Sir

SIR
Abbra Reo Ririni Khiangte

(PitarteiSualfingi😈)

Hei lo chhiar phawt ru aw. 

💫Insawithei in uang hle mahse mihring nun a lungchhiatthlak lai ber chu a kawng zawh tur a thlang theilo hi a ni. A hmalam kawng zawh tur in a rawn ko hunah chhang ngam turin huaisenna lo neita pawh nise engtiangin nge a hmachhawn ang tih chiah a thlang thei ani💫





Christmas hla play dup dup leh naupang sahawk ri le lu thawm chu zo lo in inchung chhuah chhohna step ah chuan ka pen chho nghal hlawk hlawk.

Thlan in min bual a, ka lungphu lah nasa lutuk in a inthum rawn dawt dawt a, thawchham tur ang mai hian ka boruak hip luh a tlem nghal vek.

"Haw velah Bp check ka ngai a nih hi" ti hap in step chho ah chuan thawk ka la chho kawk kawk mai.

Ka Bp a hniam hian thawm bengchheng leh ri nuaih nuaih ah ka awm in ka talbuai vek zel.



Kawngkhar te ka nam hawn rual chuan thlasik thlifim vawt hit var in min lo chhem nghal hak a, ka harh deuh kawk mai.


Inchung zawl lo thim mup tawh ah chuan ka kal chhuak a, kawngkhar ka nam phui leh tak ah chuan naupang sahawk thawm chu a reh hmiah a. Ka awm dan phung mumallo zet pawh hriattheih khawpin a ziawm riai riai bawk.



Thlasik lai chuan chhun aiin zan a rei miau a, tunah pawh tlai dar 5:30 a pel fel țawk nangin khua chu a thim ruih tawh. Kawngpui ah tawt zet a lirthei inhung zui te leh dawr țhenkhat lun em em te chu chiang zet in a hmuh theih a, Christmas a hnai tawh bawk a, khawpui boruak chu a ni dup dup ti ila a fiah ta ber in a nia ka rin ni.




Ka kut hnung lam a ka thlan rawn chhuak hruk thuak thuak pah chuan Van thengreng zau leh thiang kuk mai lan dan ti hmuhnawm zual tur tak a thlasik kawng zam paw chek chek chu hmuhnawm ti zet in ka thlir chho a, thla eng kung kiang lawk ah Arsi eng fal bik nalh pahnih an awm bawk. Chung ho hlat ang reng tak ah chuan Arsi pakhat a en dan pawh mei alh rawng lek lek a eng êng hi a awm bawk. Chu Arsi ka hmuh rual chuan atthlak tawp in ka chhungril chu a che kual rawih rawih.

Nie, khi Arsi khi chu amah nen chiah a kan Arsi kha ani!


Amah kha...


"I țha zel ang tiraw?" ti sep a, amah ngaihna nasa lutuk nen mit ka chhin sawk chuan A HMEL chu chiang zet hian a rawn lang a. Ka ngaih lutuk vang a ka țah rawn chhuak nghal ut ut chuan chhungril ațangin min hnawh sa nghal pup pup. Inhmatawn a kan din chang apiangin a mitmeng pa lutuk, dum tak zet khan zîm sún in min en chhuk run țhin.





"Ka ngai che tih i hrethei em?" zawite hian ka ti leh a. Ka ngai tih ka sawi apiang a nui suk pah a a kutphah lian zet in ka biang a dawm țhin lai bawk chu ka mitthla ah rawn lang uar uar in ka mittui a rawn luang thla lum pap, duh lo zetin in inthing harh nghal nawk pahin ka mittui chu tuai hul nghal thuak thuak mah ila, mit ka men rual a a hlimthla thlawk darh chum chum te, duat hmel zet a min melhna mitmeng tawrhharsa zet te kha ka kham lo! ka thinlung fan kual rawih rawihtu a zun tawrhna lutuk pawh hi ka mittui ko chhuak ziah tu nimahse ka thlakhlehna a bo thei bawk silo.



"Theinghilh tawh rawh.. bum hmang leh phatsantu a nih kha" ti rilru mawlh mawlh in ka mittui chu ka hru tawk tawk. Ka mitthla ah chuan bum ka ni tih ka inhriat chhuah ni te, hrilhhai lutuk a hmeichhe dang nen a ka hmachhawn laia hmelhriat loh ang mai a min melh run lai te chu a rawn lang leh nghal zut zut.

Ka insehruh a, nasa lutuk a a zun ah uai a, kan pahnih inhmangaihna khur ah tawpchin neilo khawp a ka tuiral lai tak a phatsan leh kalsan ka ni! Ka thlakhlel lai ber leh kan inkar a hmangaihna vang a ka hlim lai ber a bum ka ni! Mahse, bum hmang kha khawvel a ka hmangaih awm chhun anihna lai tak chuan chaklo takin min siam leh țhin si!


Ka mittui khap let tum a van lam ka melh rual a Arsi eng zet ka han hmuh leh zet chuan a zun ngaih luat vangin ka puak darh leh ta! Rang zetin kâ ka hup bet chawt a. Ka beng chu a hmui lum thup a a nawr ang mai a rawn lum pup pup in "ka hmangaih che" ti sup riin a rawn zui a! Thawk hip let kawk in beidawng zet hian lu ka bu nghat nghat a.



Nie, duhlo viau mahila zan thlasik boruak vawt hit vur te, Van thengreng in zar pharh duai a thla leh Arsi rawn inlar hmasa te khian hun liam tawh ah bawk ka suangtuhna chu a hruai kir leh a, ka nat phahna tur ani tih hrereng chungin 'ani nen kan inhmangaihna kha ka la kham loh em avangin kan pahnih thawnthu kha chhui let leh ka thlang fo țhîn.




Ka kâ ațang a thaw chhuak ham ham pahin ka vanvadak a. Mittui nen a inpawlh ka chil chu lem dak in ka han thaw leh hawk a. Bumtu zûn ah uai a, phatsantu hmangaihna sal a tan hi hetiang tak hian ka la na ang tih lo hrelawk niila chuan ka nun ah thuk zawk a a lo luh hma khan dan dân kawng ka zawng ngei ngei ang mawle.



"Nibiru" ti sep in meialh rawng Arsi chu en in ka nui lui ngial nang a ka thinlung erawh khawharna leh amah ngaihna vangin kut a țham nawk nawk ang mai hian a na thung.








'Sir, enteh, khi, khita Arsi mei alh rawng ang deuh khi Nibiru chu a ni ngei ngei ang tiraw?' ka kutzungchal a Arsi han kawk va pah hian uar zet in ka ti a.



Thimhlim a ni a, school campus tlang pawng hmawr ah ding kan ni bawk nen thli a tam in a vawt kher bawk.





Ka bul ah ngawi reng a kan Sir ding run chu chhanna beisei deuh a ka thlek chhoh chiah chu Arsi ka kawhna kut chu ka la thla nghal zal zal, atthlak tih hmel lutuk hian nelawm loh zet in min lo melh chhuk khúi a nih chu mawle!




'Tinge? Nibiru, Nibiru kha i hre ve lo a mi?" zawite a ti sep a Arsi ka han melh leh zeuh chuan Sir chu a din dan siam rem nghut in min hmachhawn in a rawn ding nghal run a.

A nelawm loh nasa mai bawk si nen min hau hrep tawh mai dawn emaw tih tur khawp a a hmel tak run chu inthlahrung dek hian ka melh tim dai.


Mahse, ngawi run in overcoat ipte a zen tak hlun ah chuan Nibiru chungchang bawk chu intihre zet hian ka sawi zawm leh a.


' kha... Arsi thi, planet x, khawvel rawn su chhe tur an tih Arsi thi, aih, Arsi kawngbo an ti zawk in ka hria, khami Arsi kha mei alh hlawm lian pui ang ani an tih kha.. khami chanchin kha i hre ve lo maw?' min rin loh hmel em avang chuan nikum a Nibiru chanchin an sawi hlut kha amah hrihfiah pah deuh chuan ka han sawi leh ngial pawn Sir lah chuan mitko ti hnim khui hian ngawi ngul in min lo melh run duh lek chauh.


"Engtin nge i hriat loh theih zawk a, tv ah pawh Mizo țawng meuh in an lo ti chhuak tawh" Nibiru chungchang a hre miah lo mak ka tih em avang chuan ka hma a kan Sir palian leh nelawm loh khawp a țawng duh lo zet ding run mai en chho ha pah a ka tih leh chiah chuan
'Lalnunzir, i ngaihtuahna maksak pui pui kha sawi chhuak țhin lo teh' a rawn ti hmuk.

A țawngkam hi dawnsawn a nuam lo thei fek fuk si.


'Naaa, Scientist te pawn kum 2010 ah chuan mit lawngin Nibiru a hmuh theih tawh dawn an tih mawlh mawlh kha, khi mi khi a ni chiang lutuk, mei alh rawng ang deuh in a awm dawn an ti bawk' dik inti zet in uar fe a ka tih leh meuh chuan lu min thin khum nghut in Sir chu a hawi sawn ta nghut.



'Zonet leh Lps ah pawh Nibiru chanchin chu an sawi nasat em kha, khawvel pum in an buaipui luai luai lai a nang meuh in i lo la hre miah lo hi thil mak tawpkhawk ani' ka ti leh chiah chu ti lui tih hriat tak a nuih suk pahin a coat ipte ațang chuan chahbi a rawn khai chhuak nalh a.



'Ok, i NIBIRU chungchang chu duhtawk ila class room lo va hawng rawh, midang pawh an lo kal dawn tawh ang' ti sup in chahbi bawr chu min pe a, mipa toilet panin a kal nghal nul nul anih chu!


Hepa hi chu ka nel thei thlawt lo, zirlai naupang hmeichhe dang lah hian an star thei si, kei chuan a nelawm loh ka ti, a țawng tam loh tluk zet in teacher ho ti ti karah pawh ngawi ngul a țhu in an thusawi a ngaithla ngur ringawt zel. kei nen erawh thil ho te te ah kan inhnial țhin thung. English Literature subject a la a, class a rawn lak tawh hi chuan hmeichhe ho hi an lai țut țut zel. Ka star ve lo tih a hriat vang nge ka hming a lam peih ber a, zawhna siam hlek se 'nang, Lalnunzir...' a ti tel ngei ngei ziah.




Class x board exam hmachhawn tur kan nih avang in class x ho hi October thla tir ațang khan study camp kan nei țan a, kar tin kan zirtirtu te hian a inchhawk in zirlai naupang vil pahin min riahpui mai zel. Zanin tlai ber kher ah midang an lo lang har lutuk chu a hun lo tak zet!



'Sir' hlauthawng ru zet a ka au lauh chuan a ding chawt. Rang zet in kawngpui lam ka en a, zirlai naupang dangte hmel a la rawn lang lo. Chuan, keimah chiah a school building lian lutuk leh thim țhup bawk si hawn a, room chhung ril ah luh a, light tih en ka ngam teuh lo mai.




Sir chu muangchang in a rawn inher ruai ruai a. Ka au chhan min zawt awm ang ziazang chuan a mitko chu a ti kang uk tih thla eng hnuai ațang chuan ka hre bawk.


'I rei dawn em?' ti sep a kan school chheh vel reh duk ah keimah chiah a awm fal rei ka chak lo tih hriat fe a ka hawi kual hrek hrek tak ah chuan Sir chu a nui suk mai.


'I hlau em ni?' ti sup pahin chiang zet hian min rawn melh run a, ka lo en ve chiah bawk nen thla eng zet hnuai ah chuan kan mit chu a in tawng siah. Min en run chung chuan muangchang hian a rawn let phei bawk.



'Aih.. a teuh lo' ka tih deuh vak chuan ka thusawi chu awilo tih hriat zet a nuihza insum chungin a han hawi sang nghal vuh a. Chahbi chu hum bet in ka thaw ta hak ringawt.


'Diktak chuan ka hlau pawh a nichiah lo.. ih, i rei dawn em ka ti ringawt a lawm'

'I hlau lo chiah maw?' ti sup in a nui leh suk, min naupangchhe cheibawl riau. Mahse, ka sawifiah thiam lo. Keimah chu ka sa hat hat ta mai.


'Ka hlau lo' nui leh suk in a rawn pen hnai zel bawk nen ka thawk rawn rangin sir mit ah tak chuan en let harsa ka ti ta kher mai.



'Aaaa, hlau ve tho e, a thim si, kan school awmna hi a fal in thingkung a tam ropui si, tumah an lo la kal ve bawk si lo a...'


Sir chuan min hnaihchilh tulh tulh a, keimah ah a mit chu a fu ngur tih ka lungphu rang dawt dawt ațang chuan ka hre thei.

'Yeah.. Tumah an lo la kal lo' ti sup in ka hmaah rawn ding hmiah pahin chiang fahran hian min melh ta run a. Chil lem khalh in thawk ka chelh nghal tlat bawk.



Ka taksa hmalam chu a insi deuh thaw a, a perfume rim pa zet leh a pangtilum sa hat hat pawh chu ka hre thei, thinphu dep dep leh thawk pawh thaw chhuak ngamlo a ka awm chu hrethiam ni awm tak a nui suk in a kutphah lehlam chu a rawn lek chhuak ruai ruai a. A aia nasa mah a ka lungphu su dup dup leh ka thawk rit nghal sauh vang chuan ka țang hah vek.


Min melh chhuk vung vung chung a ka biang a rawn khawih dawn lai tak chuan Bike head light eng zet hian min rawn chhun ta siah a! Sir chu rum nghut in a inla hrang nghal hmuk.


'Awi, Zir, in va kal hma em em?' Duata nau Kimi chu bike hnung ațang lo țum thla tharh in a rawn ri nghal bawrh bawrh.

Thil thleng zo chiah vang kha nge mawni, ka sa hat hat reng a, ka tha chu a khur ru dar dar bawk.


'Duata, Aziri hian chahbi a kawl, class room lo hawng r'u' Sir chuan ti nghut in min melh thuak a, a kal sawn ta daih a.


Dar 6: 30 pm ah infuihna te neiin lehkha zir hma in kan țawngțai rual țhin a, kan class ah hian mipa 28 leh hmeichhia 20 kan awm avang in kan thawm pawh a ring țhin hle.



Lehkha kan zir lai te chuan mak tak maiin Sir ringawt ka lo ngaihtuah leh veng veng ţhin, hmeichhe ho hian an star țhin em em a, 'a pa' zia thu an sawi uar thei hle, chutiang lam chuan vawi khatmah ka en ve ngai loh avang in ka star ve ngai miah lo. Mahse, zan in kha chuan chiang lutuk a min enna vangin ka sa pup pup a, thawk pawh ka thaw ngam lo a nih kha! Kimi te unau kha lo thleng ta lo se Sir khan ka biang ah a lo khawih a ngem le?


Ka ngaihtuahna chu atthlak ti lutuk hian lei ka chhuah vak ringawt. Ka lai deuh leh nghal emmawni ka biang chu a rawn sa leh hut hut tawh.


'Azir?' ring zet a ka hming a min au ri vang chuan phu dawrh in min au tu lam chu ka en a.


Class 9 room a ka lehkhazirpui hmeichhe panga te chuan kawngkharpui lam an melh țhup tih ka hriat tak ah chuan rang zet in ka en ve nghal dawrh. Mahse, ngawi ngur a min lo en run tawhtu mitmeng ka va hmu chiah chu ka che buai nghal vek.

'Aw.. awi ah' ti bah nawk in ka ding chhuak hlawl, ka țhiante chu an nui huk a. Hrethiam lo zet a ka va en kual chuan za lutuk hian an lo nui ta hawk hawk.

'Eng nge inhriat a?' Ngawi reng a kawngkhar biang nghengin Sir in min en ngur bawk nen ka che lai kual vel vek.

'Sir khan Syllabus i zir loh chuan ka lo en lawk ang a ti a' Kimi'n a rawn tih sar sar tak ah chuan rang zet in ka bag ațang Syllabus chu ka la chhuak a, kawngkhar a Sir lo ding reng chu inthiam lo ru zet in ka va pan phei.


Min auhna hre miah lo a ka lo awm avang khan min hauh leh ngei ring rilru chungin Syllabus chu ka pe zal zal a.

'Nibiru bawk em ni i lo ngaihtuah?' vei nuih suk pahin lehkhabu chu a la nghut.

'Maw?' Min hau lo chu mak ka ti tak zet.

'Zir țha rawh aw, brake hma in i thiam thlem bik lutuk ang' ti sup in mit siai suk in min kal san nghal daih.


'Sir kha apiangthar ami a? Vawi thum ngawt a auhna che i hre miah lo chung pawn a hau miah lo che' ka lehkhazirpui ten an lo tih sap sap chuan sawi mai tur pawh ka hrelo.

'Vawi thum maw min auh hman a?'

'Umm, i chhiar ve bawk silo a, ngawi rengin dawhkan chung a i note book i bih ngur ngur a, ko na i hre thei bawk silo, i damlo mi?'

'Aih.. ih, ka rilru in ka thiam sa ho ka sawi a..'



Lehkha chu ka zir zawm leh ngial nangin ka rilru ah a lut hleithei tawh meuh lo! Sir ringawt chu ka ngaihtuah ngut ngut, ka star ve țan a niang tih te'n ka ngaihtuah thul.

kum 14 ka ni ve tawh, ngaihzawng emaw star emaw ka la nei lo, ka rualpui te chuan star te neiin ngaihzawng an nei fur tawh, kan kawm țhinte ngei pawn ngaihzawng pahnih pathum an nei tawh. Mahse, keichu unau a naupang ber ka nih vang nge mawni inchhungkhur ah pangchang deuh a awm a, nu leh pa kiang ah zan ah pawh la mut kuk te hi nuam ka la ti a, vawi te khat mah mipa ka ngaihtuah zui ngut ngut ngailo.



Zanin ațang erawh ka rilru put hmang chu a danglam țan a, ka mitthla ah Sir ringawt hmu in 'Nibiru bawk em ni i lo ngaihtuah leh tawh' ti sup pah a min fiam ve ngei lai a a hmel awm dan te chu ka ngaihtuah let nawn ngut ngut a. A chang leh lai lutuk in ka insangmar leh nghek țhin.



Dar 11pm ah chuan darkar chanve chawlh kan nei a, ka țhiante chu phur zetin an tlan chhuak nghal sap sap. A chhan pawh Sir in kan thingpui in tur a lum a, thingpui in pahin dar11:30 hma chu Sir bulah an țhu khawm thei dawn miau a.



Ka han chhuah chhoh chuan thingpui no an lo dawm far tawh. Kan school Guitar chu mipa in an perh a, Sir erawh hmeichhe ho in an lo bawr leh luih tawh, a thil sawi apiang chu an nuih pui har har hlawm a, a hriatna a zau in zirlai kaihnawih ang a lang silo, kan zirlai atan țangkai tak si hi titi satliah in min zirtir a thiam riau bawk.






Manipur ațang a putea te in ah a rawn awm a. A kum zah hi rin ngaihna kan hrethiam lo, a rawn thawh tir khan 'kum engzat nge ka nih in rin?' tiin kan class kha min zawt a. Kum 25-30 inkar kan ring fur. Tuman kum 30 a pelh kan ring chhin lo. A tawp ah 'ka la lang young hle ani maw?' ti sup in a kum zat a kan rin aia a upat thu a sawi a, a kum zat dik tak erawh kan hre ta lo.


A putea hi he mi khua ah pawh mi zahawm leh kawsa thei pawl an ni a. Ka pa nen pawh an inkawm ve fo avang in quarter ah a lo chungkai ve fo a. A sawi dan chuan kan sir hian 'IPS officer a inziak tling a. Mahse, anu leh pa te'n a zawm an phal leh ta silo a. Lungawi lo tak chung in a nih chak em em IPS hna kona pawh chu a chhang ta lo, chuta țang chuan an pafa inkar chu a țha hleithei tawh lo a. Apa in Manipur a an chhungkaw sumdawnna enkawlpui tur a a duh viau laiin Mizoram ah rilru tih thawven nan tiin a putea te chhungkua a rawn fin ta daih. IPS officer hna pawh chu zawm ta bik chuang loin High school ah zirtirtu hna a rawn hmu nghal a, tihian a nu leh pa te nen an inkar țha vak lo in helam ah a cham ta char char' niin a sawi a. IPS hna chu ka lo ui pui ve em em ringawt mai ni.


'Khit Arsi eng fal deuh khi eng nge a nih in hria em?' Sir aw thum dut in a tih sup chuan an awmna lam chu ka hawi rang kher mai.


'Khi khi maw, Chawngmawii leh Hrangchhuana an ni lo mi?' An ti sap sap a. Hmeichhe ho in Arsi ngawt an en lai chuan nuihza insum tih hriat zetin Sir chuan min rawn melh a. Zanin a chet dan engpawh hian ka ngaihtuahna a ti buai nghal zel tih a hrethiam der bawk silo.



'Khi chu ka hre ve a. Mahse, an piah a Arsi eng fel deuh zawk khi a hming in hria em?' ti leh sup in thingpui chu a dawt a, nichin a Nibiru ka tih chiam kha a sawina ani tih ka hriat chuan ka melh rum ta vak ringawt.



Hmeichhe ho chuan an hriat loh thu an sawi sap sap a. An mahni chu be reng mahse thingpui lumna inte a mei lum ai chung a ka țhu chu Sir chuan min en tlat.


'Kan zing a pakhat hi chuan a hming a hria a sin' a va han nghal tak! Tunah sawn fiamthu thawh nan min hmang tihna ani em?

'Tunge a hming hria.. Sir, eng nge a hming?'



Thla eng rinchhan chuan Sir mitmeng chu a de sawt sawt hian ka va hmu. Mahse, hawi sawn in thuk lam chu ka en ta daih a.



'Hre ve lo mai ru.. oh, tihian ti ang, eng Arsi nge a nih tih hriat tum ula, a hre hmasa apiangin min hrilh dawn nia' a ti ta sup. Tawite hian ka nui ve sak bawk.



'Het, zial zu ru in awm alaw?' Sir in a tih hluk chuan Mipa toilet hnung lam chu a thum huk, nui ruh ruh in mipa ho chuan class room an pan ta diak a, keipawn ui ru zet in ka mei lum ai chu ka thawh san a, ka thingpui no si zo inher chuan tu emaw awm tihrawl nghet zet ka su ta chawrh.

Aiah țhat a ka hawi chhuah chuan a awm dawm a Sir lo ner ve sawk nen chuan kan in melh leh siah tawh.

'Tinge ka hnung ah ngawi reng a i lo din a?'

'Hmeichhia ve si, i lu a va chang ve'

'I thu lo' ti hmuk in no chu a dahna ah ka dah a, a over coat kha ha tawh lovin turtleneck dum a taksa inphut nalh zet nen a inrem thlup a ha a, inte ațang ka chal tuai vat vat a ka chhuak tur chu min en leh run tawh.


Reilote room dang a lehkha zir te nen kan awm khawm leh hnu chuan kan brake chhung a lo zo der. Khua a vawt bawk si, puan lum a intuam a, mutthil a chakawm zia kan sawi sap sap reng a. Tiranga lo ei hawng hawng tawk lah bang lo.



Dar 12 a rik chuan kan zirna room țheuh kan pan leh sang sang a. Tihian zingdar 2 thleng kan zir a nga, dar 6 ah tho leh in zing dar 8 thleng kan zir a nga, in lam ah haw in class nei turin kan kal leh dawn.


'Kha.. ka en zo tawh' class 9 room pan thlakna step chep zet ah ka chhuk thla tawh chu ka ding dat. Ka hnung ah Sir pawh chu ka lehkhabu kengin a rawn ding fel nghal der.

Ngawi rengin ka ban a.
'Zir țha rawh aw'

'Umm'


Ka note book chu khup in Syllabus chu ka keu a. Ka chhiar țan zet tawh, rang lutuk in phek hmasa ber chu ka keu let leh nghal nawk nawk.


(🌟 NIBIRU naupangte zir țha rawh aw) tih hi Gel pen tuiin nalh lutuk hian a lo inziak anih chu! Mak ka ti bawk si, Sir in a lak hma khan phek hmasa ber hi ka thai hnawk lo tih ka hrechiang bawk si nen Sir in hetiang thu a lo ziak tur a ka ngaihtuah ringawt pawn ka chhungril chu sa pup pup in ka tha a khur ru dar dar. Arsi lem lah chu a la ziak nalh em em zui!







Hmanhmawh zet a tlan khut khut ri chuan ka suangtuahna ata chu min phih chhuak hlawl in inchung chhuahna kawngkhar tê lam chu ka en nghal dawrh, ka mi beisei loh lutuk mai thlan hluam a a rawn chhuah hlawl tak ah chuan ka nuilo thei lo.

"Nathan"

"Miss, hetah i lo awm ve maw?"

"Umm, tinge hetah te i rawn kal a, lo kal rawh, inhnuai ah chhuk ang" hah hmel zet a mipa naupang kum 7 bawr thaw hliam hliam a lo ding lam chu ka pan phei a. Khua chu a lo thim mup tawh. Mahse, Arsi leh thla chu an eng zual sauh thung.




"Miss, kan inbiruk siak a"

"Ani maw? Mahse, inchung sang ah chuan biruk loh tur, i tla sual palh ang" a sam hnim lai ah tuai sak zeuh pah a ka tih tak ah chuan thuawi fe a bu lap lap in a vawn tur a ka kut pek chu a rawn hum nghal chat.




Lalnunziri ka ni a, hmeichhia ah chuan a vantlang pawl 5'6 a sang ka ni, ria chum an tih ang deuh in ka inkhaithli thlarh a, ka thawhpui te hian 'banbul lian țeng țung leh tai puar ul i nei ve lo hi lawm hle rawh' min ti fo zel. Ka sam hi kawng chen in ka zuah sei hnap a, ka awmbawr leh mawngbawr vawng lah hi ka kum a naupan deuh lai kha chuan ka zahpui fo a, tunhnu ah erawh inchei nuam ka tih phah ta viau. Kan unau hi pathum niin kei hi a naupang ber leh hmeichhe awm chhun ka ni, kan hma lawk a kum lo thar tur ah hian kum 24 ka pum ve tawh dawn a, ka u te pahnih chuan nupui neiin fa duhawm tak tak an nei tawh. Ka u chiah Zirsangpuia te nupa leh ka nu leh pa te nen kan la cheng ho a. Kan upa ber u Sangzela te erawh in hrang changin kan veng țhenawm ah an inbengbel tawh thung. Ka u te nen hian kan kum a inthlau deuh tih ka sawi tel hram ang. Ka pa hi Electric engineer ani a, ka naupan lai chuan thingtlang ah ka pa an sawn kual țhin avang in khawpui aiin thingtlang ah hun ka hmang tam zawk. Tun ah hian private school pakhat ah zirtirtu hna ka thawk mek a. Nuam ka tih bak ah naupangte pawn min ngaina in ka zirtirna chu nuam an ti ve hle chuan ka hria.


"Kan bang thei tawh" phur hmel zet a Nathan a au tak tung ah chuan nui hak hak in a ban ka vawnna chu ka thlah a. Zirlai naupangte leh Zirtirtu ten Advanced Christmas kan hmang ho a, chawhlui kan kil ho bak ah kumin a tan school kal tawpna ber ani tawh vangin 'after party' ang reng deuh siam in vawiin hian kan bengchheng ve hle.

"Nathan, school kal a ngai tawh dawn rih lo bawk a, in lam ah fel deuh a awm tur aw" ka ti a, a hmai bul ah kun hniam in a sam pheng hliam chu ka tuai thur sak a.

"Miss, naktuk ah school ka lo kal dawn lo maw?"

"Umm, Christmas a hnai tawh sia, bazar te i chak ve lo mi?"

"Aaaa, kei chu Miss, school ah lo kal zel ka duh e" pawi tih hmel zet a a tih ve nui nui chuan nuih hak hak in party neihna hall ah chuan ka kai lut a.

He mipa naupang te hi KG a mi a nia, engang chhungkua nge an nih ka hre ve chiah lo nangin kan inngaina reuh em em a, kei ngei pawn naupang dang ang ngawt a en harsa ka ti. A mitmeng dum fiah kak leh a hmui phir nalh zet hian tu emaw a an em vang te pawh ani mahna. Teachers parents meeting kan neih chang pawh in anu leh pa nilo in api leh pu emaw, ani emaw te an rawn kal mai țhin avang in a nu leh pa te ka lo hmu ve lo.


Naupang dangte pawh an chhungte nen a țhen an rawn chhuak sap sap a. Mipa naupang inhlei fal tlan kawi zawr zawr an chhungte'n an auh tak lawng lawng lah bang lo.


"Miss Azir, Nathan-a chhungte hi an la rawn kal miah lo" vice principal in ka beng bulah a rawn tih chuan ka meng phawk kher mai.


Mahse, ka kut chelh a midang che tla vel en kiau tu mipa naupang chu vengthawng ru zet in ka insiam rem a.


"Api kha chuan ka rawn hruai ang a tia, pawn ah an nghak pawh a ni mai thei" a ti leh a.

"Ok, keiman a chhungte chu ka lo nghahpui mai ang" ka tia. Nathana bag chu kan han zawng leh rih a. Give exchange a a gift dawn pawh a bag ah ka khung sak a. Zan thlasik khawvawt zet hnuai ah chuan pawn lam pan in kan inkai chhuak ta dat dat.


"Nat, vawt i ti em?"

"Aih, Miss, Santa in toys tam tawk min pe dawn sin" min chhoh en ha pah a a lo tih chuan ka nui chhuak hak.

"Ok, Santa chuan naupang thuawi te chiah Toys a pe dawn, chuvang chuan school kal loh pawn chaw țha deuh a ei a, tv en ngut ngut loh tur aw"

"Yesss, ka fel ngawt ang. Apa pawn Tv en nasat lutuk chuan mit a chhe thei a ti a" a ti ve reuh a. A kut then lap lap a ka bul a kal pah a țawng ve siam siam mipa naupang chu zuk melh zeuh in lu ka thing nak.


Kan Sir pawh khan fa te neiin khawi emaw lai ah chuan chhungkaw hlim tak a din ve tawh ngei ang.


Nathana chu school gate bul a țhutthleng ah ka țhut tir a, ke then lauh lauh pah hian a titi ve barh barh a, naupang school bang an chhungte'n an lo hruai chang pawn anu leh pa an rawn lang ve ngai miah lo hi a chhan ka hre chak ta riau.



"Nathan, ih, in inah tu te nge cheng?" a nu leh pa chanchin zawh dawt ka hreh tum hrang avang in nui chungin phur hmel tak hian ka ti a.

"Api leh apu, ani(aunty) apa pawh, chuan, Miss a chang changin anu pawh" a ti ta reuh a.

"Anu chu a chang chang chiah in maw?"

"Umm, anu leh apa kha an buai thei lutuk a, achang chuan anu nen veng dang a api te in ah kan riak țhin" eng emaw ngaihtuah bing hmel zet a a tih ve tak ah chuan a nu leh pa te an ințhen tawh a tih ve na ah ka ngai ta deuh. A rilru tih hlim sak tum in Christmas chungchang bawk ka sawipui leh ta daih a.


A fel in a țawngkam a fel fai reuh em em bawk nen a nu leh pa an ințhen chu pawi ka tihpuiin ka lainat ru vawng vawng mai.




A tam zawk an haw zawh vek hnu ah scorpio car dum chuan kan school gate chu a rawn pan ding tih ka hria a.

"Apa motor anih saw" phur zet in Nathan-a pawn a ti ta reng.

Țhutthleng ațang chuan țun thla tharh in ka kut ah a rawn hum chat, a bag khai sakin muangchang a motor lo tlan lut chu ka en a, a nu leh pa te ka vawi khat hmachhawnna tur anih vang te pawh ani mahna ka zam ru kher mai.


"Apa" motor darthlalang tukverh inkharphui vek a din thih duk rual chuan Nathan-a chu a au raih. Ka lo nuih a.


Driver side rawn innam hawng khup ațang coat suit smart zet a induang thlup mipa rawn chhuak vut ka hmu chiah chu ka tlarau a thlawk chhuak dawrh ani ber!




Zawi hnawk in ka tawlh hnung nghal dawrh!



"Apa..." ka kut zawi hniang thlah a Nathan-a tlan chu ka en a, Nathan-a pawm tur a mipa kun hniam mek chu ka en leh a. Ka thawk lak a buai nghal vek, nasa lutuk a ka lungphu phu dawt chu natna ka tawrh tawh a na ber mai in a rawn fín a, ka khur ti tih der mai!

Amah ani! Amah kha!



"I va lo kal har em em?" a pa in a vawrh kan rual a Nathan-a nui hawk hawk ri te chu ka hre khawk rum rum, Nathan-a bag chu țhutthleng ah chuan dah rawk in ka khup sai hlawk hlawk chu ka chhep sual nghal nawk nawk.


"Aaa, Nathan-a te Miss i ni em ni?" nghet lo zet a ka pen sawn tur chiah chu Sir... ugg, Nathan-a pa aw zawi sup vang chuan ka tawp chawt. Mahse, ka hawi let chuang lo.


"Apa, kan Miss fel deuh ka tih kha anih hi, tunah pawh nangmah min lo nghahpui char char a" Nathan-a chuan a ti a, chutah ka lam pan a kê pen thawm ka hre zawm nghal zat bawk.




A kê pen tin chuan mipa ang a ka en hmasak ber zan a ka lungphu a tih ran ang chiah in nasa lutuk in ka lungphu a ti rang dawt dawt!


Ka hmachhawn hreh lutuk chu ka țah a rawn chhuak ut ut, chutihrual tho chuan ka ngai a.. nie, ka ngai tak zet! Ka haw bawk! Kum 8 chhung khan a hmel vawi khatmah hmu lo chung pawh in a zun ațangin ka tal chhuak thei lo a, ka thinlungin nasa lutuk a a la thlakhlelh mipa hi engvang a kum 8 hnu ah hmu leh hlawl nge maw ka nih le?

"Miss?" a aw pa zet a a rawn tih sup chuan ka lungphu chu a chawl duk ani ber. Heh pet fan fan in ka inher a, ka inhum ruh hle bawk.


Kan inhmachhawn chiah chu Sir mitmeng chu a buai nghal vek! A kâ ațang rawn thaw chhuak hawk in chiang lutuk hian min en ta tlawk tlawk! 

Keipawh chu ka thawkte chu a tawp duk a. Bing mup mup si in ka țah a chhuak ut ut! Ka chhungrilah chuan nasa lutuk in ka huatna leh hmangaihna chu an in sual bulh bulh a, khap hlek lo va min en tlawk tlawk avang chuan kan inhmuh leh a beisei tawh bik lo tihA hmel erawh a lo la țha reng, ka tleirawl chhuah hlim mipa atchilh pa leh cool lutuk hmel ah khan patling mahni inrintawkna a khat thuneih hmel zet ka hmuh belh bawk.

"Naupangte..." a tawp a tawp ah hmui phun a a rawn tih sup chuan khur khawp hial a nghet in kut ka hum ngawt ngawt. A mitmeng pa zet chuan thuk ruih in min en a.


Eng emaw hi a rawn sawi leh dawn a. Mahse, a kâ ațang a thaw chhuak leh hawk in tawrh har lutuk hian min melh vung vung.


Tawite hian ka nuih lui a, harsa erawh ka ti tak zet! Kum 8 chhung teh meuh ka nun ah tu mithar mah seng lut thei lo khawp a ka mipa hmangaih kha a fa nen ka hmachhawn ta mai chu a nia.




"Miss, apa khan kan Miss i ni tih a hre lo a niang tiraw?" Nui sen sen in Nathan chuan a rawn ti a. A fapa țawng ri vang a harhchhuak thut in Sir chuan lu a thing nghut.

Nathan chu ka nuih lui leh a,

Mahse, chawpchilh zet in ka ngaihtuahna ah chuan thil chi hrang hrang a rawn lut nghal zut zut!

Nathan hi!

Hîk pup pup si in thlan sa in min rawn bual nghal phulh mai! Rapthlak ti lutuk a Sir ka melh rual chuan thingtum a vuak chawrh ang mai hian ka na nghing lawih! A mitmeng pa zet ah chuan ka chhanna duh chu chiang lutuk in ka hmu nghal zat bawk.



Pathian leh!


Ka chungah hian engthil chiah nge maw thleng ta le?





Nathan hi!


Thawk lak harsa ti zet in Sir mipa naupang pawm lai chu ka en ngawt ngawt, pawisawi lo zet a min nuih in apa nghawng ah a kuah ran bawk. Kei erawh chem zum zet a vih sawk sawk ang maiin ka na chhuak vek!

"Sir" ti sep in Sir chu ka melh a.. a lakah ka la pangchang thei emaw ti ang hrim hian chhanna phut zetin ka melh ngawih ngawih, chutah insehruh țawlh țawlh chungin lu a rawn bu nghut a.

Ka țîm chuai mai!


"Nibiru..." zawi sup a Sir in a rawn tih leh pawh chuan ka bengkhawn thei tawh lo. Ka inher a, ka theih ang a chakin kaihza tha sai dar dar chuanin school building pan in ka kal nghal dawr dawr!



Gate aţang ka langthei tawh lo ni a ka hriatna thim chin ah chuan ding chawt in kà ka hup bet a. Ka hrawk chhung chu rawn inhnawh tawt up up in ka mittui a rawn luangthla nghal zung zung bawk!



A va rapthlak em!


Naupang dangte aia ka ngainat leh duat ruk em em kha phatsan ka nih țum a thil thleng vang a lo piang chhuak ani! Sir mitmeng ah khan chiang tak in chuthil chu ka hmu bawk.




Zai rut rut pah a ke pen thawm ka hriat rual chuan rang lutuk in ka mittui chu ka tuai hul thuak thuak a. Mahse, Sir leh Nathan-a hmel ka mitthla ah an rawn lan rual apiang chuan thinlung na lutuk in ka tawt ipik tulh tulh.


"Ehe, Miss, i la haw nange?" Sir John-a'n a rawn tih chuan ka kâ ațang thaw chhuak hak in ka nui lui a, ka dinna chin a thim vangin ka hmel a hmuh fiah theih ka ring lo.

"Umm, naupang pakhat a chhungte ka nghahpui lawk a lawm mawle.." ka nui lui leh a.

"Han inla rawh, ka thlah ang che" thawveng zet a ti sup a phone a hmeh en tak ah chuan engmah thleng lo ang mai chuan ka fiam ve nghal bawrh bawrh.


Office ah chuan kan thawhpui țhenkhat te chu thingpui in in an lo la awm lat lat a. John-a'n min thlah kawi theih thu ka sawi vang chuan min chelh khawmuang ve ta lo. Kum thar ah inhmu leh turin kan inthlah sap sap a. Ka gift dawn box pawl a tuam nalh zet chu ka thlek zoh a. Nathan-a hnen ațang ka dawn kha ani kher bawk nen heh ka pet leh fan fan tawh.



🌟


Bike hunna pan a John-a nen tualzawl ah kan inzui chhuah leh chuan ka ké pen a buai nghal nak. Mahse, rang zet in ka insiam rem a.


Sir motor kha gate pawn ah a lo la inhung reng a nih chu!


Ngawireng in teacher te motor hunna pan chuan John chu ka zui zel a. En zui run tu ka nei tih erawh ka thisen sa pup pup reng ațang chuan ka hre thei.


"Zanin chu a vawt leh tiktek viau ang"

"I sa a țhat tehreng nen vawt lah hi i tuar thei lo deidui siah"

"Kher che chuan le.." ti nui nui in bike chung a helmet chu a la a.

"Kumin Christmas chu malpui pali nen hman ve tawh a chakawm khawp mai"

"Awi, LalJohn tenawm lo mai teh" nui hawk hawk in bike chu a ti nung a, zan dar 8 a hnai kuar tawh ang. Boruak lah a vawt hit sung mai bawk nen kan tlan thawtna vangin hnar a thip leh hlur dawn a nih hi.




John-a hnung ah ka lawn a, a tlan chhuah rual chuan ka shawl te bah chuan hmai ka tuam nghal zat. Gate kan hnaih rual chuan gate pawn a motor ding chu a che ve țual țual a.

Kan tlan chhuah hma chiah chuan kan tlanna tur ah tak lo ding dawt in glass a rawn in 'down' a.

"Miss" phur zet in Nathan-a a rawn dak chhuak heu. Mahse, a hmel ka hmuh rual chuan thil tam tak hriatchhuah ka nei tawh a, nuih let takngial pawh harsa ka ti tawh.

"Ehe, Nathan, in la haw nange?" John-a chuan a ti nghal vat.

Nathan-a chuan lu bu lap lap in min rawn en leh a, John-a jacket hmawr chu ka hum nghet ngang mai. An motor chhung chu a eng sen deuh ruih a, driver side a mipa țhu pawh chuan min en run tih ka hre thei.


"Miss, Merry Christmas " kut min vai pah a Nathan-a'n a rawn tih leh tak ah chuan nuih lui ver ver in ka wish let ve a.


A țhu țha thak a, glass a inkharphui vek hma chuan chiang fahran in Sir chuan min rawn melh leh hram bawk.


"Nathan-a pa kha ka ngaisang teh mai nia" an pafa tlan chhuah hnu chuan kan tlan chhuak ve a, John-a thil lo sawi vang chuan ka meng deuh kawk mai.


"I hriat zawng em ni?" Ka ti deuh hu. Remlo zet hian min rawn thlek a.

"I hre ngailo tih sawi miah suh" a rawn tih hluk chuan ner nak in a dar ah ka chum dat.

"Tak takin, ka mi ngaihsan tlemte zing a pakhat a nih kha" a ti leh duah a.


Sawi ve tur pawh ka hrelo. Kum 8 kalta khan amah vangin Mizoram ka chhuah san a, a chanchin ka ngaihven lo lui țang țang țhin bawk. Manipur ah nupui neiin hna țha tak a neih ka ring rilru țhin. Vawi khat pawh hmuh leh ka inbeisei tawh loh laia tum loh lutuk a kan inhmachhawn ta thut mai khan min ti hamhaih a, tun ah ngei pawh hian ka la pangngai lo.

Ngaihtuahna tak tak seng a rilrufim ka put hun ah meuh chuan ka mittui ko chhuak tu bawk ani leh dawn tih ka hria.





"Bawihte, anitei a lo haw.." ka nu in a tih vel ah chuan ka vahnu chu nghet lo zetin a rawn tlan terh terh a.


"Ka lalfanu tereuhte, vawiin i lo fel em?" ti pah in ka pawmkang nghal nawlh. Fiah lo deuh hian thil a sawi ve a, tv en a an lo țhutkhawmna lam ah chuan pawm phei in heater bul ah ka țhu nghal chat.


"Bawihte, api bulah țhu leh phawt teh, anitei kha bike ah a rawn chuang a, a kut hmawrte hi a hit vek.." ka ti a. Heater ah chuan ka kut hik khawng lo chauh chu hem in ka nuai lum nghal that that.


"A nuam bawk em?"

"Umm, nilengin kan sahawk nangin a țhen kha chuan an kham chuang lo" ka ti a. An nui dar dar a.


Ka chhungte kiang ah reilote ka țhut hnu chuan ka mut pindan ah ka chhoh san a. Tui lum a ka intleuh leh thuak hnu ah thuamhnaw lum nuam zet inbel in khum ah chau lutuk in ka bawk nghal thlawp.


"Lalpa, tun țum zet chu tuar chhuak turin chakna ka neih tawh ka ringlo.. ngatinge ka hma ah i rawn lantir leh a? Ka hmuh theih leh a awri hrepha lo a ka awm chhung pawn zantin theihnghilh turin ka bei a, tunah phei chuan a bul ațang bawk ka fight țhat leh a ngai dawn sin" ti sep sep in țah insum zetin lukham chu ka hmai in ka nawr ngawt ngawt. 

Min lo hrethiam hram ru aw. Call pawimawh uchuak lutuk vangin ka ziah zawm thei lo a. Theih hram chuan naktuk zan ah lo dah zawh vek emaw ka tum ang.