THINLUNG KHAWNGAIHTHLÂK- 10

THINLUNG KHAWNGAIHTHLÂK
CHAPTER 10
Ririni Khiangte Abbra Pitartei


"I hmelțha ngawt mai," a țawng sual emaw tiin ka melh deuh vak a. Mahse, Dana lo nui hul hawk ka hmuh takah chuan a țawng sual lo tih chu ka hrethiam chawp chilh a. Ka nuihzat ve na te kha a bo nghal duak mai.


"I va ti lawmawm ve," ngeiawm takin ka ti let ve hmak. Ka lawm tak tak loh zia erawh ka mitmeng ah chuan a hmu thiam ve tho ang.


A duhtawk tawh mai ang chu tih laiin Dana bawk chuan, "Ka thinlungah i riak reng tih hrilh ta che i la, i la lawm tho ang em?" a lo ti vawt leh ruih a. Ka hma zawnah rawn kun hniam chungin hnai takah min melh run bawk.


A thil lo sawi teh thut avang chuan ka hamhaih hle a! Dana lah chuan uluk lutukin ka hmai tlang vel chu a lo melh kual dun dun a, ka hmui zawn ah tak a mit chu a tawp ta chat a.


"Ngaihtuahna i ti buai khawp mai ka pi," a hma aia zawi zawk hian a rawn ti leh a. Hamhaih lutuk in ka en ngawt ngawt tawh a ni ber. Dana paw'n nuihzat hmel lek lekin a hmui hnuai chu a seh zauh a.

Ka en ngar lai chuan rawn thaw chhuak huai pahin min din hnaih leh deuh hrut a, "Lo intawng hma deuh ila țha tur," thinur ni awm tak hian a ti zui nghut bawk.



A fiamthu thawh ve dan a nih ringin a lo nuih mai beisei ru zetin ka en leh ren rawn phawt a. Marawh chu hmel thutak lutuk leh mitmeng tak ngul a min en tak tlatah chuan ka inhumruh nghal a.


Pawmlai nei ka ni tih pawh a hria a. Heng thil zawng zawng min sawi khum ngam chhan hi min zahloh lutuk vangah ka ngai tawh.


"I va han zakthei lo tak," ka tih khum ta erh a. Ka țawngkam te chu eng vak ah ngai lo tih hriat takin a nuih pui mai lehnghal.

"Pasal nei lai ka nih hi," thinur țeuh chunga ka tih lai te chuan nuihzat hmel zetin hmui a lo pet sawi vel nia!


"Khatiang thil kha min sawi khum tawh miah suh,"  ka ti-chang fak a, ka thil sawi te chu ngaih pawimawh loh hmel lutukin min lo melh run ringawt bawk nen, chum chawrh mai chu ka duh rum rum tawh. Chu erawh ka ti ta em lo.



Rum zet a melh leh hrepin ka inher san hmak a. Mahse, kê ka chhep sawn chiah tihin ka ban bulah a rawn man leh ta mai a! A lo chet dan chu ka beisei loh em avangin ka chiai nghal vek bawk.


"Min thlah rawh," sehchilh lutuk a ti pahin ka hawi kual zui ruai a. U Mapuia'n min rawn hmuh palh hlauhna hian ka khat a. Ka thin chu a lo phu rang nghal dawt dawt bawk.


Ka chiai lutuk hawi kual vel chu ngaipawimawh lo tih hriat fein Dana lah chu a lo kun hniam leh ngul a. 'A hmai ah tak chuan lo ben chawrh tawh mai tur em mawni chu aw,' ka ti tut tut tawh.

"Pasal nei lai mah ni la ka thinlungah i riak reng tlat a ni, chuthil chu engtin nge i tih dawn," zawi lutuk hian a rawn ti ngul ngul a. A â ta thut a nih te chu ka ring, a zawhna min zawh dan te avang chuan ka hlauhthawnna chu a lo nasa zual sauh a. Office bathlar lam chu va melhin ka tal nawk nawk tawh.


"Enteh, hetiang thil hi infiamna chi pawh a ni lo," midangte'n kan thawm chu an lo hriat palh ka hlauh vangin ka țawng ring ngam lo.

Min lo hmu tu an awm palh hlau deuh a ka han melh leh chuan, "Fiamthu thawh hmel ka pu em?" luhlul lutuk in a rawn ti chhum vut a. Ka tawt tup tup tawh.



Chhan let zel chi a ka ngaih loh rualin a hmel thutak lutuk chuan min ti hlauthawng a, rilru hrehawm țun chungin min thlah tur a duh zet hian ka en chho ngawih ngawih a. Marawh chu a lo kiai suk ka hmuh rual erawhin ka hîk nghal rawih rawih thei.


Hepa hi sakawlh pawisak pakhatmah nei lo a nih hi!



Ka pasalin min rawn hmuh palh hlau a ka chiai hmel chu hmuhnawm tih hmel lutukin min lo thlir thei nia!! A mitmeng thim ruih ah chuan tuna kan awm dan hi ka pasalin rawn hmu mah se, inthiamlohna a nei hauh lovang tih lah chiang takin a lang chhuak a. Ka mangang tak zet ta mai!


"Ngati nge hetiang hian i awm a?" ka ti ta thlawt. A chet dan hi a mak em a ni! Pawisak a neih loh zia lah ka hmu thiam tawh a. Mualpho deuhin min siam hreh dawn lo hian ka hre ta tlat a! Chutak chuan ka awm a ti nuam lo, "mawh? Ngati nge hetiang hian min tih a, i pawi sawi ka nei em ni?" ti leh pahin ka thaw chhuak hak a.


Lu a lo thing nghut nghut lawi a nih chu!

'A nih te chuan ngati nge hetiang hian i awm tlat a?' tia vin nghek chu ka duh rum rum tawh. Mahse, chu thil chu ti tur a min beisei ber a ni tih lah ka chiang bawk si. Min dang chep lutuk chu țah a chhuak țun thei mai.

"Hetiang hi i hmeichhe fiam ve dan a lo nih chuan sim daih rawh, a mawi lo em mai," ka ti leh deuh ringawt a.

Ani thung chuan ngawi rengin min en deuh vung vung a. Chiai a ka chet buai vek lai khan nuam a lo ti tlat a. Chuvang tak chuan âw kâ vin-in ka be tawh bik lo.

"Min thlah teh," ka ban bul a chelhna kutphah lian zet chu pawh phelhsak tumin a kutțang chu ka kuai ngar ngar a. A chak lulai lutuk chu a kutțang pakhat lek pawh ka kuai kau thei lo a nih chu.


"Enteh.. i huihphai deuh a mi?" beidawng ru deuh chunga ka ti leh chiah chu a lo nui ta hawk a.


A nui ri chu midangte'n lo hria a an lo kal khawm thut chu ka hlau leh lawi si! Rilru ipik deuhin ka melh thip ta ram a, Dana lah chuan mit zim sun hian min lo en deuh vung vung a, a tawpah chuan,"min dawi â tawh chu a nih ber hi," thutak lutuk hian a rawn ti leh ta mai a! Ka banbul a chelhna chu a thlah zui tak nain a kutphah lianpui chuan min la si lek lek tho.


Rang lutukin ka tawlh sawn nghal a, "ka dawi bawk lo che," ka tih ram hmak rualin a lo meng de zauh a, a nuihzat hmel ta hle bawk.


"Min dawi khawp mai," a rawn ti deuh ta tlat a. Min tih thinur belh a tum ni berin ka hre tawh.


Dawt dawt a min puh tlat chu haw viau mah ila hnial let zel chi ah pawh ka ngai tawh lo, "Vawi khatmah min be tawh suh," tih khumin ka theih ang a rumin ka melh rawm rawm bawk. Chutia ka vauna chu hlau lo tih hriat tak hian nui chungin a tawlh hnung deuh hrut a.


"I zakthei lo ngawih ngawih," tih khum leh hramin ka kal san nghal nal nal a.


Ka hnung lam aţang chuan zawite hian min nuih zui huk a. Min thamlo lutuk ni a ka hriat tlat tawh avangin ka sa zar thei mai.



Office tual zawl ka va thlen phei rualin a chhung ațang a u Mapuia rawn chhuak ve mek chu ka hmu deuh thut a. Tim ru chawih chungin Dana dinna lam kha ka va mit sir nghal a. A dinna ngaiah a lo la ding ngawi ngul a, min lo la thlir zui reng bawk.



Rang lutukin ka hawi sawn leh nghal a, office bathlar ațang lo chhuk thla thurh pahin u Mapuia chuan, "kan chhuk dawn mi" a rawn ti nghal a. Min en chik viauin ka hre bawk.


Ka bu nghat chu ka darah a rawn kuah zui hlun a. Thil thleng zo chiah khan rilru a ti nuam lo lutuk a, u Mapuia lakah chuan ka tîm dûi leh nghal.


Kan in pan thlakna kawng chhuk ah kan kal țan deuh chiah tih-in, "pu Mapui," Dana ngei mai khan a rawn ti thum dut a. A chhan ber hriat si lovin ka thinphu chu a lo rang nghal chiam bawk.



U Mapuia chuan min din pui leh rih a. A ngengin pawisak a neih loh zia chu ka hrechiang tawh a. U Mapuia a rawn au ding leh kher te hi a suah sual lutuk vangah ka ngai zo vek tawh.


Dana chu kan dinna lam panin a lo phei mek tih hrat zetin a kê pen thawm chu a lo hnai zel a. A mize maksak lutuk kha u Mapuia awm lai hian a lan chhuah tir hreh dawn lovin ka hre ta tlat a! Ka chiai leh titih tawh.


"Ka lo zuk chhuk ang aw," rilru tawt deuh chungin ka ti a, u Mapuia chuan min lo thlek nghal vut mai. Ka lo nui lui hram hram a.


" Theng lah sil lovin kan dah ringawt si a," ka ti leh sawk sawk a. Ngawi renga a buk nghut takah chuan rang takin kan building luah lam pan chuan ka kal nghal daih a.



Dana paw'n u Mapuia kiang chu a thleng chawp chilh ve nghal aniang, "Saka te nen khan kan lo inkawh hmuh tawh a..." tia u Mapuia țawng ri hriat tur a awm zawm a.


Hawi let tawh miah lovin kawngka pui chu ka pawt hawng a. Inchhunga ka pen lut chiah chu duhthawh lutuk in thawk ka la zui nghek bawk.



Thinur leh rilru nuam lo țun chungin ka che nghal sawk sawk a. Engati nge Dana khan min zuam riau a ka hriat tlat le! A zuam theih turin ka lo awm reng reng em ni. A nupui hi a hnathawk chhawr lai pakhatin a zuam hle tih hre ta se u Mapuia tak pawh a lawm lo ngawt ang. Dana lakah ai mahin ka lakah a lungawilo zawk ngei bawk ang.

'Ka thinlungah i riak reng tih hrilh ta che i la, i la lawm tho ang em?' a tih laia a mit meng tak ngul kha mitthla letin ka thaw chhuak hak a. Khatiang thu mi nu hnena sawi ngam ngat mipa chu, mipa lerh uchuak tak a ni dawn tih lah a chiang reng.


'Min lo ngaizawng ru reng ang te khan a țawng vel bawk sia. A ti tak tak nge min fiamkual mai mai zawk le,' rilru ipik deuhin nawhfe chu chawhtawlh chhungah ka vawm lut bawrh a.


'Fiamthu pawh nise khatiang thil kha infiamna chi a ni lul lo!'

'A lo ti tak tak a nih chuan..' ngaihtuah chhunzawm ngam lovin ka ip zui chawih a.


'Pasal nei lai ka nih' thu ka sawi laia a mitmeng mawlh kha!

Min nuihzat!

Ni e, khapa kha pasal nei lai ka nih thu ka sawi lai khan a nuih a za tak tak!


Thleng ka lo rem fel mawlh mawlh laiin u Mapuia chu a rawn lut ve hlawl a. Ngawi run a choka a rawn pan ding nghal chu ngam leh ngam loin ka lo melh zak zak a.



Dana khan nichina min chhaih kual dan zawng zawng kha a hrilh palh ka hlauh vang te pawh a ni mai thei, ka tawt deuh up up bawk.


Ngawi rengin filter tui chu a thli chhuak a, thaw dep dep paha ka melh tim dâi laiin tui chu a in khawlh khawlh a, a tui in zo chuan min rawn thlek ta vut a. Ka lo insangmar nasa khawp mai.


Ngunthluk zet a min en deuh vung vung chung chuan, "I lung a lo leng viau angem aw.." a lo ti fiam ta hluai a, ka thaw huai thei.


"Leng bik lo ang," ka ti let ve vat a, silhmun chu ka tleuh fai zui thuak thuak bawk.


U Mapuia chuan min pan hnaiin hnung lam ațang min rawn kuah ta hlu hlu a. Rilru tlanchhe chunga lo awm mek ka nih vang te pawh aniang chu, a pangtilum chu thlahlel ru zetin ka ngheng ve nghal zat bawk.



Min kuahna ban tha chak zet a rawn tih ngheh rual chuan, 'Dana chet dan kha hrilh tawp mai tur em ni chu aw' ka ti ru rauh rauh a. Mahse, țullo deuh ah midang nen an inkar tih chhiat sak palh chu ka hlau ve tho bawk si. Dana khan, 'ka fiam mai mai alawm' te a lo ti ve daih thei tlat.


Ka ngaihtuahna vak kual thui zet vang chuan thawk ka la halh a, ka taksa kuahtu in tha a lo pek nat salh takah chuan harh chhuakin ka ngheng țha sauh sauh a. Nichin a thil thleng kha lo hmu ta se engtin nge a ngaih ang le?!


"Office ah min zui ve mai ta che," thum dut a ti chungin ka chhip ah khabe a rawn nghat a. Chu kher kher chu a sawi ka beisei loh em avangin ka nui chhuak hak a.


"Ka zui che zawngin staff te nuih kan tiza awm em mai," tia ka nuih chuan rum chhuak hawk pahin ka chhip chu a rawn fawp tawk a.


Ka nui kar kar lai chhip ah chuan khabe a lo nghat leh a, "Innei thar kan nih an hre ve vek a, an hrethiam ang," a ti zui nghut nghut a. Office ah zui ve turin min thlem tih chu ka hrethiam tawh a, nuih a za duh ngang mai. Chutih rual erawhin nupa kan nihna chu a zahpui lova, a chhuang thiam hlein ka hre bawk.



"Chhun lam hi," tia zawt pahin ka in her a. Țha takin a hun hman țhin dan chu min hrilh ve mai bawk. Dar 12 ațanga dar 1 inkar chu chhun chawlh angin an hmang ve tho a. Thingpui dawr ah te inhnawh puar turin an chhuak țhin a ni awm e.


"I lo chho ve duh lo maw?" min ngaihtuah tih hriat zet hian min thlek a. 'Ka zui ve duh' thu sawi ta chiah ila, î he lovin min hruai ve ngei ang tih ka hmu thiam bawk.


"A zahthlak i ring a nih chuan zahna tur a awm lo," tih sup pahin ka biang a rawn khuap zui hmiah. "ka thuamhnaw țhenkhat rem chhuah zawh loh a la awm a...." ka ti fan raih chu min kiai khum sukin a hnarin ka hnar a lo nul nghal thuak...


"Chung ho chu ka lo inrem fel ang," ka hmui a rawn fawh thawi thuak avangin ka thaw zui hak a. Ka biang a khuapna chu thlah miah lovin ka hmui ah a rawn fawp ta nge nge a.



Rei ngial kan infawh hnuah thaw huai chungin kan chal chu a nawr si a. Min thlakhleh hmel taka maimitchhing chual chunga a hnar a min lo nul leh țhin chu ka fiam chak deuh thut a, "ka lunglen i hlauh vang ai mahin ka tello i awm hreh vang zawk niin ka hria," ka ti fiam zet chu a rawn rum chhuak nghut a. Na zet hian min lo fawp leh ta ngawr ngawr a. Min thlah ruala a phun zui hluk chu ka nuih rah rah bawk.


"A dik em?" mit ko san zeuh pahin ka en chho ran a, u Mapuia chu a lai ve deuh em maw ni, nui ruh ruh chungin min en chhuk run a. Ka biang a la khuap tlat a, amah chu a pa lianin a lan dan chu a nuihzatthlak tak zet.


"Min zui la chu duhthusam.." a tih leh chuan za zet a nui chungin a kawngah ka kuah ta a. Thaw huai chungin min lo kuah bet ve nghal hlu hlu bawk.


A awm ah bei a ka thawk hle hle takah chuan Dana chet danin min tih hlauhthawn zia kha ka hrechhuak thar leh a. Awm nawm lohna hian min țham er er leh nghal. Khatiang a min pawt buai lai kha min rawn hmu tu lo awm palh pawh nise pawi tihna a neih miah dawn si lova. Kan inhmachhawn fuh leh ang tih mawlh chu ka hlau tawh.


U Mapuia chuan min ngaihtuah ngang aniang, ka bek sam lo khal mual mual pah hian 'nu Tlingi talin lo awm pui che se la a țha ang' a ti dut dut reng a. Ka hnial ve tlat thung.


A chang chuan tumah be lêm loa awm mial mial hian ka hlim ber a. Nu Tlingi nen lah kan la innel vak bawk silo nen, kan pahnih chiah a awm aiin keimah a awm ka duh zawk.


A inbual tur chu mut pindan ah ka zui lut ve leh a, cigarette bawm chu en in a zuk chawp tur a la chhuak ruk ruk a, "inchung khawih tu te khan an khawih zo dawn tawh em?" ka ti a. Zawhna zawt satliah ang a lang thei tur berin amah chu ka en lo lui bawk.


"Ruah hi tla sek lo se chu an zo thuai ang maw le," a ti țha ve mai bawk. Dana pui kha vawiin te hian office thawm țhain a awm nileng ve dawn em tih chu ka hrechiang chak a. A hming mal chu lam chhuakin ka zawt ngam bik der silo.


"Hna an thawh laiin a chhung lam ah hna in thawk ve tho sia, a bengchheng duh awm," ka tih leh chuan a lo bu ve nghut. Ka rilru a hriat ve lem loh avangin engmah a sawi zui tawh lo.


U Mapuia chu office turin a kal chhuak ta a. Veranda ațang chuan ka thlir liam a, Dana bawk kha hmuh fuh leh hlau deuhin u Mapuia ka hmuh phak loh rualin rang lutukin ka lut leh nghal daih bawk. Mahse, inchhung lo reh ta tlawk tlawk lutuk chuan țah a ti chhuak lek lek mai.


Kan nupa mut pindan ah bawk ka lut leh a, ka phone kal san tawp chu ka pan zui thuai a. Lucy-i message pawh a lo awm nual tawh.


An thlen chin min lo hrilh ve zel hi a lo nia. 'Dana khawsak dan nghal lutuk khan ka rilru la peng lo se chu, tunah te hian lungchhe deuhin ka la awm ngei ngei ang,' ka ngaihtuahna avang chuan lu thing nakin Lucy- i chu ka reply a.


Ka thuamhnaw kan la rem chhuah zawh loh te kha theih ang ang rem chhuakin ka buai zui a. Meme-i te pahnih paw'n an thlen chin chu thlalak nen meuh min lo thawn ve zel a. Ngaihtuahna a kal bing chang chuan khawharna nasa lutukin min rawn luhchilh a. Haw ve mai chakna in min hnawh zui tut tut a, ka awm dan zet chu a hreawm tih piah lam a ni.


Ka inrem fel zo thawkhat tawh chu thawk la hliai in chhuat ah ka țhu sawp a. Ka kawng kham lutuk tih reh nan a ka han zik mar kual vel lai takin message a lo lut leh keuh a.


Phone ban a noti ka hmu chiah chu ka nui lo thei lo, u Mapuia message a lo ni a.


*Ka nupui hian min ngai em?* tih te mah nise ka nuih pui rah rah reng tho.


*hna thawh laiin phone khawih suh* ka ti let a.


"I ngaihawm khawp mai* tih bawk a lo thawn leh a, ka nui tak nain chhan let dan tur ka hre lo lutuk chu ka tawt vek maiin ka hria.


*i khua a har viau chuan i lo chho thei reng* tih bawkin min lo thlem zui leh a.


Chu zawk pawh chu dawnsawn nuam takin ka chhang let thiam dawn lo tih ka hria a, *ka inrem fel zo tawh a,* ka ti let ta ringawt.



Dar zat ka hmuh rualin thuamhnaw bawm chu ka khar nghal sawk sawk a. Dar 11:30 a lo pel daih tawh. Inbual te ka la duh a, a hna kal tur khan dar 12 bawr a lo inpeih turin min chhah bawk nen rilru hmanhmawh deuhin ka che zui sawk sawk a.


Ka hak tur te ka inlak chhuah buai laiin message bawk ka dawng leh a. Inpawm bawr deuh țun chungin phone bawk chu ka ban leh a.


Beisei loh lutukin u Maliani number ațangin voice message a lo awm va mai.


Ka play dawn lai takin voice message dang a lo thlen belh leh a. Voice message hmasa zawk ka play țan chiah chu nghet deuhin ka inhum ruh zui ngat ngat a.

Ka pa aw ri hian, 'Mamte, Lucy-i te'n an haw san ta si che u a, i lung a leng viau lo maw?' a rawn ti vang vang a. Voice message chu tih dan a thiam lo tih hriat zetin, 'khati khan ka thil sawi kha a hre thei ang maw?' a ti riin a zui a.

'I hmeh lai kha thlah la, a inthawn nghal mai ang' u Maliani'n a lo ti ve bawk.


Thaw chhuak ham ham chungin a hnuhnung zawk chu ka play leh a. Ka pa voice message bawk a lo ni.


'Mamte, i lunglen viau chuan i nu nen kan lo zin ve mai dawn em ni?' zawi ang reng taka a ti ri ka hre leh chiah chu ngaithla zo ngam lovin ka hmet tawp chawt a. Ka duh vang ni miah lovin ka mittui a rawn luang thla zui pap bawk.


Insehruh fan fan chungin ka awm zawn ah phone chu ka pawm bet chawt a, 'pa' tih chu rilru in ka lam nawn mawlh mawlh a. Ka hnar leh hrawk chhung te chu a lo na nghal ngut ngut mai.


Ka mitthla ah chuan voice message min lo thawn laia a hmel awm dan tur te chu a lo lang zut zut a. Thaw chhuak ham ham chungin a voice message chu ka play chhunzawm leh a.



'Keini chuan hna țul em em kan nei ve lem lova, i duh phawt chuan i nu zawk pawh hi rawn chah la, awmpui tur che u in a lo zin chho nghal mai ang, engmah rawn sawi hreh suh aw Mamte, ' a aw chu zawi viau mah se min ngaihtuah hmel hle a. Ka ngaithla zo chu inthlah dulin ka thaw chhuak nghal hawk bawk.



Ka pa voice message chu chhang let lovin bathroom ah ka lut nghal a.


Ka thuamhnaw hak chu ka hlip sawk sawk a, ka hmai rawn sa hut hut chu ngai pawimawh duh lovin shower hnuai ah ka ding a, ka sam ah shampoo hnawih in ka nuai nghal mawlh mawlh a. Mahse, thawk leh khatah ka baw chhuak ta hawk a. Ka kâ chu rang lutuk a hup bet nghalin ka insut nghal hlawp hlawp mai.


Ka pa aw ri dam ve dap mai te, min ngaihtuah tak tak tih hai rual lova ka chah chuan lo zin ve mai a inhuam lutuk te khan ka chhungril a hrawm kual nawk nawk a. A tawp ah phei chuan chhuat ah țhu sawp hnawkin ka țap chhuak ta hlawp hlawp a.


"Pa, engati nge tun ah chiah min ngaihsakna i lan tir a?" ka khup ah chal nghatin ka insut hlawp hlawp reng mai.


Pasal ka neih hnu ah chiah min ngaihsakna a lan tir chu ka hua nge, a hma zawnga min ngaihsak ngailoh avangin ka pa thla lakah chuan ka vui zawk pawh ka inhrethiam lo.


"Pasal ka neih hma te khan tun ang hian min be țhin ta che.." thana zet hian ka ti leh tawk a.


Zu ruiin kut hial min thlak ţhin mah se, tun ang hian min ngaihsakna aw kâ a lak ațang dawng khat tawk țhin ta ila chu, ka rilru put hmang te hi a pangngai ve thei deuh ang maw le.


"Ka tet lai khan duat leh ngaihsak ka phu lo a mi?" rilru a ti chungin hmai chu ka hup tlawk tlawk a.


Ka han ngaihtuah let a, chhungkaw dangte angin chhungkua a nuih tlan bawk bawk țum nei miah lohna kar ah ka țhang lian a. Ka hriat theih chin ah inleng te nen an nuih tlan ham ham laiin keichu pindan chhungah ka tawm tlat ţhin.


Kan in a lo leng lut khat deuh te hnen ah, ' i dam țha em? I lo lang khat lutuka i ngaih-awm hman alawm,' tia țawngkam țha taka an lo zawh theih laiin, kei kha chu awm ve lo ang maiin min ngai a. An rik luih luihna karah khan mal leh khawhar deuhin ka lo awm reng ang em tia min dawn pui tu an awm ngai miah lo.


Khang hun lai te khan vawi khat tal... vawi khat lek tal 'ka ri nuaih nuaih țhin si a, i lo ning em Mamte' te min han ti ta se.


Ka ngaihtuahna avang chuan thaw chham lek lekin ka chhunglam chu a rawn in let kual bulh bulh a, "Pa..." ti chhuak țiau in ka dul zawn chu ka țham ta ngawih ngawih.



'Ta se' tia ka duhthusam te chuan a hma zawng aiin min vîlh na a, ka naupanlai hun hlimawm ve tur zawng zawng kha min laksak vek asin, chuti chung chuan a țawngkam nem pakhat lek pawh ka la țahpui thei mai chu ania...


Eng tia rei nge ka chutiang chuan ka awm tawh pawh ka hre lo. Ka țah nasat em avangin beng a ngawng chuah chuah a, ka lu a hai mup a, ka lu chu a na ut ut leh nghal.


U Mapuia hian ka khawhar dawn tih hriain ka pa te a lo zuk bia a nih te chu ka ring leh hnuhnawh a. Tawite a nui hak chungin bathroom bang chu tukkhumin ka nawr zui ngat ngat a.


"Naute..." u Mapuia aw thum dut ka han hre leh chiah chu a bul ațang bawk a țah țhat leh ka chak tak zet.


"Naute.." a hma aia ring leh khauh zawkin a rawn ti fiak fur a. Ka chhang let dawn a. Mahse, ka țah a la chhuah em avangin inpet ruh fan fan chungin ka ding chhuak a.


Kawngkhar lam ka pan dawn lai takin bathroom kangkhar chu a rawn ri deuh dawt a. Va hawn hman tumin rang lutukin ka che chhuak nain, vawi khat dang a rik leh dawt hnuah kawngka chu bangah a rawn inhlap ri bur a, u Mapuia pawh a rawn lut ve nghal hlawl bawk.


Bathroom chhuat laia ka lo ding reng min rawn hmuh chuan vanvadak meuhin thawk a la zui hawk a.

Thawk la hulh hulh chunga min lo en nawn leh rual erawhin; a rawn luh hlim ang chiah khan a hmel chu a lang buai leh mup tawh.



In thunun tum tih hriat zet hian, "i țha em Naute.." a rawn ti hniam ruih a. Ka dinhmun chu min ngaichang tih hriat takin muangchang hian min pan hnai pah a. Nui lui chungin ka lo buk nghat takah chuan thlipui ang mai a chakin min hnaihchilh nghal ruak a.


Ka sam a shampoo la kai phuan luai chu a rawn khawih a, Shower a tui lo la inphuh chhuak reng chu a va melh leh thuak bawk.


Keipawh in shower chu ka off lo tih ka hrechhuak ve chiah, mah se engmah ka sawi hmain u Mapuia chuan, "I țap em ni?" a lo ti dam thlup a. Ka mitah ah chiang taka min lo en leh pahin ka biang a rawn khuap nghal hmiah bawk.


Ţap leh mai lo tura ka inpet ruh fan fan chu min han thlek deuh vang vang a, "engah nge mahni chiah a i lo țah hliam hliam a," pawi tih hmel deuh hian a ti hniam ruih a, "mal ngawih ngawih a i inhriat palh hlau tak tu hi i auh phakah ka awm reng tih i theihnghilh em ni?" a rawn tih zet chuan insut chhuak hraih pahin a awm ah ka bei nghal chawih a.


U Mapuia pawh chuan nghet deuh a min lo kuah ve pahin thawk a la zui ham ham a. "I mittui a tlak changin min hrechhuak țhin la, ngaihsaktu nei lova i in ngaihchangin mal intihna thinlung i put hlau ngawih ngawihtu hi min hrechhuak țhin rawh, i hria em?" min kuah nghet sauh sauh chungin thupe aw zet hian a ti nghut nghut a. Ka buk deuh nawk nawk chuan, "I hlat ah ka awm dawn lo tih i hriatchian kha, min hrilh la, ka lo pan thuai mai dawn che alawm," tiin min hrilh zui leh a. Chutianga hnemna chu ka dawn vawi khatna a nia, țah ban phah aiin ka lungchhiat a belhchhah zual sauh zawk.


Nakin deuh ah chuan a awm a ka la bei hle hle lai chu ka khabe ah a lo dawm a, "i thuamhnaw ka ti huh vek," țah la chhuak deuh chung a ti pahin ka en chho ve a. Insut hlawp hlawp a chungtiang thil ka sawi teh daih chuan a nuih a tiza te pawh aniang, u Mapuia chu a lo nui chhuak ta hawk a. Mahse, țha deuhin, "ka thlak leh mai dawn alawm," min lo tih san mai a. Ka mittui tla lai chu hmuh hrehawm tih hmel tak hian min en ngur ngur bawk.


"I sam phuan hi tleuh fai phawt teh ang," a tih takah chuan a taksa ka kuahna chu ka thlah riai riai a.


Shower lama min kaih phei a tum tak ah chuan țang buai lovin ka zui ve mai bawk. Shower chu a la thla vut a. Ka sam chu min khawh fai sak zung zung a, ka hmaia tui lo luangthla tur chu theih tawp a dangin ka sam chu a tleuh uluk khawp mai.


Bathrobe ha hlan a ka ding chu towel nen min pan leh a, a thuamhnaw huh chu hria awm pawh in a awm lo. Ka sam min lo hruk sak leh lai chuan ngun deuhin ka lo en veng veng a. Tunah tak hian a ngaihtuahna ah enge awm ang le?


Chutiang thil ka lo ngaihtuah lai tak chuan, "Naute, i țah chhan kha min hrilh rawh le," a lo ti ta khauh. Towel huh chu a banna ah a bang a, ka chhan hun nghak a min lo en leh takah chuan,"Min be turin ka pa i hrilh em?" ka ti a.


U Mapuia chuan ka țah chhan chu a hrethiam ta aniang chu, "hrilh miah hleinem, a rawn bia che em ni?" a lo ti let a. Ka mittui chu a rawn tlak leh mai ka hlau bawk nen, meng kual ralh ralh chungin lu ka buk khum ta ringawt.


"I pa khan a ngai em che a, i lunglen a hlau aniang.." a ti ta sup sup a. Ka pa in min ngaih thu a țum hnih sawina a ni tawh. Mipa a ni a, ka pa rilru pawh kei ai daihin a hrethiam zawk dawn a. A sawi ang hian ka pa chuan min ngai ve tak tak a ni thei mai ang em.


Ka ding ngawi tlat chu ka kut rawn humin bathroom ațang chuan min kai chhuak a. Tukverh aţang pawn lam ka va hmuh chiah chu ka harh chhuak zawk a ni ber.

"Englo.. thingpui pawh i la in ve lo, dar engzat nge ni tawh," inthiamlo ru deuh chungin ka ti nghal mawlh mawlh a. U Mapuia chuan, "in ah kan in mai dawn nia," a lo ti mai a. A sana bun lai chu a bih zui thuak tho.

"Dar engzat nge?" ka tih leh hram a. Dar 12: 30 a lo hnai hle tawh a. Ka inthiam lo zual sauh bawk.

 Ka inhak fel laiin ani paw'n a thuamhnaw huh a lo thlak ve a. Thingpui dawr a kal chhuahna hun a awm tawh mang si lova, a sawi angin in ah thingpui chu kan in ta ringawt. Ka la puitlin tawk loh zia chenin ka hriatfiah bel a. Thingpui lum nachang chu ka hre ve. A hmeh tur lam erawh buatsaih ngaihna vak ka hre lo. U Mapuia zawkin chhangthawp la awm ang ang leh artui chuan french toast a siam a. A che vel chu insit ru deuh chungin ka lo en reng ringawt.

Thingpui te kan inzawh fel chuan no ruak chu ka sil zui nghal a. Dar 1 a ri fel ve chiah bawk nen u Mapuia chu office ah a chho leh mai tur ah ka ngaih laiin, ani pui lah chu a țhutna ngai ah a la țhu run a. Ka in sil zawh hun chu min nghak ni awm tak hian min en vung vung reng bawk.


Ka kut huh hru hul mawlh mawlh paha, "dar 1 a rik tawh hi, i chho dawn lo a mi?" tia ka zawh chuan thutak zet mai hian, "Muhil phawt la ka chho ang," a lo ti let hem mai!

"Naaa, ka mut a chhuak ngawt a mi?" ka ti deuh chiam paw'n "Chhuak rawh se, mut i mamawh," a lo ti deuh ngur a. Min fiam a nih ringin a lo nuih mai beisei zet hian ka en deuh ran a. Ani lah chuan thutak fahran mai hian, "reilote tal muhil rawh, i mutthilh hlanin ka chho mai dawn alawm," tiin min nawr leh tlat a. A ti awm ang lo ka ti lutuk chu ka nui hul hak thei mai, "keimahin ka lo muhil ve thei reng alawm, chho rawh, i thawhpui te pawh an lo let tawh ang," tia ka hnial let țang țang laiin a țhutna aţang chuan a tho chhuak ta thurh a, "I intihfel zawh tawh chuan min lo zui rawh," a ti zui țo bawk.


Hnial chiam mah ila a hmel tak ngul ațang chuan ka hnial hneh dawn chuangin ka hre ta lo. Chek khum tlak tlak in ka pan ta nge nge bawk. A hrechiang te'n an sawi fo angin a mizia hi a dam dap a, chutih rual erawhin a thu a duh ve ţo chang a awm tho.


Ka pasal chuan muhil turin min duh rum rut mai si a, ka sam huh chu mutpui chi a nih siloh avangin ka chhem ro a. Chutih laiin amah pawn a thawhpui te chu phone in a lo be mek a.


'Min hmu duh an awm chuan min nghak turin lo hrilh mai rawh u' a tih lai te chuan inthlahrun a na duh khawp mai. Hair dryer hrui vet țha mawlh mawlh paha ka va en chuan ka mutna lam khum chu a lo beng thuk a.

"Chho mai la ni tur," ti nang nang chungin khum chu ka pan ve ta a, " ka tih mut man che hi a to khawp ania" a lo ti fiam ve hluk bawk.


U Mapuia hian min lo hrechiang ber mai. Mut chhuak a inhre miah silo kha mut chu ka lo mamawh tak tak aniang, kar lova ka beng hnuai a a kut vah kual tir dun dun te chu ka mang hriat thuai a.


"Muhil la, nakin ah ka rawn kai tho leh ang che," a ti a. 

 "mut rei i phal ngai mang silo," ka ti fiam let chu nui suk chungin ka bek ah a rawn fawp a, chu chu kham khawp lo tih hriat zetin ka mu saisir lai chu a hmaiin min lo nul dun dun a, a hmuiin ka hmui a lo tawh fuh rualin ril ruihin min fawp ta vang vang a. A duhtawk hnu chuan kan chal a nawr si a, "kha chiah kha lo mang zui ang che," tih sup pahih a tawp nan zawite in ka hmui chu a rawn fawp leh zeuh a. A chet phung chuan min hneh em em mai a ni.



U Mapuia'n min thawh san lai pawh chu ka hre lova. Ka harh leh meuh chuan ka 'mut chin tur a min bi tuk sak a zo tawh' tih hriat takin amah bawk chuan min lo kai tho a. Mahni a awm fal tir chi ah min ngai lo nge ni, office ah zui turin min hrilh leh ta ngur mai a! Rilru nuam lo deuhin a awm ka hlau ve tho bawk nen zui tur chuan ka insiam ta poh a.

Mahse, Dana kha ka ngaihtuah chhuah rualin ka awm a nuam lo leh ta hle a. A lo awm ve chuan awm nuam in min siam leh miah lovang.


Kan inzui chhuah rualin hnathawk te chu melh ka kual hmasa ber a. Vanneih thlak takin hnathawk zingah chuan Dana hmel hmuh tur a lo awm lo hlauh chu ka thaw huai mai.

Office chhunga kan inzui lut chu min lo nuih mai ka rin vei nen hmeichhe lam chuan țha deuhin min lo be sawk sawk a. "Quarter awmna lah hi a fal si a. Inleng neih reng a har bawk si. Mahni a in a awm tlawng ai chuan lo chho ve daih zel rawh," an lo ti mawlh mawlh hlawm a.

U Mapuia chu a cabin bik ah a lut a, amah dawr tur te ni awm tak patling pathum laiin an luhchilh ve nghal a. Staff lam chuan tih tur vak an nei tawh lo aniang, dawhkan pakhat chu bialin theite um chu acid nen an bawl a, ti ti pahin kan ei ho a. Fiamthu an duh hlawm ang reng bawk nen kan nui tlang dar dar reng mai.


Tlai dar 3 pelh hret ah u Mapuia chu a cabin ațangin a lo chhuak vut a. A thawhpui te nen a kan lo ti ti tlang min rawn hmuh chuan eng em em sawi lovin min rawn nuih suk a.


Nu Tlingi pawh a lo lang ve hlawl a, u Mapuia chuan In chahbi a pe a, veranda ah inzui chhuakin zawi tak hian eng emaw hi an sawi a.

Nu Tlingi kal tur chu a nui zui kar kar bawk nen u Mapuia lo lut leh chu, 'enge an sawi?' tih nan ka lo mitmei ralh a. Dar a kan uk ringawt.


Office bang in kan zuk thleng thla chu a ngaihna hrelo zetin u Mapuia chu ka en chho nghal haw a. Ani lah chuan, "chhuah harh i mamawh," a lo ti nghut a.


Nu Tlingi zawk chuan, "kha.. ka eirawngbawl tur kha ken chhuah awlsam chiah siam rawh a ti si a. Va picnic dun rawh u," a lo ti a. Chaw ei dawhkan ah chuan Picnic totes in pack fel thlap hi a lo awm ran mai.

Phur ru zeta a lam ka va en leh chuan pindan kawngka bulah dingin min lo en ve run a, "a tirah khan sawi ve ta che," ka ti deuh hlak chu min lo nuih suk ringawt.


Nu Tlingi chu a eitur pack bang chu hawn tur a siamin haw turin a intifel nghal a. U Mapuia paw'n zial zuk a duh vangin, "kawmchhak ah ka lo nghak ang che," tiin eitur awmna khai-in a chhuak hmasa a.

Phur deuhin ka insiam nghal sawk sawk a. Vawiin chu nilengin ruah a tla lo bawk nen kal chhuah chu a nuam zual khawp ang.


In kalh țha vekin ka han chhuak chho ve a, u Mapuia chu a motor bang ngheng a dingin zial a lo la zu mek a. Kan in leh office kawt zawl inkar ah hian waiting shed a awm a. waiting shed zawn ka thleng chho chu a lo hawi thla ve chiah a. Min lo hmuh veleh pa zet hian min lo nuih sak a. A zial zuk lai chu duhthawh zet a fawp leh kawkin a paih zui daih bawk.


"Rin aiin i inpeih hma," a lo ti dam ruih. Pan chho zel pahin ka nuih sang ringawt.


U Mapuia chuan a lam pana ka kal chu uluk fe hian min lo thlir vung vung a. A palian tha bawk a, motor bang nghenga inkuahkuah hlun a min lo thlir meuh chuan ka lai thar ta hle a!

A bul ka thlen chohh chuan, "khati vak khan min en suh," ka tih deuh ringawt a, Ani lahin "Nupui ka nei hmelțha em alawm," thutak lutuk hian a lo ti hmiah pek a. Ka zam ngawih ngawih a ni tawp mai.


"Khawi ah nge kan kal dawn?" lai ru deuh a ka zawh lai te paw'n u Mapuia chuan lungawi hmel deuhin min la thlir tlat a.

"Sasaw hmun ah khan i kal chak em?" a lo ti ve a. A mitmeng ah erawh thil dang daih a lang thung.


"Kal chak tho.. ih, khawchhung ah hian tlan kual phawt ila," ka ti niah niah lai chu motor ngheng run chung chuan min lo ban ta nge nge a. Ka kawngah rawn manin a taksa si thlawp chuan min hnuk bet ta hmiah a.

"Hey, miin min lo hmu palh ange," tal aih paha ka tih chuan, "engah nge i veiawm viau ni," a lo tichhuak phawng a. Lai zeta ka melh chiam laiin u Mapuia thung chuan khawvelah hian hmeichhe dang an awm ve talo emaw tih hial tur khawpin min duh leh thlakhlelh hmel takin min en vung vung mai a.


A tawp a tawpah motor chhung ah kan lut thei ta hram. Khati taka uluk a min han thlir vung vung mai kha ka zam phah viau nain, amah chu ka hip ve tawk a ni tih ka hriat phah a. Chu tluka ngaihțhat thlak chu a awm tawh chuang lovang.


Hla kungpui mual ka la hmu ve lo tih a hriat avangin chu lam chu min pan pui hmasa a. Sap hla cool ruih hi zawite te in a play riai riai reng a. A hla thu ai mahin a rimawi ri zawk chuan min ti hahdam sawng sawng theiin ka hria. A hla play laia rimawi lungkuai ruih chu amah, u Mapuia nen chuan ka tehkhin deuh tlat a. Ka ngaihtuahna chu ka lo nuih chhuah pui aniang, ka biangah zawite a rawn piai zeuh pahin, " enge i nuihpui ver ver a?" a rawn ti sup a. Ka va melh ralh a, min lo thlir vung vung tawh hi a lo ni a. 

"I hla play laia rimawi cool ruih nen hian in inang," tia ka chhan chuan a nuih a za khawp mai.

Atthlak tih hmel lutukin, "Naute..." a rawn ti fan ruih a. A nui zui kur kur bawk.

Kei lahin uar zet hian, "ka ti tak tak alawm. I bul a awm chu rimawi lungkuai zet ngaihthlak ang velin a hahdam thlak țhin a. Hriatthiamna i ngah si, mi i chhawk zangkhai huai zel alawm," ka ti deuh hliai a. A chungchang thu ah ka țawng tam hret a inhre leh siin ka tawp zui chawih a. Zam ru deuha ka va en leh chuan lungawi hmel tak hian min lo nuih a.


"I va ti lawmawm ve aw," nui miah lovin a lo ti ta sup bawk.


Thui kan tlan hmain tlang nuam deuh kan thleng chho hlawl a, motor ti muang pahin, "i kal kual duh em?" tia min zawh chuan ka 'aw' rang khawp mai.


Lucy-i tlang sawi ngei kha a ni tih chu hrilh nawn ka ngai tawh lo. Motor ațang chuan phur deuhin ka chhuak a. Thli in min lo chhem nghal heuh heuh a, maimitchhingin ban phar meuhin thawk ka la zui ham ham a. Fur boruak dai leh thiang kak rim chuan min tiharh sawng sawng thei mai. Chutih lai tak chuan chiang lutukin ka mitthla ah u Mapuia hmel chu a lo lang a. Ka mitthlaah u Mapuia hmel a lo lan rual chiah in ka awm chhung chu enge maw hian a lo fan kual nghal riai riai bawk. Fan thla zelin ka dul a thleng thla a, a sa kual zui mem mem a. Ka nui ta seih bawk. U Mapuia chu rimawi lungkuai ruih chang ni lovin, fur boruak thiang nuam tak leh dai ruih ang mai hi a ni.

Mit meng leh riai riai paha u Mapuia ka han en chuan ka thla min lo lak sak mek chu niin, lai ru deuh hian ka nuih seih a.


"Hetilai hmun hi a nuam e, kan hlat vak si lova kal ziah ang aw," ka han tih chuan min pawmpui ni awm takin a bu nghat nghat a.

Tlang mual lehlam ah chuan Helipad a lo awm bawk a, tlang awih vut a ni lo bawk nen nuam ti zetin ka tlan kual chhen reng a. U Mapuia lah chuan khap ta nge min ti bik lovin ka thla a lo la mawlh mawlh reng a, darkar chanve dawn kan awm hnuin Hla kungpui mual lam panin kan chhuak leh ta a. Boruak thar hip a ka chhuah harh ve tak vang te pawh aniang, motor chhungah te chuan ka titi ta barh barh reng a.


Nuam tihzawng te kan sawi dun a, kan rilru lah chu chhim leh hmar ang hlawkin a inang lo a tih theih ang. Ani chu ka lo hriat sa tawh angin Sports lam a ngaina a, tun thleng pawh in GSA lamah a la inhmang a, basketball te pawh insawizawi nan a la khel țhin. Kei ve chuan nuam tih zawng sawi tur ka nei ve lo. Lucy-i nen kan inkawm loh chuan pindan ah ka tawm chawt zel a. Ka hun hman dan ka sawi ho chu boring a ti ve ngawt ang.


"A nih leh nipui, thlasik, fur leh favang ah te hian eng hun nge nuam i tih ber?" ka tih phut chuan min lo en vut a, awmze nei zet  a nui pahin "Fur," a lo ti a. 'Chutah chiah chuan kan rilru a inang ve a nih chu' ka lo ti rilru thung.


"Nang?" tiin min han zawt zui ve leh a. "Fur ve tho," ka ti sep a. Ka malchung a ka kut chu rawn banin a hum zui vung vung a. Fur hun nuam a tihna chhan chu hriatpui lo mah ila fur hun nuam ka tih chhan tak chu amah hi a ni. Ka damchhungin, a kiangah ka awm emaw, a hlat takah ka awm tawh emaw pawh a ni thei. Khawi hmunah pawh awm ila, fur hun a lo inher chhuah chang apiangin u Mapuia hi ka hrechhuak fo tawh ang.

 

 Hla kungpui mual kan va thleng phei erawh kan tlai hret a nih hmel. Gate pui chu an lo khar vek tawh a.


Chutia an lo khar tawh ber chuan min in 'turn' pui ang a, kan tlan let leh mai tur ah ka ngai a. Mahse, u Mapuia chuan motor chu a ti ding a, pawi tih hmel fe hian min thlek nghal vung vung bawk.


A ngaihna hrelo zet hian ka lo en ha a, a kutţanga steering tuk kauh kauh paha a ngawih vung vung hnuah,"Duh aiin ka chhuah tlai pui hrat che a ni," a lo ti thum sup a. Thiam loh na a nei der si lo.


"An khar hma mange aw.." tih zui vung vung pahin a țhutna lam tukverh darthlalang chu a ti hniam a.

"A pawi lo. Heti hian Sasaw hmun ah kan kal nghal thei a ni mai alawm," ka lo tih ve chuan U Mapuia chu a thaw chhuak huai a, tukverh ațang gate pui lam chu a thlek kual leh thuak thuak bawk. Hnathawk zinga tu emaw ber hmu fuh se chu luh a dil duh hialin ka ring.


Kal chak lutuk ang a min ngaih chuan a rilru a hrehawm phah ka hlau a, "Heti lai chu ni dangah pawh kan kal leh thei tho ania, Sasaw hmun kha ka kal chak daih zawk," ka ti nghal zung zung a, u Mapuia paw'n min lo en ve leh ta a. Kei aia upa daih maiin heti taka min han buaipui mai chu, lalfanu te pawh ka inchan phah lek lek mai alawm.



"Sasaw hmun kan tlan tlang lai kha a zan thil lutuk a, en lai hian hmuh chian a chakawm," tia ka lo nui ver ver a rawn hmuh takah chuan lu a bu ta nghut a. A hmel pawh chu chawpchilh takin hmuh a hahdam thlak huai bawk.


Motor chu a ti nung zui leh nghal a. Motor turn mawp mawp pah chuan, "naktuk ah ka hruai leh mai ang che," a lo ti zui leh hmiah mai a! Insum hman lova ka nui chhuak hak chu min lo melh leh vut bawk.


"Inrinni te pawh a la awm alawm," nui chunga ka lo tih takah chuan pa zet hian min nuih a, keipawh ka la nui tho. Mahse, hnehsawh zet a u Mapuia'n motor a thunun kual lai chu ka en zui ta veng veng a.


Amah chuan ding takin hma lam a en ngur a, a rimawi play remin a kutțangin steering chu a tuk kauh kauh bawk. Min ngaihtuah lutuk avangin ka hlimna tur nia a hriat chu min tihpui a tum nghal tut tut zel niin ka hre hial a. Ani ka nei chu nihlawh intihviau awm tak. Mak deuh maiin ka chhungril ah chuan amah lainatna chu a rawn insiam riai riai a. Ka tan a inpumpek zo em em a, kei chuan a lak aţang min duatna leh min ngaihsakna lo luang chhuak te chu ka lo dawng tawp a, tih lawm let ve ngaihna lah ka hre der silo.


Thawk la hak chungin mit chu ka la sawn nghal daih a, tukverh ah dak chhuakin chhum in tlang ruam a lo bawh var lak lak chu hmuhnawm ti deuhin ka thlir zui ta a. Tlang dung ruam tuamtu chhum zing chek chek chu u Mapuia nen ka chan deuh tlat bawk.


Ka ngaihtuahna lo hnim nghal ruih chu duh lovin thawk ka la hap a, "Hetilai tlang dung vel hi a mawi e," ka ti zui lar lar a.


U Mapuia paw'n khaw țhenawm ramchin leh Khawbung ramchin te chu min lo kawh hmuh ve nghal a. Khawbung a a awm țanna a la rei bik si lova, Khawbung khua chang ni lo, khaw țhenawm ram chin thlenga a hre bik vek chu mak ka ti ru hle bawk.


"Thingkung awm tlemna lai bik saw ngati nge a, lei min na avang a mi?" tiin ral lehlam chu ka kawk zeuh zeuh a, "Chul hlui a nih saw," a lo ti let ve bul bul a.


"Kum tin maiin lo neihna hmun kan sawn kual a, ramngaw lah kan vat chereu duai duai reng a. Chutiang te ngaihtuah chuan ramngaw an la nei țha ngawt a sin," a ti zui duah a.

"I mak ka ti," nui chung hian ka melh ralh a, chiang fahran a min lo en pahin a mit hmul chu a ti kang uk a, "Thingtlang mi ang maiin thil chinchang i hre em a.." zawite a ka tih chuan a lo kiai deuh suk a.


Tukverh darthlalang ti hniam meuhin ka dak chhuak zui a. Ruah a tlak deuh reng avangin hnim leh thingkung te reng reng chu an hring țha in an lang thar sur hlawm a. Ral lehlam ah lah ramngaw a lang hring hlim duk mai bawk si a. Khawbung tlang dung a ramngaw te chu Amazon rainforest aia a hmuhnawm loh bikna a awm lo hial in ka hria.



BDO Quarter bawr kha tlan pel leh in Damdawi in tlang te kan tlan pel phei zel a. Veng hulum lai lut phei a kan lawina Biak in awmna kan hnaih takah chuan thil hriat chhuah ka nei thut a.


"U Mapui" zawhna ngah hmel zeta ka ti chhuak hliai chu min lo en rang khawp mai. 'Enge ni?' ti niawm takin mit ko a kan uk bawk.


"Kan inkhawmna veng hi ngati nge Pathian veng an tih daih a?" ka ti phawng a, Veng hming a 'Pathian veng' han tih tawlh mai chu a mak ka ti tak zet.


"A mak i ti deuh em ni?" a lo ti fan ruih a, a nuihzat hmel lek lek tih chu hrethiam tho mah ila, "aw, kan thlen zan khan ka zawt hreh deuh che a" ka ti let a, min lo thlek a, hriatthiam harsa zet hian min melh ngur bawk.


"Ka tih awmzia chu.." ka ti leh chu lu min thin khum nghut a, hma lam en leh nghal run pahin," thil hriat duh i neih chuan engmah min zawt hreh suh," a ti dam ta thlup bawk.


Ka chhan kher a phut lo tih chu ka hre nain ka bu nghat nghat tho, amah paw'n țha deuhin Pathian veng an tih chhan chu min hrilh ta a, "Khawbung khua a ringtu hmasa te kha a huho deuhin hetilai ah hian an awm khawm țhin a ni awm e," tiin motor chhung aţang chuan min kawh hmuh a.


"Ringtu a in let thar te'n an fin belh zel a. Biakin awmna mual leh mual lehlam te pawh saw awh khat zelin biak in te an din chho a. Ringtu hmasa te bawh bik veng a nih avangin Pathian veng tiin an sawi ta mai a nih hmel e a," tia a sawifiah hnu ah chuan 'Pathian veng' an vuah chu a awm ta zawk viauin ka hria.


U Mapuia bawk chuan Khawbung chanchin a hriat ang chu a sawi zawm zel a. "Khawbung hi Mizoram a kristian hmasa awmna, kohhran upa te pawh an awm hmasakna khua a nih hi," a ti leh dap dap a.


"Kan mizoram chhungah ngei pawh hian Kristian hmasa te kha an nun a chep ve țhin in ka hria.." tiin ka lo tui hnih ve vat bawk. Mizo te zinga ringtu hmasa ber Khuma leh Khara te chanchin thlengin ka ngaihtuah let rauh rauh mai.

"Lal lal hunlai a la ni a, Lal țhenkhat te phei chuan an khua ah ringtu te awm ve phal lovin an hnawtchhuak hial țhin alawm," thutak zet hian a lo ti a, "Tunlaia vai ho in kristian missionary te an haw deuh tlat ang chiah hi a ni ve ang tiraw," pawi ti deuh a ka tih leh chu min lo thlekin a bu deuh nghut a. Chutiang thil ka sawi ve duah chu hlimpui tih hriat takin min nuih zui suk suk bawk.


Khawbung a lo cheng hmasa te kha a tirah chuan Kristian a ni vek lo tih a lang reng. Ringtu hmasa te chu a hranin khaw hmawr lam ah an inkulh bing ve deuh ang a. Hmusit a diriam duh tawk pawh an awm ngei ang.


U Mapuia chuan kan tlan pelh taka hmun pawimawh lai te chu min kawh hmuh zel a. Kar lovah Sasaw hmun chu kan thleng ta thuai a.


Hmun zau rem zet ah motor chu a hung zui a. Ngaw hnuai kawng tih takah a lo dai ruih mai a. Motor ațang chuan phur lutuk in ka chhuak nghal a. Chhun nisat vanglai pawhin kalkawng hi a hlim reng in ka ring.

Midang te paw'n chawlh nan an lo hmang fo țhin tih hriat takin motor hunna kiang vel chu a lo bel țha viau a. Sava hram raih raih te chu hmuh mai inring in thingkung sang pui pui chu ka en chho ha ha reng a. Chulai boruak chu a nuam dang dai lutuk ti ila a fiah ber ang.


U Mapuia lo chhuak ve vut lamah chuan ka tlan phei a. Ani pui lah chuan ka tluk palh hlau ni awm takin motor kawngka pawh nam phui ta lo chuan min lo man bet nghal hmiah pek a!

"Fimkhur tur," patlingin a fanu a hrilh ang mai hian min han ti leh zui a, tlu khat khat rual ka nih bik tawh lo zia ka inhriat avangin ner nawngin ka melh chho vak ringawt.

"Thosi an tam viau dawn ania," a lo ti dam leh thlup zui bawk nen ka ngei lek lek mai. Min hmeichhe naupang cheibawl leh tlat tawhin ka hria. Pafa kal chhuak, pa in a fanu tluk nat palh hlaua a veng ru reng hi inchan mai a awl duh khawp mai.


"An tam ve bawk ang chu" ka tih chuan min chhang tawh lem lovin min chhuk en run run a. A tawpah chuan hriat chhuah nei thut ang mai hian a che nghal vut a.

'Eng tak ti leh ang maw' ti rilru chungin ka lo en ta reng a, motor chhungah a kun lut a. Hoodie dum leh Jogger dum a ha bawk nen amah lah chu a lang lian zual em em a, motor hmalam a pawh hawn ațang chuan bur pakhat hi a la chhuak vut a.


Zawhna ngah deuha ka lo en ha ha reng chu a bur lo lak chhuah chhin chu hawngin min rawn 'spray' ta pek a.

"Enge i hriat a?" ti vin hlurin ka lo indang nghal ruai a, u Mapuia lah chuan, " thosi hlo a nih hi, inher rawh," a lo ti mai leh nghal. Rum chhuak hakin ka inher ve mai a, ka hnung lam pawh chu a rawn spray uluk viau mai.

"A tirah khan sawi ve mai ta che," ti bai bai chunga ka inher leh chu min lo nuih suk sukin amah pawh chu a in spray ve thuak thuak a.


"Ramngaw chhungah hian luh an phal em? Eitur awmna kha keng ila ramngaw chhung ah zuk ei daih ang aw," tia ka han sawm chiah chu min nuih ta huk huk a.


Hrethiam lo deuh a ka en chu nuihza insum hmel taka min en chung hian, "Vangvat an tam rih viau ang" a rawn ti bul bul a. A thil sawi awmzia chu hrethiam lawk lovin ka bangbo hman hle lehnghal.


"Khaw hnawm lai hian Vangvat an tam duh alawm," a rawn tih leh dut a, ka hrethiam ve tawh khawp mai. Ka nui chhuak ta hak hak a, "Vangvat i lo sawi chhuak deuh thut sia, enge a nih ka hre lo deuh thut alawm," ka han ti chu awmze nei deuh hian min melh a, a mitmeng chu rilruihin a lang lum huam ti ila a fiah ber ang.

Rei en let ngam lo in ka hawi sawn ta daih a, "I ril a țam tawh em?" tia min lo zawh dut chuan lu ka thing ringawt.


Ramngaw kalna tur ni awm tak a sial chawp kawng lang raih chu ka va thlek leh țhin a. Chhungkaw khawsak harsa ve tak ațanga seilian ni mah ila ramhnuai ah kal chhuak a, chawhmeh hralh tur te zawn ngai khawpin kan awm ngai lo thung. Chuvangin ka pian a hnu lamah ramhnuai ka la kal lo hrim hrim. Tunah hian ramngaw chhunga kal chu chak viau mah ila u Mapuia hian a phal dawn der si lova.


Chutia ka ngawi ta reng chu ka titau a maw a lo ti aniang, "Naute," a rawn ti dut a.


A lam ka hawi phei chu ngunthluk zet hian min lo en a, "eitur hi a daih hmain ei phawt ila, ei kham ah ramngaw chhungah hian thui lo te kan vak kual dawn ania," a lo ti ta hlauh bawk.


Ka hlim bawk si leh a thu sawi a sut leh mai ka hlau bawk si chuan, "Kan ei kham hunah kal i duh loh leh si chuan i chak lo viau ang," tiin ka vau nghal pang pang a. A phun zui hluk bawk. Vangvat leh thosi a chhuanlam leh paw'n ka pawt lui țang țang tho ang.



Nu Tlingi sawi ang tak takin chawhmeh tui nei a khung tel lova. Mahse, ramngaw hnuai ah ngei kan ei avangin ka ei tui viau tho.


Kan ei ruahna te chu chhin felin bag ah chuan ka thun leh thlap a. U Mapuia erawh zial zu in motor dinna piah deuh ah a kal phei a. Motor hnunglam ah ka indah fel leh thlap a, kawngka nam phui dat a ka pan phei chu min lo thlekin mit zim sun hian min lo en vung vung a.


Khaw hnim ruih kara ramngaw dur thim khup hnuai ah zial zu a han din chu a lan pa pui hluah hluah in ka hria a. Ka ngaihtuahna chu ka nuih pui seih bawk..

A bul ka thlen phei chuan kut a lo lek chhuak vut a, rang deuha ka ban rualin nghet cherh chawrh tak hian a lo hum nghal a.

"Thui lutuk chu a kal chi lo ang aw," a lo ti nghal nghut bawk. Ka chhan let hma hauhin amah bawk chuan, "kê in i kal țhang silo, i sil lutuk palh ang," a ti zui leh a. Hnial chi ah ka ngai tawh bik lo. A kam chhuak reng reng chu min ngaihtuah lutuk vang tih ka chiang tawh em a ni.

Ramngaw chungril zawk chu a lo hnawm hle a. Khua a thim thet thet tawh avangin rannung hram thei tawh phawt te chuan an aw neih ang angin, 'kan lal ram a nih hi' ti ve ni awm fahranin an lo hram tliar tliar bawk a. Thingkung hnah tla lah a tam, rahna lai chu a dup suih suih chang a tam a, u Mapuia chuan min veng leh lutuk a amah chu a hah vek hial in ka ring.

Thui ang reng tak kan kal hnu chuan, "rin aiin i kal thei phian mai" min han ti deuh ringawt pek a. Nui chung hian, " 'Naute, let tawh teh ang' ti țha hle hle la a nih chu," ka ti let ve thung a.


U Mapuia paw'n min veng ru țo mai chu ka lo hrethiam vek a ni tih chu a hre ve ta a. A nui zui huk huk mai.

Kan let leh lamah chuan ka kut a hum run a, min kal chak pui lem lo bawk a thlan a sa em em lo. Thil eng emaw kan sawi dun mawlh mawlh kar lakah chuan, "i pa chuan enge a rawn sawi a," a lo ti thut a.


"Eng mah," ka ti let ringawt.


Ka chhan dan teh tawlh chu a lungawi loh pui viau tur ah ka ngai a. Mahse, beisei lo tak mai hian, "hun an neih chuan lo zin ve se la a țha ang, tiraw?" min rawn ni awm takin a ti zui leh a. Ka ding ta dat bawk.


U Mapuia pawh chu a ding ve nghal a. Muangchang a lo inherin ka kut a hum mek chu a hum nghet zual sauh a, min dinchilh zui hmiah bawk. Ka pa te chungchang min sawipui a duh vangin zanin tlai hian min hruai chhuak a nih chu ka ring ta deuh a.

"Naute, luhlul chhuah tawh lovin i nu leh pa te tan hian inhawng ve tawh la a țha lo maw?" zawldawh tak a min en chung hian a rawn ti ta charh charh a.


"An chungchang chu sawi lo teh ang," ka ti let hmak thung.


Min chhuk en run chungin a ngawi zui vung vung a. Nawr luih chiam chi ah min hrelo te pawh a ni mahna, ngawi rengin min kal pui leh a.

Kawng sial chawp chu a tet em avangin ka hmaah a kal zel a, ka kut chu a thlah lovin min pawt kal a ni zawk mah. Min sawipui renrun ang a lang si lovin kawng kal pah chuan ka pa te chungchang chu a sawi zel tho a, "in inchhung khur boruak chu i sawi ngai miah lovin ka hrethiam ve tho ania. I naupanlaia an enkawl danah che pawh lungawi lohna tur tam tak i nei ang. Mahse, heti zawng hian i ngaihtuah tawh ngai em?" ti lehin sawi zo ta mai lo chuan a rawn hawi let thut bawk.


A thil sawi lai kha ka lo ngaithla uluk kher bawk nen, a sawi leh tur chu hriat chakna hian ka khat a.


U Mapuia chuan tawite a min nuih sukin kawng lam chu a en leh nghal daih a, "i nu leh pa te hian enkawl tu țha nu leh pa an nei bik lova. Enkawlna an dawn țhin ang bakin nang hi an enkawl thiam ta lo che.. chutiang zawng chuan vawi khat tal i ngaihtuah tawh țhin em? " zawi tak hian a ti thum dut dut a. Rawn hawi let tawh lovin a kal zel a.



Thu tamtak aiin a sawi chhun thu tlemte chuan ka nu leh pa te dinhmun chu hmuh thiam sak turin min pui zawk tlat!


Ka la ngaihtuah chhin ngai miah loh angin thil chu ka ngaihtuah ve ta a.


Ka pi leh pu te pawh zu zuar țhin anni a. Tuna kan inchhungkhur boruak ang chiah hian zu lei tu te leh zu in a lo leng lut țhin te nen an ri nuaih nuaih zel dawn a. Chutiang boruak karah chuan ka nu pawh a seilian chho a. Kei min hrin khan kum 17 lek a upa a la ni bawk! Ka pa pawh kum naupangte ni si a RV ah a tal nghal ngawt danah; chhungkaw inrelbawlna țha tak hnuai ațanga seilian a ni dawn bik lo tih a chiang em em a. Nu leh pa te nun ațanga an zir chhuah ang bakin fa te lah kan nung chho mawh! Ka nu paw'n ka pi leh pu te'n an enkawl dan ang chiahin min enkawl ve a ni khawp ang.


Ka ngaihtuahna te chu rawn hre vek ang maiin, "An dinhmun hi hriatthiam sak la ngaihdam tum hram hram rawh Naute. I rilru pawh a dam hma zawk ang," a lo ti leh ta a, chho kal kan nih avangin u Mapuia aw ri chu a thum zual hle a. A dar hrawl leh ngheh hmel zet chu ka han melh deuh vang vang a.


"I pa pawh inthiam lohna nasa tak nei chungin a awm mek tih hria la, a thiam dan leh a kawng hriat ang ang a in inkar siam țha tura a beihna hi lo inkharkhip san reng suh," ti zui charh charhin a rawn thle let leh a.



Ngawi renga ka en chho chu hriatthiamna a khat mitmeng lang dam ruih hian min lo en let ve a, "Ka sawi țhin kha, i pa hian a ngai lutuk che, nangpawh in i ngai em em bawk," tia min duat hmel lutuk a min rawn nuih suk chuan ka lo in pet ruh nghal fan fan.


Ramngaw hnuai ah kan awm bawk nen u Mapuia aw chu a thum zual a, chu a aw thum leh dam ruih hmang a ka pa nen kan inkar siam țhat tum a min fuihna thu chuan min hneh bik tak zet bawk.



"A lo biak leh hunah che țha takin lo dawngsawng tawh la tiraw," min thlem pah deuh chungin a rawn ti dam leh ruih a, ka kut a hum lohna zawk chuan reilote ka biang a rawn khuap thuak bawk.


"Lo zin ve se la, nangmah ber hian nuam i ti phian mai thei asin," a han ti leh a, ka chhang let lo chung paw'n lungawi lo hmel a pu chuang lo, a kutzungpuiin duat zeta ka beng hnuai a lo tuai hauh hauh hnuah a kut chu la let in a kal țan leh nghal a.

Ka rilru a insual buai nasa hle ang tih chu hre lawk ni awm takin ka pa te chungchang lam hawi chu a sawi zawm tawh lova, "I chau tawh em?" min ti khat tawk reng thung.

Chutilai tak chuan ruah mal a rawn tla zui fuap fuap a.

Kan awmna lah a la pilril ang reng si nen phili zet hian, "Ruah a sur a nia," ka ti zui chul a. A hnung lam ațang ka nam ta dawt dawt chu min nuih hawkin min kal chak pui ta sauh sauh a.

Thui pawh kan kal hmain ka hah a hlau chuan, "Ka paw mai ang che" a lo ti dut dut reng a, ka hnial ve tlat thung.


Kawng kan han pawh chho țep tawh tih ah chuan thawm ka hre leh țhin a. Kan sir zel hnim pik karah chuan kal an awm ve hian ka hre ta tlat bawk!


Ka sir pik lai chu melh ru hrek hrek in ka pen chak zual sauh a. Min zui zel tu chu Rulpui a nih ka ring hial tawh! Ka sir pik kar lei hrul zelah phe zeuh zeuh chu a awm zel!



A hnu deuh ah phei chuan min rawn bei thut dawnin ka hre ta tlat a!

Keini lahin eng hriamhrei mah kan keng bawk si lo. U Mapuia chu hrilh hriat vat a țul a hriain thawm chhuah rin hlau ru deuh hian, "U Mapui..." ka ti sep a. Ka pawt zui dat bawk.


U Mapuia pawh chu a ding zui chut a. Chuveleh kan sir a thawm awm pawh chu a tawp ve nghal hmiah bawk a!!


U Mapuia chu a ka nek rawk rawk tawh a ni ber mai! Ka darah min lo kuah nghal hlun a.

"Ngati nge?" a rawn tih sup chuan thaw dep dep in ka en chho a. Ngaihțhat loh hmel zet a min lo en chhuk ve run tu chu sir lam chu ka kawh hmuh a, "kan rual a kal ve zel a awm ania.." ti sar sar chungin a kut chu ka hmer nghet zui vak bawk.

U Mapuia paw'n kan sir pik lam chu a thlek nghal thuak a, Rul lian zet rawn tleng chhuak thutin min rawn chuk phut ang tih mawlh chu ka hlau! Kan awmna lah a ngaw țha si, lei lung a hnawm chuap bawk si a, Rul an tam ngawt ang.


Fiah tur a u Mapuia che zui vut chu rang lutukin ka pawt zui nghek a, "hmanrua engmah i keng bawk silo, Rul te a lo nih phei chuan a lo chuk mai ang che," hlauthawng deuh hian ka ti khar khar a.


Ka thil sawi chu atthlak tih hmel deuhin u Mapuia lah chuan min lo nuih mai leh nghal.


"kal ang, i inrin theih nan ka hrilh ringawt che a nih kha, fiah kher a ngai lo," hlauthawng deuh a ti chungin kal turin ka nawr nghal tut tut a.


Chutianga thawm ka siam rin takah chuan kan sir pik kar chu a rawn ri ta sut sut a! Rul a nih loh reng ka ring tawh lo lutuk chu ka za vek thei!

"Tlan ang.. vat vat in," tiin u Mapuia chu ka nawr chuk chuk a, ka țim uaih uaih bawk, u Mapuia chu ka tlan pel a, chhak deuh ka thlen chhoh chuan min lo zui ve reng reng lo tih ka hre leh hnuhnawh a. Ka ngei asin aw!!


Zuk hawi let leh pahin vin lutuk hian, "U Mapui..." ka ti hlur a. Ani pui chuan eng emaw pawm chungin min lo nuih suk suk nia maw le!

"Enge a?" ka ti leh hu a, la nui ruh ruh chungin a rawn chho ve zel a. A thil pawm lai ka han hmu ve chiah chu mak tihna avangin ka meng zui kawk kawk a.

Ka bul a lo thlen chhoh rual chuan, "Sakei note elo?" Ka ti ți dak a, Sakei dang an lo lan belh leh hlauhna hian ka khat nghal a. Ngaihngam lo zetin ka hawi kual zui hrek hrek bawk.

"Ngati nge i lo man a, a chhungte'n min lo um palh ang e aw.." thawk la hak a tiin a thil pawm lai chu ka en ran a, Ka thinphu pawh a la ri dawt dawt mai.



U Mapuia chuan,"Sihal no zawk a nih hi" a lo ti sup a.

"Khawih ah nge a chhungte?" ka ti let ve zat chu min nuih ta hawk a. Kei thung chu ka ip leh chawih tawh! U Mapuia nui ri chu lo hriain ramsa dang an rawn chhuah belh mai hlauhna hian ka khat a. U Mapuia chu ka hnaih leh hrut hrut tawh.



Amah thung chu a talbuai ve lo khawp mai, kan thlang lam chu a zuk thlek thla leh vung vung a. A Sihal no pawm lai lah chuan ngawi hle hle hian min melh kiau reuh a, duat tu a mamawh hmel in ka hre ta tlat bawk.


Kan chheh vel thithlai a u Mapuia hawi kual chuan, "A Pui a awm hnai mai lo maw le" a ti zui vung vung a.

Min lo en leh chuan,"hawn daih ang," ka lo ti nghal a. Awm lo tih hmel taka chal ti chuar tup a min en chhuk run laiin Sihal note chu ka ban a, min lo pe ve mai bawk. Mahse, "Naute, vulh chi a nilo, kan ti thi vat mai ang," a lo ti kauh.

"Bawnghnute nen kan chawm dawn alawm," tiin ka țang kawh ve tlat thung. Bawnghnute lak sak ila, tui a ti ngawt ang.


Chutia ka pawm chu Sihal note lah chuan ka nghawng lum chuh ve niawm takin min nul sat sat reng a, a hmelțha reuh si, neih hlen daih ka duh.


U Mapuia chu rilru buai hmel deuhin a hawi kual thuak thuak reng a. Sihal pui chu a zawng rilru te pawh aniang. Ruah pawh a la tla reng a, Sihal note chu ka Hoodie hma lamin ka tuam a, "I zaidam hmel reuh si, ka nei daih ang che aw," tia Sihal note ka be mial mial chu min rawn thlek deuh vung vung a. Sihal note lahin ngawi rengin u Mapuia chu a en ve ran a. Kei lahin 'hawn daih ang' tih melhin ka melh ve kiau bawk nen thawk a la ta hulh a.

A tawpah chuan, "Chho phawt teh ang u," a lo ti ta hluk a. Khek raih paha Sihal note pawm chunga ka inher chu ka mawng a rawn beng thlawp a, "hlau a i tlanchhiat nasat nen," a rawn ti fiam hluk bawk.


"Naah, Rul tur ah ka ngaih vang mai mai alawm," ka ti let chu min nui zui huk huk a. Kar lova kawngpui kan chhuak chho a. U Mapuia chuan rang deuhin ka țhutna lam chu min pawh hawn sak a, ka țhut luh fel rualin a hoodie hak chu a hlip nghal mawlh mawlh a.

Min lo pek rual chuan, "hei hian tuam zawk rawh," a ti sup a. Ramngaw lam chu a thlir thla leh vung vung a. A awm danah chuan Sihal no hawn chu a hreh hmel riauin ka hria. Kei lahin hawn daih ka duh bur bawk sia, "Lo lut vat rawh, Ruah a tlak reng hi," ka va ti a.


Motor a a rawn țhu lut chuan light a ti eng nghal a, ka mal chunga Sihal note nen chuan min en tawn deuh chhen bawk. Ka malchung a mi te reuh lah chu a ngawi chiah chiah reng a, motor chhung a eng de zek zek te chu a en kual vial vial reuh a. Duhawm ka tih lutuk a lam ah ka ha a ziau vek theiin ka hria.


" Hliam a nei a ni lo maw," a rawn ti ta khauh a. Ka tuamna chu rawn keu hawngin a kê te chu a bih sak nghal thuak thuak a. Chek zui hluk chung hian, "a kê hnunglam hi a hliam a nih kha," a ti ta nghut.


"Engtin nge kan tih dawn?" ti ve vat pahin Sihal note chu ka tuam lum leh nghal a.

"Forest department ah hlan a ngai ang," a rawn ti chiah chu ka melh rum nghal vak a.

"Ka nei dawn ka tih tawh kha," ka ti vin hlur chu lu min lo thin khum hmiahin Motor chu a ti nung zui a.

"Ka nei dawn tho tho.." hawi tau hmak paha ka tih chuan a lo thaw huai a.


Steering thunun mawp mawp paha Sasaw hmun kha ramngaw humhalh lai a nih thu te, forest department lamin ramngaw humhalh chhung a nungcha kan man tih an hriat ruala man theih kan nih dan te chu min hrilh dap dap a. Sihal note ka neih chakna chu a kiam phah chuang lo.


Chhang let lo in ka ngawi ngal reuh sia, a tawpah u Mapuia pawh chuan, "zanin chiah kan kawl ang a, naktuk ah forest department lamah kan hlan ang," a rawn ti a.


Nem vak lova ka va melh leh hram chu min lo nuih a, "ui note lak tur kan zawng zawk dawn ania.." tia dam thlup a min thlem hnu chuan ka lungawi ve ta deuh.


Kawng tluan chuan ramsa leh ransa te inan lohna chu min hrilhfiah a. Sihal note pawh hi duatin bawnghnute te nen chawm țha viau mah ila; mihring ranvulh tur a nih miau loh avangin a dam rei dawn chuang lo, tih vel te chuan ka rilru hneh a tum khawp mai.


Biak in thlang kan thlen phei chuan Sihal ke hliam a hnawih sak turin Saka pa Rifle tel (oil) dil a rawt a, motor hung fel a a chhuah dawn chuan, "i thuamhnaw a hnawm vek sia, lo chhuk thaw ve lo mai rawh," min ti a. Ka hnial hran lo.


A kal chhuak vut chu en zui tawh lem lovin Sihal note chu ka be melh melh reng a. Ka hmuh tirh a Sakei note tur a ka ngai kha a mak hran lo. Sakei ang deuhin zia a nei ve tlat a ni.

"I hmelțha reuh e, i pu Mapuia khan zanin chiah ka kawl che a phal sia, neih hlen daih che ka duh asin le.." a lu a chul sak heuh heuh pahin ka ti a. A lo maimitchhing ve diar diar a.

"I Pui nen in inhlohna a rei tawh em?" ka han ti leh a, kan sir ah zel a lo kal ve lai te khan a mangang ru ve reuh ngawt ang.


"I Pui nen in inhloh vangin a mi keini kha min lo zui zel a?" tia ka biak chuan fiah deuh hian min melh ve kiau reuh a. A dinhmun leh ka dinhmun chuan in an na riau a nei a, ka lainat lutuk chu ka hnuk a ulh lek lek.


"I mangang reuh ngawt ang," ti sapin ka awm ah ka kuah bet a. Ramngaw dur khup hnuaiah a pui nen an in hloh tih a hriatthiam ruala a thlaphan tur zia chu ka mitthla hial thei. A la te si, a bo na ramngaw lah a zau bawk si, a ril te pawh a țam tawh ngawt ang.

"In kan thlen veleh eitur ka pe țeuh ang che aw," ti chhuak leh hliai in ka chul heuh heuh a. Mahni note nena in hloh thei khawp Sihal pui tlaw zet chu ka haw rilru hlur bawk. Chutihlai tak chuan ka țhutna lam darthlalang chu pawn lam ațangin a rawn in kik ri keuh a.


Rang zet a ka hawi chhuak leh Dana lo kun hniam run chu kan in melh nghal siah bawk. Mak ti lutuk a ka men zau kawk laiin ani thung chu a lo țhen suk a.


Hmui phunin darthlalang chu down turin min hrilh zui a. Eng thil nge ka hriat pawh ka inhre lo, a sawi angin darthlalang chu ka ti hniam a. Dana chu tukverh bawh chuan a lo kun hniam nghal run bawk.


Ka Sihal pawm lai chu reilo te a lo melh deuh run run hnuah, "Khawi a Sihal no nge i pawm teh ngawt" a rawn ti zui hluk.

"Ui note a sin.." ka lo ti ve deuh tlat a. Nui che dawt paha min lo melh rulh chuan ka lo nui ve ta tho. Kan inbum hmel loh bawk em a ni.


A kut lo lek chhuakin Sihal lu chu a lo tuai ve thuak thuak a. A palian in a intuai hnum ang reng sia, nula a rim dawn a nih ka ring. Kan ngawih dun vang vang lai chuan, "I number chu.." thutak zet hian a rawn ti zawi ruih a.

"Eng ka number maw?" ka ti hu hman a. Mahse, a sawi awmzia chu ka hrethiam chawpchilh nghal a. Mipa in ka phone number min dil hmasakna ber a nih vangin ka zam titih ringawt leh nghal.

"i phone number ka tihna a nih chu, min pe phal em?" zawi tak bawkin a rawn ti leh a. Amah pawh chu a lai ve tho in ka hria, Sihal lu chu a tuai a tuai mai.

"Enga tan nge i tih a?" ka zam zia thupin a mitah tak ka en lui tlat a. Nui hmel pu lek lek chung hian, "ka nei chak," a rawn ti ve hmiah.

"Ka phal lo"


"Ouch!" lo tiin a thin zawn chu uang zet hian a dawm a. A mitmeng thim ruih chuan min la melh lui ngur tho. Mahse, țum dang ang lo takin a mitmeng chu zamna in a pawlh tel a, a țawng ri chu midangte'an lo hriat palh hlau niawm tak hian, "min pe phal la chu ka lawm dawn vei nen," a ti zawi leh ruih a.

Sawi ve leh mai tur hrelo zet hian ka melh reng a, ka thinphu lah chu a lo phu rang dup dup a. Dana bawk chuan ngenngawl deuh hian, "Min pe mai la," a lo ti leh hram a. A țawng zawih em avangin a thil sawi chu ka hrethei chang chang chauh a.


"Mi nu ka nih tawh hi," ka tih let sak lai chuan tukin ang bawk khan nuihza hmel a pu leh tawh. Motor chhung a rawn kun lut sauh pahin cho hmel zetin min melh ta run run a. "I number chu ka la nei dawn khawp," a ti ve ta ngat bawk. Chutiang tak mai a min cho ngam chu a mak ka ti ang reng, phurawm rukna riau a awm tel leh nghal!!

"Kan la hria ang chu," luhlul hmel zetin ka ti let ve ţalh a. Mahse, a phur hmel chu a bo phah chuang lo.

Ka mita min melhna chu la sawn hauh lovin,"Kan la hria ang," a rawn ti ve leh ngat a, a ding mar zui ruai ruai bawk.

Chutihlai tak chuan Saka te veranda lam ah chuan thawm a lo awm ta a.


Ka va hawi pheiin u Mapuia leh midang rawn inzui chhuak mek te ka va hmu thut chu ka harh chhuak zawk a ni ber! Chiai deuha Dana ka melh leh nghal chuan tukin ang khan engmah ka sawi a ngai tawh lo.


Tukverh ah chuan a rawn dak lut leh thut a, "In inthlen rualin in ha lum nghal ang che," tiin ka biang a rawn piai zeuh a, mit khap kar lekin a insaseng nghal vut bawk.


A chet dan chuan min ti hamhaih lek lek. Ti ti mawlh mawlh chungin u Mapuia te pawh an lo thleng chho a. Rang lutukin darthlalang chu ka 'up' sawk sawk a.


U Mapuia'n driver side a lo pawh hawn rualin Saka pa khan, "In leng chhuak chuan Sihal no in rawn hawn ringawt a ni maw?" rawn tiin a nui zui hawk hawk a.


Tawite in ka lo nuih let ve a. "Naute, Pa Muana hi a hliam kha en tir lawk ta che," u Mapuia chuan a rawn ti dam thlup a. Rang deuhin Sihal note chu ka pe phei a, Pa Muana chuan ka tuamna chu keu hawngin a hliam te chu a en kual nghal thuak thuak a. Chutihlai chuan Dana pawh Saka te Veranda ah a lo ding fel der tawh a, motor lam chu a rawn thlir chho vung vung bawk. A tawpah Saka pa chuan, "hliam na lutuk a nih loh hi, oil hi hnawih sak ula, a dam leh vat mai ang," a ti ta a.

Kan tlan chhuak tur chu Dana khan hriatthiam harsa zetin min thlir zui reng a. Ka number min dil laia ka awm dan te lah kha...


Hmalam chu hmu hlei lovin ka melh vang vang a, khap pawh khap lo hian, "U Mapui, engtin nge ka phone number kha i neih a" ka ti sep a.


Min chhang let lawk lova a ngawih vung vung dana ka zawhna teh thut vang khan a hamhaih a nih ka ring. "I Pa in min pe alawm, ngati nge ni?" a rawn ti a.


"Ka zawt mai mai che.." ka ti let sap ringawt. Melh ngai melh veng vengin Sihal note lu chu ka tuai sak heuh heuh a. Ka pa in palai a lo tirh tur thu a sawi zan la la a'n min rawn text nghal tak kha..


Zingah chuan naupang țawng ri nak nak thawmin min ti harh hlawl a. Ka hriat sual a maw tiin bangbo zet hian ka țhu chhuak a. 'Ka awmna hmun chu kan in a ni lo em ni chu aw' tihna rilru ka pu hman hial bawk.


Mahse, mipa naupang aw in 'Sihal te chuan sa pawh an ei thei alawm' a tih ri ka hriat takah chuan ka thaw huai mai.


Tho chhuak sawk sawkin ka inphihfai nghal a, skin care ti zo in ka chhuak ve ta a. Kan in ah chuan a mak a mak a tam naupang rual an lo phu suau suau mai a.


Sihal note kha chhuat laiah an lo bial laih a, ka va chhuak ve pawh chu a tu a man min lo ngaihven lo, choka ah ka luh san a, Tual zawl lamah pawh naupang thawm chu a awm.

"An ti harh che a mi?" tiin Nu Tlingi chu a lo nui kar kar a. "Engtin nge Sihal note kan nei tih an lo hriat theih le," ka ti let ve thung a.

"Aaa, Nizan Pu Muana te kawmchhak a i chawl kha a tupa in a lo hmu cheu aniang," a tih takah chuan ka nui ve ta tawp.


Naupang lam chu school kal tur te an nih avangin an țin darh ta dam dam a. U Mapuia paw'n a hna kal hmaa Forest R.O te in a dah phei a rawt zui a.


Kan kawl theih loh thu a sawi chiang viau tawh chungin ka ui viau mai. Forest R.O te in lam kan pan lai te chuan ngawi rengin min thlek leh vung vung zel a.


Ka insum thei lo chuan, "heti hian R.O kut ah kan dah ang a, engtin nge an tih zui dawn a?" ka ti a. Ka aw chu a chang lek lek.

"Naute" a rawn ti nghut a.

"Ramhnuai ah an chhuah leh ringawt dawn a mi?" thin tawt zet a tiin ka melh ran a.


Min chhan letna pawh nghak zui lovin, "a la tet em hi. Amah ngawt hi chuan a dam chhuak zo teuh lo. Ramhnuai ah amah chiah a a awm ngam loh vangin keini kha min zui zel te pawh a lo ni thei a. Hetia ramhnuai bawk a dah let leh tur ngawt a pek daih te chu... A pui lak tlak loh zet kha an zawn hmuh sak hma chu lo la kawl rih mai ang" ka ti a, rilru tawt lutuk hian ka thaw zui hap a. Chik taka min en vang vang hnuah kawngsir zau laiah motor chu a ti ding a.


"I țha miah lo," tia chiang fahran a min rawn en vang chuan thawk ka la leh hap a. Kei tak paw'n ka awm dan chu ka hrethiam bik lo. Sihal note ah hian ka inchan tlat a. Ramngaw chhunga mahni no hloh tu Sihal pui chu ka nu leh pa te ang maiin ka ngai bawk.

"Ka khawngaih em a ni, Ramhnuai ah bawk an chhuah leh ringawt ka hlau, a pui tello chuan a dam rei miah lo ang. En mah teh, kan bulah a awm hian a thla a muan em hi... U Mapui, BDO i nih kha, nangman kawl luih i duh chuan R.O te paw'n an hnial ngam miah lo ang che, keimahni'in enkawl ang.." melh ngawih ngawih paha ka tih laiin rilru buai hmel zet hian a rawn thaw chhuak hawk a.


Ka țap ringawt dawn a inhria in u Mapuia lak a ta mit ka la sawn a, ka malchung a mi lah chu a dinhmun hrethiam hauh lovin a lo hawi kual veuh veuh reuh a. Zep miah loh chuan ka naupanlai kha ka chan tlat tak tak!


Kut lum thupin ka dar a rawn hmer salh lai chuan Sihal note ngawt chu ka bih lui tlat a, ka khaw hmuh a phe riai tawh bawk.


"Ka tihpalh," a rawn ti thum dut a. A ngaihna hre lo zetin mittui nena ka han en chuan mahni indem hmel tak hian a lo insehruh țawlh țawlh a. Amah a indem ngawtna tur chu ka hrethiam ta hauh lo.

"I thiam loh engmah a awm lo," ka tih laichuan lu a lo thing nghut a, "i dinhmun nen hmehbelin i rilru a no tlat dawn. Chuthil chu hriatthiam pui tur che ka ni a sin le," pawi tih hmel zetin a ti zui vang vang a. Mak tiin a hmel chang rut chu ka melh ta reng ringawt.


Ka sawi chhuah ngai miah lovin ka rilru put hmang zawng zawng a lo hrethiam leh vek tawh a nih chu..



"Man kher lo ila chu hetiang hian i awm miah lovang," ti chang khawlh a hmai a tuai puat chuan ka thaw chhuak ham ham a. Tunah chuan keimah indemna rilru ka pu leh daih tawh. U Mapuia rilru tih hrehawm sak khawpa ka zuau mai chu pawi ka ti tak zet.


"Man lo la chu nizan ruah sur vangte khan a damlo zawk mai thei asin," ka ti a, ka dar a lo hmerna ban rek chu tuai sak heuh heuhin ka nui lui hram hram bawk.



Amah paw'n min thlem pah titih hian, "Hei hi chu Forest lam kut ah hlan ila, ui note lak tur kan zawng dawn a nia," a rawn ti a, ka tukhum ah rawn manin a lamah min pawt hnai deuh a, ka bekah a lo fawp zui vang vang a. "Ka tihpalh" tih chu a sawi nawn leh sup bawk.


RO te in ațang kan haw dawn chuan Sihal note chu chhuat ah amah in a vak kual ve rak rak a. Kawt zawl a kan chhuak chu min hrehrang ve tawh tih hriat deuhin kawngka ațang min lo thlir doh doh a. Rei ka en ngam lo, motor chhung ah ka luh san a, u Mapuia lo țhu lut paw'n ka rilru tur hrethiam takin motor a tinung zui nghal a.


In lam pana kan tlan let leh chuan tlang takin u Mapuia bulah pawh ka rilru put hmang chu ka hrilh ve vek a. Dawhthei takin min lo ngaithla a.

Naupanlaia nu leh pa sun tawh te'n chhungkaw hlim tak leh inngeih tlang tak te an hmuh changa an rilru a no nghal vek țhin ang hian; naupang ngaihsaktu mumal neilo ka hmuh changin ka rilru a no tlat zel.


Sihal note pawh kha a pui nen an awm tlan laia man te ni ila chu heti tak hian ka thinlungah a tlana bik miah lo ang.


U Mapuia hna kal hnu chuan tih tur a vang raih raih khawp mai. Nu Tlingi hian eirawngbawl pahin hmun a hawl a, chhuat a nawt leh vek țhin a. Insuk tur lah u Mapuia nena kan thuamhnaw chiah a nih vangin reilote chhungin a su zo zung zung mai sia. A haw meuh chuan ka tan tih ve tur a awm tawh ngai mang lo.


U Mapuia pheikhawk bawm chu ka tihfai sak ta ringawt a. A pheikhawk zawng zawng chu la chhuak in a bawm chu ka hru fai hliau a, ka rem luh leh mawlh mawlh laiin phone call ka dawng a.


Lucy-i a ni tih ka hria chu ka phur nghal khawp mai. Nizan paw'n in an thlen rualin kan inbe reng a. A mut nilen ka rin laia a lo call teh hlawl chu thil pawimawh sawi tur a neih a nih ka ring nghet hmiah bawk.

"Aw, ka pi," hello pawh ti hmasa loin ka ti nghal lang lang a.

"Hummm,," a rawn ti hmak thung.

"I la mu vum thur tur ah ka ngai a," nui kar kar hian ka ti zui a. "E, tukin khan Zoramsanga pawh ka hmu tak asin," ka ti leh hnuhnawh. Kan tlan let leh lamin Zawlbuk ah khan ka hmu tlat a ni.


Lucy-i paw'n" kar tawp ah a lo chhuk ve dawn," phur hmel deuhin a rawn ti a. Ka nui ta chiam ringawt. An ni pahnih hi an serious dawn riau mai.


"Enteh, hrilh tur che ka ngah tawp," a rawn ti hlui a. A rilru a ipik ve hmel kher mai.


"Eng lam nge?" ka ti let ve zat a. Lucy-i chuan ipik hmel deuhin thawk a la leh hmasa hak phawt a. Nizan a kan inbiak khan buaina nei awmin a awm silo a. Chutia a rawn ipik thar lutuk chuan ngaih a ti țha thei bik lo.


"Lucy?" tia ka auh chuan, "Khawbung a kan chhoh hma ni a thil thleng daih tawh kha ania. Nizan kan inbiak zawh hnu khan anu te'n min hrilh ve chiah a," a rawn ti hawk a. An inchhungkhur boruak a țha vak lo a nih chu ka ring thiam ve nghal mai bawk.


"Nilai thawhțan tlai ațang u Mapuia te in ah ka lo chhoh ve daih kha maw. Kha mi tlai khan au Muana'n dawr pawisa a lo la ru a. Khawbung a kan chhoh ni khan anu'n a hrechhuak leh sia. Apa nen an dawp a," a rawn ti leh ta a. A lo sawi leh tur chu ka tin zawn thiam ta ruak mai!



Pawi ti deuh hian, "a bialnu kha a rai leh tawh a mi?" ka lo ti ve sep a.


"Aw.. an ti tla leh tawh a nih kha! Au Muana lahin hlawh a la la silova, a bialnu lah khan hna a la nei ve bawk silo nen dawr pawisa a ru tawp a nih kha! Enteh, au Muana leh a bialnu hi meidil ah an tla ngei ngei ang tiraw?" a rawn ti leh hliai a, ka tum loh zetin ka nui hawk nghe nghe.


Ka țhiani lahin, "inneih hmain an chesual pawh tih tawh nak laiin, țum hnih ngawt nau an ti tla tawh si a. An pianthar țhat viau loh chuan keichu Pathian thinurna an tawng buak ka ring tlat tawh," a lo ti leh mial mial a. Christian te rin dan ah chuan tualthah (t) hi sual lian tak a ni tlat a. Nau tih tlak pawh tualthat ang riak a ni si a. Ngaihtuah chian chuan kan Lucy-i rilru pawh chu put awm tak tho chu a ni.

"An mahni leh Pathian inkar a ni tawh a, kha chu mihringte tan lo teh sak vak theih pawh a nilo," ka ti ve tak nain, "au Muana ber bur pawh hi ka ngei ania. Mahni fa te han tih tlak tir phal.." a rawn ti leh hluai a. Kei tak paw'n u Muana chu ka hau chak tak zet. U en a kan en ani ve a, kan ngaihsan tlak loh hian a che leh khut zel.


"I nu leh pa te'n enge an sawi?" tia ka zawh leh chuan, "Au Muana kha hnawhchhuah an lo tum a. Uii.. sawi dawn chuan sawi tur a tam tawp. Khawbung kan chhoh ni khan nau chu an lo ti tla a. Zana au Muana haw kha pawisa bo vang te khan an lo dawp a. A inpuang ta vek a. Apa aiin anu a thinur zawk, au Muana bulah, 'i nep em mai, țum hnih ngawt nau inti-tla tawh a. Tun a i bialnu nen hian lo innei ta tehreng pawh ni ula keichuan inthil tih zozai hi ka theihnghilh thei tawh dawn lo. I bialnu hi mo ang tal pawh in ka en thei ngai dawn lo. Chuvangin chhuak la, an in ah han luhkhung law law rawh,' a lo ti aniang," a ti a. Ka lo thaw ve hluai mai.



Nau an tih tlak hmasak zawk țum paw'n nu Zari ber hi a lungawi lo hle tawh a. Chutiang a u Muana a ti deuh bawng bawng mai pawh chu ka dem lutuk bik lo.


"U Muana chu a chhuak a mi?"

"Chhuak nang! A bialnu kha a țhenin ka hria," thil tui tang lo deuh chanchin sawi ang maiin a rawn ti țeu hlar a. Sawi ve leh mai tur ka hriat loh em avangin ka ngawi ran ringawt.


"Nizan ah Au Muana nen chuan kan ti ti a, 'nau a pai tih min hrilh rual khan inruk mai ka duh tawh a. Amah zawk khan mualpho a hlau tlat sia. Nau pai tu zawk a ni bawk nen pai tlang turin ka nawr lui thei bik si lova. Ti tla leh phawt ila, pangngai zawkin palai lo tir ula, kan innei zawk dawn ania, tiin au Muana a kar ve tlat aniang. Au Muana pawh in anu rilru ang tho a pu ve tawh niin ka hria. Mualpho a hlauh vang ngawtin țum hnih ka fa a ti tla tawh a, nupui ah ka nei ngam ang em ka chiang ngam tawh lo. Tikhan, ka fa a ti tla tawh tho a. Inzawmna neihpui tawh lo ila ka duh tawk zawk' a ti ve țung tawh. Inrinni leh chawlhni te khan a bialnu phone call chu a chhang duh tawh lo aniang. Nizan zanlai ațang keimah zawk min lo call char char a. Ei loh sa nen ka chhang duh bik silo a," a lo ti leh duah a.

Pawi ti deuhin ka chek tlak tlak reng ringawt. Lucy-i chuan an inchhungkhur boruak te chu a lo sawi zui barh barh a. Ka ngaihtuahna ah erawh thil dang daih a lo lut thung.


U Muana'n a țhen hleh tak tak a nih chuan a bialnu chu a lainat awm reuh ngawt ang. Chutih rualin sual thuhmun ti rau rau ah pawh hmeichhiate dinhmun hi chau leh chhe zawk a ni bik zel. Mualpho a hlauh vanga u Muana bialnu in nau a ti tla țhin hi ka țan miah lo. Mahse, u Muana'n a kawp zui duh tawh siloh chuan kawppui tur a zawn leh na kawngah thui takin nghawng a nei tawh dawn a. Pasal a neih duh hial mipa dang a tawn hunah pawh a thil tihsual tawh te khan a umzui zel dawn a. A pasal tur kiangah inpuanna a neih hmasak te a țul tawh dawn si a. Nau a tih tlak hma khan a fa pai na pa rilru kha lamlet thut theih a nih zia te han chhut thui deuh se la ni tur.


Chhir zo hram👇

___He chapter hi ka ziah zawhna chu a rei ve leh tawh a. Mahse, blog ah luh a, rawn post chhuah kha ka hreh tlat a nih chu! Chhung lam ațang hian min pawt bet tlat tu a awm zel a.

Zodika'n 'dam tana thil ho tak kha ralpui phiar a a phiar a ngai tlat tawh a..' tia Lola-i chungchang a sawi ang dinhmun ah khan ka ding mek a.

'Huaisenna chu hma lam pan tura chakna neih hi a ni lo va, chakna nei lo chung pawha hma lam pan hram hram ngamna hi a ni zawk' tia Zodika sawi ang deuh khan chawlh hleh duh lovin ka rawn ti lui bek bek zel tih kha min hriatsak hram hram ula aw. 🌹


Next chapter ka lo post leh hunah a rukte a ka kalpui🤭 Give away result ka rawn puang ang. NIGHT CHANGES 11K S1 bu kha duhsak zawngte pek tur ka indah țha ve a. Ka thuziak min chhiar sak tu te bak lo han duhsak tur chuang ka nei si lo cheu a. Lo inring ula aw. 🧚‍♀️