THINLUNG KHAWNGAIHTHLAK- 3

THINLUNG KHAWNGAIHTHLÂK 

CHAPTER 3

Ririni Khiangte Abbra Pitartei

U Mapuia thil sawi avàng chuan ka bianga lo sa hat hat thei ; mahse, ka chhànna duh ka la hmu tlat lo, "Aih, tu nge i nih ka tia làwm?" rilru buai deuh hian ka ti leh hliai a. Hmàn zàn kha ka vawi khat hmuhna a ni si a, a mi khawihna erawh ka hriat hnua ang êm êm lawi si. 

Rilru buai ru deuha ka en lai chuan ka inrin hman hmàin min pawm kâng nawlh a, a mal chunga min nghah pahin a âwmah bawk min kuah bet lehnghâl a. Ka darah khabe lo nghah pahin ka hnunga lo chùl leh hauh hauh a, min khawihna mawlh chuan ka ngaihtuahna a tibuai țan buai nachâng pawh ka hre tawh lo. 

"A va mak e aw, i pasal tùr ka tih tawh kha," a ti hluk a. Thinrima sawi a ni lo tih chu a nuih chêt dawt avàngin ka hre thiam ve tho. 

"Tûnkârah hian Palai an lo kal anga min lo hnar hauh suh ang che, kâr tharah an lo kal nawn leh anga, kei erawh chutih lai chuan ka thawhna lamah ka lêt rih a țûl dâwn a, Kârtharah inneih nî tùr nangni lamin in lo tihchian vek hunah ka lo lêt leh ang," a ti a. Ka dara khabe nghata ni bawk nên, a țawng lai chuan ka beng hnuai a za mem mem mai.

"Hna chu khawi khuaah nge i thawh a?" ka ti țha ve mai a. A kut tawhna dam dap mawlh mai chuan rilru a la la pêng fan tho. 

"Khawbungah, Aizâwl ațang chuan a hla ang reng," a lo ti ve thuai a.

"Khawbungah kan awm dâwn tihna maw?" ti hè háw paha ka che chu min lo kuah bet țung bîk lo. A hmai bul chet ațang ka en lai chuan ani chu a lo nui suk a. A nuih chhan ka hre bawk silo nên, "sawi chiang teh, Khawbungah chuan kan awm dâwn i tihna em ni?" ka ti leh mawlh mawlh a. Chutia ka sawi laite hlei hlei chuan, a lungawi zual emaw tih theih tùr hian a mit meng chu a danglam vek a. Ka khabe a lo dawm a, ka beisei loh lam daih hian, "min neih chu i hreh bîk lo tih i inhria em?" a lo ti hniam ruih.

A thil sawi awmzia chu ka hre thiam lawk lo nâin, ka chhûngril erawh a lum deuh pup hian ka hria! Amah vêk chuan nghet cherh chawrh tak mai hian, "Kan innei anga, kan Pahnih in Khawbungah chuan kan chho dâwn alàwm," a ti leh a. Chutia a sawi tâkah chuan ka zawhna zawh leh a thil sawi zawh tak chiah te chu ka ngaihtuah a, ka ner ta sak mai. Kei a kher kher pawh chu engati nge kha zawhna kha ka lo zawh thawt thawt le. 

"Khawi teh, i ninawm," tih leh ka khabe a dawmna kut chu nam ka rual a, nuih huk paha a lo dawm lehnghâl chuan ka tih ngaihna hre tawh bawk silo chuan, "I zakthei lo lutuk," ka tih khum leh nghek ringawt.

U Mapuia chu a lo nui chur chur a, a mal chung ațang chhuk tum a ka che zui phat chu ka kâwngah min lo man betin ka khabe-ah a dawm tel tlat bawk. A kut chu nam sawn sak tum viau mah ila thâ kan in-ngah hleih ropui si. Lungawi hmèl deuh pu chung reng hian a mita en thei tùrin min kuai dak salh a, "I zakthei lo lutuk tih kha han sawi nawn leh teh," a ti hluk bawk. 

"I ninawm, I zakthei lo ve chiang êm alàwm," duhthaw fahrana ka tih lai chuan a hmui hnuai lam a lo liak huh zauh a. Mit tizîm sauh paha nuihza insûm hmèl tak hian, "I zakthei lo min tih chânga i hmêl lan dàn hi alàwm ka hmuh châk," a lo ti dût pek a. Min chhaih laih a tum ni ber tawhin ka hria. 

"I ninawm a nih chu," ka ti lêt vak chu min nuih hawk hawk chungin ka malpui-ah a lo bêng thlawp a nih chu!

"Khati khân min ti rêng rêng suh Zaktheilo-pa," țeu hlar hian ka ti rum al a, ka mal khuh țha tùra kawrfual ka pawh țang țang lai chuan lungawi hmêl deuh hian min nuih ruh ruh reng a.

"I zakthei lo ve ngawt mai," uar zetin ka tih khum leh hrâm bawk.

"Zaktheilo-pa nupui tùr thinchhe hlik hlek-i hi a," tih hluk pahin ka kâwnga kuahna chu a thlah ta a. Chhuata ka din rualin ka kawrfual leh Cardigan chu ka siam țha sawk sawk a. 

Ani erawh Khumah chuan a kut pahniha in nam khalha țhu âwn duai chungin, ka insiam țha lai chu hmuhnawm tih hmêl deuh hian min lo thlîr a. A mi en dàn avàng chuan ka naupangchhia thar thut ni mai hian ka hria. 

"Eng nge i en reng a?" melh deuh kha kha paha ka tih chuan, "Ka nupui tùr," hmui phun hian a lo ti a. Va kêk leh thut lo tùr chuan ka insûm țang țang, chutia ka inthunun hrâm hrâm na te chu a lo hre thei ni hmiang, "min kêk leh a nih chuan Ka nu ka hrilh tawh ang," a lo ti dût a, thu tak hmêl deuh hian min en rùn mah se a mit menga nuihzatna châm bâng erawh ka hmuh sak thiam.

Ani hi chu a lan dàn ațang mai pawha kum a tlêm chhe tawh lo tiha hriat a. Kei lah ka chet duh dàn a naupangchhia thei bawk si, a bîk tâkin ka thinrim châng hian khua ka hmu ngai lo. A lakah hi chuan ka hmeichhe naupang țha leh a ni ringawt. 

"Khatia i en reng pawh kha ka ngai lo," ti a ka hauh lêt leh hram laiin, a pindan kawngka bawk chu a lo ri leh hruih a. Phâwk deuh taka Kawngka lam ka va hawi lai chuan u Mapuia pawh chu a lo tho hluai a. 

"Xenver-a te an nih dâwn chu," tih sup pahin min lo kal pêl thuak bawk, "Meme-i chiah a ni tawh sia a lungleng hian Ui a vulh phah ringawt a, an lian dûn thuang thuang bawk nên Ui hlau mi tân chuan an hlauhawm tham ve a nia," tih bul bul pahin Kawngka chu a hawng a. TV- a kan lo hmuh țhin Chinghne tiat zet tùr Ui pahnihte chuan an pu chu an lo zuan nghâl thurh a,an bawh zui uan uan bawk. 

A tê deuh zâwkin pindan chhûnga ka lo awm ve reng min lo hmuh rual chuan, 'nang kha tu nge i nih?' ti ang hrimin min bauh ta khur khur a, u Mapuia chuan, "Het! Flash" a ti khawng țhak a, kûn hniama min bauh tu lu a chùlsak thuak pah chuan, "I pi a nih saw, bauh tawh miah suh," a ti leh a. A aw rî chu a khawng țha khawp mai, a Ui Flash a tih pawh chuan a pu thu sawi chu hre thiam ve ni àwm takin a chîk ta nghur nghur a. 

"A lian zâwk hi Xenver a nih hi, ani hi a lâk hmasak zâwk a ni a, Flash hi a nau deuh zâwk, mî bauh mai pawh a la chîng," a ti leh duah a, Ui-te chu an lu-ah leh a âwm zawn angah khân a chùl pah thuak thuak a. Din mar leh pahin min lo en a, "Zuk chhuk ve tawh ila," a ti dam thlup bawk. 

A mut pindan ațanga kan chhuak chu Ui pahnihte paw'n min zui ve zêl a. Ui tê chi ni se chuan ka infiampui nasa ngawt ang; mahse, a sawi ang tak takin an lian dûn si a, Chinghnia an ang dûn kher bawk nên ka nèl loh zâwng tak an ni. 

Inhnuai kan zuk thleng thla chu u Allan-a kha ka zuk hmu nghâl a. Ka hmêlhriat ve ber a nih avàngin ka nuih ringawt a, amah pawh chuan nèlawm deuha min lo nuih lêtin ka chhûngte chanchin min lo zâwt ve luam bawk. U Allan-a chuan nupui a lo nei tawha, fapa kum li kum nga rual tùr an nei bawk. A nupui pawh chu a sâng țhain a inkhaithli zaih a, kei chuan a cher mah mah deuh em âw ka tih tur ang chi hi a ni a; mahse, a felin min lo be ve nghâl bawrh bawrh a. 

An fapa pawh chuan Meme-i ui te chu nêl tawh tih hriat takin a lo bawh nghâl chûk chûk a, ui-te pawh chuan tihnat an tum bîk lo. 

Tlai lam boruak chu a nuam khawp mai. U Mapuia te unau leh u Allan-a te nên eirawng kan bàwl a, u Allan-a nupui erawh an fapa Op-a chu ninhlei rual a nih avàngin vên deuh a ngai a, țhutkhâwmna lamah Op-a chu a awmpui thung. 

Eirawng kan bàwl lai chuan Meme-i chu an chhaih fiam zauh zauh reng a, ani lah a laiin a tih ngaihna hre lo chuan a û te țhian dun chu a chùm leh awk zêl mai a. A châng phei chuan, "Nû, u Mapuia te țhian dun hi an sual lutuk, lo hau teh," tiin țhutkhâwmna lama a nu chu a va au țhìn a. Pa ber pawh an unau inchhaih fiam dàn vêl avàng chuan a lo nui ve kur kur reng bawk.

An chhûngkuaah chuan ka tem chhin ngai loh chhûngkaw hlimna zawng zawng chu a awm a. An zînga tel tùra sawm ve pawh ka ni, chu sâwmna chu pawmin ka têt tê ațanga ka lo awh êm êm țhìn, hlimna a khat chhûngkuaah hian ka tel ve dâwn em? Hlimna kâra awm ka thiam ve chiah ang maw? 

Ka hmuh phaka HLIMNA a lo inlâr rual a, ka rilru rawn luhchilh ve zui zat țhìn ngaihtuahna dangte hian; naupang enkawl dàn dik lova enkawl pawi thui theih dàn chu a tifiah ber awm e. Mihring siam țhatna hun duhawm ber chu naupanlai hi a ni a; mahse, ka nu leh pate khân a hlut zia an hre lo ngê, hre reng chungin an ngaihthah zâwk! Țhanglian zêl tùr ka ni tih kha an hlamchhiah tlat a, nu leh pate leh fate inkâra hlimna awm țhìn angte chhawp chhuahsak ka ni ngai lo. Chu chuan nasa takin ka rilru a thunun tawh a, hlimnate hi thlahlela mamawh êm êm chung siin Hlimna kâra rei tak awm thei tùra inrin tâwkna ka nei hauh si lo. 

Zir mi mithiamte'n chhûngkaw maktaduai têl teh meuh te, chhûngkaw inenkawl dàn an zir chian hnua an khài khâwmna ah chuan, 'Chhûngkaw inenkawl chhohna hrisêl lo lutuk (toxic family) ațanga lo seilian naupangte hian chhûngkaw hlim takte chu awt țhìn viau mah se, an saltanna aţanga chhanchhuah an nih hnû, hmun ralmuang taka an awm tawh hnuah pawh an seilenna chhûngkaw boruak hrisêl lo tak kha, drugs ang maiin an thisen zung zâmah a bet tel miau tawh a. Hlimnate thlamuannate thlahlel êm êm chung siin, chhûngkaw inrelbàwlna hrisêl lo tak kha an ngai ru veng veng a. An thisenin a țhan hnan miau tawh avàngin, a tâwpah chuan chu lam kawng bawk chu an zawh leh nge nge țhìn, an ti a. Chhûngkaw enkawl tu nu leh pate mawhphurhna sàn zia chu a chiang viauin ka hria. 

Mahni mawhphurhna hlen chhuak thei erawh, nu leh pa hetizat zîngah hian an vâng pharh lawi si. Ka nu leh pate mai bâkah nu leh pa tam takte zawhna ka zawh châk êm êm țhìn chu, 'Engati nge chhûngkaw inenkawl dàn leh naupangte enkawl dànah inzirna nei hmasa hauh lova fa in neih ngawt țhìn le?' tih hi a ni. 

Tam tak chuan, 'Nupa inkârah chuan fa an piang tur alàwm, chu bâkah kan upat huna min châwmtu tùr atân fate hi nei kan ni' tiin min chhâng ngei ngei bawkin ka ring; mahse, chu chu khawvêla mi nung dang pian chhuahtîr na tùr khawpa chhan țha a tling em? 

Zànriah ei hun hma deuh chuan mahni buai buaiin kan buai hlawm a. U Mapuia pawh intleuh thuak tùrin a pindan lamah a chho a, Meme-i chuan an Inchhûng chu min fan kualpui a. Ka lo rin lâwk ang chiah khân inhnuai lamah chuan mut pindan a lo awm nual a, Choka lamah pawh an nula mutna țhin leh mikhual pindan a awm a. 

An mut pindan lam ni a ka rin lâwkah pawh an nu leh pate mut pindan bâkah, pa berin sermon a ziahna pindan bîk a lo awm a. A chhûngah chuan lehkhabu chhah tak taka inrem tiang urh bawk, an nu leh pate mutna ep chiah chu Meme-i mut Pindan a lo ni a. Kan han lût chu u Mapuia mut pindan ai daih pawh khan a lo zau zâwk. 

"A hma chuan hetah hian a'u Chawitei pindan a awm țhìn a. Pasal a nei ta daih sia, tihian bang vaw țhiatin ka chang ta vek a nih hi," tiin a nui kar kar a. 

"Inchung lamah khân pindan pathum a awm tho a. U Zomuana-te leh a'u Chawitei-te pawh an lo haw châng chuan inchung lam pindan khi an hmang vek zêl," a ti siam siam a. Awmpuitu nula an nei a, an khuaah a pu Lungphunna hmang tùra a hâw lai tak a nih thute chu min hrilh a. 

A pindan ațang kan inzui chhuah leh chuan Op-a tê reuh khân, "Flash-a te nên infiam ang u," tiin ka bânah min lo chelh mauh mai a. 

U Allan-a chuan, "i nu Ahriati kha chu lo châwl hahdam se keiman ka lo infiampui ang che," a lo ti ve a. Naupangin ' a'u Ahriat' tih hlîra min ko țhin chutia 'nu Ahriat' min han ti chu a dik lo hú in ka hre bawk. 

"Aih, nangmah chu ka duh lo," Op-a chuan a ti ve țung roh sia. Tual záwlah chuan kan inzui chhuak a, u Allan-a pawh a lo chhuak tel ve tho. 

"Nakin lawkah chuan pi tih hlîrin asin an koh tawh dâwn che," ti tein min fiam zuk zuk reng a. U Mapuia ka vin ang bawih bawihin ka vîn ve ngam hauh bawk si lo nên, ka nui tãwi tak tak thei viau mai. 

Zànriah kil hmain pa ber chuan Bible chhiarin țawngțaina hun a hmang a, chhûng inkhâwm hi kan chhûngkaw bil bîk hian țum khat mah kan la nei ve ngai lo tih pawh ka hre thar rauh rauh a. Pa ber a țawngțai zawh hnu chuan ka che chhe țêp pek a. Lal biakna an sawi zawm leh țhìn tih hre ve hek lo î, ka la țhut bîk tlat laiin an vai chuan an ding ta vek a. Rang tâwka ka ding ve thut kha Lucy awm ve se chuan, țawngțai zui ve thei lo khawpin kan nui dun char char ang maw le!

Hmeichhe pathum chuan zànriah chu kan chhawp mawlh mawlh a, ka che zei lo viau nâin che ve lo tùra min khap mai lo a, min tihtîr ve zelna chuan min ti tlângnèl zualin ka hre thung. 

Engkim kan chhawp zawh hnua kan han țhu tur chu ka tîm deuh tlat a, mipa lam leh nu ber chuan an kîl tawh sa a, u Kimi lah a pasal leh an fapa te inkârah a țhu chat a, Meme-i pawh a nu bulah a phei a. U Allan-a nên an titi tui viau emaw ka tih laiin u Mapuia chu a lo ding vut a, a bula Chair chu min pawh chhuah sak a. Tîm ru deuha ka țhu chu ka darah a lo tuai thuak a, a țhutna ngaia țhut leh pah chuan, "Ei țeuh tùr aw," min ti ngei bawk. 

Kan chaw ei boruak pawha zangkhaiin a nuam viau tho, chhûngkaw pa ber mawlh chu a ropui ka ti a ni. Kohhran upa a nih vàng maiin a inhmuam ûp ve tlat lo va, a fapa te țhian dùn chu thiam takin a titi pui thei tlat, a zahawm dàn chu a nèlawm êm êm a. A nèlawm avàng ngawt chuan a zahawmna a nêp chuang hauh bawk si lo. 

Thlêng kan seng fel zo chu tuisik in pahin, tukverh ațanga khawpui chhûng lang êng uar chu ka thlîr a. Kan chhûngkaw dinhmun avàngin rual ka pâwl tam lo va, rual pâwl tam lo ta na nâ nâ chuan țhian tia sawi tùr pawh ka vàn viau mai. Ka țhian neih chhun chu Lucy hi a ni mai a, kan chhûngkua ni lo chhûngkaw dang ka hnaih awm chhun pawh anni chhûngkua tho an ni. Chhûngkaw hrang daihte kârah ka tlingtla ve thei mai chu, keimah tak pawh ti țha ka intiru ve hlè a. Chutihrual chuan kan chhûngkaw boruak leh an chhûngkaw boruak, inthlau lutuk mawlh mai chuan ngaihtuahna a ti kal thui viau bawk. 

Țhutkhâwmna lamah ka va phei ve chuan nuam lo ka tih an lo hlau ngê ni, "Mapuia khân ui a en fel lawk a nih kha, i duh leh va kal ve rawh," nu ber chuan a lo ti var a, ui an dahna lam chu min kawhhmuh zui bawk. 

Kei paw'n u Mapuia tel lo va an zînga lo awm ve reng chu nuam ka ti dâwn lo tih inhriain ka hnial bîk lo. Veranda ațang chuan chhuk thlain Pangpâr awmna chu ka kal pêl a, Garage sîra an uite in ni àwm tak chu ka va hmu nghâl a. 

An awm na lam pana ka kal mêk laiin, "U Cecilia-i'n min lo call asin," Meme-i tih rî avàng chuan ka ding dat a. U Mapuia chu a chek hluk ringawt.

"I û khân ka call a chhâng silo a, Zàninah ka hmu duh tih min lo hrilh sak rawh, a hmun ngaiah khân a ti," a ti leh zêl a. U Mapuia chuan engtin mah a chhâng lêt lo. Cecilia chu tu nge ni ve leh ta ang? 

An lo lêt phei thâwm ka hriat tâkah chuan rang deuh takin ka tlãn lêt leh a, Veranda ațanga chhuk thla fel chiah ang tùr berin, Veranda chhukna step tâwp berah chuan ka lo ding a. An unau pawh chu an lo lang zui nghâl mai a. Meme-i zâwk chuan, "Ka û hi i lo zawng dâwn em ni?" a lo ti fiam a. Tãwi têin ka nuih ringawt. 

U Mapuia chuan chîk deuha min en chungin ka hmaah tak a rawn ding a, Meme-i vek chuan, "awm fâl rei s'u aw," lo ti leh hrâmin Inchhûnga tlàn luha rual a. 

Ngunthlûk deuha min en tu kiangah chuan, "Ka hâw duh tawh," ka ti sap a. Min en chîk zual sauh ni maiin ka hria; mahse, thil dang sawi lovin, "Umm, lût phawt ila," a lo ti dam thlup a, ka darah bawk min lo kuah leh lai te chuan, 'Cecilia chu tu nge ni ang le?' tih ngawt chu ka ngaihtuah a. A farnu paw'n an inkâr chu a hriatpui tih laha chiang a, a fala inhmuhna bîk țhin nei tùr khawpa inzawmna a neih pui nû chu, a hmelhriat satliah ngawt a nih ka ring lo bawk. 

Inchhûnga kan luh rualin a chhûngte kiangah chuan, ka hâw duh tawh thu leh min thlah tùr thu a sawi nghâl a. U Allan-a te erawh an la leng rih dâwn niin a lang. 

Motor chhûngah pawh chuan kan inbe mang lo; ti ila min biak châng paw'n a rul tâwk lek lekin ka chhâng lêta, a tâwpah phei chuan, "i nuam lo em ni?" a ti ta rêng a, motor khalh chung chuan ka pang a rawn dek a. Ka lo melh rum leh tawh khawp mai. 

A ngaihna hriat loh hmêl deuha nui deuh chung hian, "Lang thei ah chuan nâ i nei miah lo," a ti dût a, "Ka chau mai mai a nih hi," ka ti hap a, lu bu nghut nghutin eng a sawi zui tawh bîk lo.

Min neih duh chhan tùr nia ka rinhleh kha a thleng dik chho mêk dâwnin ka hria. Cecilia-i pawh tu dang ni lovin, u Mapuia bialnu ngei a nih ka ring bawk. 

Ani Officer ve meuh tân kei angte hi chu chhan țha tak tel lo chuan neih duh na chhan tùr ka awm lo. An Inchhûngkhur dinhmun ka en khân, ka nihna dik tak ka inhre chiang telh telh bawk a. Ani ang tân hi chuan a mualphona tùr hliahkhuh tu ah bâk țangkaina ka nei ve dâwn lo. Ka chûngah eng thil pawh thleng se la, chhantu leh ngaithlatu ka nei dâwn lo tih hre chiangsa a min bitum chat te pawh an ni ang. An duhthusàm ang takin ka pa lah an țawngkam țha ah a lo inâwk tâng tawh a. Kei chu an remruatna apiang tih hlawhtlinsak tu tùr ka ni tawh mai. 

Kan in kawtah Car chu a ti ding a, amah chu melh pawh melh tawh lovin ka chhuak nghâl zat a. Min en zui vung vung tih chu ka mit sîrin ka hmu thei a. Kan Inchhûng ațang phûr hmêl deuhin Lucy a lo tlàn chhuak nghâl a, "a nuam i ti em? Chawte pawh i in ei puar ve ngam maw?" a lo ti nghâl bawrh bawrh bawk. 

Ka chhàn hun pawh nghâk lovin Car ațanga u Mapuia lo chhuak ve chu a nuih leh var var a, "Tûn țum chu thingpui tal in ve tawh rawh aw," a la ti zui. U Mapuia pawh chuan, "Teh rêng e," a ti a, phûr hmèl taka car chu locked in Inchhûngah chuan a lo lût ve a. 

Zàn dang ang lo takin Inah chuan ka pa leh Maliani te chiah an lo awm a, mak ti rilru deuha ka awm laiin ka beng bulah Lucy chuan, "Chaw ei kham rualin in inah hian ka lo zuk chhuk a, i pa bulah  'zan tirah tal chuan inlêng nei rih suh u' ka lo zuk ti thlapa nih hi. U Mapuia awm laia an rîk dur dur reng kha chuan, nangmah pawh i lang zahawm lo zual vek a," a lo ti sar sar a. Ka hma hi chu a ngai ve țhìn asin aw. 

Inthlâk tùra Pindan ka pan nghâl chu min zui lût ve a, chanchin min zâwt zui char char a, phûr lo viau mah ila min ngaihtuah lutuk vànga ni tih hriain ka chhâng ve zêl a. Meme-i chu a la hmu ve miah lo chung paw'n, "a va fel hmêl tak," a ti thei nghâl a. A țha ve țhìn a nia. 

Kan va inzui chhuah leh chuan ka pa leh u Mapuia chu an lo țawng dûn mawlh mawlh a, ka pa chuan zu a in tho nâin a rui chhe lutuk bîk lo chuan ka hria. Thingpui ka chhuang a, Lucy lah chuan u Mapuia awmna lam leh ka awmna lam chu a kar tawn sek a. A khât tâwkin u Mapuia chu zawhna te a lo zâwt ve leh thul, kan Lucy-i hian nuam a ti ber a nih hi! 

Thingpui te a in zawh hnu chuan rei țhu tawh lovin u Mapuia chu a chhuak nghâl a. Cecilia hmu tùr chuan a kal dâwn a nih ka ring. 

U Mapuia chhuah hnu rei lo têah inlêng an lo lût khâwm leh țan a, Card denna tùra Dawhkàn te an zâwn sawn leh tâk lûk lûk ah chuan kan țhian dùn pawh Pindan lamah kan inzui lût ta daih a. 

Zàn lamah dâr 8:30 vêlah chuan a message ka dawng a, *In ka thleng chiah* tih tê mai hi! Ka ner sak ringawt, a hming in save dàn chu edit țhat ka tum zet nâin ka țhulh leh ta zâwk. Heti hian thil lo thleng tùr chu lo thleng mawlh mawlh se la, an rin leh beisei ang ngei chuan inneihna pawh ka ti puitling bawk ang; mahse, ka remruatna angin thil ka kalpui ve zêl tho ang. Ani hi sum siam nân chuan ka hmang ang! Ka hmang khawp ang!

Ka insil zo pindan a ka lut leh chu, "A nu leh pate paw'n duh lo ang chein an awm miah lo maw?" Lucy chuan a lo ti țha leh a.

"Umm, an zavaiin ka lakah an țha êm êm veka a ni mai," ka tih chuan, "Ka sawi rêng kha, u Mapuia mizia en hian misual tak anni dâwn lo rêng rêng; mahse, a hmain an la hmu ngai àwm si lo che a. Engtin nge an fapa nupui tùr atân an pawm nghâl thlap theih che le?!" a ti a. Chu thil chu zawhna awm reng pawh a ni. 

"Kei paw'n a mak ka ti alàwm. Ih maw, u Mapuia hian hmân ațang daih tawh ka chanchin hi an bulah a sawi țhìn aniang. Rei tak inngaizâwng reng tawh angin min lo ngai a," ka tih lai chuan mak tih hmèl deuh hian min lo en a. 

"Zirlai ka la nih avàng chauha an hnenah pawh, min hruai rih lo angin min lo sawi a niang," ka ti leh halh chu chal chuar nângin min en rân a, "Chu chu tu in nge sawi a?" a tih chuan, "A nu in maw le," tih lêt pahin Khumah ka let thla zui hnak a. 

"U Mapuia hnênah a chhûngte bula kan inkâr a sawi dàn ka zawh lahin a nui mai ringawt bawk sia. Ka ngei lutuk khân ka kêk vak a, a nau in min rawn hmu leh sia..." ka ti zet chu inrinna hman awm lêk lovin ka mawngah a rawn bêng thlawp a. 

"A chhûngte awm lai lai te'n i kêk a maw! I va han mak tak aw, i kal hma paw'n ka hrilh mawlh mawlh che kha," beidawn hmêl deuh hian a ti vang vang a, "Awi.. an awm laite êm êm chuan ka keh ngam bîk i ring a maw?" nui hak hak paha ka ti chu min rin loh hmèl khawp lehnghâl. 

"A pindan ah kan inhnial alàwm, eng mah lah chu a sawi țha duh dèr bawk silo. Hmeichhe naupang ang maiin min treat tlat a, ka ngei alàwm," âng titih a ka tih hlak hlak laiin, "in kum a inthlau deuh bawk êm a ni," a lo ti ve sap a. Ni chiah mai! U Maliani sawi dàn aţang khân u Mapuia hi kei aiin a lo berah kum 12 vêl talin a upa zâwk ang ka ring. 

" Chuan kan innei te a nih chuan Khawbungah kan awm daih dâwn," ka ti leh a. Min ui der ka beisei ve tehlul nên, "U Mapuia hna thawhna em ni? A insawn a la hun loh chuan in awm ngei chu a ngai dâwn a nih chu," a lo ti vei thèn a. 

"I mak ka ti thei e, pasal hi nei daih se min lo tiru reng tawh zâwk ni te hian ka hria," ka ti a, thinrima sawi pawh ka ni lo; Thil thleng engkim ka hrilh ve leh hian thil nih dàn tùr sa thlap a, lo ngai diam tawh ang maiin a awm thei tlat zêl. 

"Tui lai rapin ka awm mêk ka tih tawh kha," a lo ti a. A nui zui țhá bawk. Melh ralh pahin ka mu saisîr țha sauh sauh a, "In inneih chuan BDO nupui kha i ni tawh mai dâwn sia. Awi, Puan neih hnem i ngai dâwn e," a ti teh daih a. A sawi awmzia hre thiam lo deuha ka en lai chuan, "BDO te chu an zin kual nasa alàwm, bial chhûng tlawha zin kual bâkah khawchhûnga thil tih pui nikhua a awmin Khuallianah an sâwm țhìn a. I telpui ve zêl a ngai tawh dâwn sia, Puan i bih thlap thlap zêl loh te'n i lang zahawm thei nâng.." a ti vei duah a. Thâwk ka lo la hap ringawt.

Lucy-i'n min hâw san hnuah pawh ka muhìl thei lawk lo a. Zànlai pelh tawhah pawh ka la in let tawn sek a, ka thiani sawi ang deuh khân u Mapuia nên kan innei a nih chuan, BDO nupui niin amah thlâwp tak zêla ka awma țul tawh dâwn a. A hnathawhna khua lah khaw lian taka la ni bîk si lo nên, a mi chênga te paw'n mi an lo ngaihlu der ve ngei ngei dâwn a. U Mapuia nên lah inhriat chianna mumal nei miah lova innei tùr kan ni leh zel bawk si. A hnathawhna Khuaa mi te chuan kan pahnih inkâr chu hre thiam a, mak tia an sawi mualpho maite chu a hlau miah lo emaw ni le! 

Ka ngaihtuahna te avàng chuan țul loah ka rilrua ipik leh vek tawh! Lukham bula ka phone dah chu la kãngin Whatsapp-ah ka lût a. Kan department group chats te chu ka chhiar thuak thuak hnuah ka clear nghâl vek a. Kan veng KŢP group chats pawh chhiar lem lovin ka clear nghâl vek bawk. Chutia Chats ka thenfai mawlh mawlh lai chuan, u Mapuia message a lo thleng nawlh a. 

Phone screen chung sîr chu ka en nghal thuai a. Zîng dâr 2 a lo pêl daih tawh a, tûn ang hunah te min lo text a nih chuan Cecilia-i nên an inhmu kha, a hâw ve chiaha nih te ka ring. 

*I va mengrei êm êm ve* tih tê mai hi a lo nia. Reply ngaihna vak ka hriat loh avàngin ka out san daih a; mahse, a message vêk chu a lo thleng lehnghâl a.

* Zîng lam dâr 2 a rîk tawh chuan mut phawt tùr, zîng dâr 2 hnu lama kan thu tlûkna siam chu a diklo tlângpui tawh* a lo tia nih chu. 

'I zakthei lo chiang e' han tih lehnghâl mai chu ka tum hman tawh; mahse, vawiin lama min tih dàn kha hre chhuak lehin, * I thu lo chiang êm mai*  ka ti lêt ta zâwk a. Ka duh loh dàn berin mitthla ah a nui ruh ruh lai kha a lo lang zui zat lehnghâl. 

*I la mu duh lo ta rau rau ka lo call dâwna nia* a lo tih chuan a lo call duh tak tak dâwnin ka hre tlat a, rang zetin, *A țûl bawk lo, ka mu tawh dâwn* ka ti lêt nghâl a; mahse, ka mut duh nân chutia min rawn fiam kual chu a nih ka ring leh hnuhnawh. A chhaihkual tâwk lek ka la ni chu ka duh lo tak zet bawk, a mindgame hi ka um phâk ve vat chu a ngai dâwn a ni. 

*Fel reuh lutuk, tui deuhin i muhil dâwn nia* a lo ti lêt chiah rêng a. Mak deuh maiin a message ka chhiar lai chuan a aw dam thlup rî kha ka hre tel a. Ka ngai chu ka ti lo ang, a aw rî erawh ka hre hrang tawh chiang a ni. 

Tûkin chu u Maliani'n min thawh khalh ve thung a, inphih fai zo in a eirawng bàwl chu ka pui ve zung zung a. Nimin tlaia u Mapuia te ina ka chaw ei chungchâng pawh min zawt ve nâin, lo inrawlh ve chiam țûl lo a ti deuh nge ni kan sawi zui rei lo. 

Chawi ei khamah chuan insûk ngai ang angte chu ka sù a. Class kalin a chhuah daih theih tawh si loh nên, ina awm chu ka huphurh ru viau mai. Ka insûk zawh hunah Lucy te inah ka chho daih ang ka tih rilrûk lai takin Lucy chuan min lo call a. 

'Lo chho daih la,' a lo ti dâwn emaw tih nâklaiin, "Ka lêng dâwn asin, i lo kal ve duh em?" a lo ti daih a. Ka hnual nghâl vek. 

"Tu te nên nge?" 

"Ruati te ho nên khân kan ni dâwn a, insiam la lo chho rawh," a lo ti leh làng láng a. Ani hi chuan țhian a ngah ka tih tawh kha, kei chuan amah chiah țhian ka nei thung a. A țhian dangte nên ruahmanna an lo neih chângte a awm lo thei țhìn silo a, "Aaa.. kan inhre țha ve bawk silo a ka lo kal ve lo mai ang," ka ti a. Keimah vàngin a kal lo ve leh tawp ang tih erawh ka hlau viau tho. 

A lo chek tlak tlak lai chuan, "Insûk tùra tam lutuk ka chhuak hman lo tak tak," ka ti leh thuai a, tih tùr ka ngah êm avànga chhuak thei loah min ngai se, a ngaih te pawha țha zâwk ang. 

"Hetah lo keng chho la ka suk pui zung zung dâwn che alàwm," a ti nang nang a; mahse, nui hak hak chungin ka hnial lêt ve zêl a. A tâwpah chuan Inchhûngah chêtna tùr ka ngah lutuk tih chu a ring ngam ve ta a niang, kan inbiakna chu kan ti tâwp thei ta a. 

Kei chu a sawi ang tak tak khân kan zu zawrh hi a hre lo tùra kan rin te paw'n an lo hre vek zêl a. Sawi chhuak ngai miah lo mah se teh ka ni fô țhìn, tehna kâra awm reng lah ka tâna nuam bîk silo a, zirna vànga nih loh chuan mi dang kâra awm ve loh tawp ka duh mai zêl. 

Chhûn dâr 11 chho a lo nih chuan kan inah pawh Card dêng tùr bial khat daih chu an lo lût khâwm leh reng tawh. Dân ngaite in Pindan lamah bawk ka tawm leh chawrh chawrh a. 

Lucy tê reuh chu ka ngai hlè bawk, a awm loh chuan kei chuan țhian ka nei lo a ni nghâl zel a. Ani erawh chuan kawm sen loh țhian a nei a, țhian neih ngah loh hrehawmna pawh a hre thiam pha ve kher lo ang. A hriat thiam ve kher pawh ka phal lo; mahse, a châng chuan kei aia kawm ngeih zâwka nei ang a, min thlauh thlâk daih mai ka hlau țhìn. 

U Maliani'n "Ahriat" a lo tih rî-ah chuan ka meng chhuak thuai a. Pindan ah a lo luh ve lai ka lo hre miah lo.

"Mapuia a lo lêng a?" zàwi tê bawka a lo ti leh chiah chu ka țhu chhuak at ni berin ka hria, "Eng nge a lo tih leh ringawt dâwn a?" zawi vîn zeta ka zawh lêt lai chuan a lo nui țhà a, "Ka hre bîk lo, lo chhuak ve phawt rawh," a ti a. Hamhaih leh tih hmasak ber tùr hre lova ka hawi lawl lawl lai chu min chhuahsan leh nghâl a. 

Rang deuhin ka phone connect lai chu ka pawt phawi a, ka han en kual nâk chuan u Mapuia message leh missed call a lo awm nual a. 

*Good moring* tih message zîng dâr 6:30 a mi te pawh a lo awm. 

*vawiin chu eng nge kan han tih ang aw?* tih te pawh, ka chhâng lo a nih te chuan inbiak zui chiam ka duh lovah ngai se lo kal kher loh tùr hi a nia. 

Whatsapp ațang ka chhuah hma chuan Status lamah ka lût leh hrâm a, ka beisei rûk ang chiahin Lucy paw'n status a lo nei a. Ruati te ho nên Car chhûnga an chuang lai thlalâk hi a ni a, khawpui dai lamah an kal chhuak dâwnte pawha ni mahna. Ka neih chhun tak meuha nih avang hian kei lo kawm ngeih thar deuha nei anga ka chân mai ang tih hlauhna ka nei fo a; mahse, ka tâna hlut êm avàng ngawt chuan țhian danga kâwm duhna lo dãltu nih lah ka duh bîk dèr silo. 

Ka phone hûm chunga ka va chhuah ve chuan thâwk ka la halh ringawt, ka pate chuan tui êm êm in Card an lo dêng a. U Mapuia thung chu stool lo inlâk chawpin, Kawngkapui bulah amah chiahin a lo țhu a, pawn lama lo thlîr vung vung bawk. Ka chhuak thâwma hriat rual chuan lo hawi thuaiin min nuih zui suk bawk. 

"Engati nge i lo kal?" zàwi tê hian ka ti a. Kawngka-biang nghèngin a bulah chuan ka ding a, pâwn lam chu ka melh zui vang vang bawk. Kan chhûngkaw dinhmun chu a hre chiang thawkhat tawh tih ka hria; mahse, hetianga lo hmu nawn sek tùr hian ka duh lo. 

"I rilțâm em?" a lo ti daih a, kei ang bawkin ațawng ring bîk lo. Ka tukkhuma kawngka-biang nawr si reng pahin ka zuk melh nghek a, ani erawh a dàn ngai tê in a lo nui a. A lan dàn zaidam hmèl tak pawh kha a la ngai reng. 

"Țàm lo," ka ti hmak a, min lo en chho chung rengin naupangchhia deuh hian, "Kei chu a țâm a," a lo ti dût a. Nimin paw'n 'min kêk leh a nih chuan ka nu ka hrilh tawh ang' naupangchhia deuhin a ti tawh bawk. 

"Thingpui ka lum sak ang che," ning ru deuh taka ti paha, kal sawn nghâl mai ka tum chu ka bânrêkah a lo man chawt a, ding leh data ka en lai chuan ka hriat tham tùr lek bawkin, "kal chhuak ang," a lo ti hniam ruih a. Mit ka ti che kual ralh chu ka bàn a lo pawt ve salh bawk, "Ka ril a țâm a nia," hmui phun bawk hian a ti leh a. A pa lian roh sia, a chêt phung naupangchhia tak chu a inhmeh lo lutuk a ka nuih chiam lo chauh. 

A tâwpah chuan insiam tùrin Pindan ah ka lût leh ta nge ngea, U Mapuia nên chhuak tùr kan ni tho bawka ka pa hnênah chhuah dîl pawh ni ila a vîn khur khur hauh dâwn lo. 

Kan chanchin chu message in Lucy ka hrilh leh hrâm a; mahse, țhianhoa kal chhuak anni a, a hmu lawk paw'n ka ring lo. 

Insiam peih sa diam a ka va chhuak leh chu u Maliani paw'n min lo nuih var var a, ka pa chuan Card a dêng tui bawk si nên biak leh hranpa pawh ka tum tawh lo. U Maliani bulah chuan, "Kan han chhuak lawk ang e aw, ei châk i nei em? Eng nge ka lo lei sak ang che?" ka ti ve luam a. Kan vêngah hian ei tùr tui danglam deuh lei mai tùra vâng ve a. College ka kal lai paw'n pawisa min thawna, a ei châk zawng thil țhenkhat ka lei hàw sak fo zêl. 

"Beef roll tui cial deuh ka ei châk, inhmuh fuh chuan lo lei la," a ti a. "Umm, Kimbap emaw Sushi emaw te hi i ei châk ve lo maw?" ka ti a. Chutia u Maliani nên kan inbe lai chu u Mapuia paw'n min lo thlîr reng a. Min en dàn vung vung chuan ngaiha ti țha chiah lo, nge ni a ka nuhrawn nêna kan kum inthlau lutuk si lo tùr chu, mi dangte ang bawkin a chhut ve zâwk ni. 

U Maliani chuan, "awi, kei chu tûnlai khawchhak food an tih ang ho hi tui ka ti ve lo," a ti a, beef roll leina tùr pawisa chu min pe a. Purse-ah thun mawlh mawlh pahin u Mapuia țhutna lamah chuan ka chho a. 

"Kal ang," ka tih rualin a lo ding ve hluai bawk. Stool chu a lâkna ngaiah a va dah leh thlapa. A rilțàm vàng ngawta kan ina lo pan chu, a peih ka ti mai mai khawp a.

Ka țhutna tùr min pawh hawnsak lai chuan kan pahnih chauha chhuah dun chu, nuam lo ka tih a hlau ve te pawha niang, "I țhiannu kha sâwm ve ila," a ti dût a, "A leng alàwm," zàwi tê a ti sapin ka țhu lût nghâl daih.

Kawngka a lo nam phui hma chuan uluk deuhin min thlêk vang vang a, ka rilru put hmang dik tak chu a lo hre leh vek mai dâwna ka hriat avàngin, "Eng nge i la tih reng a?" vîn deuh hian ka tih khum hlak a. Kawngka chu pawh khàr tumin kan ban zui zat bawk. Eng mah sawi belh tawh bîk lo chuan a lo nam khàr ve ta mai a.

Sawi leh sawi hnû ka rilru put hmang hrim hrim hi a hrisel tawh lo, ka țhiani hian kei ni lo a țhian dangte a lèn chhuahpui tawh chuan, hlauthâwng rêng rêngin a lo hâw hun ka lo nghâk ngawt ngawt zêl. An lenna ah chuan mi dangte'n ka chanchin an lo sawi ang a, ani chuan min lo zahpuiin, a lo lêt leh meuh chuan min kâwm țha duh tawh lo mai ang tih hlauhna lian tak ka nei țhìn a. Ka țhiannu lakah ngei ngei pawh ka inring tâwk zo lo lutuk chu, ani hian min hriat thiamsak tùrin ka duh lo. 

A lo țhut luh chuan ngawi rengin motor chu a tinung a, AC a in on tel nghâl avàngin Car chhûng boruak pawha lo dai zui riai riai a, "Lucy te chu khawiah nge an kal a?" Car khalh mawlh mawlh paha a rawn tih leh chuan, ngei tak ka ni! A mak teh țalh ngawt mai!

"Ka hre bik nâng," ka tih pawh chuan, "engati nge i kal ve loh?" a lo ti hniam leh ruih a, rum tak hian ka han melh tawh.

"I lo buai ve na tùr a awm lo," tih khum nghatin hmalam ka en nghâl ngar a; mahse, ka țaha rawn chhuak zui ut ut a. Tûn hi chu thinrimna vànga ni miah bawk si lo. 

U Mapuia vêk chuan, "Lucy chiah hi em ni țhian i neih a?" a lo ti leh zêl a. A dîl chhut ka ti bawk si nên a lakah chuan ka thinrim leh hlur tawh, zawhna nei ngah tih hmêl taka ka han melh leh lai chuan ka mittui a lo tling pam tawh, hriat thiam harsa zeta min lo en laiin "Aw.. i làwm tawh em?" ka tih khum a, hawi sawnin ka mittui chu ka tuai hul nghâl sawk sawk bawk. 

"Lawmna chhan tùra awm hleinem, ani chiah țhian i neih chuan i ngaihlu hlè dâwna nih chu.." dam ruih hian a lo ti ve leh a, a thu sawi chuan ka mal zia min hriat nawn thar tîr a ni ringawt.

"Ka neih chhun a ni miau a, ngaihlu tak ka ni," ngeiawm deuh tak hian ka ti lêt ve ngat a. Amah chu ka han melha ka nuih khum kher laiin, "Kei pawh min nei alàwm," thu tak zet hian a lo ti zawi ruih a. Engtin emaw tak hian ka awmin ka hria. A aw rî ang bawkin a hmèl chu a lang thu tak êm êm bawk nên, ka tih ngaihna hre tawh lo chuan, "Ani nên chuan intehkhin lo mai teh," ka tih khum ta ringawt a. U Mapuia chu a lo nui chhuak hawk mai, thâwk la huai pah hian, "Ahriat..." a ti hniam zui ruih bawk. 

Lungawi lo deuh hian ka melh zui kha kha a, " thil ka sawi ve hian min nuih ringawt zêl suh," ka tih khum leh hrâm bawk, a bân pakhat lek kãng ûk pahin, "Ok, Ok, ka nui tawh lo ang," a lo ti ve hluai bawk. Ka hawi sawn leh hma chuan, 'i lungawi tawh em?' ti ang hrimin dar a chhin ûk bawk. 

Țha tê tê chuan, "Khawiah nge thil chu kan ei dâwn a?" ka ti a. "Ka țhianpa-te dàwr hawn tharah kan kal dâwn nia, a hla tawh lo," a lo ti ve thuai a. Kan inhriat hun chhûng hi a la reilo viau nâin, achâng hi chuan ani hian min hre chiang mah mah ni tein ka hre dâwn dâwna. Min hre chiang ka han tih hian, kan chhûngkaw dinhmun ngawt ka sawina a ni lo, ka zawng zawng hi a hre veka ang ka ti. Childhood trauma vànga ka rilru put hmang kawi nasa tawh lutuk te chen hian a hria a, ka rilru phâk tâwk ang chuan a inherrem zel ni tein ka ngai deuh rum rum a; mahse, chutiang thil chu a tih ngawt nachhan tùra awm in ka hre bawk silo. 

A motor khalh lai chu ka lo melh rei deuh aniang, "vawiin chu min hmu hmelțha zual a ni maw?" a lo ti thut a, rang fahrana hma lam ka en nghâl zat chu min nuih zui ruh ruh bawk. 

A țhianpa te dàwra tih kan thleng chu thâwk ka la hap ringawt. 'Mi hausa ho hi chu an lo inhre kual țhêm țhûm vek zêl' an tih ang deuh tak tak kha a ni. Hmàn ni lawka an dàwr hawn thar changkâng leh ropui zet mai kha a lo ni a. Kan Local celeb te paw'n IG stories-ah an lo hman chuai chuai hlawm tawh kha. 

Dàwr chhûnga kan lût chu a țhianpa ni ngei tùr chuan min lo dawngsawng a. Tûnlaiah chuan u Mapuia te ang rual mipa lam hian sumdawnna lamah hma an la thar a, mahni mimal sumdawnna te pawh din thar an awm chho zut ta mai. Chu chu kan ram hmasawnna pakhat a ni bawkin ka hria. Tûn hma deuhah kha chuan restaurant-te hi hmeichhiate enkawl tùra ngaih deuh tlatna rilru kha a awm țhìn a. Tûnah erawh tlangvâl hnahkhat ngat ni chunga restaurant hawng thar hi an tamin, chung dàwr hawn thar te chuan bawhtu a ngah zual zêl niin a hriat bawk. 

A țhianpa nên chuan min inhmêlhriat tîra, a țhianpa bulah, "ka nupui tùr chu a nih hi," a ti sup a, rîk hluai paha a țhianpa in min lo chibai nawn leh lai chuan rilruah zawhna pahnih ka lo nei daih thung. 

Ani hnênah hian a nu leh pate bula a sawi ang bawk khân, kan inkârah eng mah awm silo kha awm a awm angin a sawi ve țhìn em niang, ngê nia ani hian min neih a duh thut chhan dik tak a hriatpui vêk zâwk?! 

Ka table tùra kan țhut fel hnu chuan ei tùr kan order zui nghâl a. Ei tùr an lo dah fel chu, u Mapuia chuan uangthuang deuh hian, "Kei Thingtlângpa hian hetiang hi ka hmang thiam ve hauh lo a nia," a lo ti thûm dût a. Dawhkàn tlâng lamah Chopstick chu a nawr sawn pah bawk, ei tùr lo chhawp tute pawh chu an nui zui hak hak a, Chopstick chu fork in an lo thlâk sak thuai a. 

"Thingtlângpa i han in ti ve ngawt a," ka lo tih chuan, "Ka ni tawh ber alàwm," a lo ti a, a nui zui ruh ruh bawk.

"Khawbungah i awm hma hian thingtlâng lamah tho i thâwk em ni?" ka ti chu a lo bu nghauh nghauh a. Țha tê tê chuan hna a zawm chhoh dàn leh a post neihna hmasa ber khaw chanchin chu min hrilh ve a, Khawbungah chuan a thawk țan chauh zâwk tihte pawh min hrilh ve thlap bawk. A chanchin ka hriat tam poh leh kan dinhmun chu a inthlauh zia ka hre chiang zual zêl a. A hnathawh mékna khaw chanchin min hrilh ve mawlh mawlh laite chuan, ngaithla reng mah ila rilruah thil dang daiha lo lang thung. 

Ani chu mipa puitling tak taka ni tawh a, fa pawh pahnih khat nei tawh mah se, a kum ngaihtuah chuan thil àwm taka ni tawh zâwk. Chutianga ni chunga amah aia naupang daih kiangah hun hmanga ka mizia in a phak tâwk ang zêla a awm thei mai chu mak ka ti a. Ka kianga a awm chhan chu eng vàng pawh lo ni se la, a dawhthei lutuk mai chu a mak a ni. Mak ka ti zual zêl dâwn ni pawhin a lang. 

Kan in ei puar hnu chuan țhu khawmuang tawh lèm lovin Bill pe tùrin kan inzui phei lehnghâl a. U Mapuia bula awm chu engti zawng emaw ni tak hian, a hahdam thlâk êm êm a, a puitlinna chuan min uap rual rualin ka duh zawng apiang sawi thei khawpin ka ngampa sarh zêl tho a. Ka thin tertek lo chhuaka ka han runluih salh salh chang lahin 'a lo beisei lâwk ang chiah,' a ni mai emaw tih theih tùrin, lung loah a la duh ngai hauh bawk si lo. Min neih duh chhan chu eng vàng pawh lo ni se, hnial lui tùrin tih theih dang ka nei lo ta rau rau bawk a. A dawhtheihna leh zaidamna te hian kan chêndun hunah pawh, ka chûngah a sual lo tùra rin ngamna min neihtîr zàn tawh. 

Bill pêkna Counter kan thlen phei hmain Table danga lo țhute zînga hmeichhe pakhat-in u Mapuia a rawn hmu chu, "Mapui" lo tih leh a țhutna ațanga thawh a rual nghâl a. U Mapuia kal lai pawh a ding ve chut tho. 

Chu hmeichhia pawh chuan kan bula rawn thleng chawp chilh ve nghâl a, U Mapuia ngawt en ràn pahin awmze nei deuh hian, "engati nge nizàn kha?" a lo ti a, no nalh deuhin u Mapuia chu a melh sawr sawr a. Ngawi rengin chu nu chu ka lo en ve rân a, u Mapuia nên hian an inrual vêlin ka ring. A incheina chu a zahawmin khawsak harsa lo tak an nih ngei pawha rin thiam mai theih bawk; mahse, a hmêl erawh chu kei aia a țhatna bîk ka hmu miah lo. 

U Mapuia chuan a zawhna chu chhâng ta mai lo chuan, "Cecilia" a ti hniam ruih a. Chu hming ka hre chiah chu ka nghing dawt ni maiin ka hria, nizàn lawkah an unaua an inbiakna ka ngaihthlâk palh avàngin a hming hi ka hre ve a, tûnah kan inhmachhawn zui leh mai bawk si chu, ka hamhaih a ni mah zâwk ang. 

"Mawh, engati nge nizàn kha?" Cecilia-i bawk chuan pangchan hmèl deuhin a ti leh nghar nghar a, an bula ka ding ve reng chu hre lo ang hmakin a la awm lui zêl bawk.

U Mapuia'n ka dara min lo kuah chuan hamhaih ru deuhin ka en chho hâ a, dam thlupa min lo en lêtin a lo nui suk bawk, "Cecilia ka nupui tùr Ahriati a nih hi," a ti nghet churh a.

Cecilia-i'n min lo en ve tâkah chuan u Mapuia a en laia, a mitmeng no sawr sawr kha a alh phat ti ila a dik ber ang. An pahnih chuan ka hmachhawn mêk hi, tu nge a nih ka hriat loh an ring te pawha niang, u Mapuia bawk chuan, "Naute, Cecilia a nih hi," a lo ti leh a. Ka dara lo hmer zui salh bawk.

Min koh dàn chu mak tia ka han melh vak chuan, duat hmêl êm êm mai hian min lo nuih lêt a, henu hi ka hria a, nizàn pawh khân an inhmu dâwn tih chenin ka hre vek tih chu hria se zawng, lem a chang hauh lo ang le. 

"Ka lehkha zirpui țhìn a nih hi, Pastor nupui a ni a, u Cecilia tiin i ko mai dâwna nia," ti supa a țhen suk rualin, Cecilia zâwk pawha lo nui ve hak bawk a. An pahnih chuan eng mah hre lo tùrah ngaiin, min nuihsawh ni mai a hriatna ka neih rualin ka luaka chhuak tel hlui bawk. He nu hi Pastor nupui a nih chuan.. Khai leh! Ngaihtuah pawh ka ngaihtuah thui peih lo zâwk.

Cecilia chuan, "Ahriati maw?" a lo ti ve ta a. A aw ram hmakah chuan min tham lohna rî pawh ka hre tel chiang viau bawk. Ka bu nghat chu uluk zet mai hian min en chhuak vek a, 'kan inhliah khuhna tùr chu nang hi maw lo ni a,' tihna te nên min zir chianga ni mah ang chu. A tâwpah chuan u Mapuia melh leh ralh chungin min lo chibai a, țha tak chuan ka lo dawngsawng tak nâa min tham lo kual vêl lutuk chuan chhûngrila ti tawt vek thei. Inrin hmanna hun awm miah lo va, kan inhmachhawn thut chu pawi ka ti tak zet bawk. Hre lâwk ni ngat ila chu, tun ang leh lutuk a tihtheih neih loh hmêl tak ang hian ka lang miah lo ang. 

"A chhiat hran loh hi," Cecilia-i chuan a ti zui a, a âw rî a min tihel na ri tel ve zêl mawlh chuan ka thinphu a ti rang zaih zaih tawh. Khaw hmu lêk lova ka chêt chhuah mai loh nân ka inthunun hrâm hrâm bawk. 

U Mapuia pawh chuan, "Ka mit a fing alàwm, ka thlan chhuah chat tawh chu 'a ber' a niang tih hre tawp la," a ti lêt duah a. Cecilia-i chu a lo nui leh sâwng bawk nên an pahnih chu ben pawp mai duhna hian ka khat a, ka insangmar țeuh mai.

Inhliah khuhna tùr an mamawh vànga min neih tum a ni tih chu ka ring lâwk vek tawh a; mahse, Pastor nupui nên meuha an chêt khaw lohna, a niang tih rêng ka lo suangtuah phâk ngai lo. An chêt khaw lohna te chu lo hliah khuh thei pawh ni ta ila Pathian tal an hlau lo emaw ni chu le! Tenawm dun hian a!

"Kan kal san ang che," u Mapuia chuan a ti leh nghut a, Cecilia pawh chuan ngeiawm deuh hian, "Nia, kal teh u," a lo ti hlak, a ner tel nàng bawk. 

Kan kal sawn hmain Cecilia-i lo țhutpui hmeichhe pathum te lamah, u Mapuia chuan kuta zuk vai thuak a, anni pawh chuan, "aw, min lo join ve ang chu tia.. Inkal nghâl mai dâwn elo?" an lo ti ve a. An zavai chuan nui hmèl pu vek mah se mak tih hmêl deuha min melh dàn chu ka hai bîk hauh lo. 

"Kalna tùr dang kan la nei a, puar deuh khân ei ula," u Mapuia chuan a ti lêt nghut a, a țhiante bul lam pana Cecilia-i a lêt leh laiin keini pawh Counter lamah kan inzui phei a. U Mapuia'n Bill a pêk lai chuan Cecilia-i te țhutna lam chu ka mit sìr zauh zauh renga, anni pali pawh chuan keini ngawt chu min rawn en zui a. Min sawi zui te pawha niang, nutling țhuau tawh tùr si chu an phun ru sar sar hlawm bawk. 

A Bill pe zo in wallet ak țha paha, "Kal ang le," a lo tih chuan Cecilia-i te lam chu chiang zetin ka va hawi lui sak kher a, chutia ka va en tâkah chuan, an inhrilh ru sar sar lai chu tâwpin an lo nui sâng hlawm mai. Tãwi têa nuih lêt ve sakin u Mapuia chu ka zui ta nghâl a.

A motor dahna kan thlen rualin, u Maliani thil min chah kha a la hre ve reng tih hriat tak hian, "I nu thil tùr chu leina bîk țhin i nei em?" a ti dût a, amah chu ka ngei hlè nâin beef roll ka lei țhinna hmun chu țha takin ka hrilh a. Phun nawi hauh lovin chu lam pan chuan a tlãn chhuak lehnghâl a. 

A motor khalh lai chu chîk rilru deuh hian ka mit sìr leh țhìn a, Dàwr chhûng kan chhuahsan ațang khân amahah danglamna ka zawng a ni mah ang chu. Cecilia-i nên an chungchâng chu sawi chhuah ka châk tet tet bawk, sawi chhuak hmasa tu zâwka țan chu ka tlawm la deuh bawk si nên ka țhu țang țeuh reng mai. An țhiante pawh khân anni pahnih inkâr hi an hriatpui ve vekin ka ring a. A awmzia chu u Mapuia nên kan innei thut tùr hi, anni kha chuan a chhan an hre chiang a ni. 

Beef roll zawrhna dàwr kawt kan thlen chuan a phun zui hluk a, kawng sîr rem lo zetah Car chu a ti ding a, "motor park-na a awm silo, lo chhuk ve lo mai rawh," a ti a, Driver side lam chu nam hawngin a chhuak zui vut bawk. 

"Kha pawisa hi la rawh," ti a ka auh zuina pawh chu min ngaithla tawh lovin dàwr tê chu a pan zui nul nul a. A hnung lam aţanga a dar pharh lian țha zet chu melh rum vakin, "Va han chhe thelh thawlh tak aw," ka ti zui hrâm ringawt. 

Rei lo tê hnuah Beef roll khai chung chuan a lo lêt leh thuai a, Car chhûngah a lo luh rual chuan, "Engzat nge i lei?" ka lo ti nghâl a.

"Pali" ti pahin a thil khai lai chu min pe a. U Maliani pawisa min ken tîrin a daih zat chiaha lo lei ve ngei a nih chu. 

Motor chu a ti nung leh nghâl a, a hun dàn rem lo zet ațang tlàn chhuah tuma steering a herh kual lai chuan, "Kha..." tih pahin a lamah pawisa chu ka lek phei a. A steering herh lai chu châwl meuhin min lo melh dur țha khawp mai.

Kei lah chuan chapo hmèl deuh hian, "La rawh," ka tilui leh ngat a. A lo chek hluk chu ngai pawimawh duh lovin pawisa chu a mal chungah ka vawm phei tawp a. Kawngpui pângngai a kan tlàn theih tâkah chuan pawisa chu a la khâwm mual mual a, "La lêt leh rawh," lo tih sup paha min pêk lêt a tum chu ka melh duh tawh bîk miah lo. 

Buaithlâk min tih hmêl fê in u Mapuia chu a rûm chhuak ta hawk a, chutiang ringawt lo deuh chuan awm se ka lo ti tet tet thung. Thinrimin min vîn nek se la, chu chu remchângah hmangin Cecilia-i nên an inkâr kha ka sawi chhuah khum sak thei tùra nia, "Ahriat..." pawisa la lêt tùra min duh tih hriat zet hian a lo ti hniam ruih a.

Thinrimin min vîn dâwn hauh lo nia a lan tâkah chuan, "Kha nu nêna in hmanruaah khân maw ka țan dâwn a?" ka lo ti zui hmak a. Ka han en chuan u Mapuia chu a lo hawihai nasa mai a. 

Kei lah chu pawisak neih loh hmèl deuhin ka nui ver ver a, "engati nge Pastor nupui kher i ngaihzawn a?" èlsèn zeta ka tih leh chuan a hamhaih hmèl viau nâin a tâwpah a lo nui chhuak ta huk a. Ngei zetin ka melh ram ram thung, thil ka sawi ve dâwn hlekin min nuih liam san daih zêl a. Tûn țum erawh ka hriat duh ang ka hriat kim vek hma chu ka duhtâwk tawh dâwn bîk lo. 

"In tenawm dùn ngawt mai... A pasalin in inngaizâwng tih a hria em?" ka ti zui kha kha a, "nge eng mah a hre ve lo zâwk," ka tih leh laiin u Mapuia thung chuan nuihza insûm, hmai sen țeuh chung hian min lo en lêt a. 

Pastor nupui meuh suala tlûk luhpui tu a ni thei chu, a tenawm ka ti zual tak zet a ni. Ramhuai te bâkin chutiang thil chu an ti ngam lovang, a sual dàn a râpthlâk bîk em mai. 

"In pahnih inkâr chu eng pawh lo ni se ka inrawlh châkna zawng a ni lo," ka rilru dik tak chu ka sawi chhuak leh nghat nghat a. Ka inrawlh châk lo a, hriat belh zêl pawh ka châk hek lo; mahse, Cecilia-i pasal Pastor chu ka lainat ru hle a, a nupui leh u Mapuia inzawmna tenawm zet hi a tuar ve tu tùra ni chu a pawi ka ti. Kei chu hmingchhe leh tùr chuang ka awm tawh lo va, ani erawh chu Pathian rawngbawltu hial a ni si a. A nupui leh u Mapuia te inkâr hi a tlâng thang a nih zet zawngin a tisual tute aia mipui te ngaihven tùr chu amah Pastor chiah chu a ni dâwn.

U Mapuia chuan, "Thil hriat sual i nei a ni lo maw?" hniam ruihin a lo ti ve a, a hmêlah chuan nuihzatna a lang tawh lo a. Cecilia-i nên an inzawmna ka hre chhuak rang lutuk chuan a țhâwng hlè tih erawh ka hmu thiam.

"Min han hrilhfiah dâwn em ni?" ka ti lêt salh a, ngaihsam hmêl zetin ka nuih leh vêl bawk.

Chutia ka cho âr reng chu a ning ta deuh a niang chek hluk chungin, "Cecilia-i te chu.." a lo ti hluk chu ka lo pawtchat leh hmak a.

"Aih, pha duh suh.. Engkim ka hre vek, nizàn paw'n in inhmu a ni lo'm ni, in inhmuhna țhìn ngaiah.." ka tih lai chuan a mitmeng chu a lo dur thim khup a. Nizàna a nau nên an inbiakna te ka lo hre ve vek tih hre chhuak tùrin hun a mamawh reilo hlè bawk. 

"U Cecilia-i chu Pastor nupui a ni si a, a pasalin in inhmu ru țhìn tihte hi a hria em?" ka tih khum leh salh salh a. A hmêl lang dam thlup țhìn kha a dur thim khup tawh. Dàwr chhûngah u Cecilia tiin i au mai dâwn nia min tih lai ang chiah khân, ka chhûngril chu a lo sa deuh pup pup bawk. Nichin khân min han nuihsawh dùn vêl a. Ngeiawm ka chhuah ve hun tùr tak a ni.

"Min neih duh chhan chu eng vàng pawh ni se ka hre chhuak vek ang ka tih tawh kha, tûnah chuan ka duh ang ngeiin min neih i tum chhan ka hre chiang tawh bawk a, ka nei ngei bawk ang che," èlsèn fê in ka ti nghat nghat a, ka sawi zo chu zahna hriat loh hmèl deuhin ka nui leh sâwng bawk nên, u Mapuia hmêl lan dàn chu a buai ta nak a. Pawisa pawh chu seat inkâra thil dahna ah dah pahin, rilru buai hmêl tak bawkin min en leh ruai ruai a. Duh thlang thei lo ka nih zia hriain min neih a tum lui ta sa sa bawk a, chân leh tùr chuang nei tawh lo hmeichhia hian, pawisaka neih loh zia a hre chho zêl ang. 

"Mak ti duh vak suh, Palai chu lo kaltîr rawh, a rang thei ang berin kan innei ang chu le.' Win win situation' a ni mai alàwm," mit siai zeuh chunga ka tih leh lai chuan, mangan hmèl lek lek hian min en tawh! Kei erawh engthâwl hmêl fein ka nui zui leh hak a, melh pawh melh duh tawh lovin hma lam ka en ta daih bawk. 

Ka mit-sîr chuan a steering humna kutphah lian zeta tha zam lo pawng chhuak țalh țalh chu ka hmu ru rân a. An inrin hmain an thil tum dik tak ka man chhuak ta kelh si a, pawi a ti lutuk te pawha ni mahna, chu erawh ka lo buai ve na tùra ni lo. Chhan neiin min neih a duh a, kei paw'n kan Inchhûngkhur hrehawm lutuk tlàn chhuahsan nân leh nun thar neih nâna rahbi hmasa berah ka hmang lêt ve dâwn. 

Atân nupui țha tak nih ka tum dâwn rêng rêng lo. A inchhûng ngei ațangin ka hringnun thar zawh tùr ka rel fel ang a, ka inkhawl char char ang a, ka mamawh ang ka khawl tlin hunah ka chhuahsan daih ang. Chubâk hmachhawp dang ka nei lo.

Kan vêng chhûng kan tlàn luh hma chu a tu zâwk mah kan țawng tawh lo va. Amaherawh chu, ka vêng kan tlàn luh hnu rei lo têah hmun reh laiah car chu a ti ding chawt a. Rilru kâwm mawlh mawlh lai ni mah ila, chutia a ding thut chuan ngaihțhat lohna Alert a ti nung rang khawp mai. 

"Engati nge?" ti hû paha ka en chuan min man bet mai duh tùr hmêl pu chungin a lo nui suk a. Ka rin lâwk ang chiahin thâwk lehkhat ah min hnaih chilh thut a.

Thlaphâng ru zeta Car bang kil ka nêk rawk rawk chu, a kut pahnihin ka biang a rawn dawm zui zat bawk. Hamhaih tak leh kut min thlâk mai hlau ru lutuk hian ka lo indang țâwk țâwk a, ka hlauhna thup a "Eng nge i hriat a?" ka ti vîn tuar chu min rawn fâwp zui hmiah mai a.

Min fawh chiah chuan engkim chu a châwl dûk mai hian ka hria! Ka rilru ngaihtuahna leh thinphu chenin a châwl vek. A duh tâwka duhthawh leh zei lutuk a min fawh mawlh mawlh lai chuan, ka ngaihtuahna pawha lo fîm riai riai a. Thil thleng mêk chu ka hriatfiah theih tâkah chuan lu ka chet nghâl nawk nawk a. U Mapuia pawh chu lo rûm chhuak hawkin a tâwp ve ta a. 

Hmai insi lo chauha min lo en in ka biang pawh a la dawm tlat a, thinrim lutukin ka hmui chu ka nuai zui nawk nawk a. U Mapuia chuan ka chet dàn chu a duh loh hmêl kher mai. Duhthawh lutuk tak hian min fâwp leh ngawr ngawr a.

Tûn țum chu ka inringlâwk tawh bawk nên lu ka lo thing zui nghek a, ka biang dawm nghet sauh paha min fawh uar sauh tâkah phei chuan, a chhîp samah bawk ka kêk leh ta chiam a. Rûm hawk pahin min fâwp leh ngheka, a inla hrang zui leh ta a.

Thinur fê hian ka melh nghek a, "Zakthei lo pa" ka ti kawlh nghâl hra a. 

U Mapuia thung chuan min lo nuih sak a, "Fâwp hmasa ber tu che ka ni maw?" min lo tih san mai lehnghâl. Ka ngei lutuk chu ka ţap vak lo chauh a ni. "Eng mah i hre lo, awm sawn vat rawh," vîn zet hian ka ti leh tâwn tâwn a, chutia ka țawng lai tak chuan min rawn fâwp leh nghek mai a, awm hrang nghâl mah se huaibâk zetin a dar ka chum sak zui țawlh tho. Dân ngai tein u Mapuia chuan min nuih leh mai a. A nui rî chu a ring hauh lo nâin a nuih chu a za hle tih pawha hriat reng a. A hmaiah tak han chum chawrh tak chu ka duh ut ut tawh.

"I zakthei lo ve ngawt mai, vawi khat mah khati khân min ti tawh miah suh, i hria em? I hre chiang em?" ka tih tâwn tâwn laiin a lo nui chur chur a, "A nuih pawh nui tawh suh," duhthawh fahrana ka ti leh chiah chu, "Naute.." lo ti zawi ruihin vanvadak meuhin a nui chhuak ta huk huk a. 

Lungawi lo deuh a, "Khati pawh khân min au tawh suh, i zakthei lo ve chiang em mai," ka ti leh hrâm chu ka bianga lo dawm leh thut a, ring tak mai hian, "Vanlalramdinthar," ka lo ti kawlh hrà a. Mit tizîm sun a min enin min kuai dâk salh a. Kei lah chu ka thinur nasa tawh mai si nên thîp zetin ka melh rân a, "Ka nupui tùr kawlh hlik hlek te," nuihzat hmêl zeta min tih chuan, "Zak rawh," ka tih khum hlâr ringawt.

"Fawh nuam nu," kiai suk pahin a lo ti daih a, ka hmui hnuai lam chu a kutzungpuiin a lo tuai zauh bawk, a mit meng thim ruiha ngaihțhatna leh lungawina ni àwm tak, lo lang chhuak te chu ka ngei zual phah hluah hluah. 

"I nupui tùr ni mah ila i fawh leh i khawih ka duh lo," kha zet leh huatna te nên ka tih khum tan tan a. U Mapuia chu a phu deuh zawka, a hmêlah chuan tawrhna ni àwm tak a mit meng ti lang vâwt ruih thei hi a lo lang a. Ka țim phah sung sung bawk!

"Ka nghah rei tawh zia che hi hria la chu, kha thil kha i sawi hauh lo ang," a ti ta sup sup a. Thi tùra thupêk ang maiin a lo dawngsawng niin a lang. 

"Nang hian min nghahna chhan tùr i nei lo," ka tih chuan a lo thaw lum ham ham a, kan hmui inhnaih leh ta lutuk chu a insi leh tak ngial dâwna hriain ka eu hnung țang țang bawk. 

A hnâra ka hnâr a lo nul thuak lai chuan, ka lungphu a lo rang dat dat a, min fâwp leh ang tih mawlh chu hlauin ka thle sawn a. Chutah u Mapuia chu za lo zet hian a lo țhen sawk a, a kutphah hlai zet chuan ka hmai a la dawm reng a, vâwt ruiha min enin nghet cherh chawrh tak mai hian, "Cecilia kha ka ngaihzâwng a ni lo a, a ni ngai lo bawk ang, chu chu hre reng rawh," a lo ti khauh fur a. Chutia ka beisei loh dàn lutuka Cecilia-i nên an inkâr a pha fai vek chu ka hamhaih phah vek mai.

"Ka lehkha zirpui țhìn a nih kha, chu bâk kan inkârah eng mah a awm lo," a ti leh nghut nghut a. Dàwr chhûnga Cecilia-i'n a melh dàn vêl nên khân a va inrem lo tak! Amah vêk chuan, "ngaihtuahna maksak pui pui intihbuaitîr lo va, min ring tawp tùrin ka hrilh tawh che kha," a lo ti hriam hrawih a, a vauin min vau a ni ber mai. Hamhaih vànga sawi mai tùr ka hre lo lai chu kan chal a insiktîr vang vang hnuah ka chalah min fâwp leh a. Thâwk a lak huai huai hnuah a inla hrang ta a. A țhut dàn a siam rem lai paw'n, chêt sawn nachâng hre lawk lovin Car bang kil chu ka la nghèng ràn a. 

U Mapuia bawk chuan, "Hei hrep pawh hi," a lo ti leh hluk a, pawisa chu a la a, a ti ang tih rin ngaihna pawh ka hriat miah loh dánin ka kawrfual âwm chu ka bra chawpin a lo keu a, pawisa chu a rawn thun lûta nih chu! 

Ka hnute zâwn hup chawih paha, "Zaktheilopa" ka tih leh meuh chuan a lo țhu fel leh diam tawh a. Ka ngei lutuk chu ka alh hluah thei mai dâwn hian ka hria, ka bra a lo keu tawh pawh tih nâklaiin a hmuh laia pawisa han phawrh chhuah leh chu ka duh loh zâwng taka ni bawk si, "I va han zakthei lo chiang tak aw..!" Ka ti vang vang a. 

"Fâwp hmasa ber tu che ka nih theih phah alàwm," a lo ti sup duh lek lehnghâl.

Va keh leh tak chu ka nâp a. Ka rilru chu lo hre thiam ang hrimin a nui zui ruh ruh a, "Min kêk leh a nih chuan ka fâwp lêt zêl tawh ang che," a ti zui a. Ngei lutuk a ka melh ngawt ngawt chu min siai sukin motor a ti nung zui nghâl a. 

A fawh leh a khawih ka duh loh thu ka sawi lai kha chuan, mipa thinrim insûm theihna tlâkchham hmèl tak ka hmu niin ka ngai hman hial a; mahse, a inthunun theih zia pawh ka hre zawm chiang khawp mai. A thinrimna chawh thawh sak ka tum viau țhìn tak nâin, han thinrim tak tak chiah se chuan a tawrhhleh àwm khawp ang. Tuar zo tùra châkna ka neih pawh ka ring lo.

Kan in kawtah motor a tih din leh ruala ka thil hmuh vang chuan thâwk ka la hliai a, "Lucy" zàwi tê a ka ti rì chu, u Mapuia paw'n hriain kawngkapui inhawng huau lam chu a zuk thlêk ve thuai bawk.

Lucy lah chu nuam tih hmêl zeta nui pàt pàt chungin a lo kal chhuak a, u Mapuia pawh ngaihsak tawh lovin Car aţang chuan ka chhuak thuai a, "inlêng a ni lo'm ni? engati nge hetah te i lo awm daih a?" zawhna ngah deuh hian ka ti nghâl mawlh mawlh a.

Ner deuh nâng paha, "Ka lo hâw daih a nih hi," a tih chuan a ngaihna hre silo leh hlim tho bawk si hian ka nui var var a, "Engati nge i lo hâw daih a, mi dangte i lo hâw san em ni?" ka ti leh hrâm bawk. Lucy pawh chuan, "Ummm, an ninawm lutuk a ka lo hâw hmasa daih a nih hi," a ti a, "Khawiah maw in kal a?" awmze nei deuh hian a ti zui zat bawk. 

Ka chhàn lêt hmain u Mapuia pawh chu a lo chhuak ve a, Lucy hmêl ka hmuh ruala ka hmêl hlim nghâl vek chu, hre thiam takin kan țhian dùn chu min lo nuih suk a. 

"Vawiin pawh ka tel lo bawkin in lo chhuak leh vêl a. Nimin khân a lehpek ah chuan ka tel ve zêl tawh ang ka ti tawh reng sia," a laka vui hmêl zeta Lucy-i'n a lo tih khum chuan, u Mapuia paw'n sawi tura vân hmêl khawp mai. 

Lucy bawk chuan, "a lehpek ah chuan ka tel ve tawh tak tak ang," a tih khum leh hrâm a, u Mapuia chu a nuihzat hmêl ta hle a, "Zirtâwpah lo inring ula," a ti dût a, Lucy làwm tâwk a tling êm êm mai a ni. 

Kan ţhian dùn chu inkai chunga Inchhûnga luh nghâl mai kan tum ûk tawh chu Lucy zawk a ding leh thut a, "I lo lût ve leh dâwn em?" tiin u Mapuia chu a zâwt a. A nachâng ka hriat miah loh hi a lo hre bîk tlat zêl. 

U Mapuia paw'n a bana Sana chu bih thuakin kei chu min en nghâl run a, "ka lo lût kawi tawh lo mai ang aw," a lo ti sup bawk. Min râwn ni àwm tak hian chiang takin min en a. Chutia min han râwn vei thlap chu Lucy zâwk chuan nuam a lo ti lehpek viau a, a nui tet tet a, min nêk salh salh bawk.

Kei lah chuan, "aw" tih chiahin ka chhâng lêt a, Lucy chuan zeilo min tih hmèl deuh hian min kaihna chu a thlah hmak a.

Ka Beef roll khai lai chu min chhuhsak nghâl a, "han inthlah fel teh u, hei ka lo zuk keng lût ang e," a ti zui a, min luhsan daih bâkah kawngkapui chu a pawt khàr zui ta kher lehnghâl.

"A va han a tak aw," ka ti zui vang vang a, u Mapuia nên chuan inhmatawna dingin kan in en a, ani paw'n sawi tùra hre bîk lo a niang kan innuih ringawt a. 

"A fel reuh a nih kha," nui paha a tih chuan, "a inla zei kual zâwka nih kha," ka ti ve thuai a; mahse, u Mapuia chuan ngunthlûk lutuk hian min lo en reng a, Lucy-i'n chance min pe ve ngei chu a hre thiam ve vek tih chu a mit mengah chuan a lang reng a, ka chhûngril chu laih luat avàngin a lo sa pup pup mai.

"Kal tawh rawh," rang deuhin ka ti a. Ka kal nghâl ûk tawh chu ka bânrêka lo chelh vàngin ka ding leh dat a. Ka en chho hâ chu ngunthlûk zet hian min lo en chhuk rùn a. A pa lianin amah chu a chhe hauh si lo a, uluk fe a min en vung vung tawh chuan mipa a nihna angin ka laih phah ve lo thei lo.

"engati nge?" zàwi tê in ka ti a. Min chhâng lovin ka kut chu a lo hûm nghet sauh a.

Ka kut a chelh lai chu min lo hmutu an awm palh ang tih hlau ru deuhin ka hawi kual zui ruai a. Ani thung chuan min hmutu lo awm mah se a pawisak loh hmèl khawp mai, ka kut chu la kãngin a fâwp a, țang țeuhin ka kut lehlam zâwk ka hûm ruh vak a. A hmuia ka kut nawr si chung chuan mit tizîm sauh pahin min din hnaih zual a, a mit meng thuk ruih vàng chuan ka hmuia min fawh lai kha ka ngaihtuah lêt lo thei lo. Ka ngaihtuahna avàng chuan ka bianga lo sa zui hat hat a, chutia ka lai êm êm mai chu u Mapuia thung chuan lungawi hmèl deuhin min thlêk vung vung reng a.

"Kal tawh mai la," zàwi tê in ka ti sa sa a. 

"I thu sawi kha sut leh rawh," hriat theih chang chang khawpa zàwi hian a rawn ti chhuak nghut. Ka lo hre chiang viau thung. 

"Eng chu maw?" ka ti lêt tak nâin min melh dàn awmze nei hluah hluah ațang chuan a sawi awmzia chu ka hre thiam nghâl a, "I zakthei lo e a," ka ti zui zat chu zàwi tê hian min lo nuih ta huk a.

A hmui chuan ka kutphah hnung lam chu a nûl kual dun dun a. Hetiang hian tu mipa mah ka la awmpui ngai si lo a, ka thin a phut ran mai bâkah ka tirîl te chu a lo khûr dar dar a, u Mapuia lah chuan, "Ka nupui tur hi fâwp lo leh khawih lo a awm thei tùra min ngai a nih chuan i tisual ngawt ang," a lo ti zawi ruih a. Ka zak lutuk chu ka sa chhuak vek hialin ka hria, a thil sawi awmze dik tak chu a mit meng hmangin, a ti lang chhuak chiang êm êm bawk si nen, ka hrawk chhûngte chu a lo ro hulh thei.

"I hria tiraw?" a lo tih leh chuan, "i ninawm," ka ti chhuak halh ringawt. Tûna taka sawi tùr ka hre lo lutuk chu ka inhaw hlur bawk. 

Ka hmaia ka sam lo tla chu, u Mapuia chuan lo hui kiangin ka lu a lo chul hauh hauh a, zâm ru deuh chunga a mit taka ka en lêt ve chuan, "Ka kal chhûngin i thu sawi kha lo sût fel la, in ka thlen hunah kan sawi dun ang, aw?" a lo ti leh a. Kan BDO pa hian mi thlêm lungawi a thiam dâwn riau! 

Ka chhàn lêt lawk loh avàng chuan, "Naute.." a lo ti zàwi ruih a, ka kut pawh lêt tum pahin, "aw" ka ti ta hlak a.

 "Good girl," a ti sup a, kiai suk suk in ka bianga lo piai zeuh a, kei lah chu ka kut pawh lêt tumin ka lo țang nasa mai sia, hreh hmèl deuh hian ka kut chu a thlah ve ta ruai ruai a. 

Car lamah a lêt leh lai paw'n ka dinna ngaiah dingin ka thlîr zui reng a. Car chhûnga a țhut luh chuan min lo nuih suk a. Ani ang a officer palian bawk si, mahni a lirthei nei hrang chin ngat leh nghâlin, kan In thleng min thlah hâw in a lêt leh tùr chu ka thlîr liam ve leh thung ang tihte chu a thawi paw'n ka suangtuah ngai lo; mahse, chu thil chu tûnah hian a thleng mêk bawk si. 

U Mapuia chuan, 'lût tawh rawh' min rawn ti ni àwm takin, kan Kawngkapui lamah chuan a thle buk a. Ngawi rengin ka bûk khum zeuh ringawt. 

A tlãn chhuah dâwn tak tak chuan kut min lo vai leh zauh a, kan In chhak kawia a liam thleng chuan ka thlîr reng a. Amah ring tawp tùrin min hrilh a nih kha, rinngam a nih ngei pawh ka ring; mahse, Ahriati hian midang lakah rinna a nghat mai mai ngailo. Naupangtê a nih laia ta tawh harsatna a hmachhawn châng paw'n, amaha a inkhai chhuah zêl a ngai țhìn a. Chutianga mahni chauh rin tur nei chung chuan huna hmang rei tawh lutuk a. Hringnun hriat thiam harsa zetah hian amah ni lovin ani lakah khân rinna a nghat thei hauh lo ang. 

Kawngkapui pawt hawnga Inchhûnga ka lût ve chu Lucy chuan min lo nuih tut tut a. He nu inla zei kual vêl ta lutuk hi engtia han tih chi nge maw ni dâwn le?!

U Maliani nên Beef roll chu an lo ei mêk a, ka pate erawh Card an lo la dêng tui hle thung. Mite hmuh ah chuan zu zuar kan nih avàngin sum pawh nei deuh țân tùra ngaih kan ni; mahse, zu hralhna pawisa lâk luh ang ang hi tihian Card den nâna hmang zo zêl țhìn. 'Dam loh palh pawha kan inenkawlna tùr,' tia pawisa dah țhat nachâng a hre ve bawk si lo a. Dawmdawi in luh ngai te in a tu emaw ber hi han awm ta chiah ila kan che buai ve ngawt ang. 

Kan țhian dùn chu pindanah kan inzui lût a, ka inthlâk mawlh mawlh laiin Lucy chuan Beef roll a lo ei țâwlh țâwlh a, tui tih hmêl zeta a ei banga melh leh țhìn chu ka lo nuih kar kar bawk. Ruati te a lo hâw san daih chhan chu ka zâwt châk viau nâin, a chhânna tùr chu ka hre thiam ruakin ka hre thung. Ruati hian David-a kha a âtchilh bur a, Vid-a lahin a ngaihven lêt ve hauh silo a. Ruati mit tikham tùr tâwk lekin min ngaihven tum hrang si a, chuvàng tak chuan Ruati hian min tih chhan deuha țawng fek fek a ching ta fo a. Tûn țum an chhuah ho naah pawh, Lucy lo hâw hmasak nalh na chhan tùr chu keimah vàng bawka ni leh ang. 

"I țha em?" a lo tih chuan, "Țha e.. engati nge?" ka ti lêt thuai a.

"Ka hre lo, i hmêl lan dàn kha a dik lo deuhin ka hria," ngaihsam hmêl deuhin a ti puat tak nâin min en chîk viau tho. 

Nizàn lama u Mapuia te unau thil sawi ka hriat rûk leh dàwr chhûnga thil thleng te chu han hrilh ve nghâl vek mai ka tum hman a; mahse, min chhan luat vànga tih hreh a neih loh zia hre chhuakin, eng mah hrilh rih loh chu a țhain ka hre leh ta zâwk a.

"Ka rin aiin i lo hâw hma ang reng ta sia. Mi dangte i lo hawsan daih chhan àwm tùr ka ngaihtuah mai mai," ka ti a, ka nui tãwi halh bawk. 

Ka rin rilrûk ang chiahin, "Awi, țawng thei deuh kâra awm chu khaw lum bawk si nên luaka chhuak hlui zêl a... ka ning alàwm," a ti zui bai bai a. Sawi lang dawt lo mah se ka chanchin sawi tâwk an awm dâwn tih chu a fiah kuarh mai alàwm. Zu zuar fanu ka nih avàng ngawta mipa țha deuhte chu phû ve lo ang hiala min ngai a, min rel phah chiamtu te hian BDO meuh pasal ah ka nei dâwn tih han hre ve ta se, min sèl nasa hlawm ngawt ang. 

Ka inthlâk zo khum tlânga ka va ka țhut ve chuan, "U Mapuia nên khân engtin emaw ni tak in-awm chiang alàwm," awmze nei deuh hian a lo ti nghâl a.

"Naaaa," ka ti hlak chu, "Zep miah suh, i taksa ah hian u Mapuia rim a nam vek alàwm," a lo ti leh ta mai a. U Mapuia'n min fawh lai kha ka ngaihtuah lêt zâwk a, Sakeibakneiin a sa seh tùra hual chêp ang mai a, Car bang kil ah min dang chêp a chêt a lak dàn avàng khân kan taksa a insi nasa si a, kei paw'n a rim chu ka nam in ka inhre tak tak. Lucy lahin min dâwp chhuah ngei tum tih hriat deuhin, mit hmul a lo kan euh euh bawk nên ka zak thar leh chem chem mai. 

"Ih... min fâwp a," ka tih chuan a țê chhuak tuarh a. Rang lutukin a kâ ka hup beh sak nghâl a. Bang lam chu melhin a ri a in fawh chungchâng chu sawi lo tùrin ka mitmei zui nghek bawk. 

Ka mitmei na chu a hre thiam ve ta a niang a bu nawk nawk a, kut ka laksawn rual chuan, "a zei em?" a lo ti leh zui zat bawk. A phur hmêl in mak tihna te nên hian min en ràn a.

"Ka hre lo" dik takin ka chhâng a, Ka biang chu a lo sa leh hat hat bawk. U Mapuia ka duh vanga ni pawhin ka hre lo ka dam chhûnga a vawi khatna atân mipa in min fâwp ve a nia, chutiang thil ka țhian țha ber hnêna ka sawi lai chuan zaka sen ap ap tùr ka ni rêng a ni.

"Awi.. i hahthlâk bawk sia," nui țhà chungin a lo ti vei ngei a, "a zei ang... A zei hrim hrim ang," a ti leh zat zat a. Ner nang a ka en laiin phûr hmêl deuh hian min lo nuih leh vêl a, "In infâwp rei em?" a tih leh chuan duhlo zetin, "ka fâwp lêt ve bawk lo," ka lo ti hlar a, "fawh lêt dàn pawh ka thiam lo hrim hrim," ka tih leh chuan, "Awi, a ni ve bawk ang chu tumah i la kiss ngai silo a, a fawh lai che a i lo hâm lêt lo a nih chuan a țha vek a ni mai," inla tawnhriat ngah hmêl bîk tawh deuhin a ti leh ngei bawk a. 

"Thinrim deuha ka hauh laiin min fâwp alàwm," ka ti chiah chu Lucy hlim hmêl chu beidawnna in a lo chîm thim nghâl vek a ni ber. 

"i mak thei e Ahriat..Engati nge u Mapuia hi i inhauhpui zêl a?" a ti ta chiah a. U Mapuia a țan tawh zia chu a lang chiang ta hle bawk, "Ka inhauhpui reng bîk pawha nilo," ka ti ve hap a.

"I mak hrim hrim, u Mapuia kianga i awmin i thinchhe êm êm zêl bawk a, a bula i awm ang hian tu bulah mah i awm ngam ngai miah hleinem," min zilh titih paha a tih lai chuan, 'a dik lo' lo tihna tùr lai rêng kka hre lo.

"Ih maw, u Mapuia hian a hmangaih che a niang," a lo ti chhuak phawng a! Chu kher kher chu ka rin zâwng a ni lo tawp. 

 

"Thla ngawt a che," àwm ang lo ti fê a ka ti hlak chu, a beef roll ei lai chu dawhkànah dah pahin min țhut hnaih sauh sauh a.

"Ka thla ngawt lo.. U Mapuia hian a hmangaih che, a hmangaih che tih pawh i inhria. Inhre miah lo la chu tûn ang hian i khawsak khum ngam miah lo ang. Hmangaih kan nihna hmunah chuan kan ngaiha ngam a, nang pawh u Mapuia kiangah chuan i ngaiha ngam a, i awm ang angin a pawm zêl dâwn che tih i ring a, chu vànga he ti taka khawsak khum ngam hi i ni chiah bawk," a ti mawlh mawlh a. Kei paw'n duhthâl a ka hau hrep ngam zêl te hi mak ka ti ru ve tho; mahse, a zaidam vànga țha taka min lo dawngsawng țhìn bâk a ni dâwn lo lutuk. 

"Han ngaihtuah mah teh, u Mapuia i hnial lêt ngam ang hian i pa hi vawi khat tal i hnial lêt ngam em?" thu tak hmêl zeta min zawh lai chuan ka thin a lo phu ri dup dup a. Zàwi tê hian, "Aih" ka ti lêt a. Ka duh loh dàn bera thil a kal paw'n ka pa chu hnial lêt ngam a ni ngai lo. Ka ngaih dàn ka sawi ve a nih chuan ngawi tùra min hrilh nân kut min thlâk mai țhìn.

"Mahse, u Mapuia chu thinrim chungin i àn khum ngam a, kan thinur khum ngam te leh luhlul kan chhuah khum ngamna mihring chu, kan mi rin ngam te chiah an ni bawk asin. U Mapuia hi i chhûngril ber ațang khân i ring a, i rin chhan pawh aman a hmangaih vàng che alàwm," a ti leh chu ka lo pawtchat rang khawp mai.

"Aih.. min hmangaih lo," ka lo ti lêt țùng chu ngawi reng hian min en deuh vang vang mai, "Min hmangaih lo... min hmangaihna chhan tùr a nei hleinem. Tûn ang a ka àn khum ngamna chhan chu maw, a zaidam vâng mai mai alàwm," a rilru thlâksak tum zetin ka ti ve a. U Mapuia hian ka lakah rilru danga pu angin ngai lo se la ka duh tak zet a ni. 

"Kan hmangaihte chu an nihna avàngin kan hmangaih țhìn, chhan dang a ngai lo," a lo ti ve leh zêl a. Tãwi tê in ka nuih lêt ta ringawt, hetiang rilru hi a pû a nih chuan kan ruahmanna neih te kha chêt chhuahpui a harsa zo vek dâwn.

Hmangaihna hi eng nge a nih pawh ka hre lo a, a awmzia lah ka hre ve hek lo. Engtin nge ka la tem ve chhin ngai rêng rêng loh thil chu a awmzia ka hriat ngawt theih rêng ang ni. Ka ngaih ve dànah chuan HMANGAIHNA chu hlawh chhuah tùr a ni, ka nu leh pate lak ațang ka hlawh chhuak zo tawh lo va. Mihrang daih lak ațang phei chuan ka hlawh chhuak thei in ka ring lo. 

U Mapuia paw'n a nupui ni tùr leh a hlawhtlinna te chenpui tùr chauhin min duh a, ka țhiani hian min hmangaih angin a ngai tih inhre ve phei se chu a duh lo ngawt ang.

"Kan inhriatna a la rei lo lulai lutuk, in hmangaihna huna awm lo, chu lam chu a sawi pawh sawi tawh suh," ka ti leh chu min pawmpui loh hmèl takin a lo ner nûng a.

"U Mapuia te chuan a hriatna che a rei tawh a ni lo'm ni?" a lo ti deuh hlar bawk. 

"Aaaa, kha thil kha chu min neih a duh vànga ka pate hnêna a dâwt phuah chawp mai mai a niang," ipik deuhin ka ti lêt a. Kha thil kha chu ngaih han tih țhatna chhan tùra tling lo tlat a ni. 

"U Mapuia hi chutianga dawt sawi duh tùr mi a ni lo, la zâwt chiang chhin teh, engtik ațang khân nge a lo hriat tawh che tih zâwt la, thu dik chu a lang mai ang," Lucy bawk chuan a lo la ti fan tho, "A hriat țan dàn che ka hre chiang châk ta riau mai. A en țhìn dàn che hi tûn hnai lawka a hriatchawp chu i ni thei lo hrim hrim," chîk deuha thil ngaihtuah zui ni àwm tak hian a lo ti leh zêl a, ka nui ringawt. Ka tân chu thil chu a pawimawh ve lo, ka nei ang a, pawisa ka inkhawl nghâl char char ang a. Ka pate belh ngai tawh lo tùra ka inkhawl ngah rualin ka țhen nghâl ang.

Mihring mihrinna ațanga chhût chuan u Mapuia hi pa țha tak a ni tih chu ka pawm thlap, min neiha duh thu a sawi rual ruala ka pa in âw a lo pawh nghâl mai te hi, mipa tam zâwk chu ni se keimah min zuam phah nân an hmang zui ang. U Mapuia erawh chuan a ti miah lo, duh ni se chu ka pain min ngaihsak lohna te hi remchângah hmangin min thunun nân a hmang thei reng a, duhthlan tùr dang ka neih lo zia thlengin a hre chiang ve êm êm bawk; mahse, chutiang thil chu ti lovin pângngai takin min kawm ve mai a. Kan chèn dun huna kan pahnih tân a harsat lutuk loh nân kan lo innêl lâwk theihna tùrin hun hman tam a duh a, chu vàng chiah a min ngaihsak leh ngaihven pawh a ni reng a. Chu thil chu chhan dang ni tùra lo hmehbel sak ka duh miah lo bawk. 

Ka țhu ngawi ràn lai chu Lucy chuan ka bek sam chu ka bengah min lo zeh țhat sak a, u Mapuia'n min neih a duh chhan nia a sawi te kha ka hrilh ve tlat silo a, min hmangaih nia a rin tlat tawh avàngin, "u Mapuia hi hmangaihna awmzia i hriatfiah thiam phahna tùr ni thei hrâm se a tih àwm ngawt mai," a lo ti a. Beidawng zeta ka en laia a mit meng a ka thil hmuh vàng chuan bei a ti dawng zual tulh tulh bawk. 

Ka țhiani mit mengah chuan u Mapuia nen hlim dun tùra min duhsakna sâng ber ka hmu thei, "Mi dangte lak ațang i indaidanna bang chhah tak hi sut hawntîr la, i tàn mékna ațang hian a hruai chhuah che rem ti rawh. I inhung bîkna bang piah lama huan mawi takah chuan zui la, nun hlimawm tak chu chen dùn rawh u. Ahriat, i indaidanna chhûng lam chiah en lovin bang piah lam ramte pawh thlîr ve tawh rawh, chu chu phûin i in-hre ve tawh lo'm ni?" a ti leh mial mial a. Rilru buai zetin thâwk ka lo la nghek thung.

"Hetiang thil hi sawi tawh lo ang, neih ka rem tih chhan chu kan hriat chian kha thil dang a awm lo, awm tùr pawhin ka duh lo. Duhthlan tùr nei miah lo va min siamtu nêna hlim dun chu ka duh zâwng a ni miah lo bawk a nia," rilru sehhel zetin ka ti chang fak a. Ipik hmêl deuha Lucy thâwk la hap chu enin ka nuih zui sak bawk. 

"Kan ruahmanna chu i hriat vek kha..." ka tih leh laiin a mit mengah chuan min khawngaihna leh min beidawnpuina ni àwm tak a lo lang a. Hmangaihna ka rin loh zia te, nupui pasal innei thar te'n fa an nei thla zen ringawt țhìn te ka hmuh dàn zawng zawng min hriatpuitu a ni a. Chhûngkaw thar dina fa neih deh duah te hi ka pawm zawng a ni lo. Engati nge pian chhuah min dîl miah lo tute chu khawvêl hrehawmna tuar tùr ngawta kan hrin chhuah ang ni, mahni fate ngei pawh enkawl țha leh thei si lovin nu leh pate zâwk an lo ințhen leh vêl thul. Chûng thil zâwng zâwng chu Inneihna in a ken tel chu a ni. Chuvàngin u Mapuia hi neih hlen ka tum loh zia chu a hre chiang thawkhat ve ang. 

Ka rilru min thlâksak tum ni àwm tak hian, "A nih leh i rin dàn hi dik lovin ka rin dàn hi lo dik zâwk se. U Mapuia hian hmangaih tak tak ta che se la engtin nge i tih ang?" a lo tih leh țâlh a. A thil min zawh dàn vêl chuan lungphu a ti rang dat dat thei. Awm a nuam lo nghulh a, ka tâwt deuh up up reng mai. 

"Kan ruahmanna ang khân ka kal tho ang. Chuvàngin i rin dàn hi a dik loh a țha ber ang," ka ti lêt a. Ka thu sawi ah chuan ka ding nghet tlat dâwn tih chu a hre thiam ta a ni mahna lungawi loh hmèl zetin Lucy chuan min lo nam thle zui lawp a. 

"Kan ruahmanna ve te kha chu.." a han ti hliai a, sawi zui leh mai tùr hre leh silo ni àwm tak hian thâwk la zui halh bawk. 

"U Mapuia hi hua anga i inhre tlat te hi maw i huat tak tak vàng a ni lo. Nakinah in inkâr a țha lo leh si ang a, chu chu i natpui dâwna i ngaih vàng chauh a hetianga awm hi i nih hi," min hau titiha a lo tih leh na chuan min dêng ve dawt mai! Nih te pawha lo ni mahna le... Thlauhthlâk nih te ngaihsak loh nih te ka hlau êm êm a. Chûng ka thil hlauh ber te chu ka dinhmun a ni mêk bawk si a, chuvàng tak chuan ka nunah mi dang lakluh pawh ka duh lo zual țhìn. 

"Chutiang vàng te a lo nih leh lêk phei chuan a lakah rilru danglam pu lo tùra ka inven zui zêl a ngai dâwn a nih chu," ka ti ve leh chu min melh ram ram a.

"Mipa rilru nghet cherh chawrh leh chak deuh, hmangaiha ngaisâng taka enkawl thei tu tùr i mamawh," a ti a. Chuthil a sawi lai chuan mitthla ah u Mapuia hmêl leh pian phung chu chiang takin a lo lang nghâl a. Duh lo zeta lu ka thing nak chu, "I mak ve e, thil rêng rêng hi a thim zawng zêlin i thlîr a. I thlir dàn angin lo thleng ta miah lo ta se, ka rin ang hian u Mapuia hian a lo hmangaih tak tak che a nih chuan țha taka lo dawnsawn tum ve rawh," a ti leh hlak hlak a. 

Nui hak chung hian, "nakin zêl a kan inkâr a țhat loh ka hlauh vànga invêng tlat ka nih thu i sawi zo chiah bawk sia..." ka ti ve zauh, "I ninawm, Mak-i, hmalam hun hre lâwk tu nge awm? A enga mah hmâa i inlahrang tlat zêl hi a dik lo ka tihna mai alàwm," a ti deuh hlaih hlaih a, u Mapuia nên kan inkâr vàng ngawta a thinrim ta chiam mai chu ka nuih nghek laiin a tho tau vei hmak zui. 

"Awi! U Mapuia vàng mai maiin min ngei dâwn a maw?" ka ti fiam chu, bak hlur hian, "u Mapuia vàng nilo in i rilru put hmang beidawnthlák zet vàng khân ka ngei che. Hringnun hi a êng zâwnga thlîr zir ve tawh rawh, i naupanlai nun hrehawm zet ah khân tâng reng tawh lo teh, Beiseina nei rawh.. Hei, Beiseina mâwi deuh ang hi," min lo ti lêt chiam a. Ka nui tâwp riai riai min lo hmuh chuan inthiamloh hmèl deuh hian, "Ahriat," a lo ti leh nghâl lawi a. Min hrechiang tu ber pawh hian min hre thiam kim lo lutuk ka tih tawh kha...

"A pawi lo..." ka lo ti lêt sep chu ka bulah lo țhu lehin min lo kuah a, "khâng thil kha ka sawi tum a ni miah lo a nia aw," a ti leh mial mial a. 

"Ka hria alàwm," zàwi tê in ka ti lêt ringawt. Ka rilru put hmang hi chu ka dinhmun a ding ve tawh tu lo chuan min hriat thiampui tak tak ngai dâwn lo. Ka tân mékna ata hi kei ngei paw'n chhuah ka châk a. Rilru zalèn leh a eng zâwnga thlîr dàn thiamna   

neih te hi ka châk ngawih ngawih; mahse, khawi ațangin nge bul ka țan ang tih lah chu min kawhhmuh thei an awm hauh bawk silo. 

"A mak a ni tiraw, Kum inang rengah kan piang a, țhian kâwm rual kan nih țan aţang kan inkâwm chho char char a. Zirna inah zirtîrna thuhmun kan dawng chho zêl a. Zirna kawngah chuan ka ûmpha mai zêl che; mahse, Inchhûngkhura enkawlna kan dâwn dàn a in an loh êm avàngin rilru puthmangah ka phâk thei ta rêng rêng lo che chu a nia. I rualin i 'Inner child' a țhanlen ve zêl laiin kei chu ka 'Inner child' hi kan naupanlai hunah khân a țhan atâwp a. Ka sawifiah thiam dàn chuan maw ka chhûngrilah hian thlabârna a khat hmeichhe naupang a tâng a. Țhanlen ve châka kut lo phar chhuah châng pawh a nei țhìn; mahse, ka hre lo... Hlauh a nei.. Hlauh deuh a nei...!" awmze nei lo zet hian ka ti mial mial a. 

"Hey.. khati khân sawi țhìn suh ka tih kha, min phâk lohna pakhat mah i nei lo. Nichin a ka thil sawi ho zawng zawng kha chu theihnghilh vek rawh," Lucy chuan a lo ti țuau a. Ka dara lu a lo nghah chuan, "kan theihnghilh vek ang," tiin ka lo nui hak a. A insût feih feih rî ka hriat chuan, "I țap elo?" ka ti zui hû bawk.

"Țap mai mai lo," a lo ti bak hlur a. Nui kar kar chungin a lu-ah chuan lu ka nghat ve a. Inla puitling deuhin min han hau ve hlak hlak țhìn mah se kei aiin a țahbelh daih zâwk. Kei chu ka thinrim vàngin ka țap a, ani erawh thil lungngaihthlâk deuh a hriat chang te in a țap a. Movie leh lehkhabu te pawh a țahpui hliam hliam țhìn. 

"Țap tawh suh, ka pate sawn ka vêl che emaw an lo ti ang e aw" ti sa sa a ka fiam chu ka nâk a lo piai vak a. Nui kar kar chungin a kut chu ka hmer sak vang vang a. Ka kum rualpuite'n hmalam hun tùr thlîra ke an pên suau suau lai han hmuh châng te hian ka tawrh (trauma) ang zat ve pawh an nunah a thleng ve lo tih hriain ka na zual fo țhìn. Ka țhian țha ber lah Survival mode hre thiam ve hauh lo va seilian a ni bîk a. Hre chiangtu nei mah ila ka mamawhna phuhru zo khawpa hre thiamtu erawh ka nei thei ngaiin ka ring lo. Anni chu hmangaih taka enkawl seilen an ni a. Kei erawh ka tha neih zawng zawngte chu dam khawchhuak tùra beih nân ka hmang zo vek a. Tûn hun hi ka thleng ve thei ta a ni. 

"Nichin a ka thil sawi te kha chu i hlim ka duh vàng chiah a sawi ka nia, i haw lo tak tak tiraw?" Lucy chuan a lo ti leh a. "Haw lo e, theihnghilh daih rawh, a ho lutuk," ka ti lêt vat a. 

Inthiam lo tih hriat taka min lo kuah ngheh sauh sauh laiin ka lo maimitchhing riai riai a. Ka rilru chhûngril berah chuan hruai luh vawn vawn ka ni ni ber hian ka hria, ka hmâa thîr bang chhah leh sâng zet tuiek ina a bawm hlui rup tawh ding chu ka hmu thei a. Vàn chen thlengin a sâng a, mit a hmuh phak loh khawp a thuiin chu bang chuan min hual vêl bawk. Ka dinna chu Ramngaw kâng bâng ang maiin a ro êm êm a, hmun țhenkhat phei chu a kan na a la rei lo tih hriat takin a la khu vut vut a. Hnim hring leh Thingkung dam chhun te lah kâr lova thi thuai tùr an ni tih hriat zetin a vuai hnêp hlawm bawk. Ka hmâa thîr bâng chhah tak lehlamah chuan Pangpâr chi hrang hrang mâwi taka an vul chèk chûkna hmun Phulrai zau tak a awm tih chu ka hria a. Savate leh Phengphehlep rawng hrang hrang thlâwk kual mêk te pawh chu ka hre thei a. Boruaka beiseina te hmangaihna te thlamuanna te leh rilru damna zâm kual chèk chèkte chen chuan ka chhûngril chuan a hre thei. Thil dang zawng zawng aiin rilru damna mawlh chu ka thlakhlelh a ni. Thîr bâng tuiek rup tawh kawngkhàr hawnna chu hnaihin ka ban de de a; mahse, ka tawh fuh hma hauhin kawngkhàr leh ka dinna inkârah chuan ka nu a rawn lang thut a! 

Hlau hlawpin ka meng chhuak zui kawk bawk. 

Ka țhutna ațanga ka ding thut chu Lucy chuan "Engati nge?" a lo ti thuai a. Mangan hmêl deuhin min en bawk.

Harsa ti zet a thâwk ka lâk kâwk kâwk hnu chuan ka ziaawm ta deuh a. Khùr ru dar dar chung hian, "hawh, in inah chho daih ang," ka ti țiak a. 

Min chhàn lêtna pawh ngaihven tawh lovin pindan ațang chuan ka chhuak hlawk hlawk a, Kawngkapuia chhuak a pâwn boruak ka hîp rual chuan ka kûn zui hnawk a. Chil lem zui khalh khalh in ka mitthla a ka nu hmêl lo lang kha ka ngaihtuah lêt a, ka insehruh zui ngawt ngawt bawk. Ani vâng teh hrep khân alàwm mihring tu te mah inzawmna thar ka siam pui theih tâk ngai loh. Ka rilrua a chi tuh te hi a boral rual khân an thi tel ve daih silo va. Ka rualin an țhang lian ve zêl si a. Ani in a min hlamchhiah ang chiah khân tu te pawh hiah min hlamchhiah ve leh mai dâwn a ngaihna chi nung chu ka chhûngril ah hian an țhang lian nasa tawh lutuk. 

Min tântîr mêk na ata tlàn chhuah tuma zalênna Kawngka ka pan châng apiangin ka hmâah a lo inlan a. A tak ram thlengin min ûm zui leh țhìn. Kha nu sual zet khân a thih hnuah pawh nun nuam a ka awm a phal lo chu a nih ber hi. 

Mi tam zâwk chuan an nu leh pa thi tawhte chu, 'lo nung leh se aw' tiin duhthu an sàm ngai a. Kei ve thung chuan ka nu kha a rawn nung leh ang tih mawlh ka hlau! Mumanga ka hmuh țum chu mangchhe râpthlâk ber ka man zân a ni a. Ka ngaihtuahna a lo luah ve hun lah ka khawvêl thim hun lai ber a ni țhìn, a laka ka rilru puthmang chu HUATNA a ni em tih pawh ka hre lo. Dawithiam sual khawlhsen zet ang maiin ka hlau hlè tih erawh ka hria. 

Lucy chuan ka Phone a lo keng chhuak tel ve a, kawt a hlauhthawn hmèl zet a ka lo ding chu min rawn pan hnaiin, "U Mapuia message i dawng a," a lo ti a. "Ahriat, i țha tak zet em?" a lo ti zui zat bawk. 

"Ummm" 

"Ka thil sawi vàng khân panic attack i nei em ni?" a lo ti leh a. Min ngaihtuah hmêl deuh leh mahni inthiam loh hmêl zet hian min melh tîm dai bawk. 

"Ka naupan laia huan mawi deuh lem ka ziah țhìn kha i la hria em?" ka lo ti daih chu a hawihai nasa hman hlè a; mahse, hre chhuak thut ni àwm tak hian, "Hria e, Phul hmun zau deuha Pangpâr leh Thingkung tam deuhna kha" a lo ti ve a. 

"Ummm, vân lama thil zâm vêl ang deuh ka ziah tel țhìn kha a awmzia min zâwt țhìn tiraw?" nui lui paha ka zawh chuan ngaih ngam zàn lo hmêl hi a la pu a. 'Chhum zìng em ni?' tiin boruak a zâm vêl anga ka thil ziah kha eng nge a nih min zâwt fo zêl. 

Min chhâng lêt lo mah se, "Beiseina a nih kha" ka ti chhuak sap a, Lucy pawh a lo nui ve seih bawk.

"Beiseina, Hmangaihna te Thlamuanna te leh Rilru damna te pawh hi ka tân chuan țiau chhûm ang mai an ni. Ka pan hnaih leh an thâmral a, ka hlat takah an insawn daih zêl," ka ti leh mial mial a. 

Min hnêm duh si min hnèm ngaihna vak hre chuang silo ni mai àwm hian, "Ahriat" a lo ti halh a, A kut a ka Phone laksak pah chuan,"In inah chuan chho ang," thawven hmèl deuh hian ka ti zui a.

Ka duh loh dàn berin chumi zàn ka mumangah chuan ka nu ka hmu zui a. Kut min thlâkin țawngkam dêngkhâwng tak takin min lo hau pawh a ni lo; mahse, amah hrim hrim ka hmu chu ka rilru a hrehawm phah êm êm a. Kan Țhutthlèngseiah a lo țhu a, inhnawih tai hlar chunga a țawng mawlh mawlh lai chu hlau fahranin ka lo en ngawt ngawt a, 'bo leh rawh, bo leh rawh' tih chu ka hriattham lekin ka sawi mawlh mawlh bawk. Chutia ka hmuh phâk loha bo leh daih tùra ka duh êm êm lai chuan ka lam chu a rawn hawi thut a, hlau zet a ka kimki chawih chu ka harhchhuah phah ta hlawl mai. 

Chutia ka han harh chiah ruala ka thâwm hriat vàng chuan ka lungphu a rang zui dawt dawt bawk. U Maliani chu ka pain kut a thlâk leh tawh tih hrilh nawn ka ngai lo, u Maliani na tuar thâwm chu inchhir rî ni àwm takin a zui leh a. 

"Engati nge a?" pindan kawngka ațang chhuakin ka ti zui tuarh a, chhuat laia u Maliani lo let reng tawh chu ka pa chuan a lu ah a lo chhir chawrh chawrh a nih chu! 

"Ti tawh suh," tih vak pahin ka pa chu ka nam nghâl vak a "Lo inrawlh hlek suh, he mihûr nû hi nizànah a vak bo dâwk dâwk a, a sim ram ram theihna tùrin ka hrem a nih hi," Ka pa chuan a ti chhur chhur a, u Maliani chu thamloh hmêl zet a enin a hmai chu a kê in a tlawh kual vêl a.

"I nupui hi hetianga awm tawh lo tùra i duh te chuan i nun hi sim tum ve ta che, zîngkâr ațangin zàn thlengin i rui reng a, a pasal angin i awm ngai rêng rêng hleinem," tih paha u Maliani ka kaitho tùr chu ka tukkhum ah min rawn bêng ve nghâl chawrh mai! 

" Nanga pawh chu sawk deuh i duh em ni?" ti pawr leh huarhin ka bekah min bêng nawn leh chawrh a, ka lu hai mup avàng chuan chaw ei dawhkàn chu ka chelh vat a, "Tu nge i riahpui sawi nghâl rawh," țêng chuai a tih paha ka pa in u Maliani tlu sawp reng a pêt leh pawp rual chuan Chemtê awmna lam chu ka melh ngat ngat tawh. 

"Pa-a tumah ka riahpui lo, nizàn chu i pum a nawm loh thu i sawi avàngin Card pawh rei dêng lovin i țhiante paw'n an hâwsan che a. Kan mu daih a nih kha.. Zân khuain i bulah ka mut reng kha," u Maliani chuan a ti a, ka pain a thu sawi rin loh hmèl zeta pêt leh nghâl mai a han tum chu," ti tawh miah suh, ka vit hlum duh mai ang che," ka ti chhuak ta tuarh a! 

Mak tih hmêl zeta min lo en chuan huatna te nên kha zet hian ka lo melh lêt a, hriamhrei ka chuh miah lo; mahse, tûnah tak hi chuan hriamhrei chuh chu hrehna ka nei miah lo tih ka inhre chiang lutuk! 

"Kut thlâk tawh suh," khùr dar dar a ti leh in ka pa chu rum takin ka melh lêt a, ani mi nunrâwng lutuk chuan a thisen kai ve tho ka ni a. Ka sawi zawh chiah kha tih hrehna ka nei miah lovang tih chu a hre thiam ve ta a niang a ding ngawi ta reng a, mak min tih hmêl in rapthlak min tih hmêl tak zet bawk. 

Chhuat laia u Maliani let hlâwm reng chu a darah kuahin ka kai tho a, ka pa erawh a kal chhuak nghâl daih. Țum dang angin stool emaw hmanraw dang emaw thawhin kut min thlâk zui ngat se chu, ka sahimna tùrin Chemtê ka chuh ve duh hial tak tak ang. 

"A na viau em?" ka ti a, chhuatah chuan țhusawpin u Maliani chuan a thin zâwn chu a dawm vang vang a, ka pa khân a pêt khawloh sak deuh a niang thâwk lak harsa a tih hmêl êm êm a, a chal leh bek vel te chu a thî nen nuan bawk nên a lainatawm tak zet.

"Ka âwm ruh hi a na deuh riau mai," a tih chuan a dara dawm ngawt bak han buaipui ngaihna vak ka hre bîk silo," A sawi ang khân ka awm miah lo asin," a lo ti leh a, a thusawi chu ka ring thlap. A chhan chu mipa dang a riahpui chang a ka pain a hriat chhuah chuan insawifiah tumna nei lovin ka pa kut a tuar mai zêl. 

"Umm, lo awm pawh ni la a duh hun hunah kut a thlâk ziah thei che tihna pawha nilo. Ka pa hi chu a kut a ramin a nunrâwng ropui si a, hâw san daih la," ka ti mawlh mawlh a, chu chu amah ka duhsak theih dàn awm chhun a ni.

U Maliani chu harsa tih hmêl zetin a rawn nui sak a, "Hàwna tùr ka nei hleinem," a ti leh mai a. Rilru ipik zetin thâwk ka la vak ringawt. 

"Nungkawng dai sual laklawh chu a hrehawm asin, siam țhat leh a harsa tawh țhìn si a. Nang erawh ka ngaihtuah lutuk tawh lo che, Mapuia i nei tawh a, a enkawl țha dâwn che tih lah a chiang a. He inah hi chuan lo kîr leh tawh miah suh ang che.." thâwk lâk tãwi zet chung hian a ti mial mial a. U Mapuia an sawi tel sek zêl hian lung a ti zîng zual. 

"Mu ila ka zia àwm deuh mai thei, eirawng chu lo bàwl mai rawh aw," a ti leh a. Ner sak sak chunga a ding tur chu ka pui zui thuai a. 

Khum a u Maliani mu saisîr bâm chu ka thlîr deuh reng a, kan inah hian ka awm reng a nih chuan ka hmalam hun chu hetiang tho hi a ni dâwn tih lah a lang chiang êm êm bawk.

🖋 In Inchhûngkhur inenkawlna boruak vàngin i fate khân an țhiante rilru put hmang ang pawh pu ve phâk lo angin an lo inngai reng thei a nia...