, nu Zari chuan, "riahchilh tawh miah suh, dâr 11 rîk hmain lo hâw ngei ngei ang che, an vêng mite paw'n i riahchilh țhìn tih an hre vek hlawm a, sawisep in kai nasa tawh lutuk," tiin a lo hau zui mawlh mawlh a. 

Tui lum ip thun khat in kei pawh ka lêt phei a, Lucy tãi zawnah dah sakin a ke lamah ka țhu a, "Engah nge maw mahni tâna țangkai lo tùr chu an lo sawi ve sek hlawm le," tiraw Mamte, uangthuang deuha tih paha u Muana'n Lucy mu hlùn lai a lo melh chuan ani lahin, "Awi!! Mâmte min ti ziah suh" a ti lêt hlur a. A period châng hian a thinchhe hlur zêl. 

Nu Zari vekin, "Hmingchhiat duh loh chuan țha taka nun ve mai tùr, i bialnu lah nula fel tak ang vekin mite'n an ngai a. Innei dâwn ula dân khatna lo a inneih duh miah lo tùr si, an in bul hnaia mite zawng zawngin i riahchilh țhìn tih an hre vek bawk nên mi nuih inti za zo dâwn a nia," a ti leh hlak hlak a. U Muana tih ngaihna hre lo chu a nui tut tut ringawt tawh. 

A bialnu nên hian college an zir ve lai ațang an inzui țan tawh a. A bialnute lah thingtlâng lam aţanga mi inhnuai luaha lo awm kha an ni si a, an unau chauha khawsa an nih avàngin u Muana hian a rihchilh ta fo a. College an zawh hma deuhin nau an pai ta chiah a, Nu Zari te lam hi chuan innei mai mah se pawi an ti miah lo. Amaherawh chu, a hmeichhia kha a nu leh pate mai bâkah a khua ang pawha nula fel leh țhaa an ngaih vek kha a lo ni si a. Nu Zari hian, 'innei ula, i duh phawt chuan i zir chhunzawm ang a, i zir chhunzawm chhûng chu keiman nau chu ka lo enkawl mai ang' tiin u Muana bialnu chu a ngen hial a; mahse, Chutia nau pai hmasak a inneih mualpho kha a lo duh bîk silo nên an ti tla ta ringawt a. Chuta țang chuan nu Zari hian a fapa bialnu chu a ngaina tak tak thei tawh lo.

Mualpho a hlauh vàng ngawta nau a ti tla thei kha râpthlâk a ti tlat tawh a, u Muana leh a bialnute inkâr pawh a țha lo chho a, kum hnih dâwn chu On and Off kan tih ang deuh khân an awm ve reng a; mahse, tun hnai ațang khân tih tak zetin an inzui leh mauh mai a. A hmâ pawha a lo riahchilh tluk tluk tawh chu mipa tân lah sim mai theih a ni bîk lo ni tùr a ni, an inzui leh ațang chuan u Muana hian a riahchilh leh ta fo a. Nu Zari'n a khak sek pawh hi ka dem lo, nau te lo pai leh palh ta se, an ti tla leh tho te a ni àwm sia. An inneih tak tak hma chu riak dun tawh lo zâwk se ka lo duhpui ve êm êm ringawt.

Nu Zari hauhna avànga a sawi tùr hre lo chuan kei chu min lo melh rulh a, "Ahriat pasal i nei dâwn a maw?" a lo ti a. Chhan ngaihna vak hre lo hian thâwk ka la hliai ringawt a.

"Kan naupan lai chuan puitlingte kha an innei țhìn a, kan han puitling ve taa naupang lam hlîr in innei leh mai sia.." a ti zui nuah nuah chu, "i zakthei lo e a," ka tih khum vak a. 

Lucy lahin, "Nangni paw'n inneih in sawi in sawi ve tawh tho kha aw," a lo ti ve hlur bawk, U Muana chu a nui ta hawk hawk a, "Ka leng daih dâwn, hmeichhe pathum thinrim kâra awm zawng boruak a rit em mai," a ti zuk bawk nên nu Zari ho chuan kan chek khum tlak tlak a. 

U Muana leh Lucy te inkârah hian u Valtea a la awm ve a. Ani chuan tûnah hian Shillong-ah Medical lam a zir mêk a, an upa ber u Nancy erawh Khawzâwl lamah pasal fanau neiin a awm thung. Ani pawh ngaihtuahawm a ni lo, sumdâwn a thiam êm êm a. A pasalte ina a lawi luh ațang an chhûngkua chu an kãng chho zawt zawt bawk nên an Inchhûngah chuan a lal a, a pasal nu leh pate thlengin an zah thiam a. Nu Zari te ngaih pawh a țha ve hlè chuan ka hria. 

Veranda kawngka phên ațang Bike a nawr chhuak lai chu, "Lalhmingmuan riak lovin lo hâw ngei ngei ang che," tiin nu Zari chuan a au zui hrâm a. Pakhat lah chuan a ngaih hoh hmêl ang reng bawk sia. 

U Muana tlãn chhuak chu melh zui vang vang chungin nu Zari bawk chuan, "In u Hmingmuana ve hi zawng rilru a ti hah țhìn em mai," a ti tlak tlak a.

Lucy lah chuan, "Nu nau an pai leh chuan inneihtîr tawh ngei ngei ang u, an ti tla leh a nih chuan u Muana chawp hian hnawt chhuak tawh thung ula," a lo ti ve bawk a. Rilru hah hmèl zetin a nu chu a thaw ham ham a.

Lucy ke ka lo hmeh sak mial mial lai chu min lo en a, "Ahriat..Chu, pasal neih te i lo tum deuh a ni maw?" a rawn ti ta a. Tãwi tê in ka nui hmasa phawt a. An chaw ei laiin Lucy-i'n a sawi thawi tawh tho sia zep ngai a awm vakin ka hre lo. 

"Ka pa hi min biak sak ula ka duh deuh a," ka ti a, "pasal chu i nei duh lo tihna em ni?" a lo ti ve thuai bawk. 

"Aih, chu lam chu a ni lo," ka ti hap a. A hlimchhàwn lai kha ni se chu 'pasal neih ka duh loh' thu ka sawi chiang ngawt ang; mahse, tûnah chuan chiang takin kan in ațang hian tal chhuah ka duh tih ka in hre tawh a. U Mapuia nên kan inkârah tel ve dang an awm leh awm loh ah ka buai lo bawk, a bula ka sawi ang khân ani hi ka nei ngei ngei dâwn a ni tawp mai. 

"Ih, Palai an lo kal dâwnah chhûngkhatte pawh inkoh khâwm ve te kha a țul àwm sia. Chutiang lam chu a ngaihtuah miah lo ngê a thawi paw'n a la sawi lo, u Mapuia te lam lahin tûnkâr hian an lo kaltîr hmêl bawk sia.." rilru buai ru deuh in ka ti niah niah a. 

Lucy pawh chuan, "Man ei tute kha an awm a ngai dâwn a ni lo'm ni? Âpa nên sawi dûn ula a chhawm tùr chu keimah niin tum sak vek ang u," a lo ti ve bawk a. A châwnpîngah ben sak taihin ka khap thuai a.

"Chhûngkhat hnaivai te hi kan nei ve em?" tih pahin nu Zari chu ka melh leh a, "Ka sawi awmzia chu maw, tûn thleng hian ka nute lam emaw ka pate lam emaw hi ka la hmu ve lo hrim hrim, chhûngte dang kan nei lo a nih te ka ring deuh ringawt a," ka tih zawm leh a. Ka sawi ang tak tak hian kan chhûngkua hi kan nung mãwl tawp a, kan chhûngkhat hnaivai ni a rin theih tùr tlawhtu kan nei ngai pawhin ka hre lo tlat a ni. 

Nu Zari chuan sawi chhuah nuam lo tih hmêl deuh hian a ngawi hmasa vang vang a, "ka hre chiang bîk lo ngawt mai, i pi leh pute kha kan tleirãwl laiin kan vêngah hian an lo insawn a. I nu bâk kha fa an neih àwm ka hre miah lo, tikhân kum naupangte in an boral zui leh mai si a. Khatia an han boral pawh kha vêng chhûng mipui leh hruaitu lam khân kan buaipui a, inchhûngte hmèl àwm tùr kha an lo lang pawhin ka hre lo. I pa erawh kan vênga a lo tâl țan tirh lam khân a û ni ngei tùr mipa pakhat in a rawn buaipui ve viau ţhin; mahse, i pa lah i nu lakah a tang nghet tawh si a, lo buaipui ve ber tu pawh kha a lo lang leh ta ngai miah lo va..." a tih lai chuan ka lo insangmar nasa khawp mai. 

"I pa hian ani chanchin kha a hre zui ang em aw, la zawh chian ve tùr a ni," a tih leh chuan ipik deuhin thâwk ka la halh ringawt. Kan chhûngkua chu ka lo rin lâwk ang chiah kan ni, ka nu nu leh pate pawh kha lo pêm lût chawp an nih te ka ring rum rum tawh. 

Ka rilru chîâi zia chu min hriat thiampui zetin nu Zari bawk chuan, "Naktûk zîngah i pa Hrila nên kan lo lêng ang a, i pa chu kan lo sawipui dâwn a nia," a lo ti dam diai a. 

"Palai an lo kal hunah pawh in nupa in lo awm ve r'u aw," ka ti a. Ka ngen ngawih ngawih a ni mah zâwk, ka duh dàn tak phei chuan an ni inah hian ka palai tùrte hi kal daih zâwk se ka ti ;   Zêp nâk emaw, ka pa bâkah kan inchhûngkhur hi ka zah pui a. Ka palai dâwn tùrte paw'n kan inchhûngkhur dinhmun dik tak lo hmu lo se ka ti tak zet! 

"E, awm ve tùra min duh phawt chuan kan awm ngei ngei ang," nu Zari'n a lo tih chuan ka hahdam huai huai a, "Pasal neih chu i hreh rêng rêng em?" min ti leh a. Min ngaihtuah zia pawh a mitmeng ah chuan ka hmu thiam. 

"A tirah kha chuan ka hreh ve deuh a; mahse, ka ngaihtuah chian hian pasal neih chu ka tân a țhat ber zâwk ka ring," tãwi tê a nui lui chung hian ka ti a. Ka dinhmun chhiat zia chu sawi nawn ngai lovin a fiah tak zet, ka rualpui dangte chu an nu leh pate thlazar hnuaiah an hmalam hun tùr rêl felin rilru thlamuang takin an awm hlawm a. Kei erawh chu rilru hahdam taka ka awm ve theih nân, kan in ti a ka sawi ve țhìn chu chhuahsan phawta ngai a. Ka pa lak ațang ka him theih nân ka hriat chian miah loh nupui nih chu ka tâna thil țha ber a ni ngawt mai chu a ni si a.. 

"I țhiannu hian a lo sawi tawh a, a nu leh pate ațanga mi țha leh fel kha an ni a. Nangman i nei hreh bur te a nih loh chuan i ti sual miah lo ang," a lo ti ve siam siam a. U Mapuia pa chu a lo ràlkhat hriat ve tawh avàngin a fak hlè a, nu Zari chuan min fuih bawk a, ka pain a nachâng a hriat miah loh thu țha tam tak min hrilh bawk a. Kan inchhûngkhur boruak leh ka dinhmun dik taka hre chiang ve êm êm a, ani pawh hian u Mapuia hi ka zalênna kawng min sialsaktu a nih theih a beisei a. Ka neih ngei min duhsak pui ni ber hian ka hria. 

Nu-ina a fate thu țha a hrilh țhìn ang thu țha tam tak min hrilh fê hnuah boruak tih zangkhai nân, "I pasal tùr chuan țhian fel deuh a la nei lo maw, i țhiannu pasal ve tùr hi ngaihtuah a hun tawh khawp mai," a ti zui a. 

Lucy tãi na thinchhe bawrlawk lah chuan, "Pasal ka nei dâwn bawk lo," a lo ti hlur a. Kawngkapuia a pa lo lût mêk chu, "Tiraw pa, pasal ka neih i phal lo tiraw?" a lo ti nghâl a. Pa Hrila lah chuan, "Phal miah nang, nang chu i pitar thlengin kan bulah i awm ang," a rawn ti ve bawk a. 

Kan bulah lo țhut ve pahin a kal chhuahna chanchin chu an nu a hrilh ve luam a, Sunday tûka an ruang chhar avànga boruak kal zêlah vêng chhûng hruaitu lam an țhukhâwm a lo ni a. Ka palai hmuh tùr chungchâng te pawh chu kan han sawi kai nawn leh rih a. Dâr 9 rîk hma deuhin current chu a lo thim deuh zuk a; mahse, rei thim lovin a lo awm leh mai a. 

"Ka hâw dawn," ka ti ta hluai a. Lucy hian min thlah thei dâwn hauh si lo a, current hi a lo thim leh palh chuan hâw kawnga ralmuang lo dâwn êm mai. 

Ka hâw tùr chu kawt thleng nu Zari'n min zui chhuak a, ani hi chuan a fate a ngaihtuahin an rilru puthmang tùrte a dâwn pui thiam țhìn a. Tûnah pawh ka rilru chîâi rûk zia leh hlauhthàwn rûkna te pawh ka sawi chhuak chiam lo nâin ka hahdam theihna tùrin thu min fah mawlh mawlh a. 

"Kan nu leh pate hun lai paw'n inngaihzàwna awm miah lo tein alàwm nupui pasal an inneih țhìn ni. Chûng hun lai phei chuan tun ang a nupa ințhen te kha an vàng pharh a nia. Kan inti tûnlai tawh a, 'Hmangaih ber lo chu' kan ti vei tlat tawh hlawm a. Hmangaih ber te nên a innei si kha tûnlaiah chuan kum li nga hnu lekah kan ințhen leh mai mai tawh zâwk a. Chuvàngin inneihna ah chuan hmangaihna hi a laimu a lo ni ber miah lo a nia. Dawhtheihnate inhriat thiam tawnnate leh rinawmnate hian nupa inkâr min lo phuar nghet zâwk a. Nang pawh mangang duh rêng rêng suh, i pasal tùr lah kum lama nang aia û zâwk a ni a, Block khat awptu meuh a ni bawk a. A hnathawh hian thui takin a rilru pawha thunun sak ngei dâwn a, a rintlak khawp ang," a ti mial mial a. 

"Nu Zar" zàwi têa tiin rilru ipik deuhin thâwk ka la hawk a, "Chhûngte dang hi kan nei lo tak tak a nih chuan tu te'n nge ka man ei dâwn a?" ka tih leh lai chuan ka hrehawm ve tak zet tawh. 

"E, lungngai duh mah ta che, thil pêk dawn tam duh vànga țûl lo pui pui man eitîr deuh duah ang khân kan ti ve lo ang a. A țûl zual tùr tak tak, Ni arte, Pa Lalte kha kan ti ve ang a. Ni âr lah keiin ka dawng thei a. Pa Lal lah i pa Hrila hian a dawng vek thei dâwn alàwm. Sum hmahruai pawh ka pa kan dawntîr ang a, mangang rêng rêng suh. I u Nancy te pawh an awm a, pasal i nei ve tawh dâwn tih a hriat hun chuan a phûr ngawt ang, " a lo tih lêt lai chuan keimah leh keimah ka inkhawngaih luat avàngin ka țah a rawn chhuak ut ut a. 

"Ka pa lah hian eng mah ngaihtuah a tum bawk si lo.." ka ti a, ka țap mai dâwna inhria in eng mah sawi belh tawh lovin thâwk ka la ham ham a. Tûn hunah hian mahni inkhawngaih vànga ka țap mai a nih chuan țah chhan tùr tam tak ka nei si a, ding chhuak tùr awm miah tawh lo khawpin ka kehsawm vek palh mai ang.

Kan in pana ka hâw lai chuan khawlai chu a lo reh hle a, ka rilru hrehawmna te chu min hriatpui ve ni àwm takin a khat tâwkin thli a lo thaw vûk vûk a. Thli ah chuan chan ve daih mai te chu ka châk a, hla takah ka thlâwk bo daih mai tùr!

"Melo" ka hnung lam ațang tu emaw hian a rawn ti thut mai chu ka phu nghek a. 

Hawi let pahin, " U Melo-i ka ni lo" ka ti a. Ka hnung lawka mipa lo ding chuan min lo nuih sûng a, "Ahriati zâwk i ni maw?" a ti zui a.

Kan vêng mi a ni lo nâin ka vêngah hian a lo tam ve hlè a, a hming ka hre chiah lo nâin ka hmuh fô tawh hnu a ni, "U Melo-i te in chu i lo kal pêl daih tawh alàwm," nèlawm vak lo hian ka ti leh a. Lucy-i te kawmchhak lamah u Melo-i te chu an awm. 

Min chhàn lêt na pawh ngaihven tawh lèm lovin ka kal nghâl hlawk hlawk a, chu pa lah chuan min lo zui ve zêl lehnghâl!

"Min lo nghâk teh, in ina kal pawh ka ngai tho alàwm," a lo tih leh lêk phei chuan ka pên chak zual sauh a. Amah pawh chu a tlãn hian a lo tlãn tawh a, ka bul a lo thlen chuan min lo kuah nghâl thuak a, "chhe lo ka tihna che a rei tawh, ding lawk la, thil sawi dûn ila," a lo tih laiin zu rim a lo nam tel huam bawk.

"Ka hmanhmawh min kal san zâwk teh," ka ti hmak a. Ka dar a kuahna phelh sak tùra ka ding dat chu ka hnute lo țhâm a tum ta mai. 

"I va han zakthei lo êm êm ve a" ti vîn țhakin ka nam nghek a. Kawngpuiah chuan mawng sawh chawrhin a tlu a, min lo en chhoh laite chuan a la nui sûng zui. 

"Min lo ûm zui tawh miah suh," ka ti leh kha kha a. Inher sanin chak zetin ka pên zui hlak hlak a, in pahnih vêl ka kal pêl hman tawh tihah current chu a rawn thim ta thut a. 

Chu pa chuan current thim chu remchânga lâk a tum zui tih hriat zetin, phone ka hmeh en rual rual chuan min lo hnaihchilh leh nghâl a.

"Induh viau lo la, mi'n chhe lo kan ti ve che a, an induh tlat ngai lo," hmeichhe dangte a thlêm țhìn dàn ni àwm tak hian a lo ti leh sur sur a. Kawngthlang lamah min pawh thlâk a tum zui ta mai bawk nên ka hlau leh thinrim bawk si chuan na zetin ka nam leh nghek a. Ani rui chu a lo invêng hman bîk lo a niang, a pai khut a, kawngsîra lung awm khâwmna laiah chuan a tlu chawrh a. A rûm hawk tih loh chu a reh zui ta hmiah mai a. 

"Khatiang khân min lo pawt nawn leh a nih chuan i hre viau tawh ang," tih khum khar khar pahin ka inher san hmak a; mahse, phone hmet êng a ka kal țan uk tawh chu ka chhîp ațang ka kê hmawr thlengin ka hit chhuak pup a. Thaw dep dep chungin a lam chu ka hawi leh nghâl a, Phone torch a ka han chhun chiah chu hlauthâwng lutukin ka tawlh hnung zui rawk rawk bawk. 

A tlu khân lung zumah tak ah tukkhum a sawh a, a thisen chu a lo luang chhuak ngiah ngiah a. Amah lah chu chhetê pawhin a che sawn tawh miah lo! 

Chil ka lem dâwn a, ka hrawk chu a lo chih tlat a. Hlauhthàwnna nasa lutuk hian min lo tuam hlup hlup bawk, thlan fîmin min lo bual zui bawrh bawrh bawk. Tual ka that ta mai em ni?!!

Ka phone screen lo êng pap pap chuan min ti phu nghek a, ka lungphu su dulh dulh vànga thâwk pawh thaw țha thei lo chungin, phone screen chu ka melh a KA PASAL TUR tih lo lang kalh ka hmuh rual chuan rang lutukin u Mapuia call chu ka chhâng a. 

Eng emaw hi a lo sawi tak nâin ka thin phu dup dup rî vàngin a thil lo sawi chu pakhat mah ka hre thei lo!

"U Mapui" âw sai hlak hlak a ka tih tâkah chuan, "I țha em?" a rawn ti mar ut a. Kei erawh ka mit deuh sulh sulh a. Ka thlarauin ka taksa a chhuah san riai riai ni maiin ka hria, ka vawt rawih rawih thei.

"Ih, tual ka that in ka hria," zàwi têa tiin ka nam thlûk pa che lo a mu zawi reng lak ațang chuan mit ka la sawn nghâl a!! 

Ka thil sawi chu a lo beisei loh lam daih a ni tih hriat zetin u Mapuia chu a rawn rûm chhuak hrawih a, kei lah chu ka hlauhthàwn êm avàngin ka thâwk laka buai vek tawh, "A che tawh lo, lung zumah a tukkhum a sawh a, thisen a lo chhuak a.. a che tawh miah lo," thlabâr zeta ka tih leh nawk nawk laite chuan ka khûr hlawk hlawk tawh.

Thâwk a lâk ham ham hnuah, "Khawiah nge in awm?" dam dap hian a rawn ti ta a.

"kan in thlen hma kawi hnihna ah khân," ka khùr nasa lutuk a, ka țawng chu a bah nuaih a. Phone torch-in chupa let hlawm reng chu ka zuk chhun leh a, a thisen chu lung kârah chuan a luang thla zeih zeih a.

Rei en ngam lovin rang zet hian ka hawi sawn leh nghâl a. Thli lo thaw vûk vûkah chuan a thisen thang rim te chu a lo nam tel hial tawhin ka hria!

"Naute, chîâi lo la, tunah khân rang takin in in lam panin kal nghâl rawh," a rawn ti charh charh a. A sawi ang a ka pên sawn uk tawh chu ka ding leh dat a, "ka tlànchhe dawn tihna em ni? A ruang hi.. eng lo.."

"Ka sawi ang chuan ti phawt rawh.. Ka lo thleng thla har lo ang. In in pan nghâl rawh, tûnah," a sawi tâwp lam chu thupêk khauh zet ang maiin a khawng mar ut a. Kei pawh chuan hnial lêt ka tum tawh bîk lo.

Khawlai dung reh ruih ah chuan min lo thlîr rengtu an awm palh hlau ru zetin ka hawi kual hmasa hrek hrek a. Min lo hmutu an awm lo tih ka chian hnu chuan thâwk ka la huai a, chak zeta tlàn mai ka han tum chu ka tiril a khurh nasat êm avàngin ka kaihza thâ chu a lo sak tlat a.

"Naute.." phone ațanga u Mapuia lo tih rî ka hriat leh chuan ka insangmar hrâm hrâm a.

"Ka lo thleng thla har dâwn lo, lo mangang miah suh," a lo tih leh mawlh mawlh lai chuan chak zetin ka tlân ta a.

Mahse, chutia ka tlàn țan chiah chu current a rawn êng thut a. Chu mai pawh a la ni lo, kan in lam ațang chuan Bike leh motor dang an rawn inzui chho zut zut ta mai a!

Hlauthâwng lutukin ka nam thlûk pa awmna lam chu ka en lêt thuai a. Current in kawngpui dung a tih en vek tawh mai bâkah, motor lo tlàn mêkte headlight in a lo chhun chiang dâwn lutuk chu ka zawi phah nghâl vek!!

Khûr ru dar dar chungin Phone chu ka beng bulah ka lek kang a, "U Mapui" a țanpuina mamawh zetin ka ti thâm țiak a. "Motor a lo kal... eng lo.." ka tih leh lai mêkin Car pakhat chuan min lo tlàn pêl a. Ka nam thlûk pa kha an hmu lo a niang an tlàn tlang a; mahse, Bike a lo inphur te chuan kawngthlang lam chu an thlêk ta chiah a. Ka thinphu rang tawh sa lutuk chu a lo ran belh dawt dawt a, zàwi tei hian, "U Mapui lo thleng vat vat rawh," ka ti sep a. Phone chu off nghâlin thâwk ka la ham ham a.

Ka bulah Bike chu an lo tiding ta chat a. An hnunga lirthei dang lo tlàn ve te paw'n kawng sîra mipa let reng chu an lo hmu ve nghâl tih hriat takin an ding zui sap sap a.

"Mami eng nge thil awmzia?" Bike a mite chuan an lo ti nghâl a. Pakhat chuan min dinchilh a, pakhat zâwk chu ka nam thlûk pa lamah khân a tlàn thla thuai bawk.

"Hliam tuar khu tu nge a?" ka hmâa lo ding pa chuan a lo ti leh a. Lirthei dang aţang mi dangte pawh chu an lo chhuak sap sap a.

"E he, hliam tuar an awm elo?"

"A la dam em?"

"Inngaizâwngte inkârah buaina a chhuak deuh a nih dâwn hi, police lo call r'u," tih vêl chu a ri zui nuaih nuaih a. Kan thâwm hriain kan bul hnai in ațang chuan mi dang an lo chhuah belh zêl bawk nên, ka chan chu a chau khawp ang le!

Ka hmâa mipa chuan a phone phawrh sawk sawk pahin, "Lo kal sawn miah suh" min ti a. Police a call nghâl zat bawk.

U Mapuia lo lan hun chu ka nghâkhlel êm êm a, a lo thleng vat lo a nih chuan ka tâlbuai zual hlè dâwn tih lah ka chiang.

Phone a hman zawh hnu chuan, "Zawhna ka zawh che chu, i țhianpa khu engtia i tih hliam nge?" Tiin min dinchilh tu pa chuan min vîn khar khar a. Mi dangte pawh chuan min dinhual țhup tawh, a țhen phei chuan an phone in min tin fur a. Video in an record a nih ka ring.

Kan vêng mite lo pung khâwmin min lo hmuh rual chuan, "Ekhai! Ahriat eng thil nge ni a?" an rawn ti ve a.

Min vîn tu pa bawk chuan, "A țhianpa hliam tuar saw tlân chhiatsan a lo tum mêk lai kan nangching a nih hmèl, a chhuthlu a niang," a lo ti zuah zauh a.

Kan vêng pa pakhat chuan, "Ahriat, a sawi hi a dik em?" a lo ti ve thuai a. Ka nam thlûk pa buaipui tute lahin, " A mar phû a la awm; mahse, thisen a hloh nasa ang reng a, Damdawi in thlen pui vat a țha ang," an lo ti ve bawk a.

"A pawisa i rûk sak em ni?" min lo hmu hmasa tu bawk khân a lo ti leh a. Phone a min tin țhup tute zînga hmeichhe țhenkhat lah chuan, "Tûnlai chu hetiang buaina hi a tam riau," an lo ti ve sek bawk.

Thil thlen dàn ka sawi hma hauh aţang ngaih dàn an nei sa nghâl vek a, u Mapuia lo thlen hma chu țawng chhuak lo ila ka ti fuh zâwk ang.

"I in la ngêng vei khanglang a, i țhianpa saw a pawisa i rûk sak em ka tih chu," ti paha min lo hmu hmasa ber tu in, ka darah min lo nam tak salh ah chuan kan vêng pa ho chu an lo ri ve ta phat a.

"E.. khati zâwng chuan che miah suh, nang hi zawhna te zâwta kut thlâk theitu i ni miah lo a nia," an lo ti ve tâkah chuan chu pa chu a zum ve ta deuh a.

Chutihlai tak chuan u Mapuia pawh a rawn thleng ve ta hlawl a. Car headlight pawh ti thim lovin a rawn chhuak nghâl vut a. A hmêl ka hmuh rual chuan eng mah sawi lo mah ila, a lo thleng chu ka thlamuan phah zia a hre hrim hrim ang.

Ding taka ka lam a lo pan laiin a car aţang u Allan-a pawh a lo chhuak ve hlawl a. U Mapuia chuan lo awm ve te chu melh pawh melh lovin ka hmâah tak a rawn ding a.

"I țha em?" a lo tih sup chuan ka bu nghat a, ka ngaihțhat nân tak tak tãwi tê hian min nuih suk bawk.

Chutah, nichin lawka min nam salh salhtu-pa hmachhawn zawng chuan a inher ta ruai ruai a, a hmâa mipa ding chu a chhuk melh nghal rùn a, "ani hi kut i lo lek khum ngam a maw?" a ti vâwt ruih a.

Motor chhûng ațang thil thlen dàn kha a rawn hmu hman vek a nih hmèl, u Mapuia hmâa ding pa chuan, "A țhianpa pawisa a rûk sak leh sak loh ka lo zâwt ringawt alàwm," a lo ti ve thuai a. Inlâk huaisen tum zetin a kut chu a hûm ruh ngat ngat bawk.

U Mapuia lah chuan tham loh hmêl zet hian a nui zui hawk a, chu pa biangah chuan na lo tê têin a ben sak ta thak thak a. A ben pa tân lah u Mapuia kutthlâk chu a na dâwn hauh si lo a, thinrimin sual lêt tum ta se a hneh dâwn lo lutuk bawk nên a lo indawh tawp a ni ber.

"Tûn hnuah chuan i inrawlhna tùr chi a nih leh nih loh ngaihtuah hmasa tawh țhìn la tiraw," a ti a, a nuih pah suk suk nâin a mitmeng chu a hlauhawm tak zet.

"Ka sawi chu i hria em Țhianpa," vîn hauh si lo hlauhawm ru êm êm tho si hian a ti vâwt leh ruih a, a hmâa ding pawh chuan, "Hria e.." a ti ve ta a, u Mapuia paw'n tham loh hmêl zeta a biang a ben sakna chu a tâwp zui a.

Kan awmna chhak kawiah chuan police motor a lo lang ta a. Hlauthâwng ru zetin u Mapuia kutphah lianpui chu ka ban a, ka tawh fuh rual rualin amah zâwk chuan nghet zetin ka kut chu a lo hûm a. A sîra ka ding chu min lo en chhuk vung vung a, "Hlau tawh suh" a ti zui sup bawk.

Thinphu su dulh dulh chunga ka han en chho chu u Mapuia chuan ka khabeah a rawn dawm thut a, a ngaihna hre lo zet a, "Engati nge?" ka tih țiak laiin uluk fê hian ka hmai tlâng chu a lo melh kual dun dun a, "Kut an thlâk che em ni?" a lo tih tak hrawih ah chuan rang lutuk in ka kûn hniam a.

"Aih, hei chu.. an mahni hian kut min thlâk lo hrim hrim," ka ti nawi nak a, a sîr zawnga min en avàngin ka pa min benna kha a lo lang chiang deuh a nih hmèl.

"Tu tih nge?" a lo ti vawt leh ruih a, chhânna ka pe lo a nih chuan pung khâwm te hian kut min thlâk angin a ngai tlat dâwn a, an lakah hian a țuan duh mai dâwna hriatna lian tak ka nei bawk.

"A ho lutuk," ka ti tak nâin a mitmeng hlauhawm zual sauh avàng chuan thâwk ka la ham ham a, "Hei chu ka pa min benna a nih hi," ka ti ta sep a. A mitmeng danglam nghâl zawk chu en duh lovin ka hawi sawn nghâl daih bawk.

"Zànin a in video lâk hi a leakout a nih chuan nangni ho hi ka rawn bitum tùr in ni," tiin u Allan-a chuan hmeichheho chu a melh kual dun dun a. Police motor a lo lan tawh hnuah Video kawl-tute zâwk a vau lêt chu thil țha lo zâwka thlen phah mai hlau zetin ka îp phah chawih a.

U Mapuia thung chuan anniho chu a va phêk en tawp a, "hlau suh ka tih kha, hetiang thil chu i u Allan-a chem kalna zâwng tak alàwm," a ti thûm bul bul a, thaw chhuak hak paha ka han en chhoh chuan anni lam chu a lo melh rùn a, "A û hi dàn hre-mi kawlhsen zet an tih kha a ni bawk a," a lo ti leh nghut bawk. Min hrilh ni lovin anniho vau nâna sawi chhuak a ni mah zâwkin ka hria.

Ka rin ang chiahin Video-a cover tute chuan u Allan-a chu an hlauh zual hmêl ta hlè a. U Mapuia lahin anni leh u Allan-a buaina chu ngai pawimawh zui lo ni àwm takin kei chu min lo nuih leh suk a. Video-a cover tute pawh chuan, "Kan delete vek tawh tak tak alàwm," an ti ta sap sap hlawm a.

"A țha e, buaina a awm zui lo tùrah ngai ang," u Allan-a pawh chuan a ti lêt thuai a.

Kan awmna lam a lo pan phei laia u Mapuia nên an innuih suk chu ka lo hmu ru reng bawk. Police te lo thlen hma hun rei lo tê chhûnga boruak an rawn thunun vek thei chu a râpthlâk letling hial zâwk.

Ka lam ţang ni lovin ka hmêlma zâwk an ni ang tih mawlh chu ka hlau thar a. U Allan-a hian u Mapuia leh min lo dawp ve chiam chiamtu pate inhmachhawn lai khân, chanchin zâwtin mi dangte hi a lo bekbawr tih chu ka hria a; mahse, chinchâng zâwt satliah ngawt chu a lo ni hauh lo. An video lâk te kha a delete tîr bâkah, leakout a awm chuan an mahni a bitum tùr thuin a vau hmiah mai a. Hetianga mi dang zahpahna nei miah lova invaivung țhìn te hi ka mi huat zâwng tak an ni țhìn; mahse, tûnah kher kher chuan ka lam ţang an nih avàngin ka thlamuan phah êm êm lawi a.

Police motor chu a lo din dawt rualin police pathumte chu an lo chhuak nghâl a, "Eng nge ni thil awmzia?" an zînga pakhat chuan a lo ti zui zat bawk.

Kan vêng mite pawh an lo pungkhâwm ve nual tawh a; mahse, u Mapuia leh u Allan-a te lo khawsak zawh chiah dàn avàng khân thu leh hla neih ve chu an châk lêm lo a niang, u Mapuiate țhian dûn chu ngaihchân hmêl zetin an en vek hlawm mai.

U Allan-a zâwk chuan, "Hei hliam tuar an awm a, in lo thleng tawh tho bawk nên ani dinhmun hi a ngaihtuah awm riau, Damdawi in panpuitu kan awm loh chuan?" a lo ti zung zung a. Police lam paw'n hliam tuar-pa chu an han en kual that that a. U Allan-a sawi ang chuan damdawi in panpui vat chu an rêl thlu nghâl a.

Mi dangte hriat thiam loh tùr bawkin u Mapuia te țhian dun chu an in mitmei leh tawh! Hliam tuar pa chu mi dang Car-ah an zawn lût a, a leh hlawm rengna hnua thisen awm nuan chu rei en ngam lovin ka hawi sawn daih a, hliam tuar damdawi in panpuitute chu u Allan-a'n a zui ve ta daih bawk. Police lamin thil thlen dàn min han zawh leh chuan ka kut a vawnna thlah miah lovin u Mapuia chuan, "Naute, hrilh rawh le," a lo ti sup a. Ka kut a lo hmer leh salh lai chuan ka tiril khûr nasa lutuk te kha a lo reh fel vek tawh tih ka hre chiah bawk.

Nghet taka ka kut min chelhsaktu chuan min humhim tlat dâwn tih chu keimah ah a chian êm avàngin zam miah lovin engkim chu ka sawi vek a. 'Ka hnute min țhâm sak a tum vàngin heti lai lovah pawh ka nam thlu tawh,' tih ka sawi laiin u Mapuia hmèlah chuan tualthah châkna a tui hâl hmêl ka hmu!!

A mitmeng râpthlâk zet leh a hmèl lan dàn rapawm lutuk avàng chuan amah chu rei en ngam lovin police pa chu ka melh daih a, ka nam thluk hliampa leh-hlawm rengna lam chu a thlîr thla vung vung tih erawh ka mit sîr chuan ka hmu thei a.

Ka side lam ka sawi zawh vek hnuah Police pakhat chuan, "A zia lo ngawt mai; mahse, station lamah call kan dâwn bâkah hliam tuarte kan awm bawk si a. Kan pute nên station-ah sawiho zâwk ang u," a lo ti ve a. U Mapuia chuan a hnial fithla leh țhak mai dâwn emaw ka tih laiin, "a pawi hlei nem, kan lo zui ang che u," a ti nghut a. Kha pa khân ka hnute min țhâm sak a tum tih a hriat tak avàng khân ka lakah chuan a lungawi lo ni hian ka hre deuh ta tlat a, ka awm a nuam lo leh vek tawh!

Mi dangte pawh chu an kal darh sap sap a, min rawn hmu hmasa tute pawh kha țhianho a kal chhuak lo hâw leh lam an lo ni a. A tira lo pawr deuh pa phei kha chu u Mapuia huhâng vàngin a zâm chhe hneh hlè a niang lo inrawlh ve chu sawi loh, a țhianpa Bike hnungah chuan a lâwn a, an tlàn chhuak ve ta daih a.

Kan vêngpa pa Dinga kal sawn ve tùr chu u Mapuia'n a chelh ding a, "Ka pu, station lamah chuan min lo zui ve hreh em? Ahriati hi in vêng mi a ni a, i țawiàwm hreh lo ang tiraw?" a ti dam thlup a. Pa Dinga pawh chuan, "A ni teh tak àwm e a...Hreh lo e, tirawh u," a ti ve thuai a.

Police motor chu kan hmâah a tlàn a, u Mapuia car-in kan pathum chuan kan zui zêl a. Thil thlen hun chhûng kha minute sawmhnih pawh a tling kher lo ang; mahse, thil tam taka thleng hman a. Kha hun rei lo tê chhûng khân tum rêng vàng ni lova nunna lâk palh mai a awlsam dàn tùr chenin ka hriatchian phah a. Tualthattu ka nih theihna chance san zia kha ngaihtuah lêtin ka țim chuaih chuaih a, 'Lo thi palh ta se' tih chuan min ti hlauthàwng thar leh a ni ber mai.

U Mapuia leh pa Dinga chu an titi zui luam a, pa Dinga'n, "vêng dang ațangin kan vêngah an lo tla lût a, vêng chhûng mite zahpah lo zeta che hreh lo an awm tlat țhìn hi a pawi ngawt a ni," a ti chuarh chuarh a. Ka chanchin chu ka pate ka la hrilh miah lo tih ka inhre chhuak thut a; Amaherawh chu, 'hria pawh ni se engah vak a ngai leh chuang lo ang' tih ngaih dàn ka pu zui zat bawk.

Lucy zâwk chu hrilh vat ka duh ta zâwk a, mi dangte kâ aţang a lo hriat chuan a chîâi phah dâwn lutuk tlat. Whatsapp ațang message ka thawn a, kan buaina hmun kha kan In ațang paw'n a la hla deuh a, Lucy-te in ațang paw'n kawi hnihna ve tho a ni. Insual buai vànga thâwm nei huk ang kha kan awm lo bawk nên a bul hnai a mite tak tak chiahin a nih kha kan thâwm pawh lo hre ve ni.

Lucy chuan, *Hei, inin lam ațanga pa Hlua lo haw chhoin a lo sawi ve chiah a. Station-ah an hruai che em ni? An man dâwn che a maw?* a lo ti lêt nghâl mawlh mawlh a.

*Palai lo kal dâwn țep tawhah buaina i nei a, kei chu u Mapuia Chhûngte lamin an lo hre ve ang a buaina a awm phah ka hlau e* tih lo thleng leh chuan ka chhûng lama ti tawt ve mup tho.

Police station kawt kan thleng zui ta mai bawk si nên ka voice ta zâwk a, "Man kher lo mai thei, u Mapuia a awm ve a. Min lo ngaihtuah lutuk suh aw," ka tih lai chuan engine tih hlum pahin u Mapuia chuan min lo en ve chiah a, ka zak leh deuh si chu rang deuhin ka hawi sawn nghâl a.

Lucy bulah chuan, "Hei station kan thleng chiaha chanchin chu ka lo hrilh leh ang che," ka ti zui a.

Station chhûnga kan lût chiah chu ka zam thar êm êm a, kha pa lo chêt dàn kha a dik lo pawha ni mahna mah se, kut thawha hliam tawrhtîrtu ka ni zâwk miau si a. Ka beisei loh deuhin lock up-ah min lo dah daih mai chu ka hlau thar a, ka kutphahte pawha lo thlan huh leh dap tawh.

Damdawi tawlh ru dâwp mêk an lo la nei zui a, an vaw thâwm leh na tuar thâwm rî te chuan ka chhûngrila ti nuam lo nghulh a, chil rial tùr ang mai hian ka pumpui chu a inlet kual a, a na tel tut tut mai hian ka hria.

Pa Dinga chu kan vêngpa a nih angin hma tâwntu ah ațang a, kan Police hmachhawn tur pa hmâah chuan țhuin a thil hmuh dànte chu a sawi nghâl mawlh mawlh a. Chutia an inbiak lai chuan, "Thil thlen dàn dik tak chiah sawi la, a bâk chu keiman ka chingfel vek ang," tiin u Mapuia chuan ka kut a lo hûm leh vang vang a. Mak deuh maiin a thil sawi chu rinhlehna ka nei chhin miah lo.

Police chuan pa Dinga chu a kal chhuahtîr ta daih a, a chair hmâah kei chu ka țhu ve ta a. U Mapuia erawh țhu lovin ka hnungah a ding a, a kutphah lian leh lum țha zet chuan ka dar a lo hmer vang vang a. Police chuan, "tûnlai chu invêng bîk ah hian ruangchhar a tam riau asin," a lo ti nghâl ringawt a!

Chu thil chu eng rilru pu a sawi chhuak nge a nih ka hriat thiam miau loh avàngin engtin mah ka chhâng lêt lo. Amah vek chuan, "Zoram mipuite hian zu chhe in vànga thi nge annih a, thil dang vàng zâwk tih hre châkin beng an chhi țhup a nia," a ti leh zêl a. Tûna kan buaina nên hian an ruang chhar tawhte khân inzawmna a nei miah lo; mahse, ka hmâa țhu pa chuan min vau zam nân hmana tum tlatin ka hre thung.

U Mapuia zâwkin nèlawm vak loh hian, "chu case vànga lo kal chu kan nilo in ka hria," a lo ti chhum vut a. Police pa chuan inlâk 'Lal' hmêl zetin ka hnunga u Mapuia ding chu a han en chho a, a hmêl chu inla dikna duh zet si mah se thamna a hmuh ruala hnar phal miah lo tùr chi kha a niin ka lo ring hmiah thung.

"Ni e, kan tûnlai boruak ka sawi tel mai mai a nih hi, țhu ve ta che," a ti vei duah a. U Mapuia thung chuan, "hun khawh ral tam lo zawngin a point-ah tak lût mai rawh," a lo ti lêt hmiah thung.

Kan hmâa Police lah chu a thinrim duh hauh lo va, a nui deuh heuh heuh reng a, thamna a beisei te pawha ni hial zâwk ang. A hmâa file in pharh chu a khup thuk a, kei chu min lo en lehin, "Engati nge tûn ang zàn tlai tawhah te hmeichhia leh nghâl khawlaiah i vah chhuah a," a lo ti leh ta chat a. Ka thiam lohna lai thur chhuakin hlauthâwng deuha min siam hnuah; case a kal thui loh nâna pawisa nên kan vawm zui a duh niin ka hre tak tak tawh.

"Pawimawh vàngin ka țhiannute inah ka kal lawk a," ka tih lêt chuan a lo nui deuh sûng a, "I țhiannute in a kal si chu, engtin nge i tlangvâl hliam tâk nên khân in awm dûn si a" a lo ti ve leh kher a. U Mapuia chuan ka dar a hmerna chu a lo ti nghet salh a, a mize pawisak neilo zet kha a lo chhuak leh ang a, police lam nên hian kan buai hlut ang tih mawlh chu ka hlau ru tel a, awm a nuam lo tet tet ta mai.

"Kan awm dûn hleinem, ka țhiannute in aţang ka hâw kha min zui zêla ka...," ka tih lai chuan ka thu sawi rin loh hmèl zet hian Police pa bawk chu a lo nui kher a. Ka țawng chàwl dat chu, "sawi zêl ta che," min tham loh hmêl zet hian a lo ti leh bawk nên ka ngei kher mai.

"Ka țhiannute in aţanga ka chhuak kha min zui a, min lo kuah vêl bawk nên ka nam thlu tawh a, min zui tawh lo tùrin ka hrilh bawk; mahse, current a lo thim rualin a lo che leh thut ta si a. Kawng thlang lamah min pawt thla nghâl rawk rawk kha ka chûngah thil țha lo a ti ang tih hlauin ka invêng a, vawi khat chiah ka nam leh a, a tlu a.. tikhân lungah a insawh vàngin nikhua a hre lo zui ta mai a ni," thil thlen dàn ka sawi laia a lo nui leh chu rum zet hian ka melh tawh.

"Tûnlai hmeichhia hi chuan dànin a humhalh țha tawh lutuk che u tih inhria a, mahni ngaihzàwng ngei ngei pawh dawta puhin pawisa in chawitîr hreh tawh lo a...," a lo ti leh ta kher kher chuan u Mapuia thinurna a chawk tho thar leh ka ti lo thei lo.

Ngawi rengin a kekawr ipte chu a zen ruk ruk a, kan hmâa Police țhu chu eng atân mah ngai lo tih hriat zet hian phone call a siam zui zat a. A phone chu loud-ah a dah miah lo nâin volume a ti ring lui tih erawh ka man thiam ve.

A call mêkin phone a chhàn rual chuan, "U Saihming," a ti nghut a. Lehlam a mi chuan, "Kan BDO vâl teh hlawl chu, buaina a awm deuh em ni? I țhianpa khân a lo sawi thawi thuak a," a lo ti ve chiah a. Police pa chuan kei ang bawkin eng nge thleng zêl dâwn tih chu, hamhaih ru takin a nghak ve tho tih hriat zetin a heh hil zet chu a liak a liak tawh a.

"Civil mi hian police te hi kan khing lêt thei em?" U Mapuia'n a tih hmiah lai chuan ka thlêk chho rang khawp mai.

A biak mêk pa lah chuan, "Thei teh reng e, mipui lam hian kan dikna chanvo kan hre lo țhìn a. Kan police te chêt dàn tam tak hi khin lêt theih a awm nual a nia. Eng atân nge chutiang te chu min zawh ni, khin lêt duh i nei em ni? A department ang zawng lo deuh paw'n a mimal kha i khing thei," a lo ti duah a. Kan awm mêkna pindan chhûng boruak chu a țang ut tawh mai.

"A țha, thil kal dàn ka en hian i tel ve a țul hmêl riau.." u Mapuia chuan a ti lêt a, pawisak neih loh hmêl zet hian a kiai tel suk bawk.

Police chuan, "Ka pu khati zâwng chuan inti lo ila," a lo ti pha deuh dûi a. Thu min zawh țan laia a hmêl lan dàn leh tûna a hmel lan dain chu inthlau tawh tak a ni.

U Mapuia lah chuan phone chu a off duh bik miah lo a, "A tir ațang keini paw'n țha taka inbiak fel kan duh rêng alàwm.. FIR pawha lo la lût lo. I nau te'n 'thil a kal thui zêl loh nân station-ah i sawiho zâwk ang u' an ti a, țha takin kan lo zui a. Chutiang ni lo se hliam tuar chhûngte nên in dàwrin keimah niin kan inchingfel daih tawh ang," a lo ti lêt hmiah si a.

Police pa chu a nui deuh a, "chutiang tùr chuan alàwm kei paw'n hma lakpui che u ka tum ni. Case theh luh an lo tum palh pawha case ziak lût kher lo a, in inbiak rem theih nân anni lam ka lo râwn theih nân.." a ti leh hman chauh a, "Nang hi pawisa kan pe che ang a," u Mapuia'n ngeiawm zet hian a lo ti ve leh hmiah si...

"Sir, i awm dàn en hian thamna i beisei tih ka hai hlei nem... a tir aţang khân pawisa sawi hmuh hmasa che ila chu, rei awm lovin min chhuahtîr nghâl ang; mahse, i beisei angin pawisa ka sawi hmuh silo che a, ani hmeichhe chak lo zâwk hi chhaih mangan i tum tih ka hai hauh hleinem. Chu tak chu alàwm ka khin duh chhan che, he case-ah hian keini hi sum a tlawn lungawitu tùr che kan ni lo. Ka nupui tùr hian sexual harassment a tâwk a, mahni a invênna lamah khaw lo taka khawihtu kha a hliam palh a. Chu thil a sawi lah chu i ngaithla țha duh miah si lo, ka lâwm lo tih hre rawh," nèlawmna tel hauh lovin a ti chang leh bawng mai a. Advocate Saihminga lahin an inbiakna chu a lo la ngaithla ve reng bawk si nên police pa chu a zah hmêl khawp mai.

FIR lût kher lo mah se police lam hian thu zawh fiah tùrin min ko thei tih chu ka hria a; mahse, u Mapuia te ang hi chuan hetiang thil hi an ngaithei lo tak zet a nih dâwn hi. 'Mi hausate chûngah dánin eng mah a ti ve thei lo,' te kan ti fô hlawm a, a dik ang. Tûnah pawh phone call pakhat leka siam avàngin police zâwk a ți dûk tawh a, khauh taka dàn lekkawhtu tùr zâwk ni mah se mi hausa leh thil ti thei te huhâng vàngin a zâm chhe hneh hlè mai a ni.

Rei lo tê hnuah police station chu kan chhuahsan thei ta rêng a, Police Station tualah chuan u Allan-a pawh a lo awm ve reng tawh a. U Mapuia nên kan inzui chhuak min lo hmuh rualin, "a ngaihtuahawm hran loh. Amah kha a lo rui sa bawk a, a lu a sawh leh kher kha nikhaw hre lovin a awm phah ta a nih kha, thisen pêk pawha ngai lo. A tukkhum kak kha hmun hnihah an țhui sak a, chu chu a ni deuh mai," a lo ti nghâl mawlh mawlh a, ka thaw huai thei.

"Va lan ve chu a țha hrim hrim," zàwi têin ka ti sap a. U Allan-a bawk chuan, "Nia, a hminga thupha va chawi ve kha a sual lo ang, nu ber kha a lo nasa deuh dâwn tih hre lâwk ula," a ti a, a nui zui huk huk bawk.

U Allan-a chuan ama car a lo ken tawh avàngin pa Dinga chu a thlah hâw dâwn a. Keini chu damdawi in lama kal tùrin kan tlãn chhuak veleh nghâl a.

"A nu a thinrim viau chuan case an ziak lût mai ang a," ka ti a. Ka bia pawha ni lo, thil thleng palh thei ngaihtuahin ka ipik ru leh țeuh tawh.

"keini paw'n kan ziak lût ve anga a ni mai alàwm," a lo ti ve nghauh a. Zawhna ngah deuha a ka en chho chu, "I duh lo chunga pawt lui che kha dànin a phal hauh hlei nem. Nang chuan self-defence atân i nam a, a tlu sual palh a ni mai. Case ka siam a nih chuan an buai viau ang," a ti leh nghut nghut a. A mizia chu a chapo ka han ti ngawt dâwn a; mahse, a âwmphaw țha taka nih zia ka hmuh chian êm avàngin eng mah ka sawi zui tawh lo.

Keini mi nâwlpui te'n buaina han tawk ve deuh ila kan police lamte min lo dawnsawn duh dàn chu keimah ah hian a chiang ber. Inla thuneitu takin min dàwr kual a, keini lahin tih theih dang kan nei hauh si lo a; mahse, Mi hausate leh thil ti thei deuh te chuan police lamin an pawt kual vêl mai mai țhìn te kha an duh hauh lo va, a vau zâm theihna naah an vau zâm a. Police lamin an hlauh phah a, an tlawn hiam hiam chhan pawh keini mi nawlpuite ang a, an thu neihnate hmanga an in pawh kualtîr duh loh vàng chiah a ni. Tute emaw thlah kal zêl te phei chu an thil tih sualah ngei ngei pawh, 'kan Police lamin thu an zâwt fiah ngam lo,' an tih hial kha. Chutiang mite chu mipui lamte paw'n sel luih luih zêl mah ila, an dinhmun a din ve chu kan châk ru țhâm vek tho. A huho-a kan sel luaih luaihna phênah hian a rûk tak chuan an hmêlhriat tal nih kan duh ru țhûm vek bawk.

"Zân lamah chuan kal chhuak tawh lo la a țhain ka hria," a lo tih leh nghut takah chuan ka en leh thuai a. Ka lakah chuan lungawi lohna a nei ta mai emaw tih tùrin a hmêl chu a lo lang rûm ul tawh.

"Ka buaina a nih chu," ka ti deuh hmak a, "Aih.. khatiang thil kha a thleng leh a nih chuan tual ka that hreh hauh dâwn si lo a, pasal atân tualthattu i duh dâwn em ni?" a ti duah a, min lo thlêkin a nui tak nâa a mitmeng chu a ţihbaiàwm tak zet thung.

Ngeiàwm zet a hnial lêt ka tum viau nâin ka hnute min țhâm saka tum thu a hriat laia, a hmêl lan dàn kha mitthla lêtin lu ka thing zui ta nak a, "Pawimawh a awm vàngin alàwm ka chhuah," ka ti leh țalh tho.

Steering her kual pahin a thaw ham ham a, "zàn dangah chuan pawimawh awm tawh suh se," a lo ti ve leh nghut a, ka han melh ralh chu min lo nuih leh tak nâin a hmêl hmuh chu a hahthlâk tak zet a ni.

"Palai in lo kaltîr huna lo awm tùrte buaipui in alàwm ka kal chhuah," ka ti ta a. Țha tê tê a thil sawi fel a fuh zâwka ka rin vàngin ka âw pawh a nêm ve hle bawk.

U Mapuia chu a ngawi ta reng a, eng mah min zâwt zui lo mah se sawi zawm zêl tùrin min duh tih chu ka hria a, "kan chhûngkua hi chiang takin min hria la chu min neih i tum ngawt hi i țhulh duh ang," ti leh hapin ka țhu țha a, thatchhe zetin seat nghenchhan chu ka nghèng a, hmalam ka melh vang vang bawk.

"Ka hre chiang che u alàwm," a lo tih ve sup chuan, "Aih.. Zu zuar kan nih thu chiah i hria," ka ti deuh hliai a, "Palai lo kaltîr pawh ni la chhûngkaw dang lo khâwm ve tùr pawh kan nei lo... chu thil chu i hria em ni?" ka ti a, kan chhûngkaw bulh bîk lutuk avàngin amah ah chuan ka țuan leh tawha ni mah zâwk.

"I sawi a, ka hre ve ta bawk a, kei chuan buaina ka la nei lo ta cheu a nih hmèl," a lo ti chiah chu rûm deuh hian ka han melh nghâl a, "Nia.. i hmachiah i sial a, i buai phah tawp nang," uar zeta ka tih khum tân tân laiin a lo nui chhuak huk a. Ngei zetin ka melh zui kha kha a, "Mi hi chu i ngai sual ve a ni tiraw?" la nui ruh ruh pahin a lo ti fân deuh ruih a, chùm chawrh mai chu ka duh deuh ut ut tawh.

Hospital kan thleng ve chu u Allan-a sawi lâwk tawh ang chiahin nu ber chu a lo lungawi lo khawp mai.

"A bialnu i ni lo'm ni, a hma paw'n zàn tam hmu tùr chein in veng a lo pan ziah a, engah nge tûna taka kutte i lo thlâk a," min lo ti zêk mai a.

"Ka pi, i fapa nên hian kan inngaizâwng lo, min hai a niang," ka tih lêt ve ngial paw'n, "daw rêng rêng suh, a sum i ei sak nasat zia pawh kan hre vek alàwm," a ti leh zêl a. Kan hliam tuar Richard-a ber lah chu an jaction na vâng nge ni a muhil tlat si a, kan boruak chu a ipik mup mai a ni.

"Khuate han var se FIR kan theh lût dâwn, chu chu lo hre rawh, nang ang hmeichhe nasa lutuk ho hi chu tâng bo vang vang rawh u," meng lian kawl kawl pahin a ti leh hlawih hlawih a.

"A țha, in duh phawt chuan case chu file rawh u," u Mapuia chuan a lo ti chhum ta vut a. Kan hmâa nutling chuan a beisei loh lutuk chhânna a dawng ta si a niang a hawi zui ta ruai.

"Keini paw'n case kan file ve dâwn tih erawh ka hrilh lâwk duh che u," a ti zui leh ta bawk nên, a pasal ni ngei tur chu a nupui sîrah a rawn ding ve nghâl a.

"Pa-a heng mite han zahtheih loh zia hi, i fapa hliampui tuara an sawisak tawh hnuah pawh case file te an la sawi ngam zâwk a nih chu," a ti ruai a, rilru na thar thut ang mai hian a țap deuh țuau bawk.

U Mapuia lahin luhlul zetin a en chhuk rùn tawh mai sia, a pa zâwk chuan, "min hre thiam hrâm hrâm teh u, in țhianpa khân thil thlen dàn tlangpui chu min hrilh vek tawh a. A nu hi chu a fapa hliam tuar vànga a rilru nâ insawh thâwlah min ngaihsak hrâm thei ula ka ti ngawt mai," a lo ti duah a. 

An nu chu a ter zui at a, "Khati'n nêm nghâl dui mah ta che. I fapa pawhin eng mah a la sawi lo a, chutih lai kârin anniho thil sawi mai mai hi i lo ring vek ang maw?" a ti hlawih hlawih a. Mahni fate sualnaah pawh phat sakna zawng ruai țhìn ang kha a ni hialin ka ring ta rum rum mai.

" In fapa chu lo harh chhuak pawh ni se sawi tùra nei tam lo khawp ang," u Mapuia bawk chuan a ti mar leh ut a. An nu zâwkin râpthlâk tih hmêl zeta a en laiin pa ber erawh rilru hah hmêl zetin a thaw hawk a.

U Mapuia chu a zawldawh țhìn hlèin ka hre si a; mahse, tun țum zet erawh a chhûngrilah thinurna nasa takin a in mung khâwm emaw tih mai tùrin tu zai mah a ngai hlek lo.

Chutia boruak a sosan lai tak chuan call a dawng a, a kekawr ipte ațang phone a lâk chhuah lai chuan screen a u Allan-a hming lang chu ka lo hmu ve a.

"Aw sawi rawh," a ti zui nghut bawk. A ngawih zui vung vung hnuah a phone chu a lek hniam a, a dah ring zui nghâl zat bawk.

"Tikhân sawi țha leh lawk rawh," a ti leh hmuk a. Richard-a nu leh pate chuan a ngaihna hriat loh hmêl zet hian an lo en hû a.

U Allan-a chuan," Ahriati te vêng ka zuk thleng thla kha, Ahriati te inah a țhiannu kha a lo awm ve a. An inpawh buai țanna lai ka sawi khân an kohhran upate in kawt zâwn a niin a hria a. Anni chuan CCTV an lo vuah hlauh a, zàn thil mah ni se kan tlãn chho rum rum a. Lucy rin lâwk ang chiahin CCTV chuan a lo cover a, a video ka lo thawn che. Duh leh a nu rilru dam lo lutuk kha lo entîr ve rawh," a rawn ti charh charh a.

U Mapuia chuan phone call chu a ti tawp hmak a, an vua leh vang awm ve hote pawh chu an lo hnai tuau tuau a. U Mapuia'n a video dawn a play tâkah chuan an ngawi țhap a.

A lo sawi ang tak takin Upa Liansanga te kawt thlen hmâ deuhin min lo ûm pha a, ka kal lai reng kha min lo kuah thuak thuak a, ding meuha ka nam thlu tawp lai chu a lang chiang khawp mai. Ka àn khumna erawh Cctv a nih avàngin a rî a tel lo a. Ka kalsan leh chiah chu an fapa pawh a ding leh nghâl a; mahse, curret kha a lo thim zui ta bawk nên kan lang thei tawh lo a.

"Khata lang chin ngawtah pawh khân in fapa chêt dàn kha a dik lo tih chu in hmuh ve tho ka ring, Current thim kha remchângah lain a ûm zui leh a. Mahni invên nân bawk ani hian a lo nam leh a, tikhân tum lâwk vàng ni lovin lungah a insawh palh ta a nih kha. Case in la file duh țalh a nih pawhin in thu thu a ni tawh. Keini lam pawhin fapa chêt dànah khân kan lungawi bîk lo tih min hriat sak ula, pawngsual tum case te pawh kan file ve hial mai thei.." an mitmei vêng lo zetin u Mapuia chuan a ti zui duah a.

A tira pâwr ber Richard-a nu chu a ngawi ta dâk a, Richard-a pa zâwk chuan, "A zahthlâk ngawt mai.. eng case mah kan file dâwn lo tih min hriat sak ula, kan fapa chêt dàn avàng khân min ngaidam hrâm zâwk rawh u," a ti mawlh mawlh a.

U Mapuia chuan a chhâng lêt ang a kan kal tawh mai ang chu tih laiin, a bula ka ding chu uluk deuhin min lo en a, "Naute, i rilru a dam em?" a lo ti a. Chu zawhna chu mi dang tân chuan a ho ngawt ang, ka tân erawh hun rei tak chhûng ka chhûngrila 'Inner child' kimki a țhu tawm chaih reng țhìn kai harh a, a kut lo phar chhuahtîr thei khawp in awmze thûk tak a nei thung.

"I rilru a dam ngang lo a, i ngaidam thei lo a nih chuan sawi hreh lo la, a tuartu i ni a, i thu tlûkna kha a pawimawh ber," a lo ti leh zêl a. U Mapuia hmèlah chuan, 'ka rilru dik tak chiah ka sawi chhuak a nih pawha min dem miah lo tu tùr hmêl,' ka hmu!

Ka awm dàn chu maw, pindan thim ruih chhûnga hmeichhe naupang lungngai taka țhu tawm chaih lai chu, 'i rilru a dam em?' tih rî a hriat rual chiah khân a hawi chhuak a, a hawina lam apiang chu a êng zui pap pap a, kum rei tak chhûnga a hriat châk leh chhàn lêtna a pek châk ber zawhna zâwttu lamah chuan kut a phar chhuak nghâl,' ang mai hi a ni.

"Ih, eng lo," ka ti bah niai a, "ka rilru a dam em maw?" ka ti leh ringawt a. A tute mah chu ka bia pawh a ni lo, 'Hmangaihna' ai pawha 'rilru damna' thlahlel ngawih ngawihtu tân chuan chu thumal tlêm tê ngawt pawh chu a mi den dàn a thûk bîk em a ni.

"Keimah mai ni lovin hmeichhe dang tute pawh an duh lo chung chu kuah lui a, pawt lui tawh ngai lo tùrin min lo hrilh sak dâwn a nia. Ka ngaidam ang; mahse, ani paw'n chîng nawn leh tawh lo se," ka ti ta mial mial a.

Kha zàn ralmuan loh thlâk zet ațang khân kâr khat dâwna liam tawh a, Richard-a pa kha a lo â lo a. Damdawi in ațang Richard-a chhuah hnuah palai tîrin ngaihdam min lo dîl leh thlap bawk, u Mapuia te paw'n palai an lo kaltîr tawh a. An lo kal nawn lehna kan nghâk mêk a, ani pawh Khawbung lamah a chho ta rih a. Zân lamah min lo call fo a, 'min ngaih thu' a lo sawi chânga piangin ngeiàwm deuhin ka chhâng lêt țhìn tak nâin police station a kan kal zàna a chêt dàn erawh ka ngaihtuah lêt ve rauh rauh țhìn.

Hospital parking-ah khân tlàn chhuak mai lovin min țhut pui reng a, ka biang a dawm a. Thinur zet a ka vîn hlak hlak reng laiin ka pa min benna lai kha a lo fawp kual dun dun a, 'ka bulah chuan i him ang' tih zawng a sawi bawk a nih kha..

Pa Hrilate nupa zârah ka pa pawha hma ang leh lutuk khian a tal ho lo ta deuh a, zu chu kan la zuarin amah paw'n a la in reng tho; mahse, card dêngin mi a kawi khâwm dur dur ta lo deuh a. A tir lamah chuan, 'pasal i neih fel hma chu kan inah card kan dêng tawh lo ang,' a ti vei thluam a.

Mahse, ni hnih thum a vei leh meuh chuan a ruih sual apiangin, 'mahni pate țhian kawm thiam ve dàn pawh zahpui zêl mai. Eng angah nge maw i inngaih reuh ni, i pasal tùrte hi an hausak avàng maiin mi i hmusit nghâl vei a ni maw,' tih zâwngin an hla a chham ta țhìn a. Card den nân kan in chu hmang zui tawh miah lo mah se a an hla chu ngaihthlâk a hrehawm tak zet tho. A ni tèlin kan in chhuahsan hlan chu ka nghâkhlel a ni ber mai.

*A'u Ahriat, vawiin tlai chu lo lêng lawk la, i hman em?* Meme-i message chu ner nakin ka chhiar a, a û hnênah ka number a lo dîl a, kan inbe ve ta zeuh zeuh a. Ka u nupui tur i ni bawk a, kei aiin nau zâwk mah la ka û tho dâwn che a ti tlat a. Ka duh lo viau nâin a uang ve reuh hian 'A'u Ahriat' min ti ta ziah ringawt.

*Min û ziah suh ka tih kha, ka vaw mai ang che,* ka ti a. *eng nge ni a, pawimawh a awm em ni?* ka ti leh nghâl a.

*A'u Chawitei'n kan pahnih thil tùr min leisak a, chu chu lo lam rawh. Ka nu leh pate paw'n an ngai tawh che* a lo ti vei duah a. Ka nui pàt pàt mai.

*Lucy ka lo hruai tel ang aw* ka ti lêt a. *Awi, min zâwt kher lovin i duh duh lo hruai rawh* a lo ti leh ngei a.

Nilai zànah palai kan hmu a, a tûk nilai thawhțan tlai leh zirtawp tlai lam chu u Mapuia Khawbung chho tur denchhen deuhin an in lama chaw ei tùrin min phut tlat a. Lucy nên kan han tel ve țhìn a, u Mapuia chhûngte nên pawh kan inkâra țhat zual phah viau mai.

Tlai lam eirawng bàwl hmâ deuhin u Mapuiate ina kal tùrin kan țhian dun chu kan inzui chhuak ta a. Kan han thleng chho chu Meme-i chuan tual zawlah a uite a lo infiampui mêk a, Lucy lah ui ngaina chi a lo ni ve bawk nên a ri zui chùl a.

Kei erawhin Chinghnia ang maia an len êm avàngin ka la nèl ve tak tak thei lo, u Mapuia nu nên titi pahin veranda-ah kan țhu dun a. Anni pawh hian kan chhûngkaw dinhmun dik tak an lo hre vek tawh zâwk a, min hmuhsit phah chu sawi loh ka pa leh u Malianite tân pawh an lo țawngțai țhìn reng a. Ka hriat tirh chuan ka zak ru hlè a, chutih rualin an chhûngkua chu an zahawm ka ti thar sauh bawk.

A châng erawh chuan anni nêna inngainat lutuk loh chu a țha zâwka hriat châng ka nei țhìn. Kan lo inngainat lutuk chuan u Mapuia ka kalsan dâwn hunah an hrehawm phah dâwna tiin rilru a insual fo mai.

Dârkâr chanve dâwn Ui an infiam pui hnu chuan inchhûng lamah kan inzui lût ta a. Meme-i chu a pindan lamah phûr zetin a tlãn lût a. A lo chhuak leh chuan iphone box pahnih hi a lo keng chhuak ta mai a.

"Purple nge starlight color hi i duh zâwk?" tih pahin ka hmâah box pahnih chu a lo lek va va mai a.

"Ka ta tùr maw?" ringhlel ru zeta ka ti hap chu, "Umm, A'u Chawitei min leisak a nih hi, i duh zâwk thlang rawh," a ti leh ta a. Ka mak ti leh hamhaih âng phiau chu a nu leh Lucy te chuan min lo nuih var var a.

"A to awm sia, hetiang hi ka neih phâk ka ring ngai lo asin," ka ti leh halh a. Lucy ka va en leh chuan a mittui a lo tling pam mai. Ani hi chuan to deuh mah se iphone a hman na a rei tawh a, ka awh ve țhìn zia kha a hre chiang hlè tlat a ni.

"Khawi, i phal zâwk kha min pe rawh," ka tih chuan nui vak chungin purple zâwk chu min pe ta a, "In u Chawitei hian a duat sual ang che u tih ka hlau ngawt mai," a nu in nui kar kar chungin a lo ti ve bawk a.

Phone ka dâwn rual chuan message in u Chawitei chu lawmthu ka hrilh nghâl a. US lam daihah an awm avàngin kan time zone a inang lo êm êm a, ka message chu a hmu lawk pawhin ka ring lo. Dinning table chu kîl țhap in phone thar chu kan khawih kual a, kei phei chu hrilh chawp zêl te ka la ngai zui bawk nên kan nui leh chiam zêl. Chutia kan lo rîk dar dar lai chuan, "Nu Thante," ti lar lar chungin Cecilia-i a lo lût hlawl a.

Ka insanmar țeuh laiin nu Thantei chuan, "Tehhlawl che chuan min va lo tlawh khat êm êm ve," a ti chùl a. Cecilia-i nen an inhmu chu a phûr hmel êm êm a, chu chuan thil tam tak min ngaihtuah zuitîr bawk.

"He lama Mapuia awm lai khân ka lo lêng ang ka ti reng țhìn a; mahse, ka buai ve lutuk a, ka hman ta thlawt lo a ni," Cecilia-i pawh chuan a ti ve a.

U Mapuia nu chuan, "Mapuia sawi tâkah chuan hei a nupui tùr Ahriati chu a nih hi," a ti a. Kan awmna lamah chuan an lo inzui phei a, "Kan inhmu tawh alàwm tiraw Ahriat?" Cecilia-i'n min nèl hmêl zeta a lo tih chuan tãwi têin ka nuih lêt ringawt.

"Engtik khân nge in lo inhmuh tawh a?" U Mapuia nu paw'n a ti khawmawi a, Cecilia-i lah chuan kan inhmuh țum a min thamloh zia te kha hre ve tawh lo ni àwm takin a sawi hliak hliak a, a hnu deuhah phei chuan Common room lamah an țhu dùn ta daih a.

Ka hriat tùr kherin a sawi lui ngê pawh ka hre lo, "Mapuia pawh tûnlai chu a buai hmêl thei tawp, nizànte khân khaw țhenawm ah kan kal a, kan zan hâw mêkte kha a lo tia," a ti vei hlang hlang reng a.

Kan hâw dâwn thleng paw'n Cecilia-i chu a la lêng a. Keini țhian dùn chu țha takin u Mapuia nu chuan min thlah thlap tho.

"Nichin a mî kha tu nge a?" hâw kawngah Lucy chuan a ti ta rêng a, "U Mapuia țhiannu a nih kha,"

"Umm, mahse, an ina i hmu thut kha mak i tih hmêl tawp," a ti leh zêl a. "Awi, a âwihawm loh e, pastor nupui a nih kha, a chhe lo i ti em?" tiin thil dang ka zâwt kai nghâl daih a.

"A țha ka tih zâwng a ni lo; mahse, țha titu chu an awm tho ang, ka duh aiin a țawng no," tiin a nui zui uarh uarh a, "Pastor nupui a ni tak tak a maw?" a lo ti leh rih a.

"Ni tak tak e, engati nge?" ka tih chuan, "Ka hre lo.. Aaa.. pastor nupui tùr chuan a inchei nasa mah mah deuhin ka hria.. ka hre lo," vei zui loh hmel deuh hian a ti hliai a.

Zànah chuan ka phone thar ațangin whatsapp te pawh ka khawih ve ta a, u Mapuia chuan status a lo nei ve ngei a.

'Ka naute te kha a ngaihawm reuh a nia' tih mai te hi, thla eng ruih thlalâkah a lo ziak tel a.

Chutia u Mapuia status ka la en lai reng chuan number save loh ațangin message ka dawng nawlh a, Notification a lo lang chu rang deuhin ka hawng nghâl a.

*Mapuia nên in inneih chhan tùr hi i hria em?* tih ngawt hi a ni a, tu dang ni lovin Cecilia a nih ka ring nghet nghâl hmak. A Dp ka hmuh theih loh avàngin Cecilia tiin ka save chhin phawt a, a dp a lo lan tâkah chuan Cecelia-i a lo ni tak tak!

*A innei tùrte hnênah kan inneih chhan min lo zâwt ngawt hi ka va'n hre thiam lo* ka ti lêt a. Engtin nge min chhàn lêt zêl dâwn tih chu ka hre châk tet tet bawk.

*hre thiam lo der suh, keimah vàngin a nei dâwn che* a lo ti lêt ve leh salh a. Inthup buai pawh a tum miah lo chu a mak ka lo ti viau thung.

*aw.. a va pawi ve, țap tùrin min beisei deuh em ni?* tih chu ka thawn a. Ka thawn fel hnuah erawh țûl lo ka ti leh hnuhnawh viau a, Message delete leh lah ka thil huat zâwng taka ni bawk nên, min lo chhàn lêt hun chu ka nghâk ta tawp a.

*hei hi i hmuh chuan i țap mai thei asin naupang khawngaihthlâkte* a lo ti a. U Mapuia nên an inbiakna screen shot a rawn thawn tel bawk.

Screen shot meuh a lo tel tâkah chuan ka thinphu a lo rang ve dawt dawt mai!

🖋 Next chapter ațang chuan a kal chak deuh tawh mai thei a.

Min hriat lawk sak tùra ka duh chu, in lo chhiar tawh țhìn arranged marriage emaw forced marriage ang kha ka ziak dâwn lo.

He thawnthu hi awareness leh survey neih nân ka hmang dâwn a. Awareness chu sawi ngai lovin a story kal phungah hian ka ziak tam tâwk tawh a, min hriatfiah sak ka ring.

Survey erawh he chapter dawt lama, a kal zel dàn tur hi a ni dâwn a, lo sawi lawk kha a chi si loh nên 🤣 Ka sawi tawh ang khân hei chu Abbra forced marriage kal phung bîk a ni dâwn a. Hei hi ka sawi chhan chu țhenkhat hian arranged marriage thawnthu dang ang tùrah ngaiin mi dangte ziak ang tho a thil thlentîr tùrah min beisei tlat a. Khatiang kha a ni lo chho tulh tulh hmêl si a, Spoil êm êm lovin ka lo thâwt lâwk tawp che u.

Survey plot a luh a, in rilru suk thlêk dik tak hriat ka châk tawh hlè a ni💓